თამარ სანაძე

ამერიკის პრეზიდენტმა, ჯო ბაიდენმა, საქართველოს პრეზიდენტ სალომე ზურაბიშვილს აგვისტოს ომის 16-წლისთავთან დაკავშირებით წერილი მოსწერა. ჯო ბაიდენის თქმით, შეერთებული შტატები მტკიცედ რჩება საქართველოს სუვერენიტეტისა და ტერიტორიული მთლიანობის მხარდამჭერი მის საერთაშორისოდ აღიარებულ საზღვრებში.

ზურაბიშვილისადმი გაგზავნილ წერილში ბაიდენი ასევე საუბრობს ჩვენს ქვეყანაში ბოლო დროს განვითარებული მოვლენების შესახებ და ამბობს, რომ იმედგაცრუებულია საქართველოს მთავრობის ანტიდემოკრატიული ქმედებებით.

„იმედგაცრუებული ვარ საქართველოს მთავრობის ანტიდემოკრატიული ქმედებებით, რომლის მაგალითსაც წარმოადგენს კრემლის სტილის „უცხოური აგენტების“ კანონი და საქართველოს მთავრობის ოფიციალური პირების ცრუ განცხადებები, რაც არ შეესაბამება ევროკავშირისა და ნატოს წევრობის ნორმებს. მიუხედავად ამ ნაბიჯებისა, ერთგულნი ვრჩებით საქართველოს მოსახლეობისა და მისი ევროატლანტიკური მისწრაფებების მიმართ“, _ ნათქვამია ბაიდენის წერილში.

საქართველოში ოფიციალური ვიზიტით იმყოფებიან სენატორი ჯინ შაჰინი და კონგრესმენი მაიკ ტერნერი, რომლებიც უკვე შეხვდნენ საქართველოს პრეზიდენტ სალომე ზურაბიშვილს, პრემიერ-მინისტრ ირაკლი კობახიძესა და რამდენიმე არასამთავრობო ორგანიზაციის წარმომადგენელს. ჯინ შაჰინის განცახდებით, მათ სურდათ ბიძინა ივანიშვილთან შეხვედრაც, თუმცა უარი მიიღეს.

პრემიერთან შეხვედრის დასრულების შემდეგ სენატორმა აღნიშნა, რომ საქართველოს პრემიერი, ირაკლი კობახიძე, არ ჩანს დაინტერესებული აშშ-სთან ურთიერთობების გაგრძელებით, კონგრესმენმა ტერნერმა კი განაცხადა, რომ პასუხისმგებლობა არ აუღია აშშ-საქართველოს შორის ურთიერთობების გაფუჭებაზე.

„იმედგაცრუებას იწვევდა პრემიერ-მინისტრის კომენტარი. პასუხისმგებლობა არ აუღია ამერიკასა და საქართველოს შორის ურთიერთობების გაფუჭებაზე. განცხადება არ გაუკეთებია რაიმე გეგმების შესახებ, რაც გააუმჯობესებდა საქართველოს და ამერიკას შორის ურთიერთობებს. არ მიმაჩნია, რომ მისი განცხადება ზუსტად ასახავს ამერიკის პოზიციას ან ამერიკასა და საქართველოს შორის ურთიერთობებს“, _ აღნიშნა კონგრესმენმა კობახიძის განცხადებაზე, რომ მთავრობა მზად არის, აშშ-სთან ურთიერთობების გადატვირთვისთვის.

საქართველოში ბოლო დღეებში განვითარებულ მოვლენებზე, ხელისუფლების ქმედებებსა და მოახლოებულ არჩევნებზე „ქრონიკა+“-თან ისაუბრა „გირჩი-მეტი თავისუფლების“ წევრმა, ცოტნე კობერიძემ:

_ ბატონო ცოტნე, ვიდრე შეხვედრებსა და საარჩევნო კამპანიაზე გკითხავთ, საინტერესო იქნება თქვენი აზრი ბაიდენის წერილზე, სადაც გამიჯნულია საქართველოს მთავრობა და ქართველი ხალხი. წერილში პირდაპირ არის ნათქვამი, რომ რუსული კანონის მიღება ეწინააღმდეგება ნატოსა და ევროკავშირის გზას, მთავრობის ოფიციალური პირები კი იტყუებიან, ცრუ განცხადებებს აკეთებენო. როგორია თქვენი შეფასება ამ გაცხადების შესახებ?

_ ჩვენ გვქონდა მოლოდინი, რომ ასეთი მწვავე განცხადებები იარსებებდა, რადგან ჩვენს ქვეყანას ძალიან მკაფიო გაფრთხილებები ჰქონდა დასავლელი პარტნიორებისგან, რომ რუსული კანონის მიღების შემთხვევაში ჩვენ დასავლურ, ევროპულ კურსს ავცდებოდით. როდესაც შენ გაქვს ყველანაირი მზაობა, რომ აგენტი დაუძახო შენი ქვეყნის პარტნიორსა და მის მიერ დაფინანსებულ საქმიანობას, ნიშნავს, რომ შენ იმ ქვეყანას პარტნიორად არ უყურებ, მეგობრად არ აღიქვამ.

ჩვენ ამ ყველაფერს ვამბობდით და არ დაგვიჯერეს. ახლა ამ განცხადებებს აკეთებს ამერიკის შეერთებული შტატები, ამ ყველაფერზე ღიად საუბრობენ დასავლელი და ევროპელი პარტნიორები, მაგრამ ეს არ გვიშველის. დიდი ხანი ვერ გაგრძელდება ისე, რომ ხალხი და ქვეყანა გამიჯნონ, დიდი ხანი ვერ მოიხსენებენ ცალ-ცალკე ქართულ საზოგადოებასა და საქართველოს მთავრობას. თუ გვინდა, ჩვენმა პარტნიორებმა არ თქვან, რომ ეს ხალხიც და ეს ქვეყანაც მიგვაჩნია სრულიად ერთნაირად და ერთიანად, რომ ისინი ერთად აცდნენ დასავლურ კურსსო, მაშინ არჩევანი გვაქვს გასაკეთებელი. როგორც ხე ნაყოფით შეიცნობა, ზუსტად იგივენაირად ხალხი შეიცნობა საკუთარი მთავრობით. თუკი ამ რეალობის შემდეგ „ქართული ოცნების“ მთავრობა ხელისუფლებაში დავტოვეთ, ეს ნიშნავს იმას, რომ ხელი მოვაწერეთ, მათ შორის, იმ რუსულ კანონს, რომელსაც ვეწინააღმდეგებოდით და რომელიც ამ მთავრობამ მიიღო. ამ კუთხით გვაქვს ძალიან დიდი შრომა გასაწევი, გვაქვს ძალიან ბევრი სამუშაო, რომ არჩევნებზე სწორი არჩევანი გაკეთდეს და ხელისუფლება შეიცვალოს.

_ კენიიდან გადმორგული ბაობაბები გახმა, ბრალდებულიც გვითხრეს, ვინ არის. მოკლედ, პასუხისმგებლობა დაეკისრა ოპოზიციას. ერთია, რომ არის ტრაგიკომიკური მოცემულობა, მაგრამ რას გვეუბნება ეს განცხადება?

_ ეს ჩემთვის მანიშნებელია ერთი პარანიოკული ადამიანის ახირების. ბიძინა ივანიშვილს ჰგონია, რომ ყველა მას ებრძვის. ზუსტად ეს არის პარანოია და სურს დააჯეროს ყველას, რომ ბაობაბის ხეები სხვამ გაახმო. ჩვენ ვსაუბრობთ ადამიანზე, რომელსაც ეს ხეები ჩამოაქვს კენიიდან, რომ მისი შარლატანური თუ რაც გინდათ ის ვუწუდოთ, გრძნობები აქვს, რაღაცების სჯერა, სამყაროში რაღაც ძალების და მათ შორის გლობალური ომის პარტიის არსებობისა და წარმოდგენები რომ აქვს მასონებზე, ასევე სჯერა ნახევრად რელიგიური და ნახევრად ცრუმორწმუნეობრივი გრძნობების და არ გამოვრიცხავ, ის ფიქრობდეს, რომ ცუდი ზრახვებისა და ფიქრების გამო გახმა ხეები, გათვალა ოპოზიციამ. მე არ ვიცი, ქართულ სიუჟეტებს თუ იმხელა გავლენა, აქვს, რომ მსოფლიოში რაღაც მოვლენებს წარმართავს ან ხელს უშლის, მაგრამ საბოლოო ჯამში მათ აქამდე უნდა გაეკეთებინათ ეს განცხადება, თუ პასუხისმგებლები იყვნენ ამ ხეებზე. უნდა ეთქვათ თავიდან, რომ ხმება, ასეთი რამ ხდება და როდესაც გამოდიხარ და გამხმარ ხეზე ამბობ, რატომ უნდა დაგიჯერო, სულ რომ „ქოცი“ ვიყო? რატომ არ უნდა მჯეროდეს იმ მოცემულობის, რომ მაგალითად ხე იმიტომ გახმა, რომ ვერ მოუარეს? რამდენიმე ხის გამო გვაგლოვონ და სერიოზული განცხადებები აკეთონ იმის ფონზე, რაც ქვეყანაში ხდება, ქუჩაში ადამიანებს ურტყამდნენ, სცემდნენ, აშანტაჟებდნენ, ურეკავდნენ და აგინეს ნახევარ საქართველოს და ახლა გამოდიან და სერიოზულ განცხადებებს აკეთებენ, ბაობაბები გაგვიხმესო. რა ბაობაბი?! ამ მოცემულობაში, ამ ვითარებაში, რომელშიც დღეს ჩვენი ქვეყანაა, ვის აინტერესებს ეს.

_ რაზეა მსგავსი პროპაგანდის გათვლა? სოციალურ ქსელში კომენტარებს თუ გადავხედავთ, ამას სერიოზულად არავინ აღიქვამს, მაგრამ „ქართული ოცნების“ დეპუტატები ამაზე მსჯელობენ სერიოზულად, რასთან გვაქვს საქმე?

_ „ქართული ოცნების“ სტილია, რომ ყველაფერი პროპაგანდისტული და ნეგატიური აწარმოონ. როგორც ვხედავთ, ისინი პოზიტიურ კამპანიას ვერ აწარმოებენ. ადამიანებს მთავარი მესიჯი აქვთ, რომ ჩვენ ყველაფერი გავაკეთეთ და ომსა და უბედურებას აგარიდეთო. მათ სხვა არაფერი აქვთ ნათქვამი. ერთი დადებითი, პოზიტიური წინადადებაც არ უთქვამთ. ერთი დაპირებაც ვერ გასცეს. ოფისი გახსნეს რამდენიმე ათეულ მილიონიანი და დაიწყეს კამპანია მუქარებით და ანგარიშსწორებების ანონსით. ერთი პოზიტიური ამბავი არ უთქვამთ, არც ერთი დაპირება არ წამოსცდენიათ. ძირითადად ილანძღებოდნენ. ხეების საკითხიც სხვისი ლანძღვისა და ნეგატივის ერთი პატარა მიმართულების ხაზია, რომ აგერ ბაობაბებსაც კი ახმობს ოპოზიცია. იმ მაღალჩინოსნებმაც, რომლებიც ამ ხეებზე აკეთებენ განცხადებებს, ზუსტად იციან, რომ ბიძინა ივანიშვილისთვის მათი ფასი ბაობაბზე გცილებით ნაკლებია და თუ ამ ფაქტზე არ ილაპარაკებს, ვერც პარლამენტში მოხვდებიან და პოლიტიკურ სპექტრსაც ჩამოაშორებენ. ამიტომ მათი ფასი არაფერი არ არის, თუ ბიძინა ივანიშვილს არ აჰყვებიან. სწორედ ამიტომ აკეთებენ ამ განცხადებებს. ამგვარი ფაქტების ასეთი პროპაგანდა არ ვიცი, „ოცნების“ ამომრჩეველზე როგორ იმოქმედებს, მაგრამ მათი ამომრჩეველი ისეთია, ოღონდ ოპოზიციაზე ცუდი ალაპარაკე. ბაობაბის ამბავს, დარწმუნებული ვარ, არც აღიქვამენ სერიოზულად, მაგრამ მოახდენენ ციტირებას და გაზეპირებულად ილაპარაკებენ ამაზე.

_ ამერიკელი კონგრესმენი მაიკ ტერნერი საქართველოში იმყოფება, ის სენატორ შაჰინთან ერთად შეხვდა პრეზიდენტს, დღეს უკვე გაიმართა შეხვედრა პრემიერთან. კონგრესმენმა განაცხადა, რომ კობახიძეს პასუხისმგებლობა არ აუღია აშშ-საქართველოს შორის ურთიერთობების გაფუჭებაზე. რას ფიქრობთ ამ განცხადებაზე და როგორ აისახება ამგვარი განცხადებები „ოცნების“ ამომრჩეველზე და ამომრჩეველთა იმ ნაწილზე, ვისაც ჯერ გადაწყვეტილება არ მიუღია, ვის მისცეს ხმა?

_ საინტერესოა, ამომრჩევლის იმ ნაწილს, ვისაც გადაწყვეტილება არ მიუღია და პროდასავლური სურვილები და ხედვები აქვს, ამ ვითარებამ, თუნდაც კონგრესმენების ვიზიტმა და მათმა განცხადებებმა უნდა მიახვედროს, რომ აქ ოპოზიციის ან ვინმეს ინტერესები და ხუშტურები არ არსებობს. პირდაპირ ის ხალხი რომ გეუბნება, ვინც წარმოადგენს დასავლეთს, ამერიკის შეერთებულ შტატებს, რომ კობახიძეს პასუხისმგებლობა არ აუღია აშშ-საქართველოს შორის ურთიერთობების გაფუჭებაზე, გეუბნება, რომ პრემიერი აშშ-სთან ურთიერთობის გაგრძელებით დაინტერესებული არ არის, უკვე გადაუწყვეტელმა ამომრჩეველმა მყარად უნდა მიიღოს გადაწყვეტილება, რა არჩევანი უნდა გააკეთოს. რაც შეეხება „ქართული ოცნების“ ამომრჩეველს, ვფიქრობ, რომ მათ ხელისუფლების მსგავსად უხარიათ თუ დასავლეთთან, ჩვენს პარტნიორებთან ურთიერთობა დაგვეძაბება. თუ ახლა „ქართული ოცნების“ ამომრჩეველი ხარ, ამ კუთხით დიდი პოტენციალი არ გაქვს, რომ რომელიმე დასავლელი პარტნიორის, თუნდაც კონგრესმენისა და სენატორის ან ამერიკის პრეზიდენტის განცხადებამ საღ აზრზე მოგიყვანოს.

_ ამ მხრივ კიდევ ერთი საგულისხმო დეტალია ის, რომ „ქართულ ოცნებას“ აქვს იმედი, თუ ტრამპი გაიმარჯვებს, დამოკიდებულებები საქართველოს მიმართ შეიცვლება, არადა, როგორც შაჰინის განცხადებაში მოვისმინეთ, პოლიტიკა არ შეიცვლება, მიუხედავად იმისა, დემოკრატი იქნება პრეზიდენტი თუ რესპუბლიკელი. რატომ აიმედებს თავს „ოცნება“ ამ საკითხის მუდმივი ტირაჟირებით?

_ ამერიკაში არჩევნებია და უნდათ, რომ ჩვენი საზოგადოება მაქსიმალურად გაწურონ და დაანახვონ, რომ აი, ჩვენ ამერიკასთან კი არ გვაქვს პრობლემა, ჩვენ გვაქვს პრობლემა კონკრეტულ პარტიასთან. ტრამპის პარტიიდანაა ის ხალხი, რომლებიც იღებენ მეგობრობის აქტს და ორპარტიულია საქართველოსთან მიმართებაში ყველა ნაბიჯი და განცხადება, რაც მოდის ამერიკიდან. მათი შიდა პოლიტიკის ამბავია. არიან ხოლმე პრეზიდენტები, რომლებიც საქართველოსთან მიმართებით უფრო ახლო ურთიერთობებს იჭერენ და ეს იყო რესპუბლიკელი პრეზიდენტი და არიან ხოლმე პრეზიდენტები, რომლებიც ისე აქტიურები არ არიან. ამიტომ, ჯამურად, როდესაც ამერიკის შეერთებული შტატები გეტყვის, რომ შენ ჩემთან ურთიერთობა გეძაბება, არ არსებობს რომელიმე პრეზიდენტი ან რომელიმე პარტია, რომელიც ამას ემიჯნება. ეს რის ამერიკის პოზიცია. მაგალითად, ის, რომ ჩვენი სტრატეგიული პარტნიორია ამერიკა, ამის აღიარება უწევს საქართველოში უკლებლივ ყველა პარტიას, ვერავინ უგულებელყოფს ამას და აშშ-ში პრეზიდენტად ვინც არ უნდა მოვიდეს, „ოცნების“ სასიკეთოდ არაფერი შეიცვლება. ჩვენ უნდა გვესმოდეს, რომ ამერიკისთვის მზე საქართველოდან არ ამოდის და არ ნატრობენ, რომ ვაიმე, ნეტა ეს ქვეყანა აზრზე მოვიდესო. ჩვენ მოგვცემენ ერთხელ შანსს და თუ ამ შანსს არ იყენებ, არ იყენებ და მორჩა, იმიტომ, რომ იმ ქვეყანას უამრავი სხვა გამოწვევა აქვს, სხვა საქმეები აქვს და ჩვენ არავინ გადაგვყვება. არ ვართ ისეთი სასიცოცხლოდ მნიშვნელოვანი, რომ ყველა ჩვენ გველოდებოდეს, აბა, საქართველო რას გადაწყვეტს. ჩვენ მკაფიოდ გვითხრეს, რომ რუსული კანონი თუ გექნებათ, დაშორდებით დასავლეთს, გვითხრეს, რომ ამ კანონის არსებობა ნიშნავს რუსულ ორბიტაზე ყოფნას. რომ ამზადებენ თითქოს ფსონს, აი, ტრამპი მოდის და დამოკიდებულება შეიცვლება ჩვენ მიმართ, „ოცნებამ“ არ იცის, რომ ტრამპს ჩინეთი არ უყვარს? მე არ მგონია, რომ ჩინეთთან მეგობრულ და პარტნიორულ რეჟიმში მყოფ ქვეყანაზე ტრამპს მზე და მთვარე ამოუვიდეს.

_ თელავში „დემოკრატიის ფესტივალი“ ჩატარდა _ „ოცნება“ ამაში არჩევნებში „უცხოეთის ჩარევას“ ხედავს. პაპუაშვილმა ცოტა ხნის წინ გააცხადა, რომ „დემოკრატიის ფესტივალის“ აქტივობები, თავისი არსით, შეიძლება მივიჩნიოთ საარჩევნო პროცესში უცხოურ ჩარევად, რაც არსად იქნებოდა მისაღებიო. რას ნიშნავს ამგვარი განცხადება და რასთან გვაქვს საქმე?

_ არ მგონია, რომ „ქართული ოცნების“ პარტიას ამ ღონისძიებაში მონაწილეობა აკრძალული ჰქონდეს. მიიღოს მონაწილეობა და იქნება სრულად ნეიტრალური. რატომ უწესებს საკუთარ თავს ამ შეზღუდვას, გაუგებარია. ამ ფესტივალზე ყველა პარტიას ეძლევა შანსი, რომ ამომრჩეველს, საზოგადოებას გააცნოს საკუთარი ხედვები. ეს არის დემოკრატიის ნაწილი და დემოკრატიის გაძლიერება და დემოკრატიულ პროცესებში მონაწილეობა არის ყველას უფლება, მათ შორის, არასამთავრობო ორგანიზაციებისაც. აქ რა ხდება ცუდი? თავად „ოცნებასაც“ შეუძლია მიიღოს მონაწილეობა, მაგრამ თვითონ არის პარტია, რომელიც ემიჯნება ყველაფერს დემოკრტიულს და დასავლური ტიპის ინსტიტუციას. მათგან განცალკევებით არსებობს, აკეთებს იმგვარ განცხადებებს, რაც პაპუაშვილმა გააკეთა ახლახან და ემიჯნება მათ და ვისაც პარტნიორულ რეჟიმში ყოფნა გვსურს, იმათ რატომ გვიკრძალავს და რატომ გვემუქრებიან, არ მესმის.

_ კახა კალაძემ გააკეთა გნცხადება და აღნიშნა, რომ პირდაპირ, ღიად, უცხოეთიდან ხდება ოპოზიციური სპექტრის დაფინანსება. მან თქვა, რომ საგარეომ უნდა დაიბაროს იმ ქვეყნის ელჩი, საიდანაც თანხა  ირიცხება. ამ განცხადებაში, ანტიდასავლური რიტორიკა ძალიან კარგად ჩანს. როგორ ფიქრობთ, გაიგებენ თუ არა მსგავსი განცხადებებით „ოცნების“ ამომრჩევლები, რომ „ოცნებამ“ ზურგი აქცია დასავლეთს?

_ კახა კალაძის განცხადებას რაც შეეხება, ჩამოყალიბდეს ეს კაცი, დასავლეთის დაფინანსება ღია და პირდაპირია თუ დაფარულია და არ ჩანს? თუ საიდან, რომელი ქვეყნიდან არის დაფინანსება, უკვე იციან და თუ ეს ღიაა, მაშინ კანონს რისთვის იღებენ. ეს ორაზროვანი განცხადებაა, სასაცილოა. რაც შეეხება მათ ამომრჩეველს, კიდევ ერთხელ გავიმეორებ, ადამიანმა, ამომრჩეველმა, რომელმაც ღიად დაინახა ამ თვეების განმავლობაში ქუჩაში ბავშვებს, ზრდასრულებს როგორ უსწორდებოდნენ, ურტყამდნენ და ეს არ აინტერებს, მე არ მჯერა არც მათი პროდასავლელობის და არც მათი ევროპისკენ სწრაფვის სურვილის. ისინი არიან „ქოცები“ და „ქოცობა“ არ იკურნება. მერე ალბათ ასეთი ხალხი გადაბარგდება იქ, სადაც ძალაუფლებას დაინახავს. მე მათი სწორი არჩევანისა და პროდასავლელობის არ მჯერა.

_ ექსპერტთა ნაწილი აცხადებს, რომ ხელისუფლებას ოპოზიციის რეგიონებში გამოჩენის ეშინია, ამის მიზეზი კი ისაა, რომ მმართველი გუნდი ახერხებს ტვინების გამორეცხვას ჯერჯერობით სპეკულაციური საარჩევნო კამპანიით, თქვენ როგორ ფიქრობთ, როგორია ამომრჩევლის განწყობები?

_ ცხადია, რეგიონებში ხელისუფლების პროპაგანდა ძალიან კარგად მუშაობს. თბილისში დავინახეთ ყველამ, სპორტულ ღონისძიებაზე ირაკლი კობახიძე რომ ავიდა სცენაზე, სტვენითა და შეძახილებით შეხვდა ხალხი და ჩამოაგდეს, ჩამოსვლა მოუწია მას დროზე ადრე სცენიდან. რეგიონებში კიდევ ასე არ არის. იმის ამო, რომ რეგიონში ხალხის დიდი ნაწილი უყურებს „პოს ტვ“-ს  „იმედს“, სერიალების ხათრით, მერე შიგადაშიგ ისმენს „ოცნების“ პროპაგანდას ამ არხებზე, ცხადია, მათი პროპაგანდის ნაწილი ხდება. ჩემი აზრით, „ქართულ ოცნებას“ რაღაც შანსი აქვს რეგიონებში, მაგრამ დედაქალაქსა და სრულ, ურბანულ ნაწილებში საქმე საშინლად აქვს. რეგიონებში არსებობს ოპოზიციური ამომრჩეველი, ხელისუფლების ამომრჩეველიც და რა და როგორ მოხდება, არჩევნებზე ვნახავთ. ცხადია, „ოცნების“ პროპაგანდა რეგიონებში მუშაობს.

_ სამი დიდი ოპოზიციური ცენტრია შექმნილი და უკვე საარჩევნოდ მიმდინარეობს შეხვედრები მოსახლეობასთან. როგორ ფიქრობთ, საკმარისია ის ქმედებები, რასაც ახლა, ამ მოცემულობაში ოპოზიცია აკეთებს?

_ როდესაც არჩევნებზე მიდგება საქმე, ყველას აქვს ძალიან დიდი მოლოდინები. ოპოზიციამ გაიარა აქციები ქუჩაში, ზეწოლა, დაჭერები, ამ ყველაფრის ფონზე ფინანსური შევიწროებაც და რაც ხდება და ოპოზიცია რასაც აკეთებს წინასაარჩევნო პროცესში არ არის მარტივი და პატარა ამბავი. არის რამდენიმე ტელევიზია, რითაც კომუნიკაცია ხდება და ვხედავთ, რომ რეგიონებში არის გასვლები და ძალიან აქტიურად ხვდებიან მოსახლეობას. დასავლელ პარტნიორებთან მიმართებითაც ჩვენ დავანახეთ, რომ გვაქვს იმის საშუალება, ძალიან დიდი სურვილი, რეალურად ეს ქვეყანა დაუბრუნდეს დასავლურ კურსს. ჩვენ ვახერხებთ ძალიან კარგად და წარმატებით დიალოგს პარტნიორებთან. სხვა კუთხით კიდევ რა უნდა ქნას ოპოზიციამ, არ ვიცი. ან ენდობი მათ, ან არ ენდობი. რაიმე მკაფიო ფორმულა რომ იყოს ამ ხნის განმავლობაში, გაკეთდება ყველაფერი, მაგრამ ის მკაფიო ფორმულა არ არსებობს. მკაფიოდ და ცალსახად ეს არჩევნები არის მოსაგები.

ახლა რომ ოპოზიცია სულაც დაჯდეს სახლში და არაფერი აკეთოს, ვინც გირტყამს, გაგინებს და ძალადობს, ის არის სახლში გასაშვები უნდა გაუშვა ხელისუფლებიდან. არ მგონია, რომ რაღაც იყოს ოპოზიციის ვერ ან არგაკეთების ბრალი. თუ „ქართულმა ოცნებამ“ გაიმარჯვა, ეს ნიშნავს იმას, რომ ამ ქვეყანაში ხალხს „ქოცობა“ უნდა, მორჩა და დამთავრდა. ხმების დაკრგვის ნაწილში, მას შემდეგ, რაც „ევროპული საქართველო“ ჩაეხსნა პოლიტიკურ თამაშს და არჩევნებს, ეს პარტია დაიშალა. რასაც ვუყურებთ, „გირჩი“ და რამდენიმე პატარა პარტია დარჩა, რომლის გადალახვა-არგადალახვამაც შეიძლება რაღაც შეცვალოს. გახარიას ამბავი არის საინტერესო, ამიტომ თუ გახარიას ხმების დაკარგვის შიშმა იარსება, ამან შეიძლება არჩევანს ხელი შეუშალოს თუ მან მოახერხა ვინმესთან დაბანაკება ან სხვა კუთხით გამსხვილება, ეს იქნება სწორი ნაბიჯი და კარგად გამოჩნდება ოპოზიციაში, ვინ რა უნდა გააკეთოს, რომ ხმები არ დაიკარგოს.

რაც შეეხება განწყობებს საზოგადოებაში, გასაგებია, რომ ახალგაზრდების ძალიან დიდ ნაწილს სურს ცვლილებები, მაგრამ არის მნიშვნელოვანი ნაწილი, რომელსაც პოლიტიკა საერთოდ არ აინტერესებს. ასეთი კატეგორია ცხოვრების სხვა ჟანრით არის დაკავებულები. არიან ახალგაზრდები, რომლებიც აქტიურად არიან ჩართულნი და ძალიან აინტერესებთ ქვეყანაში მიმდინარე პროცესები. მათი დამოკიდებულება და განწყობა არის, ის, რომ აუცილებელია ქვეყანაში ცვლილებები, ხოლო საზოგადოების იმ ნაწილს, რომელზეც ვისაუბრეთ და რომელთაც არ აინტერესებთ პოლიტიკა და ამ კუთხით მიმდინარე მოვლენები, ძალიან რთული მათთან ურთიერთობა, მათ არ მოსწონთ არც ერთი პერსონაჟი, რომელიც პოლიტიკურ ველზე ჩანს. ვცდილობ ხოლმე, ასეთ ხალხს, რომელსაც გადაწყვეტილება მიღებული არ აქვს, იცის, რომ საჭიროა ცვლილებები, მაგრამ არ იცის, რა უნდა შეიცვალოს და როგორ, რამენაირად ვესაუბრო და არჩევნებზე წასვლის აუცილებლობა დავანახვო, არა იმიტომ, რომ სასწაული ხალხია ოპოზიციაში, არამედ იმიტომ, რომ აუცილებელია ასეთ ამომრჩევლამდე არჩევნებში მონაწილეობის მნიშვნელობა მივიდეს.

მარტო ახალგაზრდა არჩევნებს ვერ მოგვაგებინებს, როგორი სურვილით და განწყობითაც არ უნდა იყოს. ძალიან მნიშვნელოვანია 30-დან 50- წლამდე ხალხის ჩართულობა. მათ არჩევანი უნდა გააკეთონ, წასულს ჩაეჭიდებიან თუ ახალგაზრდებს დაეხმარებიან, მომავალს დაეხმრებიან, რომ დავუბრუნდეთ ევროპულ გზას და მიგვიღონ მათ ოჯახში.

_ არჩევნებამდე სულ ცოტაა დარჩენილი და პოლიტიკური სუბიექტების უმეტესობა ამ პოლიტიკურ ბრძოლაში თავიანთი სტრატეგიითა და ტაქტიკით მოქმედებენ. თქვენი აზრით,  როგორი საარჩევნო სტრატეგიითა და ტაქტიკით მოქმედებს ხელისუფლება?

_ მართლა წარმოუდგენელია ჩემთვის ის მოცემულობა, რომ როგორ შეიძლება ერთი პოზიტიური მესიჯი არ ჰქონდეს, ამ ვითარებაში „ოცნების“ მოგება და ისევ ხელისუფლებაში მოსვლა ჩემთვის წარმოუდგენელია. ასეთი რამ „ოცნებას“ არც ერთ არჩევნებზე არ დამართია. ეს ძალიან უცნაურია ჩემთვის. გარდა ამისა, ჯერ საეჭვოდ ჩუმად და პასიურად არიან. ბოლო ორი თვე ან თვე-ნახევარი რომ დარჩება არჩევნებამდე, „ოცნება“ გახდება აქტიური და მობილიზაციას გაუწევენ თავიანთ კოორდინატორებს, სკოლის მასწავლებლებს. განახლდება ქუჩაში დახვედრები, დაშინებები, მუქარები, ჩართავენ ძველბიჭობას, მაგრამ ეს მოსალოდნელია. თუმცა ჯერჯერობით არც ერთი დაპირება არ მოგვისმენია, არც ერთი პოზიტიური გზავნილი არ გაჟღერებულა მათი მხრიდან, რაც ჩვენთვის, ოპოზიციისთვის, ცუდი ნამდვილად არ არის. ამ კუთხით უცნაური გარემოა. მართალია, „ქართული ოცნების“ ახლანდელი მოცემულობა ოპოზიციის წისქვილზე ასხამს წყალს, მაგრამ შტორმის წინ რომ სიჩუმეა, ასე არიან, საეჭვოდ მიჩუმებულები არიან, დაპირებებისა და წინასაარჩევნოდ ამომრჩეველთან ურთიერთობის მხრივ ან გადაბარებისთვის ემზადებიან, ან უკვე ისე აქვთ მობილიზებული და დათვლილი ხმები, რომ ზუსტად იციან, გარანტირებული აქვთ მოგება. არ ვიცი, ეს რატომ ხდება, მაგრამ, კიდევ ერთხელ ვიტყვი: ის, რომ მათ დაპირებაც კი არ აქვთ, ცუდი ნამდვილად არ არის ჩვენთვის, თუმცა ასე ჩუმად რატომ არიან, ეს ჩემთვის ძალიან უცნაურია.