ირინა მაკარიძე

რას შეცვლის კეზერაშვილთან დაკავშირებული სკანდალი ქართულ პოლიტიკურ სპექტრში და რამდენად შეძლებს ოპოზიცია, სუფთად გამოვიდეს ამ სკანდალიდან? რატომ არ სურს „ოცნებას“ მართლმსაჯულების საგამოძიებო კომისიის შექმნა და კიდევ რა სიურპრიზებს უნდა ველოდოთ ივანიშვილის ხელისუფლებისგან? _ ამ და სხვა საკითხების შესახებ „ქრონიკა+“-ს ესაუბრება „სტრატეგია აღმაშენებლის“ თავმჯდომარე, გიორგი ვაშაძე:

_ ამდენი ვნებათაღელვის შემდეგ საზოგადოებაში მკაფიოდ არის ჩამოყალიბებული აზრი, რომ ამ თაღლითური სქემის მიღმა ხელისუფლება დგას. მგონი, არავის წარმოუდგენია, რომ ამ მოცულობით თანხების ტრანზაქციები ხორციელდებოდა საქართველოში და ხელისუფლებამ არაფერი იცოდა. არავის წარმოუდგენია ამ თაღლითური სქემების არსებობა „ქართული ოცნების“ მონაწილეობის გარეშე. BBჩ-ს სიუჟეტამდეც სხვადასხვა მედიაში იყო გაჟღერებული ქოლცენტრების არსებობის შესახებ და საგამოძიებო სიუჟეტებიდან ბევრი კონკრეტული ფაქტი გახმაურდა. საქართველოში იმდენად მასობრივი იყო ამ ქოლცენტრების არსებობა, რომ ამის შესახებ უკვე ყველამ იცოდა.
კარგია, რომ ეს საგამოძიებო სიუჟეტი გამოვიდა ევროპულ მედიაში. ცხადია, ევროპელ გამომძიებლებს ხელიდან ვერავინ დაუძვრება. თუმცა ისიც ცხადია, რომ თაღლითური სქემის ერთ-ერთი ყველზე დიდი ჰაბი საქართველოში იყო და ეს სკანდალი, პირველ რიგში, დამაზიანებელია ჩვენი ქვეყნის იმიჯისთვის. როგორც კი დემოკრატიული ძალები მოვლენ საქართველოს ხელისუფლებაში, ერთ-ერთი თემა, რომელიც უნდა გამოიძიონ, არის ის, თუ ვინ აფარებდა ხელს ქოლცენტრებს საქართველოში.
_ რაც შეეხება ოპოზიციას, რომელიც გარკვეულწილად დაკავშირებულია დავით კეზერაშვილთან, რამდენად შეძლებს იგი ამ საქმიდან დაუზიანებლად გამოსვლას?
_ არ მგონია, რომ ამ საქმიდან ოპოზიცია დაზიანდეს. საბოლოო ჯამში, ხელისუფლების პასუხისმგებლობაა, თუ ასეთი დანაშაული და თაღლითური სქემები არსებობდა საქართველოს მასშტაბით. თუ კი არა, ეს უკვე დადასტურებული ფაქტია, რომ ასეთი ცენტრები არსებობდა. „ქართულ ოცნებას“ უნდა, რომ ეს სკანდალი ოპოზიციის დასაზიანებლად გამოიყენოს, მაგრამ ბუმერანგივით უკან დაუბრუნდება. არავინ დაიჯერებს, რომ „ქართული ოცნება“, ბიძინა ივანიშვილი და სამართალდამცველ უწყებაში გამწესებული მთელი მისი პერსონალი ვინმეს ამ ოდენობის ფულის შოვნის საშუალებას აძლევს, ოპოზიციურ მედიებსა და ოპოზიციურ პარტიებს აფინანსებინებს და ასულდგმულებს ამ თანხით. წარმოუდგენელია ასეთი რამ, მაშინ როდესაც ხელისუფლება ებრძვის ყველაფერს ოპოზიციურსა და განსხვავებულს, ცდილობს, ჩაკლას და ამ ფონზე ცხადია, ამ სქემით ოპოზიციასა და კრიტიკულ მედიას სასათბურე პირობებს არ შეუქმნიდა.
BBჩ-ს საგამოძიებო სიუჟეტი ეყრდნობა საქართველოს მასალებს, ცხადია, სუსი მათ საკუთარი თავის მამხილებელ მასალებს არ მიაწვდიდა. BBჩ-მ რაც მიიღო, ის მასალები გამოაქვეყნა, მაგრამ ვფიქრობ, ეს ისეთი სტარტია, რომ ამას ბევრი საინტერესო ფაქტის გახსნა მოჰყვება. ვინც გასვრილია თაღლითობაში, ყველას მოუწევს პასუხისგება.
_ დავით კეზერაშვილი თავად საუბრობდა მის მიერ ოპოზიციის „დახმარებაზე“. როგორ ფიქრობთ, ეს ფაქტი ოპოზიციას არ აზიანებს? რა უნდა გააკეთონ ამ პარტიებმა, რომ თავიანთი ავტორიტეტი გადაარჩინონ?
_ ნუ მანერვიულებთ ყველა იმ პარტიაზე, ვისთანაც კეზერაშვილს აქვს კავშირი, ეს იმ პარტიებმა ინერვიულონ. მე ზუსტად ვიცი, რომ „სტრატეგია აღმაშენებელს“ ვერაფრით დააზიანებს ეს ფაქტი, შემიძლია ამის გარანტია მოგცეთ. დანარჩენი, სხვებმა გადაწყვიტონ, მიღებულ ზიანს როგორ დააკომპენსირებენ. რა თქმა უნდა, „ქართული ოცნება“ შეეცდება, რომ მთელი ოპოზიცია გასვაროს ამ საკითხებში, მაგრამ ჩვენ ვერ გავისვრებით იმაში, რაშიც მონაწილეობა არ მიგვიღია.
_ თუმცა თქვენი მისამართითაც იყო „შეთქმულების თეორიები“, მაგალითად, რამდენიმე თვის წინათ ერთ-ერთმა ოპოზიციონერმა (აკაკი ბობოხიძე) განაცხადა, რომ კეზერაშვილს ჩაუვარდა „პროექტი მელია“ და ახლა ცდილობს გააკეთოს „პროექტი ვაშაძე“, თითქოს კეზერაშვილი ფსონს დებდა თქვენ მიერ ოპოზიციის გაერთიანებაზე. გარდა ამისა, ელენე ხოშტარიამ თავად დაადასტურა კეზერაშვილთან თანამშრომლობა. რას იტყვით ამაზე?
_ ჩემზე ბევრი ცრუ ბრალდება მომისმენია, მაგრამ ყველა ამ ცრუ ბრალდებას საბოლოოდ საქმით ვცემ პასუხს. „სტრატეგია აღმაშენებელი“, ჩემი აზრით, ოპოზიციური ფლანგის ერთ-ერთი ფორპოსტი პარტიაა. ვფიქრობ, ყოველთვის თანმიმდევრულები ვართ და ყველა ბრძოლაში წინა ხაზზე ვდგავართ, იქნება ეს პარლამენტში თუ პარლამენტს გარეთ. რაც შეეხება სხვადასხვა მონაჩმახს, რაც გვესმის მტკიცებულებების გარეშე, ესენი არიან ჩვეულებრივი ჩასაფრებული ადამიანები, რომლებმაც, რატომღაც, გადაწყვიტეს, რომ თუ ოპოზიციისთვის ტალახისმსროლელები და ოპოზიციის ოპოზიციონერები იქნებიან, ამით რამე მიემატებათ. დამერწმუნეთ, არაფერი მიემატებათ, ამიტომ ჩვენ სრულ იგნორირებას ვუკეთებთ ასეთ ბრალდებებს და საქმით ვცემთ მათ პასუხს. ჩვენი მიზანი არის აბსოლუტურად სუფთა, ჩვენი მიზანი არის, რუსეთის მიერ მართული რეჟიმისგან გავათავისუფლოთ საქართველო, მივიღოთ ევროკავშირის კანდიდატი ქვეყნის სტატუსი და არა მხოლოდ ეს. ჩვენ ვხედავთ ჩვენს თავს სამომავლოდ დემოკრატიულ ძალებში, რომელიც მოვა ხელისუფლებაში, ამაშიც დარწმუნებულები ვართ, რადგან დრომ აჩვენა, რომ ჩვენს ნაბიჯებს, საბოლოო ჯამში, საზოგადოებაში სწორი შეფასება აქვს.
რაც შეეხება ელენე ხოშტარიას და მის სიტყვებზე გამოკიდებას, მან თქვა, რომ უკრაინელი დევნილების დასახმარებლად თანამშრომლობდა კეზერაშვილთან (6 თვეა, კეზერაშვილის ფულით ვინახავთ უკრაინელებსო, _ თქვა ხოშტარიამ). აქ მე პრობლემურს ვერაფერს ვხედავ. ძალიან კარგია, რომ სიმართლეს ამბობს ადამიანი.
_ რა მოლოდინი გაქვთ საგამოძიებო კომისიის მიმართ და რა გაირკვა ჯერ მხოლოდ კომისიის შექმნასთან დაკავშირებული პროცესით?
_ ამ კომისიის შექმნასთან დაკავშირებული ვითარებით კიდევ ერთხელ დადასტურდა, რომ ნამდვილად არსებობს კლანი. ამ კლანს თავიდან ბოლომდე გადაფარებული არის რეჟიმი, რომლის მსახურიცაა ეს კლანი. კლანი იცავს „ქართული ოცნების“ ინტერესებს, როგორც პოლიტიკური, ასევე ფინანსურ-ბიზნეს თვალსაზრისით. საუბარია დიდძალ თანხაზე, რომელსაც უკანონოდ, სასამართლოს გადაწყვეტილებით ითვისებს „ქართული ოცნება“. ასევე კლანი ფარავს კორუფციულ სქემებს, საქმეებს არ იძიებს, ისეთ გადაწყვეტილებებს იღებს, რომლებიც ამ კორუმპირებული ჯგუფის ინტერესებშია. „ქართული ოცნება“ ყველანაირად ეწინააღმდეგება საგამოძიებო კომისიის შექმნას, რადგან მას ძალიან ეშინია, რომ საზოგადოებამ პირდაპირ ეთერში მოისმინოს ყველა ის მტკიცებულება, რომელიც მართალია, საჯაროდაც არის ხელმისაწვდომი, _ თქვენს თუ სხვა მედიასაშუალებაში უამრავი ფაქტია წარმოჩენილი საქართველოში ამ სასამართლო კლანის მოქმედების. ნათესავი აღარ დატოვეს, ვინც მოსამართლედ არ გაამწესეს, ლამის იურიდიულ დიპლომებს უკეთებენ ერთ-ორ საათში იმისთვის, რომ კლანი გააძლიერონ. ვაკანსიები არის, პროფესიონალ იურისტებსა და გამოცდილ სპეციალისტებს არ აქვთ შესაძლებლობა, სასამართლოში იმუშაონ. ერთადერთი ნიშანი, რითაც ინიშნებიან მოსამართლეებად, კლანის ერთგულებაა. სანქციები, რომელიც დააწესა ამერიკის შეერთებულმა შტატებმა, თავისთავად უკვე ცალსახა დადასტურებაა იმისა, რომ საქართველოში იმ დონეზეა სასამართლო კლანი ფესვებგადგმული, რომ ჩვენს პარტნიორ ქვეყანას მოუწია ასეთი მძიმე გადაწყვეტილების მიღება. ვიცი, რომ დიდხანს ფიქრობდნენ ამაზე და არ იყვნენ მოწადინებულები, რომ სანქცირების გადაწყვეტილება მიეღოთ.
საგამოძიებიო კომისიის შექმნასთან დაკავშირებით „ქართული ოცნების“ ქმედება არის ზუსტად კლანის არსებობის მტკიცებულება. ამ 2 კვირის განმავლობაში აშშ-დან მოსამართლეების სანქცირების მტკიცებულებებს ითხოვდნენ, არადა, ამის ზღვა მასალა არსებობს. საგამოძიებო კომისიის მიზანია, სწორედ ამ ზღვა მასალის შეკრება, რომ გაკეთდეს დასკვნები. აქ საუბარი არ არის მხოლოდ 4 მოსამართლეზე, საუბარია მთელ იმ კლანზე, რომელიც სასამართლოშია. დღეს, შეიძლება ითქვას, რომ სასამართლოს უმრავლესობას წარმოადგენენ სწორედ ამ კლანთან დაკავშირებული ადამიანები. ამ ყველაფრის საჯაროდ გამოტანის შესაძლებლობაა საგამოძიებო კომისიის შექმნა, რაც, ვხედავთ, რომ ასე ძალიან არ უნდა „ქართულ ოცნებას“. რა თქმა უნდა, ის კომისიის მუშაობაშიც შეეცდება, მაქსიმალურად აჭრას ეს საკითხი.
_ ირაკლი კობახიძემ ისრები თქვენი მიმართულებით უკვე მომართა და აღნიშნა, რომ სასამართლოში კლანი არსებობდა 2012 წლამდე, ეს იყო სააკაშვილ-ადეიშვილის კლანი და ცინიკურია, რომ საგამოძიებო კომისიის შექმნის მოთხოვნას ხელს აწერს ადეიშვილის მოადგილე ვაშაძე. ამაზე რას იტყვით? ხომ არ იქნება მცდელობა, რომ საგამოძიებო კომისიაში სწორედ ამ მიმართულებით ეცადონ პროცესების წარმართვას?
_ „ადეიშვილის მოადგილე ვაშაძემ“ იუსტიციის სახლები დაუტოვა ამ უბედურებს ამ ქვეყანაში, რომლის გაპარტახებასაც ცდილობენ და მაგათ რა გააკეთეს ამ 10 წლის განმავლობაში? იმ კლანის წევრების სასამართლოდან გაშვებას ვითხოვთ ჩვენ, რომლებიც, სულ არ მაინტერესებს, 2012 წლამდე იყვნენ თუ 2012-ის შემდეგ. აქაც „გაჭედილები“ არიან. 2012 წლამდე პერიოდის შესწავლას თუ მოითხოვენ, ისევ მურუსიძეს, ჩინჩალაძეს, ცერცვაძესა და შენგელიას მიადგებიან. ჩვენც სწორედ ამას ვამბობთ, რომ ეს ხალხი უნდა წავიდეს სასამართლოდან. მე რა უნდა დამაბრალონ? მე სასამართლოსთან შეხება საერთოდ არ მქონია 2012 წლამდე. ერთი, რასაც ვცდილობდი, საჯარო ელექტრონულ მმართველობაზე ვმუშაობდი და მინდოდა, სასამართლოში ნორმალური პროგრამული უზრუნველყოფა ყოფილიყო, რომ იმას მაინც გაესწორებინა ეგ უკუღმართი სისტემა. თუ რამე შეხება მქონდა მართლმსაჯულებასთან, ამ კუთხით მქონდა. ოღონდ ჩემი ინიციატივები საკმაოდ იბლოკებოდა, შემიძლია ესეც ვთქვა. პროგრამულ უზრუნველყოფას ვხედავდი, როგორც საშუალებას, რომ როგორღაც გამესწორებინა ის გაუბედურებული სისტემა, რაც ამ ქვეყანაში არსებობდა _ მხოლოდ სასამართლოში არა, პროკურატურასა თუ სხვა სისტემაში. ჩემი კომპეტენცია ეს იყო და მე არ მქონდა შესაძლებლობა, როგორც საჯარო მოხელეს, სხვაგან ვყოფილიყავი. პოლიტიკაში იმიტომ მოვედი 2012 წელს, რომ რაც არ მომწონდა, ის გამესწორებინა. აბსურდულია ამ საკითხში ჩემი რამეში დადანაშაულება. თვითონ არიან კლანის გამაძლიერებლები, მასთან ფინანსურად და პოლიტიკურად დაკავშირებულები. თავიანთ მსახურად აქციეს ეს კლანი და თავის პოლიტიკურ ინსტრუმენტად იყენებენ.
_ რაც შეეხება სანქცირების პროცესს, როდესაც დასანქცირდა 4 მოსამართლე, როგორ ფიქრობთ, ეს პროცესი გაგრძელდება? სანქცირებულთა შორის მოხვდებიან თუ არა პოლიტიკოსები?
_ დღეს დასავლეთმა „ქართული ოცნება“ დაასანქცირა. ახლა დასანქცირებულ „ქართულ ოცნებას“ ჩვენ უნდა გამოვუტანოთ საბოლოო განაჩენი და უნდა ჩამოვაშოროთ მმართველობას. როგორც „კომუნისტურმა პარტიამ“ 9 აპრილის შემდეგ დაკარგა მორალური საფუძველი, რომ საქართველოს ხელისუფლების სათავეში ყოფილიყო და ჯერ კიდევ საბჭოთა ხელისუფლების დროს ეროვნულმა ძალამ გაიმარჯვა არჩევნებში, ზუსტად იგივე ვითარებაა ახლა საქართველოში. ნებისმიერ შემდგომ არჩევნებში დამანგრეველ მარცხს იწვნევს „ქართული ოცნება“.
მეორე საკითხია, კიდევ იქნება თუ არა სანქციები, ეს ჩვენზეც არის დამოკიდებული. როგორც კი 7-8 მარტს ხალხის ძალა დაინახა დასავლეთმა, მყისიერად იყო პასუხი. მანამდე რატომ არ იყო? იმიტომ, რომ ამ ძალას ვერ ხედავდა. 24 თებერვალს, როდესაც უკრაინის მხარდასაჭერი აქცია ჩავატარეთ, ინგლისურად და უკრაინულად შემთხვევით არ გვქონდა მიმართვები. მათ დაინახეს, რომ საქართველოში არსებობს დემოკრატიული საზოგადოება, რომელიც არ დაუშვებს ამ რეჟიმის განმტკიცებას, არ დაუშვებს არაფერს რუსულს. შემდეგ იყო 7-8 მარტი, მანამდე პარლამენტში მთელი ამბავი გვქონდა რუსული კანონის წინააღმდეგ. მოსამართლეების სანქცირება არის საზოგადოების მხარდაჭერა. აშშ გვეუბნება, _ ხალხო, ჩვენ თქვენ გვერდით ვართ, საქართველოს არ დავაჩაგვრინებთ რუსეთს, რუსეთთან დაკავშირებულ პოლიტიკურ ძალებს. იქნება შემდგომი სანქციებიც, მაგრამ ამ სანქციებზე ნუ ჩამოვკიდებთ საკითხს. ჩვენ უნდა გავიმარჯვოთ თვითონ. ქართველმა ხალხმა უნდა გაიმარჯვოს, ჩვენი გამარჯვება კი არის კონსოლიდაცია. საგამოძიებო კომისიის საკითხზე ოპოზიციამ ერთიანობა აჩვენა პარლამენტში, რითაც „ოცნებამ“ მეორე დიდი მარცხი განიცადა რუსული კანონის შემდეგ.
_ თქვენ იზიარებდით რიგგარეშე არჩევნების იდეას, თუმცა ამ იდეამ ვერ მოიპოვა პოპულარობა. რას ფიქრობთ ახლა, _ რამდენად შეიძლება ისევ დადგეს ეს თემა დღის წესრიგში?
_ იდეა სხვებმა წარმოთქვეს, მათ შორის, გიორგი მარგველაშვილმა, მეოთხე პრეზიდენტმა. მე არ მითქვამს, რომ რიგგარეშე არჩევნები უნდა მოვითხოვოთ დღეს. მე ვამბობდი, თუ ჩატარდება რიგგარეშე არჩევნები, დამანგრევლად დამარცხდება „ქართული ოცნება“ და დემოკრატიული ძალები მოვლენ ხელისუფლებაში-მეთქი. მიუხედავად იმისა, რომ 2024 წლის არჩევნებიც მოახლოებულია, არ გამოვრიცხავ, რომ მაინც დადგეს რიგგარეშე არჩევნების ჩატარების საჭიროება. სიტუაცია იმდენად ზღვარზეა, საზოგადოება მაინც ელოდება, რა იქნება დეკემბერში კანდიდატის სტატუსთან დაკავშირებით. ჩვენ ყოველთვის მზად უნდა ვიყოთ რიგგარეშე არჩევნებისთვის. მაგრამ ყველაზე ბოლო ვადა არის 2024 წლის არჩევნები, სადაც დარწმუნებული ვარ, „ქართულ ოცნებას“ გაუჭირდება 20 პროცენტზე მეტი ხმის დაგროვება.
_ „ქართული ოცნების“ პროპაგანდა, რომ „მშვიდობა შეინარჩუნა“, არ იმუშავებს?
_ არ მუშაობს ეს პროპაგანდა, „რუსული მშვიდობა“ არავის უნდა ამ ქვეყანაში. ამის ნიშანია 24 თებერვლის აქცია, 7-8 მარტის აქციები, ახალი კვლევები, სადაც 80%-ს გადააჭარბა ევროკავშირის მხარდამჭერთა რაოდენობამ. ტელევიზიით კი ვხედავთ, რომ ერთსა და იმავე სისულელეს იმეორებენ, მაგრამ ქუჩაში ვერ გადის ეს ხალხი. რაიონებში დაანონსებული შეხვედრებიც შეწყვიტეს. სად არის მაგათი შეხვედრები? ყველა რაიონი უნდა მოვიაროთო, _ მოიარეს? პარტიულ ორგანიზაციებში ხელით მოყვანილ ადამიანებთანაც კი არაფერი აქვთ სალაპარაკო. მთლიანად გაშიშვლდა მათი კავშირი რუსეთთან. საქართველოში ნამდვილად არსებობს საზოგადოების პრორუსული ნაწილი, მაგრამ ეს არის ძალიან ცოტა. ჩვენ უნდა გვესმოდეს, დღეს უმცირესობაში მყოფი პრორუსები მართავენ უმრავლესობას _ პროევროპულ საზოგადოებას. ამას ხალხი ხედავს. „ოცნებაშიც“ იციან, სადმე ქუჩაში შეხვედრა რომ გამართონ, კვერცხები მოხვდებათ თავში.
_ ჩვენ ვხედავთ, რაც უფრო მეტად ხელს გვიწვდის დასავლეთი, მით უფრო ამძაფრებს „ოცნება“ ანტიდასავლურ რიტორიკასა და ქმედებებს. ევროკავშირიდან დადებითი შეფასების შემთხვევაში, ხომ არ უნდა ველოდოთ მისგან კიდევ უფრო რადიკალურ ნაბიჯებს?
_ ძალიან ბევრ „სიურპრიზს“ ველოდები „ქართული ოცნებისგან“, რომ საბოლოო უარი ათქმევინონ ევროპას ჩვენზე. ესაა დავალება, რომელიც მათ მიღებული აქვთ რუსეთისგან. ესაა რეალობა, ამიტომ ხდება ეს სიგიჟეები ირგვლივ.
ის, რომ „ოცნება“ სუსტია და მორალური საფუძველი არ გააჩნია, ეს არ ნიშნავს, რომ ის ნებაყოფილობით დათმობს ხელისუფლებას. „ოცნება“ შეეცდება, ძალისმიერი მეთოდები გამოიყენოს ხელისუფლების შესანარჩუნებლად. ეს შეიძლება იყოს ინდივიდუალური ანგარიშსწორება. აი, მაგალითად, ლაზარე გრიგორიადისი ჩასვეს ციხეში, რომლის დახსნაც ჩვენი ამოცანაა, ასევე მოსალოდნელია საქმეების აღძვრა პოლიტიკური ოპონენტების წინააღმდეგ, მათ შორის, ჩემზეც. საჯაროდ ამბობდნენ და არ დაუმალავთ, რომ ეს უნდათ. ეს შეიძლება იყოს სხვადასხვა პოლიციური თუ სამხედრო შენაერთის გამოყენება ძალაუფლების შესანარჩუნებლად, მაგრამ ყველა ეს მცდელობა ძალიან დიდი კრახით დამთავრდება, რადგან საქართველო ბელარუსი არ არის, არც თუნდაც ყაზახეთი და არც სხვა ქვეყანა, რადგან ჩვენ იმიტომ ვართ ასე ახლოს ევროკავშირის კანდიდატი ქვეყნის სტატუსის მიღებასთან, რომ ქართული საზოგადოება გაიზარდა.
დაიწყონ, თუ უნდათ, ეს გამოძიებები და, თუ უნდათ, ციხეშიც ჩაგვსვან. არავის გვეშინია, ფსიქოლოგიურადაც გადატეხილი გვაქვს ეს ბარიერი. ისეთ რეჟიმს ვებრძვით, რომ რაღაც დროს შეიძლება, მოგიწიოს ციხეში ჯდომა. შეიძლება გამოგიგონონ რაიმე ბრალდება. არ გამოვრიცხავ, რომ ნებისმიერ ოპოზიციურ ლიდერზე შეიძლება შეთითხნონ რაღაც, მაგრამ ამით ვერ დაგვაშინებენ. რამდენჯერაც დამჭირდება, „ალყას“ იმდენჯერ გამოვაცხადებ. იმ დღეს ჩვენ რომ არ გამოგვეცხადებინა ის გეგმა, ახლა შეიძლება სხვა ვითარება ყოფილიყო. ეს არის პოლიტიკოსის ვალდებულება, რომ გადამწყვეტ მომენტში აიღოს საკუთარ თავზე პასუხისმგებლობა, არ შეეშინდეს და კონკრეტული სამოქმედო გეგმა შესთავაზოს საზოგადოებას. სულ რომ იყო მოთხოვნა: „გეგმა, გეგმაო“, ყვირილი რომ იყო, ეგ იყო გეგმა, _ ალყა. დიახ, ცარიელი შენობის, რომ დილით ხელი შეგვეშალა სესიის ჩატარებისთვის, რომ ამ ადამიანებს არ ჰქონოდათ კომფორტი, მეორე დღეს მისულიყვნენ პარლამენტში და კოხტად გაეგრძელებინათ საქმიანობა.
_ თუმცა იყო თქვენ მიმართ ამის გამო კრიტიკა, სხვა დროსაც ოპოზიციონერ პოლიტიკოსებს (მაგალითად, გახარიას გუნდს) თქვენ დაუდანაშაულებიხართ „ქართული ოცნების“ სასარგებლო თამაშში. ამაზე რას იტყვით?
_ ყველა უმწიფარი პოლიტიკოსი აკეთებს ასეთ განცხადებებს, თუმცა შემდეგ უწევთ ხოლმე სიტყვის უკან წაღება. აი, მაგალითად, გაგახსენებთ 24 თებერვლის აქციას, სულელური განცხადებების გაკეთება დაიწყეს გახარიას გუნდის წევრებმა, შემდეგ თვითონ თქვეს, მივდივართ აქციაზეო. ასე არის, რა ვქნათ, ვიღაც უმწიფარია, მოუმზადებელი, არ ესმის პოლიტიკური ვითარება. ზოგიერთი არის ჩასაფრებული, რომ ოღონდ ვინმესკენ გაიშვიროს ხელი, რომ „აი, იმან ჩააგდო“, მაგრამ როდესაც ყველაფერი გამარჯვებით დამთავრდა, ყველამ დაინახა, რამდენად სწორი იყო ის ნაბიჯები, რაც ჩვენ გადავდგით. დიახ, საზოგადოება საქართველოს მხარდასაჭერად შეიკრიბა, მაგრამ შენი, როგორც პოლიტიკოსის პასუხისმგებლობა, არის, რომ ეს ენერგია მიმართო გამარჯვებისკენ და არა მარცხისკენ. ჩვენ ბევრი ფიასკო გვინახავს, ეს აქციაც რომ კიდევ ფიასკოთი დასრულებულიყო, ამას შეიძლება ქართულ საზოგადოებაში იმხელა ფრუსტრაცია (გეგმის ჩაშლა, ამაო ცდა, დამთრგუნველი დაძაბულობის, მღელვარების, გამოუვალობისა და სასოწარკვეთილების მდგომარეობა, _ რედ.) გამოეწვია, რომ ვეღარც გადავტეხდით. გაგახსენებთ, რომ შემოდგომაზე ვერც კი წამოვიწყეთ ვერანაირი პროცესი, იმდენად ფრუსტრირებული იყო ზაფხულის აქციების მერე საზოგადოება. და რატომ? იმიტომ, რომ იქ პოლიტიკოსებს არ გვქონდა შესაძლებლობა, ის გვეჩვენებინა, რაც თუნდაც ახლა ვაჩვენეთ. არ შეიძლება, პოლიტიკოსებმა შეკრებილ ხალხს გარკვეული მიმართულება არ მისცენ გამარჯვებისკენ. ვფიქრობ, სწორად მივდივართ და საზოგადოების აბსოლუტურმა უმრავლესობამაც ძალიან კარგად გააანალიზა, რომ იმ ერთმა სიტყვა „ალყამ“ შეცვალა ვითარება იმ დღეს.
_ რამდენად განაპირობებს ეს „გამარჯვების მომენტი“ შემდგომ პროცესებს?
_ ზუსტად ამას ვამბობ, რუსეთთან დაკავშირებულ „ქართულ ოცნებას“ მორალური ფუნდამენტი მოეხსნა, მოეშალა დიდი მხარდაჭერის საფუძველი. ამიტომ ვადარებ მას კომუნისტურ პარტიას. გაიხსენეთ, 9 აპრილმა კომუნისტური პარტია მორალურად დაანგრია და მას შემდეგ კომუნისტურ პარტიას ერთი პროცენტიც კი არ მიუღია არცერთ არჩევნებზე, ასე იქნება „ქართული ოცნებაც“. როგორც კი ხელისუფლება შეიცვლება, მას არ აქვს არანაირი ღირებულებითი საწყისი, რომ თავი შეინარჩუნოს, როგორც პოლიტიკურმა პარტიამ.
_ რას იტყვით ახალგაზრდების წინააღმდეგ ხელისუფლების კამპანიის შესახებ? „სატანისტებადაც“ კი გამოაცხადეს ისინი, ერთ-ერთი, ლაზარე გრიგორიადისი, პატიმრობაშიც კი რჩება…
_ ესეც რუსული ნარატივის ნაწილია. იმდენად სასაცილოდ ჩანს, რომ ერთი და იგივე მესიჯებით ლაპარაკობენ რუსეთისა და საქართველოს ხელისუფლებები. ერთი ხელიდან მოდის ეს კონტრპროპაგანდა, რომ დააზიანონ ახალგაზრდები. ქართული საზოგადოება გაცილებით გაზრდილია და ჩვენთან ამ დამღების, კლიშეების შემოტანა არ მუშაობს. სადმე ნახეთ, რომ ვინმემ გაიმეორა, მართლა სატანისტები არიანო? რუსეთში ასეთი რამ შეიძლება მუშაობს, მაგრამ აქ ეს პროპაგანდა არ ჭრის. თუმცა ეს არ ნიშნავს, რომ ჩვენ უნდა მოვდუნდეთ. ყოველდღე უნდა გავაშიშვლოთ „ქართული ოცნება“. არაერთი ვიდეო ჩვენც დავდეთ, მილიონობით ნახვა აქვს, როგორ საუბრობენ ერთი ერთში იმავეს, რასაც რუსული ხელისუფლება ლაპარაკობს. ეს კიდევ ერთი მტკიცებულებაა მათი რუსეთთან კავშირის.
_ სად ხედავთ გამოსავალს?
_ გამოსავალი არის ოპოზიციური ფლანგის ერთიანობა, სამოქალაქო საზოგადოების კონსოლიდაცია და იმ ნათელი მომავლის, ალტერნატივის ჩვენება საზოგადოებისთვის, რაც რეალურად საქართველოს აქვს.
_ მიხეილ სააკაშვილის საკითხთან დაკავშირებით რა მოლოდინი გაქვთ? როგორ წარმოგიდგენიათ ამ საკითხის გადაწყვეტა?
_ ძალიან მძიმედ. ვფიქრობ, რეჟიმი შეეცდება, ის ფიზიკურად გაანადგუროს. ამ დავალებას ასრულებს ახლა და ეს დავალებაც პუტინისგანაც მოდის. პუტინს უნდა აჩვენონ, რომ მისი მოწინააღმდეგეები ასე ისჯებიან. ამას გულხელდაკრეფილი არ ვუყურებთ არცერთ შემთხვევაში. ჯერჯერობით ველოდებით სტრასბურგის გადაწყვეტილებას დროებით ღონისძიებასთან დაკავშირებით. ვნახოთ, რა იქნება.