იმით, რაც გასული წლის ნოემბრიდან მოყოლებული საქართველოში ხდება, მხოლოდ ევროპა კი არა, აშშ-იც გავაოცეთ და საქმე, დიდი ალბათობით, სანქციებამდეც მივა. ყოველ შემთხვევაში, გავლენიანი დასავლელი პოლიტიკოსები თუ ანალიტიკოსები უკვე ღიად ამბობენ, რომ საქართველო იკარგება და ამიტომ ქმედითი ნაბიჯების გადადგმაა საჭირო. სწორედ ამას ემსახურებოდა ევროკავშირის პარლამენტის პრეზიდენტ შარ მიშელის ვიზიტი საქართველოში, რომელმაც ხელისუფლებას, პრაქტიკულად, ყური აუწია და უთხრა, 15 მარტს ან 6-პუნქტიან შეთანხმებაზე ხელს მოაწერ, ან არადა, მოვლენები დრამატულად განვითარდებაო.
მოკლედ, ზუსტად ერთ კვირაში გაირკვევა, „ოცნება“ პოლიტიკურ სამარეში ნებით ჩაწვება თუ, როგორც იტყვიან, სახის შესანარჩუნებლად რაიმე მნიშვნელოვან ნაბიჯს გადადგამს.

მანამდე კი საინფორმაციო სააგენტო ცნეწს-ი აშშ-ის სახელმწიფო მდივნის თანაშემწის მოადგილე ჯორჯ კენტის განცხადებას ავრცელებს, სადაც ნათქვამია:
„აშშ-ში ბევრმა გამოთქვა შეშფოთება იმის შესახებ, რაც თბილისში ხდება, გზავნილები, როგორც პირადი, ასევე ოფიციალური, მკვეთრი იყო. რაც შეეხება გასულ კვირას მომხდარ ამბავს, საქართველოს ყველა მოგობრისთვის ნათელია, რომ ეს იყო სახიფათო მომენტი საქართველოს ევროატლანტიკური და ევროპული მისწრაფებების გზაზე, სწორედ ამიტომ გავაქტიურდით როგორც პირად, ისე საჯარო სივრცეში და მოვუწოდეთ მხარეებს, რომ მოლაპარაკების მაგიდას დაბრუნებოდნენ“.

როგორ უნდა განიმუხტოს პოლიტიკური კრიზისი და არსებობს თუ არა სამართლებრივი მექანიზმი, რითიც „ოცნება“ უკანონო პატიმრობაში მყოფ „ნაცმოძრაობის“ ლიდერ ნიკა მელიას საპყრობილიდან გაათავისუფლებს? _ „ქრონიკა+“ იურისტს, „სტრატეგია აღმაშენებლის“ წარმომადგენელ გიორგი ცობეხიას ესაუბრა:

_ გიორგი, იმ ვითარებას, რაც დღეს ქვეყანაშია, რა იურიდიული ტერმინი მიესადაგება?
_ ეს პოლიტიკური კრიზისია. საერთოდ, „პოლიტიკური კრიზისი“ მხოლოდ პოლიტიკური კი არა, წმინდა იურიდიულ-სამართლებრივი ტერმინია. ეს პოლიტიკური კრიზისი ქვეყანაში 31 ოქტომბრის არჩევნების შემდეგ შეიქმნა და მისი განმუხტვის ერთადერთი მექანიზმი ვადამდელი არჩევნებია, თუმცა ხელისუფლება იმ მექანიზმის შემუშავებას, რომლითაც ვადამდელი არჩევნები უნდა მივიღოთ, თავს არიდებს.
სხვათა შორის, ევროპის საბჭოს პრეზიდენტმა შარლ მიშელმა ყველაფერ ამაზე თავისი სერიოზული პოზიცია საჯაროდ დააფიქსირა და მხარეებს იმ საკითხებზე საუბრისკენ მოუწოდა, რომელიც ვადამდელ არჩევნებსაც მოიცავს. ალბათ, გახსოვთ, რომ მიშელის ვიზიტამდე ღარიბაშვილისთვის ვადამდელი არჩევნები „წითელი ხაზი“ იყო.
_ დიახ, მახსოვს, თუმცა მას შემდეგ, რაც მიშელმა საქართველო დატოვა, „ოცნების“ ლიდერშიფი პირვანდელ პოზიციას დაუბრუნდა და ვადამდელ არჩევნებს ისევ „წითელ ხაზად“ მიიჩნევს, მაგრამ ვიდრე ამ თემას გავშლით, ისევ პოლიტიკურ კრიზისზე გკითხავთ, ანუ იმას, რასაც მთელი ოპოზიცია პოლიტიკურ კრიზისად მიიჩნევს, ხელისუფლება, კერძოდ, პრემიერი ღარიბაშვილი სახელმწიფოზე შეტევას უწოდებს და იმთავითვე იქადნება, რომ კონსტიტუციურ წესრიგს აღადგენს…
_ ეს, მინიმუმ, იურიდიული ტერმინების არცოდნაა.
_ რატომ?
_ კონსტიტუციური წესრიგი შეგვიძლია, მაგალითად, აფხაზეთში მას შემდეგ აღვადგინოთ, რაც მას დავიბრუნებთ. მოკლედ, ყველაფერი ეს იურიდიული ტერმინების არასწორი ინტერპრეტაციაა.
_ ხომ არ ფიქრობთ, რომ ამ ტერმინების არასწორი ინტერპრეტაცია მიზანმიმართულად ხდება, რათა საზოგადოების ნაწილმა დაიჯეროს, აი, ოპოზიცია კონსტიტუციური ჩარჩოებიდან გადისო?
_ დიახ, ეს პოლიტიკური ტექნოლოგიის მეთოდია.
ისე, იმას, რომ ქვეყანაში პოლიტიკური კრიზისია, ისიც მოწმობს, რომ პარლამენტში ოპოზიცია არ არის.
_ არ მგონია, თქვენი ეს განცხადება მთლად რელევანტური იყოს, რადგან პარლამენტში ელისაშვილ-იოსელიანიც არიან და ექსპატრიოტებიც ფრიდონ ინჯიას მეთაურობით.
_ ელისაშვილსა და ექსპატრიოტებს მნიშვნელობა არ აქვთ.
_ რას ჰქვია, „მნიშვნელობა არ აქვთ“?
_ პარლამენტში ხუთი პარტია არ შევიდა, ანუ ოპოზიცია თავის პროტესტს იმ ფორმით გამოხატავს, რომ არჩევნების შედეგებს ბოიკოტს უცხადებს. ბოიკოტი ერთ პარტიასაც რომ გამოეცხადებინა, ეს პოლიტიკურ-სამართლებრივად უკვე პოლიტიკური კრიზისი იქნებოდა და მხოლოდ ჩვენთვის კი არა, ევროპისთვისაც.
საერთოდ, პოლიტიკურ კრიზისს თავისი ინდიკატორები აქვს და ამ შემთხვევაში ინდიკატორი სწორედ ისაა, რომ წეღანდელი თქმისა არ იყოს, ოპოზიცია იმ მანდატების რეალიზებას არ ახდენს, რომელიც „ოცნებამ“ 31 ოქტომბერს „დაუწერა“.
ერთი სიტყვით, ქვეყანაში ცალსახა პოლიტიკური კრიზისია, რომლიდან გამოსვლაზეც ყველამ ერთად უნდა ვიფიქროთ, თუმცა ღარიბაშვილი ჯერ რაღაც წითელ ხაზებზე ლაპარაკობს, მიშელის ჩამოსვლის შემდეგ ეს წითელი ხაზები, თურმე, აღარაა და ხვდება, რომ კომიკურ სიტუაციაშია, მიშელის წავსლის შემდეგ კი თავს უფრო კომიკურ სიტუაციაში იგდებს და ამბობს, რომ წითელი ხაზი ისევ არსებობს.
_ სხვათა შორის, „ქოცსპიკერები“ ცინიკოსობენ, მიშელთან მოლაპარაკებაზე შეთანხმებული 6-პუნქტიანი გეგმა დოკუმენტი კი არა, მაგიდაზე დადებული მოსაზრებებიაო და ეს მაშინ, როცა დასავლეთის გავლენიანი პოლიტიკური ფიგურები უკვე ღიად ამბობენ, საქართველოს ვკარგავთო.
_ ეს ძალიან საინტერესო დეტალია.
_ ანუ?
_ მდინარაძე და მისი დამქაშები კი ამბობენ, ეს 6-პუნქტიანი გეგმა დოკუმენტი კი არა, მხოლოდ მოსაზრებააო, მაგრამ ყურადღება ერთ რამეს არ მიაქციეს.
_ რას?
_ მიშელმა გასაგებად თქვა, რომ 15 მარტს, ასოცირების ხელშეკრულების ფარგლებში ჩატარებულ შეხვედრაზე, შეთანხმებულ ანგარიშს მოისმენს და ეს პირდაპირი მინიშნებაა.
_ მინიშნება რაზეა?
_ მინიშნება იმაზეა, ივანიშვილ-ღარიბაშვილის ოლიგარქიული რეჟიმის მსგავსი მოქმედება რად შეიძლება დაგვიჯდეს, ანუ თუ საქართველო იმ, ასე ვთქვათ, რეცეპტით არ იმოქმედებს, რომელსაც მიშელი გვთავაზობს და კრიზისი დემოკრატიული მეთოდებით არ განიმუხტება, ძალიან სერიოზული საფრთხის წინაშე დავდგებით, მათ შორის, ასოცირების ხელშეკრულების რეალიზების კუთხითაც.
მოკლედ, ყველაფერი ეს შესაძლოა, ჩვენი ევროპული მომავლის გაქრობის ფასად დაგვიჯდეს!
_ ღმერთმა არ ქნას, ეს პროგნოზი ახდეს…
ბოლო დროს ოპოზიცია სანქციებზე ბევრს ლაპარაკობს, ანუ არის მოლოდინი, რომ ივანიშვილსა და კიდევ რამდენიმე სუბიექტს პერსონალურ სანქციებს დაუწესებენ. არსებობს თუ არა იმის თეორიული შანსი, რომ ეს სანქციები ქვეყანაზეც გავრცელდეს და დასავლეთმა გრანტებზეც უარი გვთხრას და სხვა სახის დახმარებაზეც?
_ პიროვნული სანქციები პირველი ეტაპი იქნება, რასაც აუცილებლად მოჰყვება სხვა ნაბიჯებიც.
_ კერძოდ?
_ ამის ძალიან კარგი მაგალითი რუსეთის ფედერაციაა, ანუ ვიცით, რომ თავიდან რუსეთში ზოგიერთ პირს ევროპისა და აშშ-ის ტერიტორიაზე შესვლა აეკრძალა. ამასთან, ანგარიშებიც გაიყინა. ყველაფერი ეს კი იქამდე მივიდა, რომ სანქციები, საბოლოო ჯამში, რუსეთის სახელმწიფოს დაედო.
_ ანუ ჩვენც ამ სცენარისკენ მივდივართ?
_ ამას ვერ გეტყვით, მაგრამ იცით, მთავარი რა არის?
_ რა?
_ სანქცირებული მაღალჩინოსნების პირობებში გამორიცხულია, რომ დასავლეთიდან ინვესტიციები და გრანტები მოვიზიდოდთ. ასევე ვერც ევროპული ბაზრის იმ სიკეთეებით ვისარგებლებთ, რაც ასოცირების ხელშეკრულებამ მოგვცა.
თუ ივანიშვილის რეჟიმი ამ პოლიტიკას გააგრძელებს, პირველი, რაზედაც ევროპა „დაგვარტყამს“, მიმოსვლა იქნება.
_ რას გულისხმობთ?
_ უვიზო მიმოსვლა, უბრალოდ, დაიკარგება, არადა, ეს საკითხი მნიშვნელოვანი მონაპოვარია.
_ უვიზო მიმოსვლა ივანიშვილისთვის მაინცდამაინც მნიშვნელოვანი არაა.
_ შეიძლება, მაგრამ, საბოლოო ჯამში, მაინც მას დაარტყამს.
_ როგორ?
_ უვიზო მიმოსვლის შეჩერება საზოგადოებას ქუჩაში გამოიყვანს და ივანიშვილის რეჟიმის წინააღმდეგ პროტესტის უფრო დიდი ტალღა აგორდება და ყველაფერ ამას როდემდე გაუძლებს?
_ მგონია, რომ დიდხანს გაუძლებს. ყოველ შემთხვევაში, „ოცნება“ თავს გაიმართლებს, გასაგებია, რომ უვიზო მიმოსვლა შეწყდა, მაგრამ აი, გერმანიაში დასაქმების მსურველებს ვაგზავნით და მეტი რაღა გინდათო?
_ ეს დასაქმება ვის რად უნდა? ჩემი ქვეყანა ჩემს ქვეყანაში ვერ მასაქმებს და სადღაც მიშვებს! ისე, ვინ თქვა, რომ გერმანიამ ხელი მოაწერა დოკუმენტს, რომლის თანახმადაც ჩვენს დატრენინგებულ ხალხს დაასაქმებს? ასეთი დოკუმენტი არსებობს?
_ ასეთი დოკუმენტი არც მე მინახავს. მეტიც: ცნობილია, რომ გერმანია საქართველოდან დასაქმების მხოლოდ 500 მსურველს მიიღებს.
_ ხუთასი კი არა, განაცხადი 50 ათასზე მეტმა შეავსო და რაზე ვლაპარაკობთ? იცით, ამ ხუთასს ადამიანზეც რატომაა მოთხოვნა?
_ რატომ?
_ „ოცნება“ გერმანიას ეხვეწება, იქნებ, ჩვენი მოაქალაქეები დაასაქმოო.
ერთი სიტყვით, ასეთ მარაზმულ სიტუაციაში ვართ!
ისე, სიტყვამ მოიტანა და ძალიან სასაცილო რაღაცები ხდება. აი, მაგალითად, რამდენიმე დღის წინ სუს-ის უფროსის პირველი მოადგილე ხოჯევანიშვილი გადადგა, რომელიც გახარიას კადრად მიიჩნეოდა. ხოჯევანიშვილი ის მაღალჩინოსანი იყო, რომელთანაც ნებისმიერ სახელმწიფო უწყებაში ნებისმიერი თანამშრომლის მიღება თანხმდებოდა, ანუ ხოჯევანიშვილი წყვეტდა, ესა თუ ის პირი იმ პოლიტიკური გემოვნების იყო თუ არა, რომ მუშაობა რომელიმე ადმინისტრაციულ ორგანოში დაეწყო.
აი, ქვეყანა ამ მდგომარეობაშია და ვინმე მეტყვის, რომ ესენი კრიზისიდან გამოსვლაზე ფიქრობენ? _ არა! ესენი კრიზისს შეეჩვივნენ და ეს კრიზისი მათი არსებობისთვის მნიშვნელოვანია.
_ ანუ „ოცნება“ ხელისუფლების შენარჩუნებას კრიზისით ცდილობს?
_ დიახ და თუ 15 მარტს შეთანხმება არ იქნება, ამით სახელმწიფო და თითოეული ჩვენგანი დაზიანდება! ივანიშვილის რეჟიმი სწორედ აქეთკენ მიდის!
თუ გახსოვთ, ვიღაცები ამბობდნენ, ღარიბაშვილს თავისი ამომრჩეველი ჰყავსო.
_ დიახ, ამის შესახებ მსმენია, ანუ ღარიბაშვილი „ოცნების“ მომხრეთა გარკვეულ სეგმენტში პოპულარულია…
_ უაზრო, დესტრუქციული და ხისტი რიტორიკის მქონე პოლიტიკოსს მხარდამჭერების თავისი სეგმენტი ჰყავს და სწორედ ამ სეგმენტზე მუშაობს, რომ რამე შერჩეს.
_ ყველაფერი ეს გასაგებია, მაგრამ პოლიტიკურ კრიზისზე გარკვეული პასუხისმგებლობა, ჩემი აზრით, ოპოზიციასაც ეკისრება, ანუ ხელისუფლება ამბობს, თუ მელია გირაოს გადაიხდის, საპყრობილიდან გამოვუშვებო. ჩვენთვის რომ ვთქვათ, სამართლებრივად ეს ხომ სწორი და კანონიერი მიდგომაა?
_ „ოცნებამ“ კანონი მაშინ დაარღვია, როცა მელია დაიჭირა.
_ განაჩენი სასამართლომ გამოიტანა და „ოცნება“ რა შუაშია?
_ სასამართლომ უკანონო გადაწყვეტილება გამოიტანა, რადგან იგი, რეალურად, პოლიტიკური დევნის ინსტრუმენტად იქცა!
საერთოდ, აღკვეთის ღონისძიებად პატიმრობის გამოყენებას თავისი წინაპირობები აქვს _ მაგალითად, მიმალვის ან მტკიცებულებების განადგურების საფრთხე უნდა არსებობდეს. მელიას შემთხვევაში კი აქედან ერთი სტანდარტიც არ დაიცვეს.
_ კი ბატონო, მაგრამ სასამართლოს განაჩენი სახელმწიფოს სისრულეში რომ არ მოეყვანა, ეს ხომ კიდევ ერთი უკანონობა იქნებოდა?
_ დიახ, სასამართლოს გადაწყვეტილება აუცილებლად უნდა შესრულდეს, მაგრამ არსებობს სასამართლოს უკანონო გადაწყვეტილება.
_ ამ გადაწყვეტილების უკანონობა ისევ იმ სასამართლომ უნდა დაადგინოს, რომელმაც პირვანდელი გადაწყვეტილება გამოიტანა?
_ ეს საქმე სტრასბურგამდე მივა!
_ ვნახოთ, მაგრამ ე. წ. მელიას კრიზისის მოგვარება სამართლებრივად როგორ შეიძლება?
_ ამ საქმეზე ისევ ივანიშვილის სასამართლომ უნდა იმსჯელოს!
რაკი სასამართლოს შევეხეთ, ერთ მნიშვნელოვან დეტალს გავუსვამ ხაზს, რომელზედაც აქცენტი არავის გაუკეთებია.
_ რას გულისხმობთ?
_ გახარიას გადადგომა სწორედ ამ საკითხს მოჰყვა.
_ დიახ, ეს ცნობილია.
_ აქ ერთი ნიშანდობლივი გარემოებაა: გახარია გამოვიდა და, პრაქტიკულად, თქვა, ასეთ ვითარებაში მელიას დაპატიმრებას არ ვეთანხმებიო. აქვე, „შუშის სასახლეში“ მურუსიძის ვიზიტიც არ უნდა დაგვავიწყდეს.
_ საუბარი საითკენ მიგყავთ, გიორგი?
_ მელიას დაკავება პოლიტიკური დაკვეთა იყო, რომელიც „შუშის სასახლიდან“ მოდიოდა და ამ, პრაქტიკულად, სპეცოპერაციაზე პრემიერი თანახმა არ იყო.
მოკლედ, ყველაფერ ამით ის დადასტურდა, რაზედაც წლებია, ვსაუბრობთ _ ივანიშვილი ყველაფერს ისე მართავს, როგორც უნდა. გახარიამ ამის ლუსტრირება მოახდინა, თან პასუხისმგებლობისგან განთავისუფლებასაც შეეცადა და ივანიშვილს, პრაქტიკულად, ხელი დაადო!
_ გეთანხმებით, მაგრამ კონკრეტულად გეკითხებით და კონკრეტულად მიპასუხეთ: ხელისუფლებამ მელია პოლიტიკური შეთანხმების საფუძველზე რომ გამოუშვას, ეს კანონის დარღვევა იქნება თუ არა, ანუ სამართლებრივი ჩარჩოდან კიდევ ერთხელ ხომ არ გავალთ?
_ პროკურატურამ განაცხადა, სასამართლოში აღკვეთის ღონისძიების შეცვლის შუამდგომლობით შევალ, თუ მელია გირაოს გადაიხდისო, მაგრამ ესეც არასწორია.
_ რატომ?
_ ადამიანი პატიმრობაშია და გირაო როგორ უნდა გადაიხადოს?
_ ეს კითხვაც ლოგიკურია, მაგრამ კითხვაზე მაინც არ მპასუხობთ, ანუ თუ პოლიტიკური შეთანხმება მოითხოვს, კანონის დარღვევა „მოსულა“?
_ საერთოდ, აღკვეთის ღონისძიების ამა თუ იმ საქმეს სახელმწიფო ბრალდება, ანუ პროკურატურა ითხოვს, თუმცა პროკურატურას იმის დისკრეციაც (მოქმედების თავისუფლება, _ რედ.) აქვს, რომ თუნდაც დღეს აღკვეთის ღონისძიების სხვა ფორმა მოითხოვოს და ეს კანონდარღვევა არ იქნება, თუმცა აქ მთავარი სხვა რამეა.
_ კერძოდ?
_ პირადად მე მექმნება შთაბეჭდილება, რომ პროკურატურა ფინანსური აქტივების ბიუროს მსგავსად იქცევა.
_ რას გულისხმობთ?
_ სახის შენარჩუნებას ცდილობს და, ერთი მხრივ, ამბობს, აღკვეთის ღონისძიება გამოყენებული უნდა იქნესო. არადა, თეორიულად იმის შესაძლებლობა არსებობდა, რომ ნიკა მელიას აღკვეთის ღონისძიების გარეშე დატოვება შესაძლებელი იყო. მეორე მხრივ კი იმიჯისთვის ისე იქცევა, თითქოს აღკვეთის ღონისძიების შესაცვლელად მზადაა, მაგრამ, ამავე დროს, მელიას სთავაზობს, რომ უკან დაიხიოს.
_ მელიას უკან დახევა იმას ნიშნავს, რომ გირაო გადაიხადოს?
_ დიახ, თუმცა მელია გირაოს იმიტომ არ იხდის, რომ საქმე უკანონობასთან გვაქვს.
ერთი სიტყვით, ხელისუფლება, რეალურად, თავის პოლიტიკას აგრძელებს და მერე თუ გირაოს გადაიხდიდა, იტყოდა, აი, მელიამ ყველაფერი გაიაზრაო, ანუ მისგან ანტიგმირს შექმნის, თორემ დიდი ხანია, ხელისუფლების მოქმედებები სამართლებრივ ჩარჩოში აღარ ჯდება!
სართოდ, არჩევნების გაყალბების შემდეგ ამ ტიპის ხელისუფლებასთან სამართლებრივ საკითხებზე ლაპარაკს აზრი აღარ აქვს! როცა უამრავი ადამიანის ფუნდამენტურ უფლებას ფეხქვეშ გათელავ, იქ სამართლებრივი ჩარჩოები აღარ არსებობს, მიშელიც სწორედ ამიტომ ჩამოვიდა და პირდაპირ თქვა, 15 მარტამდე პრობლემის გადაჭრის გზებზე შეთანხმდითო.
_ გიორგი, ერთსაც გკითხავთ და დაგემშვიდობებით: ყველაფერ ზემოთქმულის ფონზე, ოპოზიცია საპროტესტო აქციებს, მინიმუმ, „ალაითებს“, შესაბამისად, საპროტესტო მუხტიც ვარდება. გამორციხავთ, რომ ოპოზიციის გარკვეული ნაწილი „ოცნებასთან“ იყოს გარიგებული და აქციის ფორმებიც ამიტომ შეარბილეს?
_ ესეც მიშელის ვიზიტთანაა დაკავშირებული, ანუ ოპოზიციამ ყველას უნდა აჩვენოს, რომ დიალოგს კი არ გაურბის და დამაბრკოლებელ გარემოებებს კი არ ქმნის, არამედ სურს, რომ სახელმწიფო ინტერესების სასიკეთოდ შეთანხმებას კონსტრუქციულ ჩარჩოებში მიაღწიონ.
ისე, ოპოზიციამ კი არ თქვა, აქციები აღარ იქნებაო, უბრალოდ, დროებით ფორმა შეცვალა, ანუ ხელისუფლებას გარკვეული „დროის დერეფანი“ მისცა, რათა შეთანხმება მოხდეს!
სწორედ აქედან ჩანს, რომ ოპოზიციას ხელისუფლებაზე მეტი პასუხისმგებლობა აღმოაჩნდა, რადგან აბსლუტურად სახელმწიფოებრივად მოქმედებს!
_ ე. ი., ოპოზიცია მხოლოდ პოლიტიკურად კი არა, სამართლებრივადაც სწორედ მოქმედებს?
_ დიახ.
_ გიორგი, როცა ეს ბაკქანალია დამთავრდება, თქვენ, როგორც იურისტს, „ოცნების“ ბედი როგორ წარმოგიდგენიათ?
_ „ოცნებას“ უმძიმესი ბედი ელოდება და ამაში ღრმად ვარ დარწმუნებული. წარსული გამოცდილებიდან, ვფიქრობ, ჩვენი საზოგადოება იქამდე მივიდა, რომ ყველა ის დანაშაული, რომელიც „ოცნებამ“ ჩაიდინა, სამართლიანმა სასამართლომ შესაბამისად უნდა აზღვევინოს!
_ ქართულ სისხლის სამართლის კოდექსში ისეთი მუხლები არსებობს, რომლითაც „ოცნებას“, მინიმუმ, პოლიტიკური დანაშაულისთვის მოეთხოვება პასუხი?
_ „ოცნების“ მიერ ჩადენილ მთელ რიგ დანაშაულებთან დაკავშირებით, რა თქმა უნდა, ასეთი მუხლები არსებობს!

ვანო პავლიაშვილი