საერთაშორისო გამჭვირვალობა – საქართველოს (TI) საბოლოო ანგარიშის მიხედვით, რომელიც 2020 წლის საპარლამენტო არჩევნებზე პარტიების მიერ მიღებულ შემოსავლებსა და გაწეულ ხარჯებს შეეხება, მმართველი პარტიის შემომწირველთა კომპანიებმა 2020 წელს, დაახლოებით, 68 მილიონი ლარის ღირებულებების ტენდერები მოიგეს და იმავე პერიოდში 1.6 მილიონი ლარი გაიღეს „ქართული ოცნების“ სასარგებლოდ. 

„ამ მხრივ განსაკუთრებით აღსანიშნავია შპს „გ & კ ტექნოლოგი“, რომელმაც წლის განმავლობაში 17.2 მლნ. ლარის ტენდერი მოიგო, მისმა მფლობელმა რომან აბრამიშვილმა კი თებერვალში „ქართულ ოცნებას“ 60,000 ლარი შესწირა. საინტერესოა, რომ აბრამიშვილმა შემოწირულობა მას შემდეგ გაიღო, რაც მისმა კომპანიამ მოკლე პერიოდში ზედიზედ რამდენიმე მსხვილი ტენდერი მოიგო. მოგებული ტენდერებისა და განხორციელებული შემოწირულობების თარიღები ერთმანეთთან ასევე საკმაოდ ახლოს იყო შპს „ცეკურის“, შპს „გრავიტასა“ და შპს „ჯი-თი ჯგუფის“ შემთხვევებში. კიდევ ერთი მსხვილი სახელმწიფო კონტრაქტორია შპს „ლ.და.კ“, რომელმაც 2020 წელს 17.3 მლნ. ლარის ტენდერები მოიგო, ხოლო მისმა მფლობელებმა მმართველი პარტიის ყულაბაში 22,000 ლარი შეიტანეს. ასევე ყურადღებას იქცევს შპს „არსაკიძე-2000“, კომპანია, რომელმაც 2020 წელს 2.2 მლნ. ლარის სახელმწიფო ტენდერები მოიგო. ამ კომპანიის მფლობელები ამავე დროს დაკავშირებული არიან შპს „ლილო-მოლთან“ – მსხვილ ბიზნესჯგუფთან, რომლის პარტნიორები წლების განმავლობაში არიან ერთ-ერთი ყველაზე მსხვილი პოლიტიკური შემომწირველები“, – ნათქვამია ანგარიშში.

TI-ის ცნობითვე, ტენდერების გარდა, მმართველი პარტიის შემომწირველი ფიზიკური პირების კომპანიები გამარტივებული სახელმწიფო შესყიდვების მიმღებებიც არიან. კერძოდ, 2020 წელს (17 ნოემბრამდე) დაახლოებით 4.2 მლნ. ლარის ღირებულების გამარტივებული შესყიდვების კონტრაქტები მიიღეს იმ კომპანიებმა, რომლებთან პირდაპირ ან ირიბად დაკავშირებულმა პირებმა 2.2 მლნ. ლარამდე გაიღეს მმართველი პარტიის სასარგებლოდ. ამ კუთხით აღსანიშნავია შპს „ყვარლის ედემი“, რომელიც მმართველი პარტიის ყოფილი თავმჯდომარის, ბიძინა ივანიშვილის ძმის, ალექსანდრე ივანიშვილის ბიზნესპარტნიორების მფლობელობაშია. ეს კომპანია საერთაშორისო გამჭვირვალობა – საქართველოს ყურადღების ცენტრში მიმდინარე წლის გაზაფხულზეც მოექცა, როდესაც საგანგებო მდგომარეობის დროს, მისი მფლობელების მიერ თანხის შეწირვიდან რამდენიმე დღეში, მას გამარტივებული სახელმწიფო შესყიდვის მსხვილი კონტრაქტი გაუფორმეს.

ორგანიზაციის ანგარიშში ასევე ნათქვამია, რომ წლების განმავლობაში მმართველი პარტიის შემომწირველებს შორის ჩამოყალიბდა რამდენიმე მსხვილი ჯგუფი, რომელიც თითქმის ყოველ არჩევნებზე „ქართულ ოცნებას“ დიდი თანხით აფინანსებს. სამმა ასეთმა ჯგუფმა 2020 წელსაც გააგრძელა მსხვილი შემოწირულობების გაღება. კერძოდ, ბიძინა ივანიშვილთან დაკავშირებულმა პირებმა „ქართულ ოცნებას“ ჯამურად 544,300 ლარი შესწირეს.  შპს „ლილო-მოლთან“ ასოცირებულმა პირებმა მმართველი პარტიის სასარგებლოდ სულ 595,000 ლარი გაიღეს, ხოლო შპს „ბომბორამ“ და ბავშვებთან პირდაპირ ან ირიბად დაკავშირებულმა პირებმა  იგივე პარტიას 255,000 ლარი შესწირეს;

საერთაშორისო გამჭვირვალობა – საქართველოსთვის ცალკე კვლევის საგანი გახდა პარტიების მაჟორიტარი კანდიდატების შემოწირულებები. მართველ პარტია „ქართული ოცნების“ მიერ წარდგენილმა მაჟორიტარობის 30 კანდიდატიდან 7-მა (მათი ოჯახის წევრებისა და ბიზნესპარტნიორების ჩათვლით) 2020 წლის 1-ლი იანვრიდან 17 ნოემბრამდე პარტიას 1,035,000 ლარი შესწირეს, რაც ამ პერიოდში პარტიის მიერ მთლიანად მიღებული შემოწირულობების 5% იყო. მაჟორიტარობის შვიდივე კანდიდატი მსხვილი ბიზნესმენია და სხვადასხვა ფორმით სულ 127 კომპანიასთან არის დაკავშირებული. ეს მაჟორიტარები არიან: ზაალ დუგლაძე, ანტონ ობოლაშვილი, გოჩა ენუქიძე, ზაზა ლომინაძე, ირაკლი ხახუბია, დავით სონღულაშვილი და ვასილ ჩიგოგიძე. იყო ისეთი შემთხვევებიც, როდესაც ერთი მაჟორიტარი კანდიდატის ბიზნესპარტნიორები ერთსა და იმავე დღეს ერთსა და იმავე ოდენობის თანხას სწირავდნენ პარტიას.

ნენე ინჯგია