„ქართული ოპოზიცია ამაზრზენად გამოიყურება. ქვეყანა შიმშილისა და სრული სიღატაკის ზღვარზეა და ესენი პოლიტიკური იწილო-ბიწილოთი, არარსებული თანამდებობებისა და მანდატების გაყოფით არიან დაკავებული. გონს მოდით, დროზე!“ _ ამ სიტყვების ავტორი „ნაციონალური მოძრაობის“ ყოფილი დეპუტატი და ტელეკომპანია „იმედის“ ყოფილი დირექტორი, გიორგი არველაძეა, რომელმაც რამდენიმე დღის წინ სოციალურ ქსელში ერთობ სკანდალური სტატუსი გამოაქვეყნა.
ვერ გეტყვით, რამ უბიძგა არველაძეს ოპოზიციის გაკიცხვისკენ, მაგრამ „ტრადიციონალისტთა კავშირის“ ლიდერი, აკაკი ასათიანი, ამ კრიტიკის პათოსს იზიარებს, ანუ „ქრონიკა+“-სთან ის ამბობს, რომ ბოლოდროინდელი მოქმედებებით ოპოზიცია გამარჯვების შანსს, თუკი ასეთი ჰქონდა, ამცირებს. ამას გარდა, ჩვენი რესპონდენტი სხვა საინტერესო საკითხებზეც ამახვილებს ყურადღებას და იმასაც ასაბუთებს, თუ რატომაა ცუდი ოპოზიციისთვის ერთიან მაჟორიტარებზე შეთანხმება.

_ ბატონო აკაკი, ლოკდაუნს თავი როგორ გაართვით?
_ ნორმალურად. საერთოდ, დარწმუნებული ვიყავი, რომ პრობლემა არც მე მექნებოდა და არც სხვას შევუქმნიდი, მაგრამ რადგან 60-ს გადაცილებული ვარ, ახლობლებმა შინ გამომკეტეს. ეს, შეიძლება, მეტისმეტი იყო, მაგრამ ასეთ დროს თავის დაზღვევა სწორია.
_ კი ბატონო, მაგრამ შინ გამოკეტვას ეკონომიკის ჩამოქცევა რომ მოყვა?
_ ნებისმიერი მოქმედება რაღაცის ფასად ჯდება. სიმართლე გითხრათ, ეკონომიკის ღრმა სპეციალისტი არ ვარ, თუმცა ეკონომიკის პრინციპებზე ზოგადი წარმოდგენა ნებისმიერ პოლიტიკოსს უნდა ჰქონდეს და მიმაჩნია, რომ ეკონომიკაზე მემარჯვენე შეხედულებები მაქვს, თუმცა დღეს ისეთი დროა, მემარჯვენეობა და მემარცხენეობა ეკონომიკაში კი არა, პოლიტიკაშიც აღარაა. მთავარია, ადამიანები ზოგად პრინციპებს არ ღალატობდნენ და ყველაფერს დროის მიხედვით საზღვრავდნენ.
_ ანუ?
_ იმას, რასაც ახლა ვიტყვი, არც ექსპერტები გაიზიარებენ და არც _ ოპოზიცია, მაგრამ მგონია, რომ მხოლოდ ჩვენთან კი არა, მსოფლიოშიც ეკონომიკა იმაზე მალე აღდგება, ვიდრე ამას ვარაუდობენ.
_ სხვათა შორის, დონალდ ტრამპიც სწორედ ამ აზრს ავითარებს. ყოველ შემთხვევაში, მან განაცხადა, აშშ-ში უკვე 2 მილიონზე მეტი სამუშაო ადგილი აღდგა და ყველაფერი კარგად იქნებაო. იმის გათვალისწინებით, რომ „უხილავი მტრის“ მოსალოდნელი მეორე ტალღა საქართველოსთვის მნიშვნელოვან არჩევნებს ემთხვევა, ხომ არ ფიქრობთ, რომ კორონა, ერთგვარად, პოლიტიკური ბრძოლის იარაღად იქცა და აქვე, ერთსაც გკითხავთ: ის შედეგი, რასაც ჩვენმა ქვეყანამ კორონასთან ბრძოლაში მიაღწია, ხელისუფლების დამსახურებაა, ექიმების თუ საზოგადოების?
_ ეს, პირველ ყოვლისა, ქართველობის დამსახურებაა, ანუ ჩვენ კარგი ჯიში გვაქვს. პირდაპირ ვთქვათ: ადამიანიც ცხოველია და ჩვენ ადამიანების ერთ-ერთი ჯიშიანი სახეობა ვართ! ამას იმიტომ კი არ ვამბობ, რომ ფაშიზმს ვქადაგებ. უბრალოდ, ეს გენეტიკაა. სხვათა შორის, სტალინმა გენეტიკა იმის გამო აკრძალა, რომ ეგონა, რადგან მეწაღის შვილი იყო, გენეტიკა ქადაგებდა, მუდმივად მეწაღედ დარჩენილიყო, მაგრამ გენეტიკა ამას არ ქადაგებს.
ამას გარდა, ჩვენ კულტურული საზოგადოება ვართ, რაც განსაკუთრებით კრიზისის დროს ვლინდება _ ჩემზე ახალგაზრდა კი ხართ, მაგრამ თითქმის ყველა უბედურებას მოესწარით და გაიხსენეთ, კრიზისების დროს ხალხი როგორ იქცეოდა. იგივე 9 აპრილისა თუ „ვარდების რევოლუციის“ დროს ხიდან ფოთოლი არ ჩამოვარდნილა, სამოქალაქო ომის დროს კი მასწავლებლები სკოლაში ფეხით დადიოდნენ.
კორონასთან ბრძოლაში ხელისუფლების გაუბედაობამაც იმუშავა, ანუ „ოცნება“ იმდენად არაინიციატივიანია, რომ ექიმებს დაუჯერა. ჩვენი ექიმები კი ძალიან კვალიფიციურები არიან და ხელისუფლებას ქრესტომათიული რჩევები მისცეს.
_ კი ბატონო, მაგრამ ეს კვალიფიციური ექიმები აღდგომის წინ გვაშინებდნენ, თუ ეკლესიაში წახვალთ, კუბოებს ვეღარ დავითვლითო, თუმცა „ეკლესიის კლასტერი“ არ შედგა. მოკლედ, კორონას ეკლესია და პოლიტიკური ელიტა იმისთვის ხომ არ იყენებდა, რომ ერთმანეთისთვის საკუთარი გავლენა თუ უპირატესობა დაემტკიცებინათ?
_ ამ საქმეში ხელისუფლებას ოპოზიციაც უჭერდა მხარს, რადგან, აბა, სხვანაირად როგორ იქნებოდა _ ეკლესიას უნდა ებრძოლოს და მხარდაჭერასა თუ ფინანსებს ტრამპისგან კი არა, მე თუ მკითხავთ, ყავლგასული ფსევდოლიბერალებისგან ამისთვის იღებს!
რაც შეეხება ზემოხსენებულ განცხადებას, მხოლოდ ექიმებს კი არა, ხელისუფლებასაც გულწრფელად ეშინოდა, რადგან მორწმუნე არც ერთია და არც _ მეორე. შესაბამისად, არ ესმოდათ, რომ „ეკლესიის კლასტერი“ არ იქნებოდა. მოკლედ, ხელისუფლებაც და სამედიცინო პერსონალიც თავს იზღვევდა… საერთოდ, ეკლესია, განსაკუთრებით საქართველოში, სპეციფიკურია. გავიძახით, ევროპელები ვართო, მაგრამ ევროპელები გეოგრაფიით კი არა, ამ ეკლესიით ვართ. ის, რასაც დასავლურ ცივილიზაციას უწოდებენ, სინამდვილეში, ქრისტიანული ცივილიზაციაა… სხვათა შორის, კენედის საპრეზიდენტო არჩევნების დროს პრობლემა მხოლოდ ის ჰქონდა, რომ კათოლიკე იყო, თუმცა მაინც გაიმარჯვა და აშშ-ის ისტორიაში დღემდე ერთადერთი კათოლიკე პრეზიდენტია…
_ არ გეკამათებით, თუმცა ამ თემაზე საუბარი შორს წაგვიყვანს. ამიტომ პოლიტიკური საკითხები განვიხილოთ. მოკლედ, თავდაპირველად ე. წ. ლეიბორისტულ მაგიდაში მონაწილეობდით.
_ მხოლოდ პირველ დღეს, რადგან შალვას ხათრი ვერ გავუტეხე.
_ შეიძლება, შეკრებას მხოლოდ ერთხელ დაესწარით, მაგრამ მგონია, რომ ოპოზიციის კულუარებზე ჩემზე მეტი იცით. ჰოდა, თქვენი აზრით, „ნაციონალებმა“ თბილისში ექვსი რაიონი რატომ დათმეს და მაჟორიტარობისთვის მხოლოდ გლდანში, სამგორსა თუ ისანში რატომ იბრძოლებენ?
_ ამის ახსნა საპრეზიდენტო არჩევნებით შეიძლება.
_ ანუ 2018-ში „ნაციონალებმა“ ყველაზე კარგი შედეგები თბილისის ამ ორ რაიონში აჩვენეს?
_ დიახ, მტკვრის მარცხენა სანაპიროზე აჩვენეს და წელსაც ეს ორი რაიონი დაიბევეს. საერთოდ, მათ არ უნდათ, რომ ოპოზიციური შეთანხმების ჩაშლა დაბრალდეთ.
_ „ერთობის დაშლაზე“ აქცენტს რატომ აკეთებთ?
_ აი, მაგალითად, ვაშაძის პრემიერად დასახელებით ეგონათ, რომ თუ სხვას დაასწრებდნენ, პრემიერობა მათ დარჩებოდათ, თუმცა ეს მხოლოდ საქართველოში კი არა, სხვაგანაც აბსოლუტურად არასწორი ნაბიჯი იქნებოდა.
_ რატომ?
_ პარტიას, რომელსაც, იდეალურ შემთხვევაში, 2-3 პროცენტი შეიძლება ჰქონდეს, პრემიერი რომ არ ეყოლება, ცხადია! ყოველ შემთხვევაში, ევროპაში ასეა.
_ ბატონო აკაკი, მომავალი კოალიციური მთავრობის ხელმძღვანელი, თქვენი აზრით, რომელი პარტიიდან უნდა იყოს?
_ იმ პარტიიდან, რომელიც უფრო მეტ ხმას მიიღებს. საერთოდ, საქართველოში ე. წ. ჩრდილოვანი კაბინეტის პრაქტიკა არ ამართლებს, რადგან ადამიანები, ჯერ კიდევ, საბჭოეთიდან გამოყოლილი ინერციით, ფიქრობენ, რომ ეს ამბიციურობა და პრეტენზიულობაა. პრეტენზიულობა ცუდია, მაგრამ ამბიციურობა _ არა, თუმცა გააჩნია, რისი ამბიცია გაქვს. აი, მაგალითად, ხომ არ შეიძლება, მე მომღერლის ამბიცია მქონდეს, მიუხედავად იმისა, რომ ხმა მაქვს, სმენა კი _ არა?!
_ ქართველ პოლიტიკოსებში ამბიცია უფრო ჭარბობს თუ პრეტენზია?
_ პრეტენზია.
_ ამ შემთხვევაში, ოპოზიციას გულისხმობთ?
_ არა, ხელისუფლებასაც _ მთავარი თანამდებობის დაკავებაა, ანუ ყველაფერი რაღაც დაწესებულებას ჰგავს, არადა, პოლიტიკა დაწესებულება არაა.
_ სხვათა შორის, ოპოზიციაში მიმდინარე ამ მოვლენებზე კახა კალაძემ განაცხადა, ისეთ რაღაცებს ვნახავთ, ბევრს ვიცინებთო…
_ როგორც ვატყობ, სასაცილო ორივე მხარეს მოხდება, მაგრამ „ნაცებში“, როგორც ჩანს, ვიღაცას ესმის, რომ არჩევნებს მაინც ვერ მოიგებენ და ამიტომ, არ უნდათ, რომ ერთობის მოშლა და წაგება მათ დაბრალდეთ.
_ ეს „ვიღაც“ შეიძლება, სააკაშვილი იყოს?
_ გიორგი არველაძის წერილი წაიკითხეთ?
_ დიახ, წავიკითხე და ის ოპოზიციას პირდაპირ რევოლუციისკენ მოუწოდებს.
_ „ტაკიმასხარაობასა“ და სხვა ასეთ ფრაზებს თავი რომ გავანებოთ, არარევოლუციურ, ანუ შეფასებით ნაწილში ხომ სიმართლეს ამბობს?
_ საუბარი იქითკენ მიგყავთ, რომ არველაძემ შესაძლოა, სააკაშვილის აზრი გაახმოვანა?
_ ეს არ ვიცი, მაგრამ სიმართლე თქვა.
კარგი, ზოგი პოლიტიკურად გამოუცდელია, მაგრამ დიდი გამოცდილების პოლიტიკოსებს უნდა ესმოდეთ, რომ თუ ოპოზიციამ ისეთი ტალღა ვერ ააგორა, როგორიც, მაგალითად, ჩვენ კომუნისტების წინააღმდეგ ავაგორეთ, სააკაშვილმა _ შევარდნაძის, „ოცნებამ“ კი _ სააკაშვილის, საერთო მაჟორიტარებზე შეთანხმებას აზრი არ აქვს, ანუ რაც მეტი მაჟორიტარი იქნება, საქმე მეორე ტურამდე უფრო მივა, რადგან ხმები დაიქსაქსება. ერთიანი მაჟორიტარების შემთხვევაში კი, იმ ამომრჩევლის ნახევარი, რომელიც „ოცნების“ მოწინააღმდეგეა, ამ ერთს არ დაუჭერს მხარს. მეორე ტურში კი შეთანხმება საჭიროც არაა, რადგან ასეთ დროს ყველა ოპოზიციონერი ოპოზიციის კანდიდატს დაუჭერს მხარს.
მოკლედ, მეორე ტურამდე ბევრი კანდიდატით უფრო მივლენ, ვიდრე _ ერთით. ერთ კანდიდატს „ოცნება“ ბეჭებზე დადებს და ამას ნახავთ!
_ ისე, კულუარებში ამბობენ, რომ ერთიან მაჟორიტარებზე შეთანხმებას „ევროპული საქართველო“ ლობირებს. თქვენი ლოგიკიდან გამომდინარე კი ხომ არ მყარდება ეჭვი, რომ ბოკერია „ოცნების“ თამაშს თამაშობს?
_ ყველამ ვიცით, რომ ასეა…
დღევანდელი მონაცემებით, „ოცნება“ ოპოზიციას ყველა პარამეტრით უგებს.
_ ბატონო კაკო, ამას რის საფუძველზე ამბობთ?
_ აი, თუნდაც, კორონასთან ბრძოლის საფუძველზე.
_ კორონა ხელისუფლების სასარგებლოდ შესაძლოა, პირველ ეტაპზე მუშაობდა, მაგრამ ახლა ხალხს შია და იმის ძახილით, აი, ვირუსიაო, არ მგონია, ხელისუფლებამ მოსახლეობის გული კიდევ მოიგოს.
_ ადამიანებს იმაზე მეტად არ შიათ, ვიდრე აქამდე შიოდათ. ისე არ გაიგოთ, რომ ხელისუფლების ადეპტი ვარ, უბრალოდ, ის, რასაც ვამბობ, ფაქტია, მით უმეტეს, იმ ფონზე, რაც ჩვენს სამეზობლოში ხდება. ჩვენთან კი სულ 13 გარდაცვლილია.
ხელისუფლების უინიციატივობა იცით, სად გამოჩნდა?
_ სად?
_ ხელისუფლებას ახლა გაახსენდა, რომ ისეთი სოფლის მეურნეობა უნდა გვქონდეს, რომელიც გამოგვკვებავს, თორემ სოფლის მეურნეობისთვის თავიდანვე რომ მიეხედა, ტურისტებსაც გამოკვებავდა და ამის აბსოლუტური შესაძლებლობა არსებობს. აი, მაგალითად, ქიზიყი ან ქართლი, სადაც ხორბალი მოდის, გადასახადებისგან რომ გავათავისუფლოთ, ეს სრულიად საკმარისი იქნება, რომ ამ ქვეყანას ხორბლის იმპორტი არ დასჭირდეს, მაგრამ ამას ვერ ბედავენ. კორონას დროს დადებითი ფაქტორი, როგორც აღვნიშნე, სწორედ ეს გაუბედაობა აღმოჩნდა, ანუ ხელისუფლებამ იფიქრა, ისე მოვიქცევი, რასაც ექიმები მეტყვიან და თუ რამე არ გამოვა, ექიმებს დავაბრალებო.
_ ე. ი., არჩევნების წინ კორონა „ოცნების“ მთავარ მოკავშირედ იქცა?
_ დიახ.
_ თუ ასეა, აბა, ოპოზიცია რატომაა დარწმუნებული, რომ შემოდგომაზე ხელისუფლება აუცილებლად შეიცვლება?
_ აბა, სხვა რა უნდა თქვას? თუ ეს არ იცის, უნდა გრძნობდეს მაინც და თუ ვერ გრძნობს, მაშინ საქმე უფრო ცუდად ყოფილა, თუმცა მათ, ვინც ოპოზიციაში არიან, ვიცნობ და ცვლილებების დროსაც მინახავს, რომ საერთოდ ვერ ხვდებოდნენ, მოვლენები როგორ განვითარდებოდა. აი, მაგალითად, ზოგს ეგონა, რომ სააკაშვილი ერთ-ორ წელიწადში დამთავრდებოდა და „ნაციონალებისგან“ ამიტომაც წამოვიდნენ, მაგრამ მაშინვე ვეუბნებოდი, მას ისეთი ხელი აფარია, რომ ასე მალე არ დამთავრდება-მეთქი და ასეც მოხდა.
_ შეიძლება, ოპოზიციას გამარჯვების შანსი არ აქვს, მაგრამ მის სასარგებლოდ ერთი ფაქტორი მუშაობს, კერძოდ, ჩვენთან დამკვიდრებული ტრადიციით, ნებისმიერი ხელისუფლება ორი ვადის შემდეგ იცვლება. „ოცნების“ მეორე ვადა კი სწორედ შემოდგომაზე იწურება.
_ დასავლეთშიც ბევრს უნდა, რომ ასე მოხდეს და ცნობილი განცხადებებიც სწორედ ამას ნიშნავს, თორემ რა, იმათ არ იციან, ესენი რა პოლიტპატიმრებიც იყვნენ?! სხვა საკითხია, რომ უგულავას, ოქრუაშვილისა და, მით უმეტეს, რურუას დაპატიმრება სისულელე იყო. თუ რურუას რამე ძველზე ემართლებიან, მაშინ იმაზე ელაპარაკონ, მაგრამ ახლა რატომ გაიხსენეს? თუ ასეთი საშინელია, მასთან ერთად ხომ ბევრი რამ გაგიკეთებია და თავის დროზე რატომ არ დაიჭირე?
იცით, სამართალი როგორი რამეა?
_ როგორი?
_ კაცობრიობის წინაშე ჩადენილ დანაშაულს ვადა არ აქვს. აი, მაგალითად, ნაცისტებს და მათთან მოთანამშრომლე ადამიანებს (ოღონდ მხოლოდ მათ, რომელთაც მასობრივ მკვლელობებში აქვთ ხელი გასვრილი) წლობით დასდევდნენ. ბავშვობაში ეს მიკვირდა, მაგრამ მერე მივხვდი, ეს დასავლური ცხოვრების პრინციპია, რომ მოქალაქეს სასჯელის გარდაუვალობის შეგნება ჰქონდეს, ანუ ისეთი დანაშაული არ უნდა ჩაიდინოს, რომელიც სიკვდილსაც არ დააცლის, თორემ იგივე მკვლელობებს ხანდაზმულობის ვადა აქვს.
_ ე. ი., უგულავა, ოქრუაშვილი და რურუა არ უნდა დაეჭირათ?
_ რას აშავებდნენ? აი, ახლა უგულავა და ოქრუაშვილი გარეთ რომ არიან, ოპოზიციას რამე შესძინეს თუ ხელისუფლება შეაყანყალეს? ჩემი აზრით, პირიქითაა _ ისეთ განცხადებებს აკეთებენ, რომ ოპოზიციას ბევრი რამ დაუშავეს!
დააკვირდით, ოპოზიცია ყველაფერს აკეთებს, რომ თუ გამარჯვების რამე შანსი ჰქონდა, რაც შეიძლება, შეამციროს!
_ ეს ეჭვი, ცხადია, ლოგიკურია.
_ ამას შეგნებულად არ აკეთებს.
_ აბა?
_ არ ვიცი, შეიძლება, ვიღაც შეგნებულადაც აკეთებს. აი, მაგალითად, ზოგს ჰგონია, რომ ვაშაძის პრემიერობის კანდიდატობა „შეგდებული“ იყო, რომ ოპოზიციის ერთობა „აჭრილიყო“, მაგრამ პირადად მე ასე არ მგონია. უბრალოდ, მგონია, რომ მას ასეთი პრეტენზია გაუჩნდა, თუმცა იმაში ცუდი არაფერია, რომ ადამიანს პრემიერობა უნდოდეს, მაგრამ დროს გააჩნია.
_ თუ ოპოზიცია გამარჯვების შანსებს, შეგნებულად თუ შეუგნებლად, ამცირებს და იმასაც ხვდება, რომ ყველაფერ ამის უკან შესაძლოა, ბოკერია იდგეს, მაშინ „ევროპულ საქართველოს“ კარტ-ბლანშს რატომღა აძლევს?
_ ისინი გაჩერებულ მატარებელში საძილე და საერთო ვაგონებით ვაჭრობენ.
_ ვინ „ისინი“?
_ მთელი ოპოზიცია.
_ ვისთან ვაჭრობს?
_ ერთმანეთთან, ანუ მათთვის მთავარია, რომ ერთმანეთს გადაასწრონ.
_ ეს როგორ?
_ ტიტული _ „მთავარი ოპოზიციური ძალა“ _ ბოკერიასაც უნდა და სხვასაც. ბოკერიას და, საერთოდ, „ევრონაციონალებს“ ხელშეწყობა მეტი აქვთ, თუმცა უშანსოა!
საერთოდ, მათი ამბავი იცით, რას ჰგავს?
_ რას?
_ თავის დროზე, როცა ხრუშჩოვმა სტალინის კულტი დაგმო, საფრანგეთსა და სხვა ქვეყნებში, სადაც კომუნისტები მძლავრად იყვნენ, მიხვდნენ, რომ კატასტროფა მოდიოდა, სახელი გადაირქვეს და „ევროკომუნისტები“ დაირქვეს. ხომ არაფერი გეცნობათ?
_ რა თქმა უნდა, მეცნობა…
_ მას შემდეგ, რაც საბჭოეთი დაემხო, იტალიაში რაც კი კომუნისტები იყვნენ, გაერთიანდნენ და „დემოკრატიული მოძრაობა“ დაირქვეს.
ყველაფერი ეს ჩვენთან ახლა მცირე მასშტაბებით მეორდება, ანუ ბოკერია იგივეა, უბრალოდ, უნდა, რომ გადაიღებოს. სხვათა შორის, „ნაციონალები“ სწორად იქცევიან, ანუ სააკაშვილი რაც უნდა გადარეული იყოს და „ნაციონალურ მოძრაობასაც“ რაც უნდა დაშავებული ჰქონდეს, მაინც ბრენდია და თუ ადამიანი მხარს იმ ტიპის პოლიტიკას უჭერს, რომელიც „ნაციონალების“ დროს იყო, სწორედ „ნაციონალებსა“ და სააკაშვილს ემხრობა. იმას კი, ევროქართველი იქნები თუ აფროქართველი, მნიშვნელობა არ აქვს.
_ სხვათა შორის, ბოკერიამ სურვილი გამოთქვა, რომ თბილისის ერთ-ერთ რაიონში მაჟორიტარობის კანდიდატი იყოს. რა შანსი აქვს?
_ ძალიან მცირე.
_ ამით მოგებული ისევ „ოცნება“ დარჩება?
_ რა თქმა უნდა. საერთოდ, მათი ამოცანაა, იმდენი აიღონ, რომ პარლამენტში პარტიული ელიტები მოხვდნენ.
_ მერე, ამდენს აიღებენ?
_ „ნაცმოძრაობა“ აიღებს, ოღონდ იმდენს არა, რომ ყველა დააკმაყოფილოს და ამიტომ, მომავალში პრობლემები ექნება.
_ თქვენი ვარაუდით, „ნაციონალები“ მაინც, რამდენი პროცენტის აღებას შეძლებენ?
_ ვფიქრობ, 15-დან 20 პროცენტამდე.
_ „ევროპული საქართველო“?
_ ათი პროცენტის ფარგლებშიც არა.
_ „ლელოზე“, ბურჯანაძესა და იგივე ლეიბორისტებზე რას იტყვით?
_ „ლელო“ უპერსპექტივოა და იქ ადამიანებს, უბრალოდ, საკუთარი თავის შველა უნდათ.
_ ანუ პოლიტიკა მათთვის ანტურაჟია?
_ დიახ. თუ აკვირდებით, ხელისუფლებას მისი იმდენად არ ეშინია, რომ არც ბომბავს.
_ ყველაფერ იმის ფონზე, რასაც ამბობთ, ოპოზიციის კობახიძისეული შეფასება, _ გოიმურია, _ გამართლებულია?
_ არისტოკრატია არც ერთ მხარეს იგრძნობა.
_ ისე, ბატონო კაკო, თქვენ, ანუ „ტრადიციონალისტთა კავშირი“, რას აპირებთ, არჩევნებში მონაწილეობას მიიღებთ?
_ მაჟორიტარობის ფინანსური საშუალებები არ მაქვს, თუმცა „ტრადიციონალისტთა კავშირი“ მაჟორიტარობის კანდიდატებს, ალბათ, ოცდაათივე ოლქში დააყენებს.

გიორგი აბაშიძე