საქართველოში ყველა არჩევნების შემდეგ მუდმივი კამათის საგანია არჩევნების ლეგიტიმურობის (ან ლეგიტიმურობის ხარისხი) და საარჩევნო გარემოს საკითხი.
ბიძინა ივანიშვილი, „ქართული ოცნება“ და კოალიციაში შემავალი ყველა პარტია და ლიდერი სამართლიანად აკრიტიკებდა 2012 წლის საპარლამენტო არჩევნების პერიოდში არსებულ საარჩევნო გარემოს. კატეგორიულად ითხოვდა გარემოს გაუმჯობესებას. აცხადებდა, რომ არსებული კანონმდებლობით და სისტემით ჩატარებული არჩევნები ვერც ერთ შემთხვევაში ვერ ჩაითვლებოდა სამართლიანად.
„ქართული ოცნება“ და ბიძინა ივანიშვილი საქართველოს მოსახლეობას ჰპირდებოდა, რომ არჩევნებში გამარჯვების შემთხვევაში რადიკალურად შეცვლიდა საარჩევნო გარემოს, საერთაშორისო სტანდარტებისა და ოპოზიციის მოთხოვნას გაითვალისწინებდა. თუმცა, იმავე სტანდარტებით, ხელისუფლებაში ყოფნისას, სამი არჩევნები ჩაატარეთ.
1. რატომ მოატყუეთ საქართველოს მოსახლეობა და არ განახორციელეთ საკანონმდებლო ცვლილებები თქვენ მიერ „უსამართლოდ“ აღიარებული საარჩევნო სისტემის შესაცვლელად?
2. რატომ არ შეასრულეთ დანაპირები ამომრჩეველთა სიების დადგენის თაობაზე, მაშინ როდესაც თქვენ თვითონ არათუ ბიუჯეტიდან, არამედ საკუთარი ფულითაც კი გვპირდებოდით სიების დადგენას? ხომ ყველასთვის ნათელია, რომ საქართველოში ფიზიკურად არ არის 3.200.000 ამომრჩეველი და სიების დაზუსტებაზე უარის თქმა პირდაპირ მიუთითებს თქვენ მიერ საარჩევნო მანიპულაციის შესაძლებლობის შენარჩუნებაზე.
3. რატომ არ შეასრულეთ თქვენი დანაპირები ბიომეტრიული საარჩევნო სიების შექმნაზე?
4. რატომ დატოვეთ უპრეცედენტოდ უსამართლო სისტემა, რომლის საფუძველზეც პარტიამ, რომელმაც ამომრჩეველთა 24%-ის მხარდაჭერა მიიღო, პარლამენტში საკონსტიტუციო უმრავლესობა მოიპოვა? ფაქტია, რომ არც ერთ დემოკრატიულ ქვეყანაში არ შეიძლება, საკონსტიტუციო უმრავლესობა ჰქონდეს პარტიას, რომელმაც ხმების 24% მიიღო.
5. რატომ დაარღვიეთ ელემენტარული სამართლიანობა და საერთაშორისო სტანდარტები, როდესაც არ მიიღეთ სისტემა, რომლის მიხედვითაც საარჩევნო სუბიექტი არჩევნებზე მიღებული ხმების პროპორციულად უნდა იყოს წარმოდგენილი პარლამენტში?
6. რატომ არ დაუშვით საარჩევნო სისტემის უფრო სამართლიანი, გერმანული მოდელის შემოღება, რომელსაც არ სჭირდებოდა საკონსტიტუციო უმრავლესობა პარლამენტში?
7. რატომ გვყავს მთელ მსოფლიოში ერთ-ერთი ყველაზე ძვირი ხელისუფლება და საარჩევნო ადმინისტრაცია?
8. რატომ დაუშვით არჩევნებამდე სამი თვით ადრე საარჩევნო კოდექსის დანაშაულებრივი ცვლილება, რომლითაც კვალიფიციურ სუბიექტებს წაართვით უფასო პოლიტიკური რეკლამის ნახევარზე მეტი?
9. რატომ მიაღებინეთ გენერალურ აუდიტორს კაბალური ბრძანება, რომლითაც პარტიებს ყველანაირი რეკლამის საფასურის 100%-ის წინასწარ გადახდის ვალდებულება დააკისრეთ, რითაც საარჩევნო გარემო უკიდურესად არაკონკურენტული გახადეთ?
10. რატომ უთხრა თქვენმა კუთვნილმა ბანკმა „ქართუმ“ „დემოკრატიულ მოძრაობას“ წინასაარჩევნოდ კრედიტის გაცემაზე უარი, მაშინ როდესაც იდენტური უზრუნველყოფის საფუძველზე, იმავე დღეებში, მილიონი გამოუყო „ქართულ ოცნებას“?
11. რატომ არ უზრუნველჰყავით რუსეთში მცხოვრები საქართველოს მოქალაქეებისთვის ხმის მიცემის ორგანიზება, თუნდაც, შუამავლის, შვეიცარიის საელჩოსა და საკონსულოების მეშვეობით?
12. როგორ ხდება, რომ თქვენ მიერ გაკეთებულ, არჩევნების შედეგების პროგნოზებს ყოველთვის საოცარი სიზუსტით „ემთხვევა“ ცესკოს ოფიციალური შედეგები?
13. რატომ შეუკვეთეთ ეგზიტპოლები, როცა თქვენ ყოველთვის ეგზიტპოლების წინააღმდეგი იყავით და საჯაროდ აცხადებდით, რომ ეს საარჩევნო შედეგებით მანიპულირებაა და სხვა არაფერი?
14. იყო თუ არა ამომრჩევლის შანტაჟი ის ფაქტი, რომ საჯაროდ აცხადებდით, _ თუ მოსახლეობა კონკრეტული პროცენტით არ აირჩევდა თქვენთვის სასურველ ძალას, ხალხს ყოველგვარ დახმარებას შეუწყვეტდით?
15. რატომ მოითხოვდით ბიზნესმენებისგან აქტიურობას ხელისუფლების სასარგებლოდ და რატომ აძლევდით დირექტივებს, თუ ვისთვის უნდა მიეცათ ხმა მათ თანამშრომლებს, თუ თქვენ მართლა ერთ რიგით მოქალაქედ მიგაჩნიათ თავი?
16. რატომ აიძულებდით სოციალურად დაუცველებს, სტატუსის დაკარგვის შიშით, ხელისუფლებისთვის მიეცათ ხმა?
17. როგორ უნდა ისაუბროთ თქვენ და „ქართულმა ოცნებამ“ სამართლიან არჩევნებზე, როცა 30 ოქტომბერს ინტერვიუში თავად განაცხადეთ, რომ „ძალიან ბევრი ბიულეტენი გაყალბდა“?
18. რატომ არ აღიძრა საქმე და არ იქნა გამოძიებული 30 ოქტომბერს ინტერვიუში გაცხადებული ბრალდება „ნაციონალური მოძრაობის“ მიერ არჩევნებზე „ძალიან ბევრი ბიულეტენის გაყალბების“ შესახებ?
19. რატომ იქნა იგნორირებული ხელისუფლებისა და ცესკოს მხრიდან ასეულობით დაუბალანსებელი ოქმი, მაშინ როდესაც დაუბალანსებელი ოქმების არსებობა არჩევნების გაყალბების ყველაზე ნათელი დასტურია?
20. რატომ არ დაუჭირა მხარი საარჩევნო ოლქებსა და ცესკოში თქვენი პარტიის კვოტით დანიშნულმა არც ერთმა წევრმა, თუნდაც, ერთი საარჩევნო უბნის გადათვლასაც კი?
21. როგორ მოხდა, რომ „პოლიტიკური ზეწოლისგან განთავისუფლებულმა“ სასამართლოებმა, არც ერთ ინსტანციაში, საოცარი ერთსულოვნებით, არ დააკმაყოფილეს „დემოკრატიული მოძრაობის“ არც ერთი სარჩელი?
22. როგორ მოხდა, რომ „ნაციონალურ მოძრაობასა“ და „ქართულ ოცნებას“ იმაზე მეტი ხმა აღმოაჩნდა, ვიდრე თავად ელოდნენ?
23. რატომ არ გაიხსნა, მთელი საქართველოს მასშტაბით, ასობით საჩივრის მიუხედავად, პრაქტიკულად, არც ერთი უბანი, თუნდაც, იმის დემონსტრირებისთვის, რომ არჩევნები არ გაგიყალბებიათ?
24. რატომ წაართვით კვალიფიციურ სუბიექტებს მეორე ტურში წარმომადგენლების ყოლისა და საარჩევნო პროცესზე დაკვირვების უფლება? როგორ დაუშვით, რომ ცესკოს, თავისი ნორმატიული აქტით, შეეცვალა პარლამენტის მიერ მიღებული ორგანული კანონის _ „საარჩევნო კოდექსის“ ნორმა და პარტიები მეორე ტურში წარმომადგენლების გარეშე დაეტოვებინა?
25. როგორ მოხდა, რომ მხოლოდ მთაწმინდაზე _ იქ, სადაც თქვენ მიერ მხარდაჭერილი კანდიდატი იყრიდა კენჭს, დაუშვით საარჩევნო უბნის გახსნა და ხმების გადათვლა?
26. აცნობიერებთ თუ არა, რომ 73 ოლქიდან 73-ვე ოლქის სახელისუფლებო კანდიდატების მოგებით ქვეყანა საბჭოთა კავშირს დაამსგავსეთ, ხოლო ,,ქართული ოცნება“ კომუნისტურ პარტიას?
27. რატომ დაფიქსირდა 8 ოქტომბრის საპარლამენტო არჩევნებზე გაბათილებული ბიულეტენების კოლოსალური და უპრეცედენტო რაოდენობა _ 137 000?
28. როგორ ახსნით იმ ფაქტს, რომ არჩევნების დღეს, საღამოს ხუთიდან რვა საათამდე, ცესკოს ოფიციალური ინფორმაციით, საარჩევნო უბნებმა 330 ათასზე მეტი ამომრჩეველი გაატარა, როცა განსხვავებით დილის საათებისგან, მცირე რიგებიც კი, არსად დაფიქსირებულა?
29. რატომ აღმოჩნდა თქვენ მიერ დანიშნულ საარჩევნო კომისიის თანამშრომელთა აბსოლუტური უმრავლესობა სრულიად არაკვალიფიციური, რაც დადასტურდა სასამართლოებზე წარმოდგენილი მათი ახსნა-განმარტებებით?
30. როგორ მოხდა, რომ პირველად არჩევნების ისტორიაში პოლიტიკურმა გაერთიანებამ (მაგ.: დემოკრატიული მოძრაობა) აჭარაში ხმების 2-ჯერ მეტი რაოდენობა აიღო, ვიდრე დანარჩენ საქართველოში?
31. რატომ მოხდა, რომ აჭარაში მანდატები უკანონოდ და უსამართლოდ გადანაწილდა და დემოკრატიული მოძრაობის მანდატი „ქართულმა ოცნებამ“ მიისაკუთრა?
32. რატომ გადააქციეთ არჩევნები მასკარადად და სავაჭრო ქარვასლად, რისი მაგალითიც იყო „პატრიოტთა ალიანსის“ სამი დღის განმავლობაში 4.99%-ზე გაყინვა და ბარიერის გადალახვით მანიპულირება? ხომ არ უკავშირდება ეს მიხეილ სააკაშვილის მიერ გაკეთებულ განცხადებებს, რომ „ნაციონალური მოძრაობა“ პარლამენტში არ შევიდოდა?
33. როგორ მოხდა, რომ კომისიის წევრთა მიერ დაწერილი ახსნა-განმარტებები ისევე აბსოლუტურად იდენტური იყო, როგორც პოლიციელების მიერ სასამართლოებისთვის მიცემული ახსნა-განმარტებები 2011 წლის 26 მაისის მოვლენებთან დაკავშირებით?
34. რატომ გაავრცელეთ 26 მაისის უცნობი კადრები არჩევნებამდე ერთი კვირით ადრე, როცა ეს კადრები გამოძიებას, ჯერ კიდევ, აპრილში ჰქონდა და რატომ არ გრძელდება გამოძიება?
35. რის საფუძველზე გაათავისუფლეს წინასწარი პატიმრობიდან არჩევნების შემდეგ ფარულ ჩანაწერებთან დაკავშირებით დაპატიმრებული პირი?
36. რატომ აღარაფერი ისმის სახელმწიფო გადატრიალების მუხლით არჩევნებამდე ერთი კვირით ადრე აღძრულ საქმესთან დაკავშირებით?
37. რატომ აღარაფერი ისმის არჩევნებამდე ცოტა ხნით ადრე აღმოჩენილ იარაღის სამალავთან დაკავშირებით?
38. რატომ არ გამოიძიეთ ბოლომდე და არ დასაჯეთ დამნაშავეები, როცა 2013 წლის საპრეზიდენტო არჩევნების წინ აჭარაში არჩევნების გასაყალბებლად გამზადებული 25 ათასი ყალბი პირადობის მოწმობა აღმოაჩინეთ? იმიტომ ხომ არა, რომ თავად გადაწყვიტეთ ამ ყალბი პირადობების მოწმობების გამოყენება?
39. აცნობიერებთ თუ არა, რომ ლარის კურსის არჩევნებამდე ხელოვნურად დაჭერა, ხოლო არჩევნების წინ და არჩევნების დღეს ადამიანების, მათ შორის, საარჩევნო ადმინისტრაციის მოხელეების მასობრივი მოსყიდვა და დიდი რაოდენობით თანხის დარიგება გააუფასურებდა ლარს და არჩევნების შემდეგ უმძიმეს მდგომარეობაში ჩააყენებდა მოსახლეობასა და ეკონომიკას?
40. რატომ აცხადებდით წინასწარ ჩვენს პარტიასთან და სხვებთან მიმართებით არჩევნების თქვენთვის სასურველ შედეგებს? ეს ხომ თქვენი მხრიდან მოსახლეობაზე ზეწოლა და არჩევნების შედეგების წინასწარი ,,გათეთრება“ იყო?
41. რატომ გადაწყვიტეთ, რომ საქართველოში პოლიტიკა უნდა მოკლათ, შუა ,,გაკრიფოთ“ და პოლიტიკაში მხოლოდ ,,ქართული ოცნება“ და ,,ნაციონალური მოძრაობა“ დატოვოთ? პოლიტიკოსები პოლიტიკას ნებისმიერ ფასად ჩამოაშოროთ და პოლიტიკა და კანონშემოქმედება ქვეყანაში მსახიობებმა და სპორტსმენებმა წარმართონ?
+5 კითხვა:
1. რატომ მოატყუეთ საქართველოს მოსახლეობა და ნაცვლად დაპირებული „ნაციონალური მოძრაობის“ დასჯისა რატომ მოახვიეთ თავს ქართველ ერს ე. წ. კოჰაბიტაცია, რომლითაც გადაარჩინეთ და გააცოცხლეთ „ნაცმოძრაობა“ და 2016 წელს პარლამენტში 27%-ით შეიყვანეთ?
2. რატომ არ გამოიძიეთ დანაშაულებრივი პოლიტიკური პარტია „ნაციონალური მოძრაობის“ კრიმინალური საქმიანობა 2012 წლის საპარლამენტო არჩევნების შემდეგ?
3. რატომ დატოვეთ თანამდებობებზე უამრავი დამნაშავე, რომელიც დღემდე „ნაციონალურ მოძრაობას“ ემსახურება და არა ქვეყანას?
4. რატომ გააპარეთ დამნაშავე სააკაშვილი საქართველოდან და მხოლოდ ამის შემდეგ აღძარით მასზე საქმე? რატომ არ გამოიძიეთ აგვისტოს ომის დროს მისი ქმედებები? რატომ „ვერ იპოვეთ“ მის ქმედებებში სხვა დანაშაული, ბიუჯეტის ხარჯზე შეძენილი ქიშმირის პალტოსა და ბებიის ძველი ავტომანქანის გარდა?
5. რატომ გარიგდით „ნაციონალურ მოძრაობასთან“, რის შედეგადაც მან 27 მანდატის ფასად აღიარა არჩევნების როგორც პირველი, ისე მეორე ტური და ერთი გაყალბებული ოქმიც კი არ გაუსაჩივრებია?
ყოველივე ზემოაღნიშნულიდან გამომდინარე, აცნობიერებთ თუ არა, რომ ქვეყანა მიგყავთ არა თქვენ მიერ დაპირებულ „ევროპელებისთვის გასაკვირ დემოკრატიამდე“, არამედ ფეოდალურ მმართველობამდე? აცნობიერებთ თუ არა, რომ ყოველივე ზემოთქმულიდან გამომდინარე არჩევნები აზრს კარგავს საქართველოში, რაც, ადრე თუ გვიან, აუცილებლად მიიყვანს ქვეყანას კრიზისამდე, ან სამოქალაქო დაპირისპირებამდე?
აცნობიერებთ თუ არა, რომ პასუხისმგებლობა ქვეყანაში მიმდინარე პროცესებზე, განსაკუთრებით საკონსტიტუციო უმრავლესობის უკანონოდ მოპოვების შემდეგ, მთლიანად დაეკისრება ფორმალურად „ქართულ ოცნებას“, ხოლო, რეალურად, ბიძინა ივანიშვილს?