„ქართული ოცნების“ რღვევის პროცესი ავტობანს გამოჰყვება, ხელისუფლებას მოვუწოდებთ, წავიდეს!“

2n

ეკა ხერხეულიძე, რომელიც ერთხელ უკვე იყო პარლამენტის წევრი, ისევ პარლამენტში აღმოჩნდება, ამჯერად, წინასგან განსხვავებით, სხვა ამპლუაში _ უმცირესობის რიგებში.

რა სახის აქტივობას აპირებს, რას ფიქრობს მის კოლეგებზე, ხელისუფლებასა და ოპოზიციაზე და რა მოლოდინი აქვს 21 მარტის აქციასთან დაკავშირებით?

ამ საკითხებზე ეკა ხერხეულიძე „ქრონიკა+“-ს ესაუბრება:

_ ბოლო პერიოდში, სხვადასხვა მიზეზთა გამო, პარლამენტს ორი ახალი წევრი შეემატა: უმრავლესობიდან და უმცირესობიდან. ლუკა კურტანიძის მიმართ უმცირესობის წარმომადგენელთა პოზიცია ცნობილია. თქვენ ხომ არ იცნობთ პირადად მას და როგორ შეგიძლიათ შეაფასოთ, _ მისი დამატება პარლამენტში _ უმრავლესობის გაძლიერებას ნიშნავს თუ პირიქით?

_ ლუკა კურტანიძეს მე არ ვიცნობ. ცხადია, ჩვენი გზები არასდროს გადაკვეთილა და ეს არავის გაუკვირდება. ვიცნობ მხოლოდ როგორც სპორტსმენს, სხვა შეხება არასოდეს მქონია. საპარლამენტო უმრავლესობას იმედი აქვს, რომ ის გასაძლიერებლად არის შესული.  რეალურად გააძლიერებს თუ არა გუნდს, გამოჩნდება ძალიან მალე, როდესაც მოუწევს გადაწყვეტილების მიღებისას პოზიციის დაფიქსირება. დავინახავთ, რას დაუჭერს მხარს _ მონურ გადაწყვეტილებებს, რომელსაც ძალიან ხშირად ვხვდებოდით, ერთსულოვნების სახით, თუ იქნება გამორჩეული ადამიანი საკუთარი ხედვით. მე ნაკლებად მჯერა ამის, თუმცა წინასწარ არაფრის გაცხადება არ შემიძლია.

_ მიმდინარეობს ოკუპაციის მსხვერპლთა ხსოვნის კვირეული. ზოგადად, უმცირესობის, ასევე პირადად თქვენი პოზიცია ამ დღეების აღნიშვნის კუთხით ცნობილია. თუ იგეგმება თქვენს გუნდში ერთიანი აქტივობა ამ კუთხით პარლამენტში და რა სახის?

_ საქართველოში არავინ არასდროს არ აღნიშნავდა ამ დღეს. ეროვნული მოძრაობის დროს გაიგო ხალხის უმრავლესობამ ამ ტრაგიკული თარიღის შესახებ. ბუნებრივია, შევარდნაძე არასოდეს აღნიშნავდა ამ თარიღს, რადგან რეჟიმი, რომელიც იმ დროს არსებობდა, ცხადია, შინაგანი განწყობით არ უპირისპირდებოდა წითელი არმიის შემოსვლის დღეს. ეს აღნიშვნა წინა ხელისუფლების ტრადიცია გახლავთ, კონკრეტულად კი გიორგი კანდელაკის ინიციატივა და ჩვენ პირობა გვაქვს დადებული, სანამ ცოცხლები ვიქნებით, ყოველთვის ერთიანი ძალებით აღვნიშნოთ ეს დღე. ღონისძიებები ახლაც ტარდება პარლამენტში. უმრავლესობაც შემოუერთდა და მოხარულები ვართ მათი გადაწყვეტილებით.

_ ბევრს ახსოვს თქვენი გამოსვლები და აქტიურობა 1991-92 წლების სამხედრო გადატრიალების დროს. თქვენთან ერთად მაშინ გადაღებულ ვიდეოებში საკმაოდ ხისტ პოზიციას გამოხატავენ პირები, რომლებიც დღეს „ნაციონალური მოძრაობის“ მოწინააღმდეგეებად მოიაზრებიან. რა შეიცვალა მათში? რა გადაფასდა? მათი პრეტენზიებიდან „ნაცმოძრაობის“ მიმართ, რომელიმეს ეთანხმებით?

_ მე არ ვიცი, მათში რა შეიცვალა. ვიცი, რომ მე მაშინაც ვებრძოდი საქართველოს მტერს და ოკუპანტს _ ეს გახლავთ რუსეთი, ახლაც ვებრძვი ამ ბოროტ ძალას. ჩემში, ბუნებრივია, არაფერი შეიცვლებოდა. ადამიანები, რომლებიც ვერ ფიქრობენ, რომ  უმრავლესობაში იმისთვის არიან, რათა ქვეყანას სასიკეთოდ წაადგნენ, ეს მათი პრობლემაა. ცხადია, მე ჩემს ყოფილ თანაგუნდელებზე ხელაღებით ლაპარაკი არასოდეს მომინდება. ეს არის თემა, რომელიც მეც ძალიან მტკენს გულს და ცხადია, მიკვირს მათი პოზიცია, მაგრამ ჩემი პოზიციის არ მრცხვენია, ვინაიდან ის დამოკიდებულება, რომელიც მქონდა რუსეთის მიმართ, მაქვს დღესაც და მექნება მანამდე, ვიდრე საქართველოს დეოკუპაცია არ მოხდება. ასე რომ, ჩემში არ უნდა იყოს პრობლემა.

_ თქვენ საკმაოდ აქტიური ხართ სოციალურ ქსელში. ხომ არ აპირებთ ამ აქტივობის შემცირებას პარლამენტის წევრის სტატუსის მიღების გამო?

_ არა, არ შევწყვეტ. მე პარლამენტის წევრი მანამდეც ვიყავი, თუმცა აქტიური გახლდით მაშინაც.

_ როგორ ფიქრობთ, როგორც ბოლო სტატუსში დაწერეთ, „გამოყვება ავტობანს“ „ქართული ოცნების“ რღვევის პროცესი?

_ დარწმუნებული ვარ, ასე ფიქრის საფუძველს მაძლევს გამოცდილება, ის პოლიტიკური ვითარება, რომელიც ქვეყანაშია და ისტორიული მაგალითები, რომლის შემსწრეც ჩვენი თაობა გახლავთ.

_ არსებობს ინფორმაცია, რომ „პატრიოტთა ალიანსი“ აჭარაში გარკვეულ აქტივობებს გეგმავს, რაშიც მოიაზრება შენობების პიკეტები, სტრუქტურების პარალიზება და ა. შ. თქვენი აზრით, რა პოზიციას დაიკავებს ხელისუფლება? აღკვეთს პოლიცია ამ მცდელობებს, თუ „პატრიოტთა ალიანსის“ აქტივობა ხელისუფლების ფარულ სურვილებს ემთხვევა?

_ რანაირად შეიძლება აღკვეთოს ხელისუფლებამ იმ ძალის აქტივობა, რომელსაც თავად წარმოადგენს? დარწმუნებული ვარ, ქართული საზოგადოების უმრავლესობას ეს ესმის. იციან, რომ დღეს ადამიანები ერთი განზრახვით მოვიდნენ ხელისუფლებაში და ერთ პოლიტიკას ავითარებენ, ეს გახლავთ ცალსახა რუსული პოლიტიკა, ამ ფლანგის გამგრძელებელია „პატრიოტთა ალიანსი.“

თუმცა ხელისუფლებას სჭირდება ახალი ფრთის გაძლიერება და, თავისთავად, ამ რეალობაში აჭარის რეგიონი გახლავთ მნიშვნელოვანი, სადაც სწორედ ამ ალიანსმა დაიწყო თავისი მუშაობა, თუ არ ვიცი, რა ვუწოდო… წარმოდგენა არ მაქვს, რა უნდა ქნან. ვერ გეტყვით, ჯერ წარმოუდგენელია, შენობების პიკეტირება მოახდინონ, რომელიც შეთანხმებული არ არის ხელისუფლებასთან. მათ არაფერი მოსათხოვი არ აქვთ. მაგალითისთვის ავიღოთ აჭარის უმაღლესი საბჭო, როგორ შეიძლება „პატრიოტთა ალიანსმა“ აქ მოაწყოს აქცია? რა უნდა მოითხოვონ? ავთანდილ ბერიძეს დაკარგული აქვს ძალა, არჩილ ხაბაძე არაფერს წარმოადგენს. აჭარაში მათი ბედი გადაწყვეტილია.

_ მაშინ რა აზრი აქვს იქ აქციების დაწყებას?

_ ამას მხოლოდ ის აზრი აქვს, რომ `პატრიოტთა ალიანსი” გახდეს შემაფერხებელი ძალა იმ ოპოზიციური მოძრაობისა, რომელიც აჭარაში ავანგარდში მოდის.

_ ვის გულისხმობთ ამ შემთხვევაში, „ნაციონალურ მოძრაობას“, თუ ირაკლი ალასანიას?

_ მთლიანად ოპოზიციურ ძალას. თავისთავად უმრავლესობა გახლავთ „ნაციონალური მოძრაობის“ და მასთან ერთად არიან სხვა პარტიები, რომლებიც არ იზიარებენ ხელისუფლების პოლიტიკას. დიდი ძალისხმევა წამოვა „ნაციონალურ მოძრაობაზე“, სწორედ ამიტომ სჭირდებათ იქ შემაფერხებელი ძალა.

_ როგორ შეაფასებთ უკრაინაში წინა ხელისუფლების წარმომადგენელთა მასობრივ დანიშვნებს? თქვენც ხომ არ გქონიათ შეთავაზება?

_ მე შემოთავაზება არ მქონია, თუმცა დიდი ინტერესით ვადევნებ თვალს  უკრაინაში მიმდინარე მოვლენებს. ნებისმიერი გონიერი ადამიანისთვის გასაგებია, უკრაინაში მიმდინარე მოვლენები რა კავშირშიცაა ჩვენს ევროპულ მომავალთან. ფაქტია ისიც, რომ ჩვენ ორივეს გვყავს ერთი მტერი. მნიშვნელოვანია, როგორ მოხერხდება იქ საქართველოს გამოცდილების გაზიარება. თითოეული ქართველის წარმატება კი ჩვენი ქვეყნისთვის კიდევ ერთი წარმატებაა და დიდი ინტერესი და მოლოდინი გვაქვს იმისა, რომ ეს ადამიანები მალე დაუბრუნდებიან საქართველოს.

_ რა სახის აქტივობა იქნება თქვენი პრიორიტეტი პარლამენტში და როგორ ფიქრობთ, მივა ეს პარლამენტი 2016 წლამდე, თუ ვადამდელ არჩევნებს ელოდებით?

_ ჯერ რთულია წინასწარ ამის პროგნოზირება, თუმცა არ ვისურვებდი, რომ ვადაზე ადრე დაშლილიყო პარლამენტი. ცხადია, ქვეყანაში მძიმე ვითარებაა, ამიტომ საზოგადოება გამოთქვამს პროტესტს. მიუხედავად ამისა, ნებისმიერ შემთხვევაში სასურველია, რომ შეცვლა მოხდეს არჩევნების გზით.

რაც შეეხება ჩემს პრიორიტეტებს: პრიორიტეტია ყველა მნიშვნელოვანი საკითხი, რაც საზოგადოებისთვის აქტუალურია. ცხადია, ამ თემის ირგვლივ განვითარდება ჩემი ინტერესებიც. ჯერ არ დამდგარა პარლამენტში ჩემი უფლებამოსილების საკითხი, ამიტომ წინასწარ საუბარი არ მიმაჩნია გამართლებულად. დავით საყვარელიძე იყო იურიდიულ კომიტეტში, თუმცა ეს არ ნიშნავს, რომ მეც ამ კუთხით ვიმუშავებ.

_ 21 მარტს თქვენმა გუნდმა დაგეგმა საპროტესტო აქცია, რასაც წინ უსწრებდა უმცირესობის მოთხოვნით გამართული რიგგარეშე სესიის ჩაშლა. როგორ ფიქრობთ, უმრავლესობამ რატომ ჩაშალა ეს სესია და რას ელით დაგეგმილი აქციისგან?

_ უმრავლესობის მხრიდან ეს იყო უპასუხისმგებლობა.

21 მარტს ჩვენ მიერ დაგეგმილი საპროტესტო აქცია თავისი შინაარსით აერთიანებს ყველა ადამიანს და ყველა პრობლემას, რომელიც დღეს საზოგადოებაში არსებობს, განსაკუთრებით ბოლო თვეების მანძილზე. ჩვენ კიდევ ერთხელ უნდა ვუთხრათ ხელისუფლებას, რომ საზოგადოების ტკივილი გაიზიაროს.

ეს იქნება გამაფრთხილებელი აქცია. ვფიქრობ, ბევრი ხალხი მოვა. ჩვენ მოვუწოდებთ ადამინებს  კონსოლიდირებას, ხოლო ხელისუფლებას, _ თუ ის ვერ მოახერხებს საზოგადოების პრობლემების გადაჭრას, წავიდეს!

 

დოროთე გითოლენდია