ნატო ჩხეიძე: „რუსო ოლიგარქო, შენი წასვლის დროა!“

მას შემდეგ, რაც პრეზიდენტმა სალომე ზურაბიშვილმა განაცხადა, რომ გიორგი რურუას, რომელსაც მოსამართლემ ოთხწლიანი პატიმრობა შეუფარდა, არ შეიწყალებს, პარტია „სახელმწიფო ხალხისთვის“ პოლიტსაბჭოს ლიდერმა და „ძალა ერთობაშიას“ წევრმა, ნატო ჩხეიძემ, სოციალურ ქსელში დაწერა:

„ჩემზე კარგად იცით ქართველმა საზოგადოებამ ყველაფერიო და მაგიტომ რურუას არ შევიწყალებო, _ ბრძანებს ქ-ნი პრეზიდენტი.
ქართველი საზოგადოების ნაწილი ვარ მეც და ვიცი, რომ: მოქალაქე სალომე ზურაბიშვილი და მოქალაქე გიორგი რურუა ერთად უპირისპირდებოდნენ საქართველოს პირველ პრეზიდენტს და ორივენი თანამოაზრენი იყვნენ იდეურად.
ვიცი, რომ: ეროვნული მთავრობის დამხობის მერე ახალ ხელისუფალს მოქალაქე რურუა საზღვარგარეთ გაერიდა, მაგრამ მონახეს, მიუსაჯეს ციხე და ბოლომდე მოიხადა სასჯელი.
ვიცი, რომ: მოქალაქე ზურაბიშვილი ისედაც საზღვარგარეთ ცხოვრობდა და როცა მონახეს, „მიუსაჯეს“ მინისტრობა და ვადამდე გაათავისუფლეს.
ვიცი, რომ: რაც ვიცით, იმის სასჯელი დიდი ხნის წინ უკვე იყო და ისიც ვიცით, რომ რაც უკვე იყო, ორჯერ არ უნდა მოხდეს.
ვიცით, რომ მოქალაქე რურუას ახლა პოლიტიკურ პატიმრად აღიარებს ჩვენი მეგობარი დემოკრატიული დასავლეთი და ასეც გააგრძელებს, თუ პოლიტპატიმარ რურუას არ გაათავისუფლებენ.
ვიცით, რომ: თუ მოქალაქე რურუას არ გაათავისუფლებენ, ხელისუფლებიდან ხომ ისედაც წასასვლელია „ოცნების“ მთავრობა და შინაურ-გარეული ვითარება ისეთია, რომ სულ კინწისკვრით მიაბრძანებენ.
ვიცით, რომ: მოქალაქე რურუას ოცნება სწორედ ეგ არის _ „ოცნების“ კინწისკვრით წასვლა.
ჯერ არ ვიცით, მაგრამ ისე ეტყობა, რომ პრეზიდენტის ოცნებაც ეგ ყოფილა.
ჰოდა, იდეურად ახლაც თანამოაზრენი გამოდიან ქ-ნი ზურაბიშვილი და ბ-ნი რურუა, _ ეს ხუმრობით…
ისე კი მშვენივრად ვხედავთ და ვიცით, რომ: „ოცნების“ შეფასებაში თანამოაზრეა ერი და ბერი, დიდი და პატარა, ქალი და კაცი, ლოთი და პირაკრული.
ჰოდა, ვიცით, რომ: აგერ, ოქტომბერი და აგერ, საქართველოს მოსახლეობის ლოგიკური გადაწყვეტილება“.

სხვათა შორის, „ქრონიკა+“-ის ინფრომაციით, ოქტომბრის არჩევნებზე „ძალა ერთობაშია“ ნატო ჩხეიძეს ხაშურისა და ქარელის ოლქის მაჟორიტარ კანდიდატად განიხილავს, თუმცა ჩვენთან საუბრისას რესპონდენტი ამ ინფორმაციას არც ადასტურებს და არც უარყოფს.
„ქრონიკა+“ „სახელმწიფო ხალხისთვის“ პოლიტსაბჭოს ლიდერს, დეპუტატ ნატო ჩხეიძეს ესაუბრა:

_ ქალბატონო ნატო, დიდი თუ პატარა ხვდება, რომ ქვეყანაში კრიმინოგენური ვითარება დაძაბულია. თქვენი აზრით, ამის საბაბ-მიზეზი რა არის _ დაუსჯელობის სინდრომი, ხელისუფლებისა და კრიმინალის კოლაბორაცია თუ სხვა რამ?
_ თქვენს დასმულ კითხვაზე პასუხი, პრაქტიკულად, თავადვე გაეცით _ თუ ამის ნება არ არსებობს, კრიმინალი ვერც ერთ ქვეყანაში ვერ მომძლავრდება. საერთოდ, კრიმინალი ყველგანაა და სწორედ ამიტომაც, ყველა ქვეყანაში კრიმინალთნ მებრძოლი სტრუქტურებიცაა.
_ კრიმინალთნ მებრძოლი სტრუქტურა საქართველოშიცაა.
_ დიახ, მაგრამ ეს სტრუქტურა _ შსს იქნება, პროკურატურა თუ სასამართლო, კრიმინალის წინააღმდეგ კი არ იბრძვის, არამედ საზოგადოებისთვის აშკარაა, რომ დამნაშავეებს ხელს აფარებს და ცხადია, კრიმინალიც ამიტომ მომძლავრდა.
_ ამ „ხელის დაფარებას“ არაპროფესიონალიზმით ხსნით თუ „ოცნება“ დამნაშავეებთან, უბრალოდ, ვალშია და სხვანაირად მოქცევა არ შეუძლია?
_ არ მგონია, რომ პრობლემა არაპროფესიონალიზმი იყოს. პირიქით, სწორედ პროფესიონალები ჰყავთ ჩაბმული, რომ იმ კრიმინალისგან, რომელსაც ხელს აფარებენ, რაც შეიძლება ნაკლები კვალი დარჩეს.
_ თუ ასეა, მმართველი გუნდი, ნუთუ, ვერ ხვდება, რომ ყველაფერი ეს არჩევნებზე ცუდად მიუტრიალდება?
_ სამწუხაროდ, ვერ ხვდება ან იმედი აქვს, რომ ამას მოუვლის.
_ ისე, ამ კრიმინალმა რიგითი მოქალაქეების კარზე, როგორც იტყვიან, ახლა დაიჩოქა, თორემ ჯერ კიდევ ორი წლის წინ იგივე „ომეგამ“ ღიად დაიწყო იმაზე საუბარი, რომ მთავარ პროკურორსა თუ სხვა მაღალჩინოსნებს ბიზნესმენები სარდაფებში ჩაჰყავდა და „კრიმინალურ რაზბორკებს“ უწყობდა, ანუ საზოგადოებას მაშინ უფრო მეტად რომ ეაქტიურა, დღეს ქუჩაში გასვლის შიში მაინც გვექნებოდა?
_ საერთოდ, აქტიური რომ იყოს, საამისოდ საჭიროა, საზოგადოება ქვეყანაში არსებულ პრობლემას ძალიან ნათლად ხედავდეს. ხალხი პრობლემას ნათლად კი მაშინ ხედავს, როცა ეს პრობლემა მომძლავრებულია. პრობლემის ჩანასახს კი ის ცალკეული ადამიანები ხედავენ, რომლებიც ამის შესახებ საუბრობენ კიდეც, მაგრამ საზოგადოება მაინც ფიქრობს, იქნებ, ასე არ არის, ანუ დავიჯერო თუ არაო? სწორედ ამიტომაცაა, რომ ამ მხრივ პირველი მერცხალი გაზაფხულს ვერ „ქმნის“, თუმცა თუ ეს პირველი მერცხალიც არ იქნება, აზრის გადატეხა ვერ მოხერხდება.
_ ე. ი., ორი წლის წინ, როცა „ომეგა“ კოშმარულ ამბებს ჰყვებოდა, საზოგადოებამ ბოლომდე არ დაიჯერა, ანუ ჩათვალა, რომ „სარდაფში ჩაყვანა“ მასობრივ სახეს არ მიიღებდა?
_ გარკვეულმა ადამიანებმა, ცხადია, დაიჯერეს და ისიც თქვეს, ამას ჩვენც ხომ ვფიქრობდით ან ამას ჩვენ რატომ ვერ მივხვდითო, მაგრამ იმას, რომ ასეთი ამბავი გარეთ გამოიტანო და საზოგადოების სამსჯელო გახადო, გამბედაობა სჭირდება! გამბედაობაში კი თავიდანვე ყველა თუნდაც იმიტომ ვერ წამოგყვება, რომ ჯერ უნდა იმსჯელოს. ამ მსჯელობას დრო უნდა და ამასობაში, ფაქტს ფაქტი ემატება. მაშინ კი, როცა ფაქტი უკვე ბევრია, მსჯელობა საჭირო აღარაა, რადგან ყველაფერზე თავად ფაქტები ღაღადებენ.
ხომ გახსოვთ, თავის დროზე, ილიამ ბრძანა, ქვათა ღაღადიო და, დიახ, ხელისუფლების თითოეული ნაბიჯი კრიმინალთან ალიანსზე უკვე თავად ღაღადებს!
_ აი, ყველაფერ ამის გათვალისწინებით, სააკაშვილისდროინდელი ლოზუნგი _ ნულოვანი ტოლერანტობა ან, გნებავთ, ყველანი ციხეში, გამართლებულად ხომ არ გეჩვენებათ?
_ ვერ გეტყვით, ტოლერანტობა ნულოვანი უნდა იყოს თუ სხვანაირი, მაგრამ ხელისუფლების სტრუქტურებმა თავიანთი საქმე ისე უნდა აკეთონ, რისთვისაც არსებობენ! სამწუხაროდ, ეს სტრუქტურები ახლა პირიქით მუშაობენ და ქვეყანაც თავდაყირა ამიტომ დგას! აი, აქედან გამომდინარე, ეს სისტემა შესაცვლელია!
_ ისე, ქალბატონო ნატო, თქვენი დაკვირვებით, ხალხი დარწმუნებულია თუ არა, რომ ოქტომბერში „ოცნება“ ხელისუფლებიდან აუცილებლად წავა?
_ დიახ, ვფიქრობ, რომ ხალხში ასეთი განწყობაა. განწყობის გარდა, მართალია, დემოკრატია არაა, მაგრამ კონსტიტუციით, დემოკრატიული და დამოუკიდებელი ქვეყანა ვართ.
_ დიახ, ასეა, მაგრამ ვერ ვხვდები, ეს რა შუაშია?
_ დამოუკიდებელი და დემოკრატიული ქვეყნის აუცილებელი პირობაა, რომ ამ ქვეყანაში არსებული პარტიები ხელისუფლებას ცვლიდნენ, ანუ ხელისუფლებაში პარტიების მონაცვლეობა იყოს. დიახ, დემოკრატია სწორედ ისაა, რომ ქვეყნის სათავეში სულ ერთი კი არა, სხვადასხვა პარტია იყოს.
„ოცნებას“ საბჭოური მენტალობა აქვს, რომ ქვეყანა პარტიაა და საზოგადებაზე ზემოქმედებას ამ მენტალობით აგრძელებს. საზოგადოებას კი დიდი ხანია, აღარ სჯერა, რომ პარტია ქვეყანაა. ქვეყანა ქვეყანა, ანუ საზოგადოებაა. პარტიები კი სათავეში გარკვეული დროით მოდიან, _ აი, დემოკრატია სწორედ ესაა და ის დემოკრატიული ქვეყნებიც, რომლებიც ჩვენი სტრატეგიული პარტნიორები არიან, ზუსტად ამისკენ მიგვითითებენ. კერძოდ, ისინი გვეუბნებიან, დემოკრატიული ქვეყანა რომ ააშენოთ, ხელისუფლება უნდა შეიცვალოს. ასეა ჩვენთან და შენთანაც ასე უნდა იყოსო.
მოკლედ, თუ ევროსტრუქტურაში ინტეგრაცია გვინდა, ეს მენტალობა უნდა გადმოვიღოთ, რომ ხელისუფლებაში რომელიმე პარტია ორი ვადით უნდა იყოს და მერე შეიცვალოს.
ზოგადად, ძალაუფლება, როგორც ამბობენ, რყვნის. რვა წელიწადი კი ის დრო არაა, რომ ვინმემ გარყვნა მოასწროს. ამიტომ რვა წლის შემდეგ ხელისუფლებაში სხვა უნდა მოვიდეს და, როგორც გითხარით, სწორედ ესაა დემოკრატიის არსი.
_ რვა წელი, შეიძლება, გასარყვნელად საკმარისი დრო არაა, მაგრამ ამ დროში „ოცნებამ“ გარყვნა მაინც მოახერხა. არ მეთანხმებით, ქალბატონო ნატო?
_ წეღანდელი თქმისა არ იყოს, „ოცნებას“ საბჭოური არსი აქვს, თუ ხელისუფლებაში მოვედი, სანამ ცოცხალი ვარ, სულ ხელისუფლებაში უნდა ვიყოო. ადვილად სწორედ ამიტომაც გაირყვნა.
საერთოდ, საბჭოური მენტალობისთვის ხელისუფლებაში მყოფი ადამიანების პრივილეგირებულობა, ანუ კანონდაუმორჩილებლობაა დამახასიათებელი _ ე. ი., კანონს, ხელისუფლებაში მყოფების გარდა, ყველა უნდა დაემორჩილოს!
ისე, საბჭოური მენტალობა დიდი ხანია, გადავარდა. ეს, უბრალოდ, ნაშთია, რომელიც ცხადია, პოლიტიკურად უნდა მოისპოს!
_ გეთანხმებით, მაგრამ ისიც ვაღიაროთ, რომ ადამიანები პოლიტიკისა და პოლიტიკოსების მიმართ ნიჰილიზმით არიან განწყობილნი. ჰოდა, ამის გათვალისწინებით, როგორ ფიქრობთ, მოსახლეობას ოპოზიციის იმედი აქვს, რომ თუ ხელისუფლებაში მოვიდა, ყველაფერს შეცვლის?
_ საზოგადოებაში ხელისუფლება და ოპოზიცია არსებობს. თუ ხელისუფლება აღარ მოგწონს, მაშინ ოპოზიციის იმედი უნდა გქონდეს. აბა, სხვანაირად ქვეყნის ყოფა პოლიტიკურად როგორ უნდა შეიცვალოს, თუ ოპოზიციის იმედი არ გექნება და ხელისუფლებაში ის არ მოვიდა? ეს ცნობიერება ხალხში გამჯდარია.
_ შეიძლება, მაგრამ ხალხს მაინც ახალი სახეების მოთხოვნა აქვს.
_ პოლიტიკაში ახალი სახეები თავისით უნდა გამოჩნდნენ.
_ ეს როგორ?
_ თუ ადამიანს პოლიტიკა არ აინტერესებს და ამ მხრივ აქტიური არაა, რამდენიც უნდა ვთქვათ, ესა თუ ის ქალი ან კაცი პოლიტიკაში კარგი იქნებაო, კარგი ვერ იქნება. პოლიტიკა აქტიურობის გარეშე არ არსებობს და ეს ახალი სახეებიც ხალხმა სწორედ ამ აქტიურობით უნდა დაინახოს! თუ ახალ სახეს ვერ ვხედავ, მაშინ ვინც აქტიურობს, ვინმე ისევ იმ ძველი სახეებიდან უნდა შევარჩიო.
_ ქალბატონო ნატო, მართალია, პოლიტიკაში 20 წელზე მეტია, ხართ, მაგრამ პარტიას სათავეში ახლაღა ჩაუდექით. შესაბამისად, ამ კუთხით ქართული პოლიტიკისთვის ახალი სახე ხართ?
_ აბა, რა გითხრათ? _ ეს ჩემგან ცოტა რთული შესაფასებელია.
_ რატომ?
_ კი ბატონო, პოლიტიკაში _ პარლამენტში დიდი ხანია, ვარ. საზოგადოებრივი აქტიურობის თვალსაზრისით, შეიძლება, ახალი სახე ვარ, მაგრამ საკანონმდებლო ორგანოში ჩემს მოვალეობას ყოველთვის მაქსიმალურად ვასრულებდი და ვასრულებ _ თითქმის არ ყოფილა კანონპროექტი, რომელზედაც ჩემი დამოკიდებულება კომიტეტზე არ დამეფიქსირებინოს.
მოკლედ, ჩემს მოვალეობას საზოგადოების წინაშე მაქსიმალურად ვასრულებ, თუმცა მეორეა, ყველაფერ ამას საზოგადოება რამდენად აქტიურად და რეგულარულად ხედავს. ამიტომ შესაძლებელია, რომ ახალ სახედაც ჩავითვალო.
_ ასეა თუ ისე, პარტიის ლიდერობა ახალი გამოწვევაა. ამ შემოთავაზებას რატომ დასთანხმდით და, საერთოდ, მას შემდეგ, რაც „სახელმწიფო ხალხისთვის“ პოლიტსაბჭოს ლიდერი გახდით, თქვენს ცხოვრებაში რა შეიცვალა _ პოლიტიკურ პროცესებზე ზემოქმედების უფრო ბევრი ბერკეტი გაგიჩნდათ?
_ პარტიის ლიდერობა, რაღა თქმა უნდა, გაძლევს საშუალებას, რომ გადაწყვეტილებების მიმღები ჯგუფის მუშაობაში უფრო აქტიურად იყო ჩაბმული.
ერთია, როცა გარეთ ხარ და აუცილებელ ნაბიჯებზე საუბრობ, მეორეა, როცა იმ ჯგუფში ხარ, რომელიც გადაწყვეტილებებს იღებს. პოლიტიკური ლიდერობა სწორედ ამის აუცილებლობაა. ჰოდა, როცა ეს, ასე ვთქვათ, აუცილებლობა შემომთავაზეს, ცხადია, უარს ვერ ვიტყოდი!
_ ისე, ჩემს ხელთ არსებული ინფორმაციით, მალე შესაძლოა, კიდევ ერთი ახალი გამოწვევის წინაშე დადგეთ, ანუ „ძალა ერთობაშია“ ხაშური-ქარელის მაჟორიტარ კანდიდატად განგიხილავთ. ასეა?
_ ვნახოთ, რა გადაწყვეტილებას მიიღებენ.
_ ვთქვათ, თუ გადაწყდა, რომ ზემოხსენებულ ოლქში მაჟორიტარ კანდიდატად დასახელდით, ბრძოლისთვის მზად ხართ?
_ ბრძოლისთვის ყოველთვის მზად ვარ, რადგან მთელი ჩემი ცხოვრება ბრძოლაა. ასე რომ, ეს ჩემთვის რაღაც ახალი გამოწვევა არ იქნება!
_ იმ შემთხვევაში, თუ მაჟორიტარობის კანდიდატად არ დასახელდებით, „ძალა ერთობაშიას“ პროპორციულ სიაში იქნებით?
_ თუ მაჟორიტარი არ ვიქნები, მებრძოლად აუცილებლად დავრჩები!
_ კონკრეტულად მიპასუხეთ: სიაში იქნებით თუ არა?
_ ვერ გეტყვით. ეს მაშინ გამოჩნდება, როცა სია „დაიდება“, მაგრამ კიდევ ერთხელ ვამბობ: ბრძოლისთვის ყოველთვის მზად ვარ!
_ იმ შემთხვევაში, თუ „ოცნება“ არჩევნების შედეგებს გააყალბებს, ოპოზიციას რა ბერკეტები აქვს, რომ ხმები დაიცვას?
_ არჩევნები ახლა ვეღარ გაყალბდება!
_ ასეთი დარწმუნებული რატომ ხართ?
_ ის საშუალებები, რომლითაც არჩევნები ყალბდებოდა, მხოლოდ ჩვენმა მოსახლეობამ კი არა, იმ საერთაშორისო საზოგადოებამაც უკვე ძალიან კარგად იცის, რომელიც არჩევნებზე დამკვირვებლად უნდა იყოს.
მოკლედ, „ოცნებას“ არჩევნების გაყალბების საშუალებას არც ამომრჩევლები მისცემენ და არც _ საერთაშორისო დამკვირვებლები.
ამიტომ გაყალბების შანსი ნულის ტოლია!
_ თუ „ძალა ერთობაშია“ ხაშურისა და ქარელის ოლქში მაჟორიტარობის კანდიდატად დაგასახელებთ, ხალხისთვის სათქმელი რა გექნებათ, მით უმეტეს, იმ ფონზე, როცა მოსახლეობას დაპირებების აღარ სჯერა?
_ გააჩნია, ვინ და რას ეტყვის.
_ ჰოდა, რას ეტყვის ნატო ჩხეიძე ხალხს?
_ მე არ დავპირდები!
_ აბა?
_ სწორედ იმიტომ, რომ ხალხს დაპირებების აღარ სჯერა, მე ვიმოქმედებ! დიახ, ჩემი დევიზი დაპირება კი არა, მოქმედება იქნება!
_ რა ამის პასუხია და, თუ ელოდებით, რომ არჩევნებამდე დასავლეთმა და, მათ შორის, აშშ-მაც ივანიშვილს სანქციები დაუწესოს?
_ გააჩნია, როგორ მოიქცევა.
_ იმაზე უარესად როგორღა უნდა მოიქცეს, როცა 8 მარტის შეთანხმება არ შესრულდა და გიორგი რურუა ციხეში დარჩა?
_ დიახ, 8 მარტის შეთანხმება არ შესრულდა, თუმცა თუ „ოცნებაში“ საღი აზრი არსებობს, რურუას ციხეში დატოვება ნამდვილად გაუგებარია.
როცა გეუბნებიან, სამი პოლიტპატიმარი გყავსო და აქედან ორს ათავისუფლებ, მესამეს კი ციხეში ტოვებ, ეს შენი, ანუ ხელისუფლების მხრიდან კიდევ ერთი უგუნურობა და ისედაც არარსებული ნდობის მთლად ნულს ქვემოთ დაყვანაა!
ასეთ შემთხვევაში, ყველას მხრიდან, რა თქმა უნდა, შესაბამისი მოქმედებები იქნება, მით უმეტეს, რომ სტრატეგიული პარტნიორებისთვის _ ევროსტრუქტურები იქნება თუ აშშ _ საქართველოს მომავალი მნიშვნელოვანია!
_ სხვათა შორის, თქვენს პარტიას „სახელმწიფო ხალხისთვის“ ჰქვია. ჰოდა, თქვენი ხედვით, როგორი უნდა იყოს სახელმწიფო, რომ ხალხმა თქვას, ეს ჩემი სახელმწიფოაო?
_ პარტიის სახელი ძალიან კარგია.
_ გეთანხმებით, მაგრამ მიპასუხეთ, როგორი უნდა იყოს სახელმწიფო ხალხისთვის?
_ სახელმწიფო ისეთი უნდა იყოს, რომ ყველა _ ქვეყნის სათავეში მდგომი ადამიანი და რიგითი მოქალაქე, კანონს ერთნაირად ასრულებდეს, ანუ კანონი ყველასთვის ერთნაირი უნდა იყოს! სწორედ ესაა დემოკრატია და თუკი კანონი ყველასთვის ერთნაირად შესრულდება, ამ შემთხვევაში ხალხი იტყვის, რომ სახელმწიფო მისია!
ამას გარდა, ის, რაც ხალხისთვის პრობლემურია, სახელმწიფოს თავში მდგარმა ადამიანმა უნდა გადაჭრას.
აი, ასეთი სახელმწიფო იქნება ხალხისთვის! შეიძლება, პრობლემას ვერ ხედავ, მაგრამ როცა ხალხი გეუბნება, აი, ესა და ესაა პრობლემაო, შენ, როგორც სახელმწიფომ, ისეთი კანონები უნდა მიიღო, რომ ეს პრობლემა მოიხსნას. ასეთ დროს იქმნება განცდა, რომ სახელმწიფოს შემოქმედი ხალხია!
_ თუმცა მთავარი კანონების მიღება კი არა, კანონების შესრულებაა. არ მეთანხმებით?
_ რაღა თქმა უნდა. ხალხს განცდა რომ ჰქონდეს, სახელმწიფო ჩემიაო, კანონები უნდა შესრულდეს, თორემ კანონები ქაღალდზე ახლაც წერია, მაგრამ ამ კანონების ადმინისტრირება არ ხდება.
_ მოკლედ, ვნახოთ, არჩევნები როგორ დამთავრდება…
_ ყველაფერი ის, რაც გითხარით, არახალია, მაგრამ ახალი ქმედება უნდა იყოს და ჩვენც სწორედ ამ ქმედებისთვის მოვდივართ!
„ჩვენ უნდა მივცეთ მომავალი ხალხს!“
_ წარმატებებს გისურვებთ, ქალბატონო ნატო!

გიორგი აბაშიძე