გუბაზ სანიკიძე: „მთელი „ოცნება“ რომ შეკრიბოთ, ათი გრამი ტვინი არ გამოუვა!“

გუბაზ სანიკიძე იმ პოლიტიკოსთაგანია, რომლის შეფასებები თუ განცხადებები „მეოცნებეებს“ ყველაზე მეტად აღიზიანებთ. „თუ „ქოცები“ ღიზიანდებიან, ე. ი., სწორ გზაზე ვდაგავარ“, _ ამბობს გუბაზ სანიკიძე.

ამას გარდა, ვრცელ ინტერვიუში, რომელიც ძირძველმა პოლიტიკოსმა „ქრონიკა+“-ს მისცა, რესპონდენტი სომხეთ-აზერბაიჯანის კონფლიქტსაც ეხება და აცხადებს, რომ საქართველოს წინა ხელისუფლებებისგან განსხვავებით, ჩვენი ქვეყნის დღევანდელმა მმართველმა ძალამ ამ კუთხით ნეიტრალიტეტი ვერ შეინარჩუნა და, პირდაპირ თუ ირიბად, მეზობლების კონფლიქტის მხარედ გვევლინება. ამის გამო კი, სანიკიძის თქმით, შესაძლოა, მძიმე ფასის გადახდა მოგვიწიოს.
რა იქნება ეს „მძიმე ფასი“? _ ამას წინამდებარე ინტერვიუდან შეიტყობთ. ასევე გაიგებთ, თუ ვის და რატომ სთავაზობს ღია ეთერში გუბაზ სანიკიძე დებატებს და რატომ არ ენდობა ცნობილ ექიმებსა და ინფექციონისტებს, რომლებიც კორონავირუსის მეორე ტალღას ვარაუდობენ?

_ ბატონო გუბაზ, შეუიარაღებელი თვალითაც ჩანს, რომ ქვეყანაში კრიმინოგენური ვითარება დაიძაბა, ანუ როგორც თავის დროზე „ოცნების“ ბოსებმა თქვეს, „კრიმინალი კარგადაა“. თქვენი აზრით, კრიმინალი რატომ გაიზარდა?
_ კრიმინალი იმიტომ გაიზარდა, რომ ის ხელისუფლებასთანაა შეზრდილი, ანუ ისინი ერთმანეთის მოკავშირეები არიან და საერთო ინტერესები აქვთ.
_ და ეს „საერთო ინტერესი“ რა შეიძლება იყოს? გასაგებია, რომ ხელისუფლებას კრიმინალები არჩევნებისთვის სჭირდება, მაგრამ, სანაცვლოდ, კრიმინალები რას იღებენ?
_ კრიმინალს ხელისუფლება იმისთვის სჭირდება, რომ არჩევნებიდან არჩევნებამდე ინავარდოს! ეს არის პრინციპი _ „ხელი ხელს ჰბანს“, ანუ ხელისუფლებას კრიმინალი ოთხ წელიწადში ერთხელ სჭირდება. ამიტომ დანარჩენ დროს კრიმინალი ქვეყანაში ძალიან ლაღად გრძნობს თავს!
_ იმ დროსაც, როცა „ოცნების“ კოალიციაში იყავით, ასე იყო?
_ არა.
_ არადა, კალაძისა და ექვსი თუ შვიდი სული ქურდის ამბავი სწორედ იმდროინდელია.
_ აი, საქმეც სწორედ ეგ არის.
_ ანუ?
_ ბიძინა ივანიშვილმა კოალიცია იმიტომ დაშალა, რომ ასეთი რაღაცები გამორიცხული იქნებოდა _ ამას კოალიციის ერთი სუბიექტიც არ დაუშვებდა, ამიტომ თავი მარტო დაიტოვა. დამშლელი, შიგნიდან კრიტიკოსი და განსხვავებული მოსაზრების მთქმელი აღარავინ ჰყავს და მივიღეთ ის, რაც მივიღეთ _ კრიმინალი და „ოცნება“, როგორც იტყვიან, „ერთ სულ და ერთ ხორც“.
_ კი ბატონო, მაგრამ არჩევნებამდე სამი თვით ადრე, როცა ყველაფერ ამაზე მედია გამოძიებას ღია ეთერში აწარმოებს და არაფერი იმალება, „ოცნება“ ვერ ხვდება, რომ კრიმინალთან კოლაბორაცია შესაძლოა, ძვირი დაუჯდეს?
_ კრიმინალის გაკონტროლება თითქმის შეუძლებელია და ხელისუფლება იმ პრობლემებს აწყდება, რაც მოსალოდნელი იყო. მოკლედ, ქვეყანაში კრიმინალის თარეშია, რომელსაც ხელისუფლება ხელს უწყობს, უფრო სწორად, ხელს აფარებს!
_ ე. ი., „ოცნებისთვის“ კრიმინალთან კავშირი შესაძლოა, უკვე წამგებიანიცაა, მაგრამ მეტი გზა აღარ აქვს?
_ საქართველო არც ჩინეთის სახალხო რესპუბლიკაა და არც _ ინდოეთი, რამე რომ დაიმალოს, ამიტომ ყველამ ყველაფერი ვიცით, მით უმეტეს, რომ მედია ძლიერია. ასევე პოლიტიკოსებიც არსებობენ და, რაც მთავარია, საზოგადოება ყოველდღე ხედავს, რომ მანქანებიდან სარკეებსა თუ საბურავებს იპარავენ. ყველაფერ ამას ახსნა-განმარტება რად უნდა? ჰოდა, ხალხიც რეაგირებს _ ხომ უყურებთ, „ოცნების“ რეიტინგი უკან წავიდა.
_ მთლად ასეც არ უნდა იყოს, რადგან „ედისონ რიჩერსის“ რეიტინგით, რომელიც შაქარაშვილის გარდაცვალების მერეა გაკეთებული, „ოცნებას“ თითქმის 40-პროცენტიანი ნდობა აქვს…
_ ეს რეიტინგი შაქარაშვილის მკვლელობამდეა გაკეთებული.
_ ბატონო გუბაზ, „ედისონ რიჩერსის“ საზოგადოებრივი კვლევის შედეგები „ფორმულამ“ სულ ახლახან გაასაჯაროვა.
_ დიახ, მაგრამ დანამდვილებით ვიცი, რომ საველე სამუშაოები შაქარაშვილის მკვლელობამდე ჩატარდა!
_ არ გეკამათებით, მაგრამ შაქარაშვილამდე ლუკა სირაძის, დათუნა სარალიძისა თუ თემირლან მაჩალიკაშვილის საქმე იყო, რომელსაც „ოცნების“ რეიტინგზე, წესით, უნდა ემოქმედა.
_ დიახ, მაგრამ ყველაფერი ეს ერთმანეთს ემატება.
_ ანუ?
_ აქამდე ხელისუფლება და მისი მხარდამჭერები შემთხვევითობის თეორიით სარგებლობდნენ, მაგრამ ის, რაც ხდება, უკვე შემთხვევითობა კი არა, კანონზომიერებაა!
_ ამის გამო ხალხი „ოცნებას“ ოქტომბრის არჩევნებში აგებინებს პასუხს თუ ხუთი კილო ხახვისა და კარტოფილის თემა ისევ იმუშავებს?
_ იმედი მაქვს, რომ ხალხი „ოცნებას“ პასუხს მოსთხოვს. საერთოდ, ადამიანებს სახელმწიფოს ბედი _ დამოუკიდებლობა, თავისუფლება თუ სხვა მაღალი კატეგორიები _ არ აინტერესებთ, მაგრამ საკუთარი შვილების უსაფრთხოება ყველას, მათ შორის, ნაძირალასაც აინტერესებს და ქვეყნის მოღალატესაც! შვილები ყველას უყვარს!
_ დიახ, ასეა, თუმცა ამ კრიმინალურმა კოშმარებმა ერთი მნიშვნელოვანი საკითხი ყველას დაგვავიწყა. ვგულისხმობ აზერბაიჯან-სომხეთის განახლებულ კონფლიქტს.
_ კი ბატონო, გეთანხმებით.
_ მართალია, ამ ორ ქვეყანას შორის კონფლიქტი ახლა არ დაწყებულა, მაგრამ დღეს, ვფიქრობ, სხვა მოცემულობა გვაქვს. აი, თუნდაც ყურადსაღებია აზერბაიჯანული მედიის მიერ გავრცელებული ინფორმაცია, რომ რუსეთიდან სომხეთს იარაღი თითქოს ჩვენი ქვეყნის გავლით მიეწოდა…
_ დღეს საქართველო ბანაკშია.
_ რას გულისხმობთ?
_ ისეთი სიმპტომებია, რომ საქართველო თითქოს მხარეა. იმედი მაქვს, ამ საკითხს ხელისუფლება ვერ გააფართოებს და ამ ამბავს ოქტომბერში დავამთავრებთ, თორემ საქართველო რუსეთი-სომხეთი-ირანის ვერტიკალის მხარეს აღმოჩნდება!
_ თქვენი აზრით, ყველაფერ ამაში საქართველო, როგორც მხარე, ნებით ჩაერთო თუ რუსეთმა ჩაითრია?
_ ამას რა მნიშვნელობა აქვს? ამ ხელისუფლებამ რუსეთთან დაახლოების ნება კარგა ხანია, გამოხატა. 2016 წლის შემდეგ, როცა შიგნიდან დამშლელი აღარავინ ჰყავდათ, აიწყვიტეს და ახლა საქართველო პრორუსული სახელმწიფოა _ რუსეთის გავლენების ქვეშაა!
_ სხვათა შორის, ამაზე რამდენიმე ამერიკელი კონგრესმენიც საუბრობს.
_ რა თქმა უნდა.
_ აშშ-ში იმაზეც ლაპარაკობენ, რომ საქართველოს დახმარება შესაძლოა, 15 პროცენტით შეუმცირდეს, მაგრამ ყველაფერი ეს არჩევნებზე იმოქმედებს, ანუ არჩევანს ხომ მაინც ხალხი აკეთებს და თეთრი სახლის განწყობა რას შეცვლის?
_ ყველაფერი ეს არჩევნებზე იმიტომ იმოქმედებს, რომ ჩვენი ქვეყნის მოსახლეობის 2/3 მკვეთრად პროდასავლურადაა განწყობილი.
_ ისევ სომხეთ-აზერბაიჯანის განახლებულ კონფლიქტს რომ დავუბრუნდეთ, ეს როგორ შეგვეხება?
_ ძალიან ცუდია და ძალიან მეშინია!
_ რატომ?
_ თუ ეს კონფლიქტი გაძლიერდება, ჩვენ სამი რამ გვემუქრება: 1. ლტოლვილების დიდი ნაკადი; 2. ქვეყნის შიგნით ეთნიკური დაპირისპირება სომხებსა და აზერბაიჯანელებს შორის, ანუ ღმერთმა ყველა დაგვიფაროს, მაგრამ სომეხი ან აზერბაიჯანელი ლტოლვილების დიდი ნაკადი თუ შემოვიდა, ეს დისბალანსს გამოიწვევს _ მტრობა შემოჰყვებათ და ერთმანეთს დაერევიან; 3. რუსეთი დერეფანს მოგვთხოვს.
ამ მოცემულობიდან გამომდინარე, უსაფრთხოების საბჭოს შეკრება აუცილებელია. თუ დავაკვირდებით, ხელისუფლება მთავარ საფრთხედ მხოლოდ კორონას მიიჩნევს.
_ დიახ, აქცენტი კორონასა და ბიძინას უსაფრთხოებაზე კეთდება, ანუ ჩვენი უსაფრთხოება ივანიშვილის უსაფრთხოებაზე მუშაობს. ასე რომ არ იყოს, უსაფრთხოებამ რა ნაბიჯები უნდა გადადგას?
_ განგაში უნდა გამოაცხადოს და საერთაშორისო ორგანიზაციებს უნდა მიმართოს, რათა ამ კონფლიქტზე ყურადღება გამახვილდეს, რადგან ეს მხოლოდ სომხეთ-აზერბაიჯანის კი არა, საქართველოს პრობლემაცაა!
_ წეღან თქვით, რომ რუსეთმა შესაძლოა, დერეფანი მოგვთხოვოს, რითაც, ალბათ, უფრო ცუდ ვითარებაში აღმოვჩნდებით, რადგან აზერბაიჯანის სტრატეგიული მოკავშირე ვართ, არა?
_ არა, ეს გამოგონილი თემაა. არ ვიცი, ვინ საიდან მოიტანა, მაგრამ საქართველოს აზერბაიჯანთან არანაირი სამხედრო კავშირი არ აქვს!
სხვათა შორის, აქამდე ყველა ხელისუფლება (ზვიად გამსახურდია, ედუარდ შევარდნაძეც და მიხეილ სააკაშვილიც) ახერხებდა, რომ ამ კონფლიქტში ნეიტრალიტეტი ეჭირა. დღევანდელი ხელისუფლება კი აშკარად ერთ მხარესაა გადახრილი.
_ ამ გადახრით „ოცნება“ რა მოგებას ან ხეირს ელოდება?
_ იმის იმედი აქვს, რომ რუსები მიეხმარებიან და ისევ ხელისუფლებაში დარჩება, რათა ქვეყნის ძარცვა გააგრძელოს!
_ ისე, კრემლს სომხეთ-აზერბაიჯანის კონფლიქტის გაცოცხლება რატომ აწყობს? ზოგი ამბობს, ამით პაშინიანს სჯის, რომელიც დემოკრატიულ ნაბიჯებს დგამს და დასავლეთის მიმართ სიმპათიებს არ მალავსო. ასეა?
_ ეს ცალკე საუბრის თემაა და ჯობია, ამაზე სხვა დროს ვილაპარაკოთ. საერთოდ, ერთმანეთზე ბევრი რამეა გადაჭდობილი, ანუ რუსეთს, ზოგადად, კი აქვს ინტერესი, რომ ეს კონფლიქტი იყოს, მაგრამ ვეჭვობ, ეს ინტერესი დღეს არ უნდა ჰქონდეს, რადგან იგივე აზერბაიჯანში იარაღს ძალიან წარმატებით ყიდის. „ოდეკაბეს“ ხელშეკრულება ყარაბაღის კონფლიქტში ჩართვას არ გულისხმობს, მაგრამ დღეს კონფლიქტი ყარაბაღში კი არა, უშუალოდ სომხეთ-აზერბაიჯანის საზღვართანაა და ამ შემთხვევაში „ოდეკაბეს“ მუხლები უნდა ამუშავდეს, რაც რუსეთს, რა თქმა უნდა, არ აწყობს.
_ არ ვიცი, რამდენად მართალია, მაგრამ თუ სომხეთი ფართომასშტაბიან ბრძოლებში ჩერთვება, ოფიციალური ერევნის მიერ კრემლთან დადებული ხელშეკრულების თანახმად, სომხური ჯარის მთავარსარდალი რუსი უნდა გახდეს, არა?
_ სომხეთის არმია და გიუმრის რუსული ბაზა ცალ-ცალკეა, მაგრამ, როგორც ვიცი, მათ საერთო სარდლობა ჰყავთ, ანუ სომხეთის არმია და გიუმრის სამხედრო ბაზა, რაღაც მომენტში, შესაძლოა, ერთი სამხედრო შენაერთი აღმოჩნდეს…
_ მოკლედ, მხოლოდ საშინაო კი არა, საგარეო კუთხითაც ცუდ ვითარებაში ვართ, ბატონო გუბაზ?
_ დიახ, ძალიან! საერთოდ, წარმატებულები რაში ვართ?
_ აი, მაგალითად, კოვიდინფექციასთან ბრძოლაში.
_ ეჭვი მეპარება, რომ კოვიდთან ბრძოლაში წარმატება ხელისუფლების დამსახურება იყოს. შეიძლება, ვიღაც გამოხტეს და თქვას, გუბაზ სანიკიძე რასისტიაო, მაგრამ კოვიდთან ბრძოლის წარმატება უფრო ჩვენი გენეტიკის დამსახურება მგონია. საერთოდ, სხვადასხვა ხალხი სხვადასხვა დაავადებაზე სხვადასხვანაირად რეაგირებს. აი, ლიბერალები თმის გლეჯით რომ არ გამოცვივდნენ, ერთ მაგალითს მოვიყვან: ესპანელებმა, ამერიკაში რომ ჩავიდნენ, სურდო ჩაიტანეს და ინდიელების 90 პროცენტი სურდოთი გარდაიცვალა. ამ დროს ესპანელებს ინდიელებისგან ვენერიული დაავადებები გადმოედოთ. ეს დაავადებები ინდიელებს ზიანს არ აყენებდა, მაგრამ ევროპელებისთვის ძალიან სახიფათო აღმოჩნდა.
მოკლედ, სხვადასხვა ხალხი სხვადასხვა დაავადებაზე სხვადასხვანაირად რეაგირებს და ახლაც ასეა. გენეტიკას კი, მოგეხსენებათ, გეოგრაფიაც განსაზღვრავს. კორონავირუსთან დაკავშირებით ქართველები, როგორც ჩანს, უფრო გამძლეები არიან.
ერთი კითხვა მაქვს: კარანტინი არაა და ვირუსი რატომ არ ვრცელდება?
_ ვრცელდება, ბატონო გუბაზ, ბოლო დროს, დღე არ გავა, 10-ზე მეტი ადამიანი არ დაინფიცირდეს…
_ მას მერე, რაც ბიძინას „შაბაშზე“ ასულები ვნახე, ამ ექიმებს აღარ ვენდობი! ეს ექიმები მიუკერძოებლები არ არიან. ისინი „ოცნების“ აქტივისტები არიან! ამიტომ მათი არც ციფრების მჯერა და არც _ არაფრის. მიუხედავად ამისა, დღეში ათი დაავადებული პანდემიას არ ნიშნავს. წეღანდელი თქმისა არ იყოს, ჩაკეტილი არაფერია, ადამიანები ქუჩაში ერთმანეთს კოცნიან კიდეც, ავტობუსებიც დადიან, ტაქსებიც. აქა-იქ ქორწილებიც გაჩნდა, მაგრამ ვირუსი მასობრივად არ ვრცელდება _ რა, გამყრელიძის ეშინია?
_ ეს კითხვა, ცხადია, ლეგიტიმურია, მაგრამ გამორიცხავთ, რომ „ოცნებამ“ კორონა საარჩევნოდ გამოიყენოს და ცალკეული რეგიონები ჩაკეტოს?
_ დიახ, შეეცდება, გამოვა გამყრელიძე და კიდევ ის ორი მუშკეტერი რომ ჰყავთ და იტყვის, აი, ვიღუპებით და კუბოები უნდა დავაწყოთო, მაგრამ ხალხი აღარ დაიჯერებს და არც დაემორჩილება. „ოცნებამ“ საბედისწერო შეცდომა მაშინ დაუშვა, როცა ექიმები კოჯორში მაჟორიტარობის კანდიდატების წარდგენაზე აიყვანა!
_ ექიმებმა განმარტეს, ხელისუფლების მომხრეები ვართ და კოჯორში რატომ არ უნდა ავსულიყავითო?!
_ ჰოდა, ხელისუფლების მომხრეები რომ არიან, დარჩნენ მომხრეებად და პირადად მე მათ აღარ დავუჯერებ. მარტო მე კი არა, მრავალი ათასი ქართველი აღარ დაუჯერებს.
_ სხვათა შორის, ცერცვაძემ ისიც თქვა, თუ ჩვენ სამი მუშკეტერი ვართ, დ’არტანიანი პრემიერიაო…
_ და ბიძინა ლუი მეცამეტეა, არა?! ნეტავ, რიშელიე ვინაა? _ ალბათ, კობახიძე.
_ რიშელიე არა, მაგრამ კობახიძე „ოცნების“ საარჩევნო შტაბის ხელმძღვანელია, ბატონო გუბაზ!
_ ასე განაგრძონ და, საერთოდ, კარგი სანახავები იქნებიან, თუ მუშკეტერების ტანსაცმლით ივლიან!
_ კიდევ ერთი თემა, რომელსაც უნდა შევეხო, ბატონო გუბაზ: თქვენმა ნათქვამმა, „ოცნება“ საქათმეაო, სოციალურ ქსელში დიდი აჟიოტაჟი გამოიწვია…
_ საქათმეა, აბა, რა არის?
_ ჰოდა, სოციალურ ქსელში „ოცნების“ მომხრეები გეკითხებოდნენ: როცა „ოცნებაში“ იყავით, „საქათმე“ მაშინ არ იყოო?
_ ჯერ ერთი, მე „ოცნებაში“ კი არა, „ეროვნულ ფორუმში“ ვიყავი. მეორეც, „საქათმეა“ ზუსტად! მოხვდათ „დუდუკში“? ჯერ სად არიან _ მათთვის არმაღანი და მარგალიტები მაქვს გამზადებული! მომწონს, თუ გულზე ასე მოხვდათ. ჩემზე გადაცემებს აწყობენ და ჩემს ბიოგრაფიულ ცნობებს აგროვებენ _ ეს კარგია, ე. ი., სწორ გზაზე ვარ!
_ ოპოზიციაც სწორ გზაზეა, ანუ ოპოზიციაში ყველაფერი კარგადაა?
_ არა, ყველაფერი კარგად არაა, მაგრამ ოპოზიციას დინამიკა აქვს. „ოცნებას“ კი არც დინამიკა აქვს და არც _ არაფერი. ერთი ცალტვინა კაცის იმედზეა, რომელიც ხან გამოანათებს და ხან _ არა, თვითონაც არ იცის, რა უნდა. კოჯორში „ოცნების“ შეკრება ხომ ნახეთ?
_ დიახ, თვალი მოვკარი.
_ ჰოდა, რომ შეგეკრიბათ, ყველას, ერთად აღებულს, ათი გრამი ტვინი გამოუვიდოდა! ყველა უწიგნური და გაუნათლებელია. თუ პრეტენზია აქვთ, ნებისმიერ ეთერში დამისხდნენ და პასუხს გავცემ! ზურგს უკან რომ იგინებიან და იფურთხებიან, აბა, ღია ეთერში დამისხდნენ, არ უნდათ? მთელ ქვეყანას ვაჩვენებ, როგორი უწიგნურები არიან!
_ სიმართლე გითხრათ, დარწმუნებული არ ვარ, რომ „ოცნებიდან“ თქვენთან დებატები ვინმემ გაბედოს, თუმცა ვნახოთ…
ბატონო გუბაზ, თუ ისე მოხდა, რომ „ძალა ერთობაშია“ დაიშალა და ამ პლატფორმის მიმართ სიმპათია მიხეილ სააკაშვილსაც გაუქრა, თქვენი პოზიცია როგორი იქნება?
_ არც ჩახედული ვარ და არც ინფორმირებული იმის შესახებ, „ძალა ერთობაშიას“ შიგნით რა ხდება. განხილვებში არ ვმონაწილეობ, რადგან ეს მათი შიდა საკითხია და, მგონი, წარმატებით გაარკვევენ.
_ მაშინ კითხვას სხვანაირად დაგისვამთ: საარჩევნოდ პოლიტიკაში ვისთან ერთად ჩაერთვებით?
_ პოლიტიკაში 30 წელია, ჩართული ვარ! ბიძინა „ნასკებით“ რომ „ბარიგობდა“, მაშინ მე უკვე პოლიტიკაში ვიყავი!
გაიძახიან, ბიძინას გაჰყევი და ბიძინას გვერდით რომ იყავიო, მაგრამ ბიძინას გვერდით მე კი არ ვიდექი, არამედ ჩემს გვერდით ის იდგა, თორემ მე ღრმა ოპოზიციაში ვიყავი!
2007 წლის 7 ნოემბერს ბიძინა ივანიშვილი სად იყო ან სააკაშვილზე გული როდის აიცრუა?
_ ივანიშვილმა, როგორც თავად თქვა, სააკაშვილზე 2011 წელს აიცრუა გული.
_ დიახ, ასე დაწერა და ამის დოკუმენტიც გვაქვს!
_ მოკლედ, მითხარით, არჩევნებზე რას აპირებთ, ვისთან ერთად იქნებით?
_ ვნახოთ.
_ როდისღა უნდა ვნახოთ, ბატონო გუბაზ, სამ თვემდე ცოტა დროა დარჩენილი.
_ ცოტა დრო რატომაა? _ არჩევნები სამ თვეშია, თან ეს ბლიცარჩევნები იქნება.
_ შეიძლება, მაგრამ თუ მაჟორიტარობას აპირებთ, მინიმუმ, დარეგისტრირება ხომ უნდა მოასწროთ?
_ კაცო, რეგისტრაციამდე დროა.
_ დღეს ყველაზე სიმპათიურად რომელი პოლიტიკური ძალა გეჩვენებათ?
_ დასამალი არაა, რომ მიხეილ სააკაშვილთან და, აქედან გამომდინარე, „ნაციონალურ მოძრაობასთანაც“ ძალიან სერიოზული პოლიტიკური ურთიერთობა ჩამომიყალიბდა! სხვა პოლიტიკოსებისგან განსხვავებით, ღიად და გამჭვირვალედ ვიმოქმედე.
_ ზოგი ამბობს, რომ სააკაშვილი და „ნაციონალური“ მოძრაობა ერთი და იგივე აღარაა.
_ აბა, რა არის?
_ დავიჯერო, შიდა განხეთქილებაზე არაფერი გსმენიათ?
_ არავითარი. „ნაციონალური მოძრაობა“ საქართველოში ყველაზე შეკრული პოლიტიკური ორგანიზაციაა.
_ უცებ რომ გავიგოთ, გარკვეულმა ჯგუფმა „ნაციონალური მოძრაობა“ დატოვა და სხვა პარტიაში წავიდა, მაშინ?
_ არ ვიცი, კაცო, სხვის მაგივრად როგორ უნდა გითხრათ? მე პასუხს საკუთარ ქმედებებზე ვაგებ!
ეს პოლიტიკური მანევრებია. ცუდია, რომ ოპოზიციამ ერთიან სიაზე ჩამოყალიბება ვერ მოახერხა. სხვათა შორის, ამის მომხრე ვიყავი და ამაზე მოწოდება რამდენჯერმე სააკაშვილმაც გააკეთა, თუმცა სკეპტიკურად ვიყავი განწყობილი და ვიცოდი, რომ ეს ვერ მოხერხდებოდა.
კი ბატონო, დანარჩენმა პოლიტიკურმა სპექტრმა გადაწყვიტა, რომ საკუთარი ძალა გამოსცადოს _ ამის უფლება ყველას აქვს, თან ეს ნორმალური პროცესია.
საერთოდ, პოლიტიკას ადამიანური ურთიერთობები კი არა, პოლიტიკური ინტერესები განსაზღვრავს! მორჩა და გათავდა!
ამ შემთხვევაში ჩემი პოლიტიკური ინტერესები მიხეილ სააკაშვილისა და „ნაციონალური მოძრაობის“ პოლიტიკურ ინტერესებთან სერიოზულ თანხვედრაშია! თუ ვინმე ეს არ მოსწონს, ბიძინეს მიაკითხოს და ბიძინეს ჰკითხოს, ასე რატომ მოხდა!

გიორგი აბაშიძე