კახა მიქაია: „გახარიამ „ოცნებაში“ არსებული კრიზისი დაძლია და პრემიერობა შეინარჩუნა“

სამოქალაქო აქტივისტი კახა მიქაია დარწმუნებულია, რომ შემოდგომაზე საქართველოში არჩევნები დემოკრატიულად და გამჭვირვალედ ჩატარდება. ამის თქმის საბაბს მას დასავლეთის გააქტიურება აძლევს. მიქაია მიიჩნევს, რომ ჩვენს ევროპელ და ამერიკელ პარტნიორებს ოპოზიციაც ყელში ამოუვიდათ და _ უმრავლესობაც. მისი თქმით, დასავლეთი ახლა იმას ცდილობს, რომ „ოცნებამ“ და ოპოზიციამ ერთმანეთი არ დაჭამონ. მისი აზრით, არჩევნების დემოკრატიულად ჩატარებაზე არანაკლებ მნიშვნელოვანია ირაკლი კობახიძის გაჩერება, რომელსაც აწყვეტილი აქვს და სისულელეს სისულელეზე ლაპარაკობს. მიქაია „ქრონიკა+“-სთან „ოცნების“ შიგნით არსებულ დაპირისპირებაზეც ამახვილებს ყურადღებას, თუმცა დეტალებს არ ასაჯაროებს. მხოლოდ იმას ამბობს, რომ ეს დაპირისპირება მოქმედმა პრემიერმა მოიგო.

რას მოასწავებს დასავლეთის ასეთი აქტიურობა? ვინ არის „ქართული ოცნების“ რეალური ოპოზიცია? რა კრიზისი დაძლია გახარიამ გუნდის შიგნით? ვის შეუძლია აწყვეტილი ირაკლი კობახიძის გაკავება? ჩატარდება თუ არა 30 წლის შემდეგ საქართველოში დემოკრატიული არჩევნები? _ ამის შესახებ კახა მიქაია გვესაუბრება:

_ პარლამენტის ყოფილმა თავმჯდომარე ირაკლი კობახიძემ გასულ კვირას თავისი განცხადებებით რამდენჯერმე გააოგნა მრავლისმნახველი ქართველი ერი: ოპოზიციას გოიმები ეძახა, კორუფციაზე კი თქვა, რომ ის ყველა ქვეყანაში უნდა იყოს. თქვენ რას ფიქრობთ მისი განცხადებების შესახებ?
_ მასთან დაკავშირებით კომენტარის გაკეთება ძალიან ძნელია. მინდა, თქვენი გაზეთის მეშვეობით საგანგებოდ მივმართო პრემიერ გიორგი გახარიას, რომ ამ ახალგაზრდას მიხედოს. ჩემს მიმართვაში კობახიძის ფრაზებსაც გამოვიყენებ. გასულ კვირას მისგან შემდეგი რამ მოვისმინეთ: „მე ვიტყოდი, ეს იყო არა ანგარიში, არამედ ეს იყო მასტერკლასი, რომელიც ჩაგიტარათ პრემიერმა თქვენ – გოიმური ოპოზიციის წარმომადგენლებს“; „კრიზისის წინააღმდეგ ბრძოლის პირველი ეტაპი სამთავრობო გუნდის გამარჯვებით დასრულდა, პირველი ტაიმის მერე მოგებული აქვს გუნდის მწვრთნელს 7:0“; „თუ ოპოზიცია ცვლილებებს მხარს არ დაუჭერს, შეიძლება, ცუდი არ იყოს, უფრო ნაკლებად იქნებიან წარმოდგენილნი პარლამენტში“; „კორუფცია შეიძლება ყველა ქვეყანაში იყოს“ და „ჯარიმების ჩამოწერა, ალბათ, მიუღებელი უნდა იყოს, გამომდინარე იქიდან, რომ ეს არ არის პირველი და უკანასკნელი საგანგებო მდგომარეობა, რომელიც გამოცხადდა“.
ბატონო პრემიერო, ბატონო გიორგი! ეს ირაკლი კობახიძის ბოლო ჟამის „მარგალიტებია“. მინდა, მოგმართოთ: გთხოვთ, მიხედოთ ირაკლი კობახიძეს! ამ ბოლო დროს ძალიან აიჭრა და არაადეკვატური გახდა ეს ახალგაზრდა კაცი. როგორც მითხრეს, ის უკვე არც ბიძინა ივანიშვილს უჯერებს და თქვენ წარმოიდგინეთ არც _ კახი კალაძეს, ამიტომ ბოლო იმედი თქვენ ხართ, სწორედ თქვენ უნდა ითავოთ ეს საქმე და არა ვინმე სხვამ, რადგან, როგორც ვიცი, ირაკლის ძალიან უყვარხართ და ცოტათი კიდევაც ეშინია თქვენი!!!
ბატონო პრემიერო, გულწრფელად მინდა, წარმატებები გისურვოთ ამ საქმეშიც და მოგიწოდოთ, იჩქარეთ, რადგან რაც უფრო გადის დრო, მით უფრო მძიმდება ამ ახალგაზრდა და, ერთ დროს, პერსპექტიული კაცის ჯანმრთელობის მდგომარეობა!
_ ახლა გახარიას თქვენ სერიოზულად მიმართეთ?
_ შეიძლება, ვიღაცამ ეს სარკაზმში ჩამითვალოს, მაგრამ ფაქტია, რომ ამ ბავშვს სერიოზული მიხედვა უნდა.
_ პარლამენტის ყოფილი თავმჯდომარის განცხადებები მნიშვნელოვნად აზარალებს „ქართული ოცნების“ იმიჯს. გუნდში მას არაფერს ეუბნებიან, ასეთ „მარგალიტებს“ რომ ისვრის?
_ ვფიქრობ, „ქართულმა ოცნებამ“ ირაკლი კობახიძეს სრული კარტბლანში მისცა. იმათაც რომ არ მიეცათ თავისუფლება, აშკარაა, რომ ბავშვის გაჩერება ცოტა რთულია. ისე აიწყვიტა, რომ მას მხოლოდ გახარია თუ გააჩერებს. ამიტომაც მივმართე საგანგებოდ პრემიერს.
_ ისე, გახარიამ კობახიძე როგორ უნდა გააჩეროს? ყველამ იცის, რომ პრემიერს კალაძის კლანმა სერიოზული ბრძოლა გამოუცხადა. ამ კლანს წარმოადგენს ირაკლი კობახიძეც.
_ მე არ მაინტერესებს, სად არიან კახა კალაძე, დიტო სამხარაძე, ირაკლი კობახიძე ანდა „ოცნების“ სხვა წევრები. მმართველ გუნდში არსებული კლანებითაც არ ვინტერესდები დიდად. იმის გარკვევას, თუ ვინ რომელ კლანს წარმოადგენს, ჯობს, შევაფასოთ საქართველოში არსებული სიტუაცია, რომელიც უმძიმესია. პანდემიასთან ბრძოლა, რა თქმა უნდა, წარმატებული იყო. მაგრამ ეს პატარა წარმატება ჩამოუყალიბებელ და სუსტ ხელისუფლებას ხიბლში აგდებს _ რაღაც-რაღაცები ავიწყდება.
_ ფიქრობთ, რომ საქართველოს ხელისუფლება ხიბლშია?
_ დიახ! რაღაც-რაღაცები ავიწყდება და თუ არ გაიხსენებს, ეს პანდემია მონაგონი იქნება იმ კრიზისთან შედარებით, რაც შემოდგომაზე გველოდება. წინ ძალიან სერიოზული გამოწვევებია. ხელისუფლება არის იმისთვის მზად, რომ მოსალოდნელი კრიზისი დაძლიოს? ხიბლში თუ ჩავარდებიან, ვერ დაძლევენ.
_ რა კრიზისზე საუბრობთ, რომელიც შემოდგომაზე გველოდება? პოლიტიკური სიტუაცია გამწვავდება?
_ ამ შემთხვევაში უფრო ეკონომიკურ კრიზისს ვგულისხმობ, ვიდრე _ პოლიტიკურს. ობიექტურობისთვის აქვე იმასაც დავამატებ, რომ ეს ეკონომიკური კრიზისი მხოლოდ საქართველოს არ დაატყდება თავს, არამედ მთელ მსოფლიოს, მაგრამ მასთან გასამკლავებლად საჭიროა კონკრეტული ანტიკრიზისული გეგმა. ასეთ გეგმას მე ვერ ვხედავ. რაღაც წარმოადგინეს, მაგრამ ამას სერიოზულს ვერ უწოდებს კაცი, ეს უფრო მიკიბ-მოკიბვაა და ყველაფერი ზერელედ არის ნათქვამი. კონკრეტული გეგმა ჯერ არ არსებობს. იმედი მაქვს, რომ გიორგი გახარიას კაბინეტი ამ გეგმას შეიმუშავებს.
_ თქვენ არ მოგწონთ ის გეგმა, რომელიც ხელისუფლებამ წარმოადგინა, „ოცნება“ კი ამბობს, რომ გახარიამ პარლამენტში თავისი გამოსვლით და გეგმებით ოპოზიციას 100:0 მოუგო.
_ ასეთი შეფასებები სასაცილოდ მეჩვენება _ 100:0 კი არა, 100:2 კიდევ. ობიექტურად ვთქვათ: საქართველოს ხელისუფლება ძალიან სუსტია. ამ სუსტი ხელისუფლების ფონზე გახარია ნამდვილად გამორჩეულია და მასთან შედარებით ის არის პელე _ თუ შეიძლება, რომ გახარიას პელე უწოდო. რაც შეეხება ოპოზიციას, ის კიდევ უფრო სუსტია, ვიდრე _ ხელისუფლება.
_ გახარიაზე თქვით, პელეაო, ადრე ზლატან იბრაჰიმოვიჩს ადარებდით ხოლმე. პელე იბრაჰიმოვიჩს ბევრად აღემატება. გინდათ თქვათ, რომ პრემიერმა თამაშის სტილი გააუმჯობესა?
_ კაი, იყოს იბრაჰიმოვიჩი. ისე, არც პელეა და არც იბრაჰიმოვიჩი, გიორგი გახარიაა ეგ, მაგრამ ხელისუფლების დანარჩენი წევრების ფონზე ძალიან გამორჩეული ფიგურაა. ამასთან, კიდევ ერთხელ გავიმეორებ, რომ „ქართულ ოცნებაზე“ ბევრად უფრო სუსტად გამოიყურება ოპოზიცია.
_ როცა ხელისუფლებაც სუსტია და _ ოპოზიციაც, იქ არც ქვეყნის საქმე იქნება კარგად… და არც არის საქართველოს საქმე კარგად.
_ ბანალური ჭეშმარიტებაა, რომ თუ უმრავლესობაც ძლიერია და _ ოპოზიციაც, მაშინ ქვეყანაც მდიდარი და წელგამართულია. ცივილიზებულ ქვეყნებში, საითკენაც ჩვენ მივილტვით, ასეა _ იქ ხელისუფლებაც ძლიერია და _ ოპოზიციაც. შესაბამისად, ეს ქვეყნებიც მყარად დგანან ფეხზე.
_ ცივილიზებული ქვეყნები ახსენეთ, საითკენაც გეზი გვაქვს აღებული. ბოლო კვირებში მათგან ძალიან მწვავე შეფასებები წამოვიდა. ამაზე რას ფიქრობთ?
_ სრული პასუხისმგებლობით გეუბნებით, რომ ჩვენი დასავლელი მეგობრები საქართველოში არსებულ სიტუაციას ბევრად უფრო ადეკვატურად აფასებენ, ვიდრე _ ხელისუფლება და ოპოზიცია. ვფიქრობ, რომ მომავალ არჩევნებში, რომელიც მიმდინარე წლის შემოდგომაზე უნდა გაიმართოს, ხელისუფლების მთავარი ოპონენტი იქნება არა შალვა ნათელაშვილის ფანჩატურში მოკალათებული ოპოზიცია, არამედ _ ჩვენი დასავლელი პარტნიორები.
დიახ, დასავლეთი იქნება „ქართული ოცნების“ მთავარი ოპოზიცია. ევროპა და ამერიკა აიძულებს საქართველოს ხელისუფლებას, რომ მან თამაში დასავლური წესებით აწარმოოს. სხვა შემთხვევაში ბიძინა ივანიშვილსა და მის პარტიას მოუწევთ ხელისუფლებიდან წასვლა. „ქართულ ოცნებას“, ჯერ კიდევ, აქვს შანსი, შეინარჩუნოს ხელისუფლება.
_ რა შანსები აქვს?
_ დასავლელი პარტნიორების რჩევებს თუ გაითვალისწინებენ და დასავლური თამაშის წესებით ითამაშებენ, ამ შემთხვევაში შეძლებენ ხელისუფლების შენარჩუნებას.
_ დასავლური თამაშის წესებში რას გულისხმობთ _ სამართლიან და დემოკრატიულ არჩევნებს?
_ რა თქმა უნდა. დააკვირდით ბოლო დროს საქართველოში განვითარებულ მოვლენებს: მას შემდეგ, რაც საქართველომ დამოუკიდებლობა მოიპოვა, ამერიკამ და ევროპამ უამრავი შანსი მოგვცეს, რომ აქ დასავლური ტიპის ქვეყანა შექმნილიყო და ისეთი არჩევნები ჩაგვეტარებინა, როგორც ეს ცივილიზებულ და დემოკრატიულ ქვეყანას ეკადრება. რამდენი წელია, დასავლეთი გვთხოვს, რომ გამჭვირვალე არჩევნები ჩავატაროთ. ადრე თუ ეს მხოლოდ თხოვნა იყო, ახლა ამან მოთხოვნის სახე მიიღო, რაც სერიოზული ნიშანია.
თქვენს მკითხველს ვთხოვ, რომ დააკვირდეს სენატორების, კონგრესმენებისა და ევროპარლამენტარების ენას, ეს არ გახლავთ დიპლომატიის ენა. დასავლელი პოლიტიკოსები არადიპლომატიურად ხშირად არ საუბრობენ, მაგრამ როცა მათ დიპლომატიურ ნათქვამს ვერ გაიგებ, მაშინ უკვე სულ სხვა ენაზე დაგელაპარაკებიან _ შენთვის გასაგებ ენაზე.
_ თქვენი აზრით, ახლა ჩვენთვის გასაგებ ენაზე დაგველაპარაკნენ?
_ ასეა. დასავლეთი ძალიან გაღიზიანებულია საქართველოში მიმდინარე პროცესებით. ეს გაღიზიანება იოლი შესამჩნევია. არ გეგონოთ, რომ ევროპა და ამერიკა მხოლოდ ხელისუფლების ქმედებებით არის გაბრაზებული. მათ უკმაყოფილებას ოპოზიციაც იწვევს. ვფიქრობ, დასავლეთი ძალიან დიდ წვლილს შეიტანს იმაში, რომ საქართველოში ერთხელ და სამუდამოდ ჩატარდეს დემოკრატიული, გამჭვირვალე არჩევნები, როგორიც 1990 წლის 28 ოქტომბრის შემდეგ აღარ ჩატარებულა.
_ 2012 წელსაც, ასე თუ ისე, დემოკრატიულად ჩატარდა საპარლამენტო არჩევნები. წინააღმდეგ შემთხვევაში, აქ ხელისუფლება ვერ შეიცვლებოდა.
_ მე გაგახსენებთ, თუ როგორ აქტიურობდა მაშინ ვაშინგტონი და ევროპა. დასავლეთის ძალისხმევა, რომ არა, მიხეილ სააკაშვილი ძალაუფლებას არავითარ შემთხვევაში არ დათმობდა, ეს გამორიცხულია. 8 წლის წინათ დასავლეთის ძალისხმევით ვეღარ გააყალბეს არჩევნები და ახლა ისევ დასავლეთის ძალისხმევაა საჭირო, რომ აქ დემოკრატიული და გამჭვირვალე არჩევნები ჩატარდეს. ერთი მხრივ, ეს არის ძალიან კარგი, მაგრამ, მეორე მხრივ, ცუდია.
_ ცუდი რატომ არის?
_ ცუდი იმიტომ არის, რომ როცა დასავლეთის მითითების გარეშე ვერ ატარებ დემოკრატიულ არჩევნებს, ეს შენს უმწიფრობაზე მეტყველებს.
_ თქვენ დასავლეთიდან მოსულ წერილებში გამოყენებულ არადიპლომატიურ ენაზე ისაუბრეთ. არადიპლომატიური ენა აქედან წასულ წერილებში იგრძნობოდა, თუ იგრძნობოდა. ჩვენი ხელისუფლების წარმომადგენლებმა აშშ-ის სენატის საგარეო კომიტეტის თავმჯდომარე რიშსაც კი „ნაციონალი“ უწოდეს. არც სხვა დასავლელი პოლიტიკოსები დაინდეს. ამაზე რას ფიქრობთ?
_ ეს არადიპლომატიური ენა კი არა, რა ვიცი, რა არის! კომიკურია ეს ყველაფერი. სენატორი რიში თუ „ნაციონალია“, მაშინ ტრამპიც „ნაციონალი“ გამოდის და _ ელისაბედ მეორეც. პარტნიორებთან ასე საუბარი არ შეიძლება. ეს ძალიან არასერიოზულია. სხვანაირად რომ გითხრათ, ეს ირაკლი კობახიძის დონეა. მის დონეზე თუ დავიდა მთელი „ქართული ოცნება“, მაშინ კარგად ჰქონიათ საქმე. საბედნიეროდ, დღევანდელ ხელისუფლებაში პარლამენტის ყოფილ თავმჯდომარეზე ჭკვიანი ადამიანები ჯერ კიდევ არიან.
_ „ოცნების“ სამზარეულოში მიმდინარე პროცესებზეც ვისაუბროთ. თქვენ თქვით, რომ გახარია ამ სუსტი ხელისუფლების ფონზე გამორჩეული ფიგურაა. მას გუნდის შიგნით არსებულმა რამდენიმე კლანმა ერთდროულად გამოუცხადა ბრძოლა. ამის შესახებ თქვენც გექნებათ ინფორმაციები. რა ხდება „ოცნების“ შიგნით?
_ ძალიან ბევრი რამე ვიცი როგორც გიორგი გახარიაზე, ასევე _ ბიძინა ივანიშვილზე, კახა კალაძეზე, აჩო თალაკვაძესა და ა. შ., მაგრამ სხვებისგან განსხვავებით, არის საკითხები, რაზედაც ხმამაღლა და საჯაროდ არ ვსაუბრობ. ერთი რამ ფაქტია: გახარიამ დაძლია შიდა კრიზისი.
_ რა კრიზისზე საუბრობთ?
_ „ქართული ოცნების“ შიგნით არსებულ კრიზისზე. მან ეს კრიზისი დაძლია და პრემიერის პოსტიც შეინარჩუნა. ყურადღებით ვაკვირდები მთავრობის მეთაურის მოქმედებებს, განსაკუთრებით ამ პანდემიის დროს. გახარიას ფანი არ ვარ და მას არც ძლიერ პრემიერად მივიჩნევ, მაგრამ ვერ წარმომიდგენია, რომ „ოცნებიდან“ სხვა ვინმე იყოს დღეს მთავრობის მეთაური.
_ „ოცნებაში“ არსებული შიდა კრიზისი ახსენეთ, ასეთი კრიზისი რამდენიმე იყო და თქვენ რომელზე საუბრობთ? იანვარში გახარიას ძალიან ცუდად ჰქონდა საქმე და მის შემცვლელად არჩილ თალაკვაძე მოიაზრებოდა.
_ რა საპრემიერო აჩო თალაკვაძეა. მე უკვე გითხარით, რომ ძალიან ბევრი რამე ვიცი იმაზე, თუ რა ხდება „ქართულ ოცნებაში“, მაგრამ ამ ამბებს სააშკარაოზე არ გამოვიტან. ის ვთქვი, რომ კრიზისი იყო და ამას ყველა ამჩნევდა. ეს კრიზისი ახლაც შესამჩნევია.
_ გავიგეთ, რომ „ოცნების“ შიდა სამზარეულოს გარეთ გამოტანა არ გინდათ, მაგრამ ერთი რამე მაინც გვითხარით: ის ხალხი დაამუხრუჭა გახარიამ, ვინც პრემიერის სავარძლიდან მის ჩამოგდებას ცდილობდა?
_ გახარიას ეს რომ არ შეძლებოდა, დღეს საქართველოს მთავრობის მეთაური სულ სხვა ვინმე იქნებოდა. ის პრემიერობას ვერც ივანიშვილის მხარდაჭერის გარეშე შეინარჩუნებდა.
_ გინდათ თქვათ, რომ ამ შიდა ბრძოლაში ივანიშვილმა გიორგი გახარიას მხარე დაიჭირა?
_ აქ მხოლოდ მხარის დაჭერაზე არაა საუბარი. „ქართული ოცნების“ ლიდერმა რეალურად შეაფასა ჯერ ქვეყანაში არსებული პოლიტიკური სიტუაცია და შემდეგ _ გახარიას შესაძლებლობები. „ოცნების“ წევრებიდან, პრემიერის რანგში, ამ პანდემიას თავს ვერავინ გაართმევდა.
_ იმის წარმოდგენაც არ მინდა, ამ პანდემიის დროს მამუკა ბახტაძე რომ ყოფილიყო პრემიერი.
_ ამის წარმოდგენა როგორ არ შეიძლება, მაგრამ ქვეყნის საქმე კარგად არ წავიდოდა. ვიმეორებ: გახარიას გარდა ამ კორონაკრიზისს „ოცნებიდან“ ვერავინ გაუმკლავდებოდა. რაც შეეხება ბახტაძეს, მისი პრემიერად დანიშვნა თავიდანვე საცოდაობა იყო. ის ისეთ გაუგებრობაში მოყვა, რომ მართლა უბედურად გამოიყურებოდა.
_ ახლა ოპოზიციაზეც ვისაუბროთ: აშკარად ჩანს, რომ ოპოზიცია ხელისუფლებას ისე მწვავედ აღარ აკრიტიკებს, როგორც რამდენიმე თვის წინათ. ეს პანდემიის ბრალია, თუ _ დასავლეთის აქტიურობის?
_ პანდემიაც არის შუაში, მაგრამ მთავარი მაინც დასავლეთია. ევროპა და ამერიკა შეძლებისდაგვარად აკონტროლებს საქართველოში არსებულ სიტუაციას. ყველაფერს აკეთებს, რათა პოზიცია-ოპოზიციამ ერთმანეთი არ დაჭამოს და არ სცემოს. დღეს დასავლეთზე ბევრი რამ არის დამოკიდებული.
_ თუ არჩევნები დემოკრატიულად ჩატარდა, თქვენი აზრით, რომელიმე ძალა მოიპოვებს საპარლამენტო უმრავლესობას? თუ მთავრობის დასაკომპლექტებლად კოალიციის შექმნა გახდება საჭირო?
_ წინასწარ რა გითხრათ მე ლელა კაკულიობას ვერ დავიწყებ. პროგნოზების გაკეთება უმადური საქმეა, მით უმეტეს, პოლიტიკაში. პროგნოზის გაკეთება საჭირო არაა, მაგრამ მართლა დემოკრატიულად თუ ჩატარდება არჩევნები, ვერც ერთი პარტია ვერ მოიპოვებს ვერც უმრავლესობას და მით უმეტეს, საკონსტიტუციო უმრავლესობას.
ხელისუფლება და ოპოზიცია თავის შეცდომებზე თუ ისწავლის და დასავლეთი იაქტიურებს, ვფქირობ, 30 წლის შემდეგ საქართველოში კვლავ ჩატარდება დემოკრატიული არჩევნები. 1990 წლის შემდეგ აქ არჩევნები გამჭვირვალედ აღარ ჩატარებულა. ასეთი არჩევნების ჩატარება ძალიან დიდი მიღწევა იქნება ჩვენი ქვეყნის დემოკრატიისთვის.
_ თქვენ როგორი მოლოდინები გაქვთ? ჩატარდება აქ არჩევნები დემოკრატიულად? კი თქვით, კაკულია არ ვარო, მაგრამ მეგრელებს კარგი ინტუიცია გაქვთ და თანაც შორსმჭვრეტელობაც არ გაკლიათ.
_ მეგრელები შორსმჭვრეტელები კი ვართ, მაგრამ არჩევნებამდე ჯერ კიდევ შორია. როცა მოახლოვდება ეს თარიღი, მაშინ ვილაპარაკოთ, თუ რა მოლოდინი გვაქვს.
_ რაღა დიდი დრო, 4 თვეა დარჩენილი.
_ მაინც დაველოდოთ. ხომ გითხარით, არ ვარ კაკულია. ახლა გადაჭრით იმის თქმა შემიძლია, რომ ჩვენ გვაქვს შანსი, საქართველომ დემოკრატიულ ქვეყნად ჩამოყალიბებისკენ დიდი ნაბიჯი გადადგას. თუ გვინდა, ცივილიზებული ქვეყანა ვიყოთ, არჩევნები გამჭვირვალედ უნდა ჩავატაროთ.

შორენა მარსაგიშვილი