მერაბ ბლადაძე: „ზოგიერთი პოლიტიკოსისთვის პოლიტიკა ბიზნესია!“

წინა კვირას აჭარის უმაღლესი საბჭოს დამოუკიდებელი დეპუტატი, მერაბ ბლადაძე, სკანდალში გაეხვია. ყველაფერი კი იმით დაიწყო, რომ ოპოზიციის მხარდამჭერებმა და აქტივისტებმა უმაღლეს საბჭოსთან „სირცხვილის დერეფნის“ მოწყობა გადაწყვიტეს. როგორც აქციის ორგანიზატორები ამბობდნენ, ამით კიდევ ერთხელ გააპროტესტებდნენ პროპორციული საარჩევნო სისტემის კანონპროექტის ჩაგდებას.

მოკლედ, „სირცხვილის დერეფანზე“ ინფორმაცია მედიამ გაავრცელა თუ არა, მერაბ ბლადაძემ, რომელიც აჭარის უმაღლესი საბჭოს დეპუტატი „პატრიოტთა ალიანსის“ სიით გახდა (მან ზაზა ოქუაშვილი ჩაანაცვლა, თუმცა დღეს „პატრიოტების“ წევრი აღარაა), სოციალურ ქსელში დაწერა:
„დიდება ღმერთს, რომ დღეს სესიას, საპატიო მიზეზის გამო, ვერ დავესწარი… დედის საფლავს გეფიცები, „სირცხვილის კორიდორი“ არც გაბედოთ, თორემ თავებს დაგიტეხთ თუნდაც მანდატის დატოვება მომიწიოს.
არ ვცხოვრობ ისე, რომ ეგ მაკადროთ!!!
მომავალ შეხვედრამდე და უნამუსოები ხართ!“
ბლადაძის ამ განცხადებას ოპოზიციასა და სამოქალაქო მოძრაობაში დიდი აჟიოტაჟი მოყვა. აქვე იმასაც გეტყვით, რომ ზემოხსენებული აქცია დაპირისპირების ფონზე ჩატარდა, ანუ პროტესტანტები პოლიციელებსა და დეპუტატებს დაუპირისპირდნენ.
„მოძრაობა „გაბედესა“ და „ალტერნატივის“ აქტივისტებს ჰქონდათ სასტვენები და პლაკატები წარწერებით: „იაზროვნე, ეცადე მაინც“, „დასაბმელი „ოცნება“, „თქვენ არ გენდობით“ და სხვ. დეპუტატებმა პროტესტის ფორმა დაიწუნეს და შეკრებილებთან კამათი დაიწყეს, რის გამოც საქმეში პოლიცია ჩაერთო. ფაქტს გამოეხმაურა საბჭოს თავმჯდომარე დავით გაბაიძე და მომხდარის გამო „ნაციონალური მოძრაობა“ გააკრიტიკა. მისი თქმით, თავად ასე არ იქცეოდა, როცა ოპოზიციაში იყო და ოპონენტებს მსგავს დისკომფორტს არ უქმნიდა. მანვე აღნიშნა, რომ თავს დამნაშავედ არ გრძნობს იმის გამო, რომ „ქართულ ოცნებას“ წარმოადგენს და რამდენჯერაც უნდა შეიკრიბონ აქციის მონაწილეები, საბჭო საქართველოს კონსტიტუციას ვერ შეცვლის“, _ იუწყებოდა იმ დღეს ქართული ონლაინ მედია.

იმის გასარკვევად, თუ რატომ გააღიზიანა „სირცხვილის დერეფნის“ მოწყობამ, „ქრონიკა+“ აჭარის უმაღლესი საბჭოს დამოუკიდებელ დეპუტატ მერაბ ბლადაძეს დაუკავშირდა:

_ ბატონო მერაბ, წინა კვირას სკანდალის ეპიცენტრში აღმოჩნდით. ქრონოლოგიურად მიამბეთ, რა და როგორ მოხდა?
_ იმ დღეს სესიაზე არ ვიყავი.
_ სესიას რა მიზეზით აცდენდით?
_ მოსახლეობასთან შეხვედრა მქონდა, ანუ გამოსახლების პრობლემა იყო და სესიაზე შეგნებულად არ მივედი, რადგან მიმაჩნდა, რომ იქ უფრო საჭირო ვიყავი, თან სესიაზე მაინცდამაინც მნიშვნელოვანი საკითხი არ იხილებოდა _ ცესკოს წევრი უნდა დაემტკიცებინათ და ხელს ავწევდი თუ არა, ეს ბევრს არაფერს შეცვლიდა.
ერთი სიტყვით, სესიაზე მისვლას გამოსახლებაზე მისვლა ვარჩიე. სწორედ ამ დროს ტელევიზიით გავრცელდა ინფორმაცია, უმაღლეს საბჭოსთან „სირცხვილის დერეფანს“ აწყობენო, თუმცა აღმოჩნდა, რომ „სირცხვილის დერეფანი“ არ ყოფილა და ყველაფერი მედიის ინტერპრეტაცია იყო.
სხვათა შორის, ტელევიზით იმასაც მოვკარი თვალი, რომ ახალგაზრდებს უმაღლესი საბჭოს წევრებიც შეურთდნენ. ყოველ შემთხვევაში, მათ გვერდით იდგნენ. მეც უმაღესი საბჭოს წევრი ვარ. მითხრეს, ყველაფერი ეს შენ არ გეხებაო, მაგრამ ეს ამომრჩეველმა ხომ არ იცის? პირადად მე ისეთ რამეს არასოდეს ვაკეთებ, რომ ვინმემ „სირცხვილის დერეფანი“ მომიწყოს!
_ ჯერ ერთი, კარგია, თუკი ისეთს არაფერს აკეთებთ, რომ ვინმემ სირცხვილის დერეფანი მოგიწყოთ. მეორეც, მთელმა ქვეყანამ იცის, რომ სამოქალაქო აქტივისტები მსგავს აქციებს ხელისუფლების წარმომადგენლების წინააღმდეგ მართავენ და თქვენ, ოპოზიცოონერმა, „ოცნებასთან“ რატომ გააიგივეთ თავი?
_ „ოცნებასთან“ თავი არ გამიიგივებია! შე კაი დედმამიშვილო, დააკონკრეტე, „სირცხვილის დერეფანს“ ამას და ამას ვუწყობო, თუმცა, როგორც გითხარით, „სირცხვილის დერეფანი“ საერთოდ არ ყოფილა და ეს, უბრალოდ, ტელევიზიების ინტერპრეტაცია იყო.
_ ბატონო მერაბ, შევთანხმდეთ, რომ ჯოხს მედიაზე არ გადატეხთ, მით უმეტეს, რომ გასული წლის შემოდგომიდან მოყოლებული, ანუ მას შემდეგ, რაც საქართველოს პარლამენტმა პროპორციული არჩევნების კანონპროექტი ჩააგდო, სამოქალაქო აქტივისტები მსგავსი ტიპის აქციებს „ოცნების“ წევრებს მთელი ქვეყნის მასშტაბით უწყობენ და ხელმეორედ გეკითხებით: თქვენ, ოპოზიციონერმა, მმართველ გუნდთან რატომ გააიგივეთ თავი?
_ ხომ გითხარით, რომ „ოცნებასთან“ თავი არ გამიიგივებია-მეთქი?! უბრალოდ, გავრცელდა ინფორმაცია, რომ ახალგაზრდები „სირცხვილის დერფეფანს“ უმაღლეს საბჭოს უწყობდნენ და მეც ამ უმაღლესი საბჭოს წევრი ვარ.
იცით, ყველაზე სამარცხვინო რა იყო?
_ რა?
_ ახალგაზრდების გვერდით უმაღლესი საბჭოს დეპუტატები დავინახე, რომლებიც სირცხვილის დერეფანს თავიანთ კოლეგებს უწყობდნენ. შენ, უმაღლესი საბჭოს წევრი, იქ რატომ უნდა იდგე?
_ რატომ არ უნდა იდგე?
_ ჯერ ერთი, დეპუტატი რომ ხარ, ხომ იცი, რისი შესაძლებლობები გვაქვს და რას ვაკეთებთ. მეორეც, კი ბატონო, გასაგებია, რომ უმაღლესი საბჭოს წევრი „ნაციონალური მოძრაობიდან“ ხარ, მაგრამ შენი შესაძლებლობებიდან გამომდინარე, მოქალაქეებს მაქსიმალურად ხომ ეხმარები? ყოველ შემთხვევაში, პირადად მე ასე ვიქცევი _ ჩემს სტატუსს ვიყენებ, რომ გაჭირვებულებს დავეხმარო და იგივე გამოსახლების დროს ადამიანი, იქნებ, გადავარჩინო. ეს ზოგჯერ გამომდის, ზოგჯერ _ არა, მაგრამ ვცდილობ და მგონია, რომ სასიკეთო საქმეს ვაკეთებ.
ამასაც თავი რომ დავანებოთ, აქციას ბავშვები ატარებდნენ _ „ალტერნატივა“ და ნათელაშვილის შვილის მოძრაობა რომაა, „გაბედე“.
_ „გაბედე“ ნათელაშვილის შვილის სამოქალაქო მოძრაობა კი არა, ახალგაზრდების ინტერპარტიული გაერთიანებაა.
_ აბა, ამ ახალგაზრდებს ვინმემ ჰკითხოს, რამდენი საარჩევნო სისტემა არსებობს ან პროპორციულსა და მაჟორიტარულ სისტემებს შორის რა განსხვავებაა? ამ კითხვაზე პასუხს ერთიც ვერ გასცემს.
_ რატომ გგონიათ, რომ ახალგაზრდები ამ კითხვაზე პასუხს ვერ გასცემენ?
_ მიკითხავს და პასუხი ვერ გაუციათ.
ისე, სიმართლე რომ გითხრათ, პირადად მე პროპორციული სისტემის მომხრე ვარ, მაგრამ ნულოვანი კი არა, ხუთპროცენტიანი ბარიერით.
სხვათა შორის, აჭარაში პროპორციული არჩევნები ჩვენს კონსტიტუციას მშვენივრად ერგება.
_ ეს როგორ?
_ აჭარაში, ამომრჩევლების რაოდენობიდან გამომდინარე, ბარიერი 4,7-ია, ანუ ამ საარჩევნო სისტემითაც ძალიან მშვენივრად შეიძლება, რომ აჭააში პროპორციული არჩევნები ჩატარდეს.
_ ამ დეტალებში ვერ გამოგყვებით, რადგან აჭარის საარჩევნო სპეციფიკა ნამდვილად არ ვიცი, სამაგიეროდ, იმაზე კი შემოგედავებით, რომ ამბობთ, ახალგაზრდებს გამოცდილება არ აქვთო. ბოლოს და ბოლოს, იგივე 1978 წელს ქართული ენა სწორედ ახალგაზრდებმა დაიცვეს და გადაარჩინეს! მოკლედ, ამ თაობაზე ასეთი ცუდი წარმოდგენა რატომ გაქვთ?
_ ცუდი წარმოდგენა კი არ მაქვს, უბრალოდ, იმას ვამბობ, რომ ძალიან აგრესიულად და უზრდელურად იქცევიან. ამიტომაც, პირადად ჩემთვის, ეს ახალგაზრდები დასავლური ღირებულებების მატარებლები არ არიან! დიახ, მაქარაშვილი, ბერძენიშვილი და სხვა პატარა ბიჭები, რომლებმაც არც უფროს-უმცროსობა იციან და თან თავხედურად იქცევიან, საზოგადოებისთვის ძალიან გამაღიზიანებლები არიან და დასავლური კულტურის მატარებლებად არც მე მივიჩნევ და არც _ საზოგადოება.
_ საერთოდ, საზოგადოების სახელით საუბარი მგონი, გადაჭარბებულია. ამასთან, ის დასავლური ღირებულებები იყო, გასული წლის 20 ივნისს ახალგაზრდებს თვალები რომ დასთხარეს? ეს სისხლიანი მოვლენები რატომ არ გააპროტესტეთ?
_ ვინ გითხრათ, რომ არ გავაპროტესტე? არათუ გავაპროტესტე, იმ პოლიციელების დასჯაც მოვითხოვე, რომლებმაც ძალას გადაამეტეს და ახალგაზრდებს თავში დამიზნებით ესროლეს!
_ მხოლოდ პოლიციელების დასჯა მოითხოვეთ? არ ფიქრობთ, რომ ყველაფერში, რაც მოხდა, სისტემაა დამნაშავე და ამიტომაც სისტემა უნდა შეიცვალოს?
_ რა თქმა უნდა, სისტემაც დამნაშავეა, მაგრამ მომისმინეთ.
_ დიახ, გისმენთ.
_ იქ პარლამენტში შეჭრის მცდელობა იყო და კადრებიც ყველამ ვნახეთ.
_ მაპატიეთ, მაგრამ ეს „ოცნების“ ნარატივია.
_ ხელისუფლებას შეჭრის მცდელობა უნდა მოეგერიებინა, მაგრამ ფაქტია: ძალის გამოყენება გადაჭარბებული იყო.
სხვათა შორის, გვატყუებდნენ, რომ პოლიციელები დაისაჯნენ, მაგრამ რამდენიმე სამსახურიდან გაუშვეს, ანუ სამსახურებრივი მოკვლევა ფორმალურად ჩაატარეს და სამსახურში აბსოლუტურად ყველა აღდგენილია. ყოველ შემთხვევაში, მე ასე ვიცი.
_ ისე, ბატონო მერაბ, სანამ დეპუტატი გახდებოდით, ოპოზიციურ განწყობებს უფრო მეტად ამჟღავნებდით, ახლა კი მეჩვენება, რომ თქვენი ტონი შერბილებულია. რატომ, თქვენს მსოფლმხედველობაში რა შეიცვალა?
_ ჩემს მსოფლმხედველობაში ის შეიცვალა, რომ ისეთი ძალა არ არის, რომელიც ხალხის გართიანებას შეძლებს!
საერთოდ, ჩემთვის „ნაციონალური მოძრაობის“ ხელისუფლებაში მობრუნება ძალიან სახიფათოა. ვისაც ჰგონია, რომ „ნაციონალური მოძრაობა“ არ მობრუნდება, ძალიან ცდება! სწორედ ეს მაშფოთებს.
_ ე. ი., იმის შიშით, რომ „ნაციონალური მოძრაობა“ ხელისუფლებაში არ დაბრუნდეს, „ოცნება“ სამარადჟამოდ უნდა იყოს და ცა ქუდად არ მიაჩნდეს, დედამიწა კი _ ქალამნად?
_ არა, ასე რატომ ამბობთ?
_ მე კი არ ვამბობ, თქვენი საუბრიდან ასეთ დასკვნას ვაკეთებ.
_ მე ასე არ ვფიქრობ.
_ აბა, როგორ ფიქრობთ?
_ ამ გაერთიანებულ ოპოზიციასა და ახალგაზრდებს: „სირცხვილიას“, „ალტერნატივასა“ და „გაბედეს“ მხარს ვერ დავუჭერ.
_ დამისაბუთეთ, რატომ ვერ დაუჭერთ?
_ მათ რომ ძალა მისცეთ, ყველაფერი დაინგრევა. ვიმეორებ: ესენი დასავლური ღირებულებების მატარებლები არ არიან!
ისიც მაშფოთებს, რომ ზოგიერთი პოლიტიკოსისთვის პოლიტიკა ბიზნესია!
_ ამას რის საფუძველზე ამბობთ?
_ უკვე შვილებით ჩაანაცვლეს. აი, მაგალითად, ბერძენიშვილის, ნათელაშვილისა თუ ბურჯანაძის შვილი.
_ ამ ადამიანებს უფლება არ აქვთ, რომ პოლიტიკურ ავანსცენაზე შვილები გამოიყვანონ?
_ უფლება, შეიძლება, ყველაფრის აქვთ, მაგრამ პირადად მე ხელს არ შევუწყობ, რომ ისინი ხელისუფლებაში მოვიდნენ!
_ ჯერ ერთი, ამა თუ იმ პოლიტიკური ძალის ხელისუფლებაში მოყვანა თქვენს ან ჩემს ხელშეწყობაზე კი არა, არამედ არჩევნებზეა დამოკიდებული. მეორეც, წეღან ამბობდით, „ნაცები“ მობრუნდებიანო. ახლა კი ხელისუფლებაში ნათელაშვილის, ბერძენიშვილებისა თუ ბურჯანაძის მოსვლის გეშინიათ. ბოლოს და ბოლოს, „ოცნებას“, თქვენი აზრით, ვინ ჩაანაცვლებს?
_ აბსოლუტურად ყველა „ნაცების“ გაგრძელებაა.
_ რას ნიშნავს, „გაგრძელებაა“?
_ დაფინანსებას „ნაციონალური მოძრაობისგან“ იღებენ.
_ ანუ ამბობთ, რომ მაგალითად, ბურჯანაძეს „ნაცები“ აფინანსებენ?
_ ამ შემთხვევაში, ბურჯანაძეს არ ვგულისხმობ, მაგრამ ნათელაშვილი ღებულობს, „ალტერნატივა“, „სირცხვილია“.
_ ეს ინფორმაცია საიდან გაქვთ?
_ ამაზე თავად პოლიტიკოსები საუბრობენ.
_ არ ვიცი, ვინ რას საუბრობს, მაგრამ ბატონო მერაბ, დეპუტატი ხართ და ვფიქრობ, უფრო დასაბუთებული და არგუმენტირებული განცხადებები უნდა გააკეთოთ, თორემ თქვენ მიერ დასახელებულებმა რომ მოგთხოვონ, დაგვიმტკიცე, „ნაციონალებისგან“ ვფინანსდებითო, მტკიცებულებებს წარმოადგენთ?
_ ეს ჩემი გონივრული ეჭვია.
_ თუნდაც ეს გონივრული ეჭვი რის საფუძველზე გაგიჩნდათ?
_ ყველა აქციაზე მათ უკან „ნაციონალური მოძრაობა“ დგას.
_ გასაგებია, რომ „ნაციონალების“ დაბრუნების გეშინიათ. ჰოდა, ეს შიში რომ გაქარწყლდეს, რა უფრო უკეთესი იქნება _ „ოცნება“ ხელისუფლებაში კიდევ ერთი ვადით დარჩეს თუ პოლიტიკურ ავანსცენაზე ახალი ძალა გამოჩნდეს, რომელიც „ქოცებსაც“ დაასრულებს და _ „ნაცებსაც“?
_ ისე, რაც უნდა ვიკამათოთ, ფაქტია, რომ „ნაციონალურ მოძრაობას“ ძალიან ბევრი ამომრჩეველი ჰყავს, რომელსაც ვერაფერს ვუზამთ. ამიტომ ამ პარტიის წინააღმდეგ გამოძიება თავის დროზე უნდა დაწყებულიყო და „ქართულ ოცნებას“ ისე უნდა გაეკეთებინა, როგორც „აღორძინება“ აკრძალეს.
_ „ოცნებას“ „ნაცმოძრაობა“ რომც აეკრძალა, ამით მაინც არაფერი შეიცვლებოდა, რადგან ის ასი ათასობით ადამიანი, რომელიც ამ პარტიის მხარდამჭერია, არსად წავიდოდა.
_ ამომრჩველი „აღორძინებასაც“ ჰყავდა, მაგრამ გაიფანტა.
_ სხვათა შორის, „აღორძინება“ კი არ აკრძალეს, არამედ 2004 წლის აჭარის რევოლუციისა და ასლან აბაშიძის მოსკოვში გაქცევის შემდეგ თავისით დაიშალა.
_ აკრძალვაში იმას ვგულისხმობ, რომ ლიდერებზე საქმეები აღიძრა. „ოცნებასაც“ იგივე რომ გაეკეთებინა, „ნაციონალური მოძრაობის“ ამომრჩეველი სხვადასხვა პარტიაზე გადანაწილდებოდა.
_ არ მგონია, ასე მომხდარიყო, რადგან „ნაცების“ მხარდამჭერები იდეის მიმდევრები არიან.
სხვათა შორის, თავის დროზე, უფლებადამცველი იყავით.
_ უფლებადამცველი ახლაც ვარ.
_ როცა ერთსა და იმავე საქმეზე ადამიანს ორჯერ იჭერენ, უგულავას ქეისს ვგულისხმობ, თქვენ, უფლებადამცველი მერაბ ბლადაძე, რას ფიქრობთ, ეს სამართლიანია?
_ ხანდახან ნიშნის მოგებით ამბობენ, რა, უგულავა დასაჭერი არ იყოო?! შეიძლება, დასაჭერი იყო, მაგრამ უმართავი და რადიკალური რომ გახდა, მაშინ უნდა დაიჭირო? რაც უნდა თქვან და გაამართლონ თავიანთი ქმედება, უგულავას დაჭერას პოლიტიკური სუნი ასდის!
მოკლედ, დასაჭერი თავის დროზე უნდა დაიჭირო და არ ითამაშო, ანუ ვინმე მაშინ არ უნდა დაიჭირო, როცა მკვეთრ განცხადებებს აკეთებს. ეს უსამართლობის განცდას აჩენს.
კიდევ ერთხელ ვამბობ: არ მიმაჩნია, რომ უგულავა უცოდველი კრავია და შეიძლება, ის 48 მილიონიც, რასაც ედავებიან, მართლა აქვს მითვისებული, მაგრამ რას ნიშნავს, როცა გინდა, უშვებ და როცა გინდა, იჭერ?
ისე, კულუარებიდან ხალხში ხმა გამოდის და ყველამ იცის, რაც მოხდა.
_ რა მოხდა?
_ თავიდანვე ითქვა, თუ უგულავა მორჩილი არ იქნება, ციხეში შეაბრუნებენო და ასეც მოხდა.
მოკლედ, მიმაჩნია, რომ უგულავას დაჭერას პოლიტიკური სუნი უდის!
_ რა ამის პასუხია და, ამ დღეებში ცნობილი გახდა, რომ ბათუმელ მხატვრებს, რომლებიც საფრანგეთში გამოფენაზე გაემგზავრნენ, აჭარელი ჩინოვნიკების დელეგაცია კრუასანების საჭმელად გაჰყვა. თქვენ, როგორც უმაღლესი საბჭოს ოპოზიციონერ დეპუტატს, ამან ნერვები არ მოგიშალათ?
_ ძალიან არ მომეწონა, მაგრამ იცით, აქ რაზეა ლაპარაკი?
_ რაზე?
_ ელისო ბოლქვაძის ინიციატივა იყო, რომ პარიზში ბათუმელი მხატვრების გამოფენა მოწყობილიყო, რაც ძალიან კარგია და მივესალმები.
_ ქართველების უცხოეთში წარმოჩენა, რაღა თქმა უნდა, კარგია, მაგრამ სხვა რამ გკითხეთ, ანუ რა აუცილებლობას წარმოადგენდა, რომ მხატვრებს მაღალჩინოსნებიც გაჰყოლოდნენ?
_ ბიუჯეტის ხარჯზე, ბევრი-ბევრი, სამი-ოთხი ადამიანი, მაგალითად, კულტურისა და სპორტის კომიტეტის თავმჯდომარე, აჭარის განათლების მინისტრი და ქალაქის მერი წასულიყვნენ. სიმართლე რომ გითხრათ, ეს თემა არ შემისწავლია და მხოლოდ ის ვიცი, როგორც „მთავარმა არხმა“ გააშუქა. ამიტომ ყველაფერ ამას გადამოწმება სჭირდება.
_ უმაღლესი საბჭოს წევრი ხართ და გადაგემოწმებინათ!
_ მოკლედ, თუ ბიუჯეტის ხარჯზე მართლაც 40 ადამიანი წავიდა, ეს დანაშაული და ძალიან ცუდი ფაქტია, რომელსაც შესწავლა სჭირდება.
ისე, არ მგონია, ბიუჯეტის ხარჯზე ოჯახებით წასულიყვნენ.
_ რატომ არ გგონიათ?
_ ეს კანონით არ შეიძლება.
_ კანონით ბევრი რამ არ შეიძლება, მაგრამ „ოცნებას“ ხომ თავისი კანონები აქვს, ბატონო მერაბ?
_ გამორიცხულია, ვინმეს ოჯახის წევრები პარიზში ბიუჯეტის ხარჯზე წაეყვანა!
_ კარგი… ბატონო მერაბ, არჩევნები კარსაა მომდგარი. ხომ არ უნდა ვიფიქროთ, რომ „ოცნების“ საარჩევნო სიაში იქნებით?
_ შემოთავაზება არ ყოფილა. ისე, მგონია, რომ გაერთიანებული ოპოზიციის გარდა ისეთი ძალა გამოჩნდება, ვისთანაც ჩემს თავს დავინახავ. არჩევნებში კი მონაწილეობას აუცილებლად მივიღებ!
ერთი სიტყვით, მე სიმართლეს ვლაპარაკობ. არავის დავინდობ, ვინც გასაკრიტიკებელია!
_ მახსოვს, რამდენიმე წლის წინ შიმშილობის აქცია მოაწყვეთ. აჭარაში ადამიანის უფლებები დღეს აღარ ირღვევა?
_ პოლიცია ძალას აღარ ამეტებს. ადრე კი ყველამ იცის, როგორც აწამებდნენ ადამიანებს. ისე, ჩემთვის ამოუხსნელია, ამ წამებების ორგანიზატორი ამირანაშვილი სამცხე-ჯავახეთის გუბერნატორი რატომაა?!
მოკლედ, ბოლო დროს არ გამიგია, რომ აჭარაში პოლიცია ადამიანის უფლებებს არღვევდეს და თუ ასეთი რამ მოხდება, მომმართავენ და აუცილებლად ხმამაღლა ვიტყვი!
_ აჭრის უმაღლეს საბჭოში სულ რამდენი ოპოზიციონერი ხართ?
_ შვიდი.
_ ამ შვიდიდან, თქვენ გარდა, „სირცხვილის დერეფნის“ გამო, რომელზედაც წეღან ვსაუბრობდით, კიდევ რომელიმემ იგრძნო თავი შეურაცხყოფილად?
_ არა.
_ რატომ?
_ ისინი გაერთიანებულ ოპოზიციაში არიან.
_ ანუ ყველა „ნაციონალია“?
_ არა, „ნაციონალი“ ოთხია, ერთი ბურჯანაძისგანაა, ერთიც _ ბოკერიასგან.
_ ბატონო მერაბ, თქვენ არათუ უპარტიო, არამედ უფრაქციო დეპუტატი ხართ, არა?
_ დიახ. ძალიან რთული სიტუაციაა.
_ რთული სიტუაცია რატომა?
_ იმიტომ, რომ მარტო ვარ და პარტიასაც ვერ ვხედავ, ვისთანაც გავერთიანდები. გამორიცხულია, „ნაცებთან“ ან რომელიმე ულტრალიბერალურ ძალასთან გავერთიანდე.
_ თქვენი პარტიის შექმნას ხომ არ ფიქრობთ?
_ პარტიის შექმნას ფული უნდა. საერთოდ, არჩევნებსაც ფული იგებს. ისე, კარგი იქნება, თუ ევროპული ქვეყნების მსგავსად, საქართველოშიც არჩევნებში მონაწილეობა ყველა ამომრჩევლისთვის სავალდებულო იქნება!

გიორგი აბაშიძე