სალომე ზურაბიშვილს სკანდალები არც აქამდე აკლდა, მაგრამ იმან, რაც რამდენიმე დღის წინ გააკეთა, ყველაფერი გადაფარა. კერძოდ, ქართული ენისა და კულტურის დღეზე სიტყვით გამოსვლისას, ამ „გაფრანგებულმა ქალბატონმა“, განაცხადა: „არც ჯარი გვაქვს, არც _ იარაღი და არც გვექნება, არც ის ეკონომიკური ძალიან დიდი პოტენციალი, რომ დავიპყროთ, თუნდაც, რეგიონი, მაგრამ ჩვენ გვაქვს ის უზარმაზარი, ძალიან მაგარი იარაღი, რასაც ჰქვია ცოდნა, მეცნიერება, კულტურა და ძალიან მდიდარი რეგიონი ამ მხრივ“. ზურაბიშვილის ამ განცხადებას ოპოზიციის მხრიდან მყისიერი რეაქცია მაშინვე მოყვა. საბოლოოდ, საქმე იქამდეც მივიდა, რომ ზურაბიშვილს, მისი „აყსაყდრებიდან“ (ეს სიტყვაც ზურაბიშვილის ლექსიკონიდანაა) „ოცნების“ „ფეისებიც“ გაემიჯნენ. ყოველ შემთხვევაში, „მისტერ კულულამ“, ანუ პარლამენტის ექსთავმჯდომარე ირაკლი კობახიძემ, აქეთ დაგვანამუსა, _ ეგ ქალბატონი „ოცნების“ წევრი არაა და ჩვენ პასუხს რატომ გვთხოვთო?

რაც შეეხება თავად პრეზიდენტს, რომელიც, ამავდროულად, მთავარსარდალიც გახლავთ, მან თავი ბულინგის მსხვერპლად იგრძნო და საზოგადოება დატუქსა, არ შეიძლება, პრეზიდენტს ყველა სიტყვაზე გამოეკიდოთო.
ზურაბიშვილის დაცვა მმართველი გუნდის არანაკლებ ოდიოზურმა ფიგურამ, დეპუტატმა სოფიო კილაძემ სცადა, რომელმაც გვითხრა, რომ ზურაბიშვილს სხვა რამის თქმა უნდოდა, მაგრამ რადგან ქართული კარგად არ იცის, სხვა რამე გამოუვიდაო, თუმცა საქმე ისე მარტივადაც არ არის, როგორც სოფიოს ჰგონია. ყოველ შემთხვევაში, ყოფილი სამხედრო, „მებრძოლთა ლიგის“ დამფუძნებელი ბადრი შელია, რომელიც ქართულ არმიაში 23 წელზე მეტ ხანს მსახურობდა, „ქრონიკა+“-სთან ინტერვიუში ამბობს, რომ ზურაბიშვილის ზემოხსენებული განცხადება, უბრალოდ, წამოცდენა კი არა, რუსული ჰიბრიდული ომის ნაწილია.
ამას გარდა, პროფესიონალი სამხედრო, რომელიც იძულებული გახდა, რომ ქართული არმია შარშან დაეტოვებინა, ჩვენს გამოცემას არაერთ მნიშვნელოვან ინფორმაციას აწვდის. ასე, მაგალითად, _ ბადრი შელია ამბობს, რომ ადამიანს, რომელმაც სახელმწიფო ენა არ იცის, კონსტიტუცია პრეზიდენტისა და, შესაბამისად, მთავარსარდლის თანამდებობის დაკავების უფლებას უკრძალავს.
შელიას თქმითვე, თავიდანვე არ შეიძლებოდა, რომ ზურაბიშვილი პრეზიდენტი გამხდარიყო, რადგან მან ქართულ არმიას, ჯერ კიდევ, გაპრეზიდენტებამდე კარგა ხნით ადრე მიაყენა შეურაცხყოფა, როცა საქართველოს აგვისტოს ომის დაწყებაში დასდო ბრალი.
„ზოგადად, აბსურდული სიტუაციაა _ არმიას მთავარსარდლად ის ადამიანი დაუსვეს, რომლისთვისაც მას ხმა არ მიუცია!“ _ ამბობს შელია და იმის ალბათობასაც უშვებს, რომ ზურაბიშვილის ზემოხსენებული სკანდალური განცხადება რუსეთმა ახალი მცოცავი ოკუპაციისთვის გამოიყენოს, ანუ სამაჩაბლოს შემდეგ უკანონო ბორდერიზაცია კრემლმა აფხაზეთშიც დაიწყოს და ე. წ. ადმინისტრაციული საზღვარი ენგურამდე გადმოსწიოს, რის შედეგადაც წალენჯიხის მუნიციპალიტეტის 14 ქართული სოფელი ოკუპაციის ზონაში მოექცევა და, შედეგად, ათასობით ახალ დევნილს მივიღებთ.

მოკლედ, „ქრონიკა+“ გთავაზობთ სკანდალურ ინტერვიუს პროფესიონალ ქართველ სამხედროსთან, ბადრი შელიასთან, რომელიც სალომე ზურაბიშვილის ანტისახელმწიფოებრივ ქმედებებს კიდევ ერთხელ ჰფენს ნათელს:

_ ბადრი, მართალია, დღეს მოქმედი სამხედრო მოსამსახურე არ ხართ, მაგრამ ყოფილი ჯარისკაცები არ არსებობენ. ჰოდა, როცა მთავარსარდალ ზურაბიშვილის განცხადება მოისმინეთ, ჯარი არ გვყავსო, რა განცდა დაგეუფლათ?
_ თავიდანვე გეტყვით, რომ პრეზიდენტის ეს განცხადება ანტისახელმწიფოებრივია.
_ დამისაბუთეთ, ანტისახელმწიფოებრივი რატომაა?
_ ეს განცხადება ანტისახელმწიფოებრივი იმიტომ არის, რომ სალომე ზურაბიშვილმა შეურაცხყოფა მიაყენა მთელ არმიას, დაღუპულ ბიჭებსა და ჩვენს გმირებს, მოკლედ, ყველას!
როცა მთავარსარდალი ამბობს, ჩვენ არმია არ გვყავსო, ამას ავღანეთგამოვლილი 20 ათასამდე სამხედრო მოსამსახურე, ორმოცი ათასამდე მოქმედი ჯარისკაცი და ასევე ათობით ათასი ომის ვეტერანი ისმენს! ყველაზე მთავარი კი ისაა, რომ ამას ისმენენ სამხედრო სასწავლებელში მყოფი ახალგაზრდები, რომლებსაც სურთ, მთელი ცხოვრება არმიას, სახელმწიფოს ემსახურონ და ოფიცრები გახდნენ! ხვდებით, ამ განცხადებით ზურაბიშვილმა ამ ხალხს რა მესიჯი მისცა?
_ მაინც, რა მესიჯი მისცა?
_ პირადად მე, მგონია, რომ ეს ადამიანი ჩვენს ქვეანაში რუსული ჰიბრიდული ომის შემადგენელი ნაწილია. სხვათა შორის, ზურაბიშვილი პრეზიდენტად არჩევამდეც ისეთ ანტისახელმწიფოებრივ განცხადებებს აკეთებდა, რომელიც პირდაპირ არმიასა და ჯარს ეხებოდა.
_ ზურაბიშვილის ძველ განცხადებაში იმას გულისხმობთ, აგვისტოს ომის დაწყებას საქართველოს რომ აბრალებდა?
_ დიახ, ამას ვგულისხმობ.
_ ისე, ზურაბიშვილის ახლანდელი და ძველი განცხადებები წინააღმდეგობრივია, ანუ თუ ჯარი არ გვყავს, აბა, ომი როგორ დავიწყეთ?
_ ზურაბიშვილი არ ამბობს, ჯარი არ გვყავდაო. ის ამბობს, არმია ახლა არ გვყავსო. ყოველ შემთხვევაში, მისი განცხადება, პირადად მე, ასე გავიგე.
სხვათა შორის, ზუსტად მაშინ, როცა ზურაბიშვილმა თქვა, არმია არ გვყავსო, ავღანეთში, ბაგრამის ბაზაზე, ტერორისტული თავდასხმა მოხდა, რა დროსაც ქართველი სამხედროები დაზიანდნენ. ამ თავდასხმის დროს ჩვენი ჯარისკაცების პროფესიონალური მოქმედება მთავარსარდლის ამ განცხადებაზე პასუხია, თუ როგორი ჯარი გვყავს!
მოკლედ, ზურაბიშვილის ეს განცხადება უდიდესი შეურაცხყოფაა და რომ გამოვიდეს და ბოდიშიც მოიხადოს, ესეც არ იქნება საკმარისი!
ზოგადად, ეს პიროვნება არმიისთის ძალიან მტკივნეულია. ალბათ, გახსოვთ, რომ არჩევნების დროს არმიამ მას მხარი არ დაუჭირა.
_ ზემოხსენებული განცხადებით ზურაბიშვილმა არმიაზე იქნებ, სწორედ ამ მხარის არდაჭერის გამო იძია შური?
_ ჩემი აზრით, მან თავიდანვე იცოდა, რომ არმია მხარს არ დაუჭერდა. ჯარი პრეზიდენტს ისე განიხილავს, როგორც მთავარსარდლის ინსტიტუტს. ჰოდა, იცოდნენ, რომ ზურაბიშვილს ჯარი არჩევნებში მხარს არ დაუჭერდა და ამიტომ, მაქვს ინფორმაცია, რომ საპრეზიდენტო არჩევნებადე სამი დღით ადრე ავღანეთში მთელი დელეგაცია წავიდა _ თანამდებობის პირები, რათა ჯარისკაცებზე ზეწოლა მოეხდინათ, მაგრამ არმიაზე ზეწოლას ვერავინ მოახდენს და ვნახეთ, ჯარმა საპრეზიდენტო არჩევნებზე რა შედეგიც დადო.
რაც შეეხება თქვენს კითხვას, არ გამოვრიცხავ, რომ ამ განცხადებით სალომე ზურაბიშვილს ჯარზე შური ეძია. საერთოდ, იმის თქმა, რომ ქართული არ იცის და შეცდომებს ამიტომ უშვებს, არ შეიძლება. თუ დავაკვირდებით, მისი ყველა გამოსვლა ძალიან შეგნებულია, ანუ ყველა ნაბიჯს შეგნებულად დგამს. ჰიბრიდული ომის მთელი ფილოსოფიაც სწორედ ის არის, რომ ყველაფერი ბუნებრივად ჩანდეს.
სხვათა შორის, ისიც კონსტიტუციის დარღვევაა, როცა პრეზიდენტი ისეთი ადამიანი ხდება, რომელმაც ქართული, ანუ სახელმწიფო ენა, კარგად არ იცის. კანონით, პრეზიდენტსა და ყველა თანამდებობის პირს სახელმწიფო ენის ცოდნა იმიტომ მოეთხოვება, რომ თავისი განცხადებებით, ქვეყნის შიგნით თუ გარეთ, გაუგებრობები არ გამოიწვიოს, თუმცა არ მჯერა, რომ ამ შეცდომებს ზურაბიშვილი შეუგნებლად უშვებს. შეუგნებლად როგორ დაუშვებს, როცა მთელი სამსახურები ჰყავს და, ბოლოს და ბოლოს, ვინმე მაინც ეტყოდა, შეცდომებს უშვებთო. მოკლედ, ყველა მისი განცხადება მიზანმიმართულია.
_ ე. ი., ბადრი, ეჭვობთ, რომ ზურაბიშვილი ყველა განცხადებას პირდაპირ კრემლის დავალებით აკეთებს?
_ დიახ. საქართველოს წინააღმდეგ რუსეთმა ჰიბრიდული ომი დიდი ხნის წინ დაიწყო და ეს ქალბატონი ამ ჰიბრიდული ომის ერთ-ერთი შემადგენელი ნაწილია.
სხვათა შორის, როგორც კი ხელისუფლებაში მოვიდა, „ოცნებამ“ პირველი სწორედ არმიას დაარტყა.
_ ანუ?
_ არმიაში მნიშვნელოვანი რგოლები დაასუსტა, ზოგი კი საერთოდ გააუქმა და ამით რუსეთმა იმის გამო, რაც 2008-ში ჩვენმა არმიამ მას გაუკეთა, შური იძია. დიახ, მეორე მსოფლიო ომის შემდეგ, რუსეთს იმხელა დანაკარგი არ ჰქონია, როგორიც 2008 წლის აგვისტოში ჩვენგან მიიღო. ყველაფერი ეს კი იმ ჯარისკაცებმა გააკეთეს, რომლებიც არმიაში ახლაც მსახურობენ. აგვისტოს ომში ბევრი ჩვენი მებრძოლი დაინვალიდდა, ბევრიც დაიღუპა. გავიხსენოთ, მაგალითად, შინდისის გმირები. ზურაბიშვილმა კი, როგორც მთავარსარდალმა, თავისი განცხადებით, არმია არ გვაქვსო, მთელ ამ სამხედრო ისტორიას ხაზი გადაუსვა!
_ ბადრი, არმიიდან როდის წამოხვედით?
_ არმიაში 1995 წლიდან ვმსახურობდი, ანუ თბილისის სამხედრო აკადემიაში ჩავირიცხე. შარშან კი, 2018 წლის მარტში, იძულებული გავხდი, არმიიდან წამოვსულიყავი.
_ იძულებული რატომ გახდით?
_ ესეც ჰიბრიდული ომის ნაწილია, ანუ ბოლო წლებში ქართული არმია რუსული ჰიბრიდული ომის პირდაპირი სამიზნეა.
_ შარშან, ანუ როცა არმიიდან წამოხვედით, თავდაცვის მინისტრი ლევან იზორია იყო, არა?
_ დიახ…
დაბალი რანგის ოფიცერი არ გახლდით და ძალიან მნიშვნელოვანი გადაწყვეტილებების მიღებაში, ასევე ქვეყნის თავდაცვის გეგმების შემუშავებაშიც ვმონაწილეობდი, მაგრამ ისეთ გადაწყვეტილებებს იღებდნენ, რომელსაც მხოლოდ მე კი არა, სხვებიც წინააღმდეგობას ვუწევდით. ამიტომ თითქმის ყველა იძულებული გავხდით, არმიიდან წამოვსულიყავით. ზოგი ახლა აშშ-შია, ზოგიც _ ევროპაში და ფიზიკურად მუშაობს.
საერთოდ, არმიაში გარკვეული პროფესიებია. აი, მაგალითად, არიან არტილერისტები, ტანკისტები და ა. შ., მაგრამ ადამიანებს ამ პროფესიებს აშორებენ და ისეთ თანამდებობაზე გადაჰყავთ, რომელზედაც წარმოდგენაც არ აქვთ. ეს, იცით, რას ნიშნავს?
_ რას?
_ იურისტს ქირურგად რომ დავაწყებინოთ მუშაობა, შეიძლება, ამ დავალებას თავი გაართვას, მაგრამ ჯარში ასეთი გადაადგილებები არ შეიძლება. მოკლედ, როცა ადამიანს პასუხისმგებლობა გაკისრია და იქ არ ხარ, სადაც შიდა არმიული დოქტრინის მიხედვით უნდა იყო, იძულებული ხდები, არმიიდან წახვიდე!
_ ბადრი, მართალია, ერთ წელიწადზე მეტია, ჯარში აღარ მსახურობთ, მაგრამ მოქმედ სამხედროებთან კომუნიკაცია, ცხადია, გექნებათ და ისიც გეცოდინებათ, ზურაბიშვილის ზემოხსენებულ განცხადებას ჯარისკაცებისგან როგორი რეაქცია მოყვა?
_ კონტაქტი, რა თქმა უნდა, ახლაც მაქვს. შეიარაღებულ ძალებში 23 წელიწადზე მეტი ვიმსახურე, თითქმის ყველა მიცნობს და ურთიერთობაც მოქმედ ჯარისკაცებსა თუ ოფიცრებთანაც მაქვს. ყველა აღშფოთებულია. კანონი და შიდა წესდება ჯარისკაცებს იმის უფლებას არ აძლევს, რომ ეს აღშფოთება საჯაროდ გამოხატონ, მაგრამ შოკირებული არიან!
_ მესმის, რომ ჯარისკაცებს ამაზე საჯარო საუბარი ეკრძალებათ, მაგრამ, მაინც, ხომ არ უნდა ველოდოთ, რომ ჯარმა ზურაბიშვილს, როგორც მთავარსარდალს, ბოიკოტი, უფრო სწორად, დაუმორჩილებლობა გამოუცხადოს?
_ არა, არმიაში ასეთი რამ გამორიცხულია, რადგან ჯარისკაცებს, მთავარსარდლის გარდა, პირდაპირი უფროსებიც ჰყავთ. ასევე თავდაცვის მინისტრიც არსებობს. სხვათა შორის, მართალია, მოგვიანებით, მაგრამ თავდაცვის მინისტრმა მთავარსარდლის განცხადება დაგმო.
_ მხოლოდ თავდაცვის მინისტრი კი არა, ზურაბიშვილს პრემიერიც გაემიჯნა და „ოცნების“ სხვა „ფეისებიც“.
_ დიახ, ასე იყო. მოკლედ, ბოიკოტის გამოცხადებას ერთი სამხედროც კი არ იკადრებს, რადგან ჩვენ პროფესიონალური ჯარი გვყავს!
_ ჩვენში დარჩეს და, ზურაბიშვილი თავის განცხადებაში ცუდს ვერაფერს ხედავს. პირიქით, ბულინგის მსხვერპლად მიიჩნევს თავს და ამბობს, რომ მისი ნათქვამი კონტექსტიდან ამოგლეჯილად და დამახინჯებულად გავრცელდა.
_ როგორც გითხარით, ჰიბრიდული ომის მთელი ფილოსოფია ისაა, რომ ყველაფერი ბუნებრივად ჩანდეს. მხოლოდ ზურაბიშვილმა კი არა, ხელისუფლების სხვა წარმომადგენლებმაც თქვეს, პრეზიდენტს სხვა რამის თქმა უნდოდაო.
_ პრეზიდენტის დაცვა, თუ არ ვცდები, მხოლოდ სოფო კილაძემ სცადა, მაგრამ, თავის მხრივ, სოფო კილაძეც ოდიოზური ფიგურაა…
_ წარმოიდგინეთ, მთელმა საქართველომ ვერ გაიგო და ხელისუფლებიდან მხოლოდ ერთი-ორმა ადამიანმა გაიგო, მთავარსარდალს რისი თქმაც უნდოდა. ხომ იცით, ეშმაკები დეტალებში ზის და ესაა სწორედ ჰიბრიდული ომი, მაგრამ დავუშვათ, ზურაბიშვილს სხვა რამის თქმა უნდოდა, ეს ჩვენს უცხოელ მეგობრებს როგორ უნდა ავუხსნათ? დავუშვათ, ავუხსენით, ჩვენმა მთავარსარდალმა სახელმწიფო ენა არ იცის და ასე იმიტომ გამოვიდაო, მაგრამ ამას დასავლეთში მაინც ვერ გაიგებენ!
_ სხვათა შორის, ზურაბიშვილის სკანდალური განცხადება დიპლომატებმაც დაგმეს _ თუ არ ვცდები, განცხადება საფრანგეთის ელჩმა გაავრცელა და ქართული არმიის პროფესიონალიზმს გაუსვა ხაზი.
ბადრი, რამდენჯერმე ჰიბრიდული ომი ახსენეთ და ამ ომის მიზანი რა არის, ანუ ზურაბიშვილის სიტყვებს კრემლი ხელზე დაიხვევს და მტკიცებას მოჰყვება, საქართველოს ჯარი არ ჰყავსო?
_ ეს განცხადება არმიის დასუსტებისა და, ასევე ნიჰილიზმის დამკვიდრების ერთ-ერთი ნაბიჯია.
_ ანუ ზურაბიშვილი ქართული არმიის მორალურ დასუსტებას ცდილობს?
_ დიახ. ამასთან, ეს განცხადება ყველაზე მტკივნეულად მომავალ სამხედროებსა და ოფიცრებზე იმოქმედებს.
_ რატომ?
_ როცა მთავარსარდალი ამბობს, არმია არ გვყავსო, ამან არმიის შიგნით შესაძლოა, დაძაბულობა შექმნას, რითაც ჯარი, გარკვეულწილად, დასუსტდება.
_ როგორც ვიცი, რამდენიმე სამხედრომ განაცხადა, ყველაფერ ამის შემდეგ ზურაბიშვილს უფლება აღარ აქვს, გმირთა მემორიალებთან მივიდესო. ბადრი, ამ მოსაზრებას იზიარებთ?
_ ამ ადამიანმა, ჯერ კიდევ, პრეზიდენტობამდე განაცხადა, აგვისტოს ომი საქართველომ დაიწყოო. მართალია, მერე გადააკეთა, ომი მთავარსარდალმა დაიწყოო, მაგრამ არმია მთავარსარდალს ექვემდებარება, ე. ი., ომის დაწყებაში მთელი არმია დაადანაშაულა და ამიტომ მთავარსარდლობის მორალური უფლება არ ჰქონდა და არც აქვს.
_ სამწუხაროდ, ეს რეალობაა _ ზურაბიშვილი მთავარსარდალია!
_ პარადოქსული ვითარებაა _ ადამიანი, რომელიც არმია მხარს არ უჭერს, მთავარსარდლად დასვეს!
მოკლედ, ზურაბიშვილს გმირთა მემორიალთან კი არა, სამხედრო ნაწილთან მისვლის მორალური უფლებაც არ აქვს! ზურაბიშვილი თავისი განცხადებების გამო სინანულს არ განიცდის. ამიტომ მიმაჩნია, რომ ამორალური ადამიანია და აქედან გამომდინარე, არც მემორიალთან მისვლას მოერიდება და არც _ ძმათა სასაფლაოზე, სადაც ჩვენი გმირი ბიჭები განისვენებენ!
_ ყველაფერ აქედან გამომდინარე, ხელისუფლებას თავმოყვარეობა რომ ჰქონდეს, პრეზიდენტის იმპიჩმენტი უნდა დაიწყოს?
_ ზურაბიშვილმა არმიას, მოქმედ ჯარისკაცებს, ვეტერანებსა თუ დაღუპულებს არაერთი განცხადებით მიაყენა შეურაცხყოფა. ამ შემთხვევაში ბოდიში საკმარისი არაა. ამიტომ მხოლოდ ბოდიში კი არ უნდა მოიხადოს, არამედ უნდა გადადგეს! ნებისმიერ ნორმალურ ქვეყანაში ნებისმიერი პრეზიდენტი და მთავარსარდალი სწორედ ასე მოიქცეოდა!
ზურაბიშვილს უკვე იმდენი ანტისახელმწიფოებრივი განცხადება დაუგროვდა, რომ მეტის პატიება დაუშვებელია და მისი იმპიჩმენტი აუცილებლად უნდა დაიწყოს!
_ დისკრედიტებულ ზურაბიშვილს „ოცნება“ საარჩევნოდ ხომ არ გამოიყენებს, ანუ ხალხის მოთაფვლის მიზნით პრეზიდენტის იმპიჩმენტს დაიწყებს?
_ ვფიქრობდი, რომ ასე მოხდებოდა, მაგრამ კობახიძემ თქვა, ზურაბიშვილი „ოცნების“ წევრი არ არისო, ანუ ხელისუფლება ზურაბიშვილს გაემიჯნა, ე. ი. თავისი გუნდიდან განკვეთა. აქედან გამომდინარე, არ მგონია, რომ ზურაბიშვილის იმპიჩმენტი „ოცნებამ“ საარჩევნოდ გამოიყენოს. ასეც რომ მოხდეს, „ოცნება“ შემდეგ არჩევნებში მაინც ვერ გაიმარჯვებს _ ამის შანსი აღარ აქვს!
_ თვალი არ მიმიდევნებია და, შესაბამისად, არ ვიცი, მაგრამ რუსული მედია ზურაბიშვილის ამ განცხადებას, ალბათ, აიტაცებს, არა?
_ რუსული მედია ამ განცხადებას, ცხადია, გამოიყენებს და, უპირველესად, შიდა მოხმარებისთვის.
_ „შიდა მოხმარებაში“ რას გულისხმობთ?
_ 2008 წელს, საქართველოზე თავდასხმის შემდეგ, რუსეთმა ჩვენი არმიის სიძლიერე დაინახა და მენტალობა _ აი, რუსული არმია უძლეველიაო, პრაქტიკულად, დაინგრა. რუსეთი საქართველოს ჩვიდმეტჯერ მეტი ცოცხალი ძალითა და თხუთმეტჯერ მეტი სამხედრო ტექნიკით დაესხა თავს, მაგრამ ჩვენს შეიარაღებულ ძალებს შესაბამისი წინააღმდეგობა მაინც ვერ გაუწია. ეს რუსი ჯარისკაცებისა და მათი მეთაურებისთვის ფსიქოლოგიური დარტყმა იყო.
ახლანდელი ვითარება კი, თუ რუსეთი საქართველოზე თავდასხმას კიდევ დააპირებს, რუსეთის არმიისთვის უპირატესი ფსიქოლოგიური მომენტია. შესაბამისად, რუსები ზურაბიშვილის განცხადებას გააპიარებენ და გამოიყენებენ.
საერთოდ, ნუ ვიქნებით დარწმუნებულნი, რომ თუნდაც ამ ხელისუფლების დროს რუსეთმა საქართველოზე კიდევ ერთი აგრესია არ განახორციელოს! კრემლისთვის მნიშვნელობა არ აქვს, ხელისუფლებაში ვინ იქნება. როცა საჭიროდ ჩათვლის, ომში საქართველოს ნებისმიერ ხელისუფლებას ჩაითრევს!
_ ე. ი., რუსული ხელახალი სამხედრო აგრესიის საფრთხე რეალურია?
_ რუსეთს საამისო ბერკეტები აქვს და ჩვენმა ხელისუფლებამ რუსეთის ე. წ. გაუღიზიანებლობის პოლიტიკა ამიტომაც აირჩია!
სხვათა შორის, რუსეთს შეუძლია, რომ იგივე მცოცავი ოკუპაცია განმუხურშიც დაიწყოს.
_ სერიოზულად?
_ დიახ. მაგალითად, წელს, აფხაზეთის ე. წ. რესპუბლიკაში ჩასულ რუს ტურისტებს ბროშურებს ურიგებდნენ, რომლებშიც ე. წ. აფხაზეთის რესპუბლიკის საზღვარი ენგურზე იყო გასწორებული.
_ ანუ, ცხინვალის რეგიონის მსგავსად, უკანონო ბორდერიზაცია აფხაზეთსაც ემუქრება?
_ დიახ, ეს საფრთხე არსებობს. რუსებმა სამაჩაბლოს მიმართულებით ის გააკეთეს, რაც უნდოდათ, თუმცა აფხაზეთში საქმე გაცილებით რთულად იქნება.
_ რატომ?
_ თუ რუსები ე. წ. მცოცავ ოკუპაციას ენგურზეც დაიწყებენ, მაშინ წალენჯიხის 14-მდე ქართული სოფელი ამ ბორდერიზაციაში მოხვდება. მართალია, ყველაფერ ამას მოსახლეობა წინააღმდეგობას გაუწევს, მაგრამ ათასობით ახალ დევნილს მივიღებთ. ამასთან, ე. წ. ადმინისტრაციული საზღვარიც ასეული კილომეტრით გადმოიწევს.
_ ერთი სიტყვით, ზურაბიშვილმა თავისი განცხადებით პუტინს უპატაკა, საქართველოს მეზარბაზნეები არ ჰყავსო?
_ სამწუხაროდ, ჩვენი ქვეყნის ყველა სისტემაში რუსეთის ჯაშუშებს აქვთ ფეხი მოკიდებული! აი, მაგალითად, ბატონ წითელაშვილს იმის უფლება მისცეს, რომ თბილისის გარშემო მომზადებული საიდუმლო თავდაცვის ობიექტებისთვის ფოტოსურათები გადაეღო. სხვათა შორის, ამ ობიექტების მომზადებაში მეც ვმონაწილეობდი. თქვენი აზრით, წითელაშვილს ეს ფოტები რისთვის სჭირდებოდა?
_ რისთვის?
_ ეს ობიექტები რუსეთის ინტერესშია და ცხადია, სურვილი ჰქონდა, რომ გარედანაც შეესწავლა და შიგნიდანაც! დარწმუნებული ვარ, ეს მასალები რუსებს მიუვიდათ!
მოკლედ, რუსებმა ჩვენი ზოგადი მდგომარეობა იციან და იმასაც ხვდებიან, რომ ჩვენი მთავარსარდალი, როცა ამბობს, არმია არ გვყავსო, ცრუობს, მაგრამ ყველაფერი ეს რუსებისთვის, საკუთარი პიარის კუთხით, არაჩვეულებრივი მასალაა!

გიორგი აბაშიძე