ბოლო დღეების ერთ-ერთი მთავარი პოლიტიკური მოვლენა პარტია „კანონი და სამართლის“ თავმჯდომარე თაკო ჩარკვიანის მიერ ოპოზიციის იმ საკონსულტაციო საბჭოს დატოვება იყო, რომელიც პროპორციულ სისტემასთან დაკავშირებით შეიქმნა. ჩარკვიანმა ეს გადაწყვეტილება მას შემდეგ მიიღო, რაც ცნობილი გახდა, რომ ამავე საბჭოს წევრი, ნინო ბურჯანაძე, მოსკოვში წავიდა.

„ვრჩები ქუჩის აქციების მომხრედ, პიკეტირების მომხრედ! ვარ გაერთიანებული ოპოზიციის _ „ძალა ერთობაშია“ წევრი და ვრჩები ამ გაერთიანებაში! ჩვენ იმხელა ბრძოლა გავიარეთ, რომ, რა თქმა უნდა, გაერთიანებულ ოპოზიციაში ვრჩები „კანონი და სამართლით“!
რაც შეეხება კონკრეტულად პროპორციულის ფორმატთან დაკავშირებით დროებით გაერთიანებას, ამ გაერთიანებაში ყოფნაზე უარს ვამბობთ პარტია „კანონი და სამართალი“, რადგან ამ ვითარებაში ბურჯანაძის ვიზიტის შესახებ, მინიმუმ, უნდა ვყოფილიყავით ინფორმირებულნი! პირველად შევიტყვეთ რამდენიმე ადამიანმა „სიურპრიზად“! ვიმეორებ: ამ კონკრეტულ ვითარებაში, როცა მთელ მსოფლიოს ვეუბნებით, რომ რუსეთი გვებრძვის და იბრძვის, დაგვაბრუნოს თავის სივრცეში, აი, ამ დროს სრულიად უადგილოდ მეჩვენება ეს ვიზიტი, თორემ არანაირი უფლება არ მაქვს, რომ რუსულ ვექტორს „სირბილი“ დავუშალო მოსკოვში, პუტინთან, მაგრამ ამ უმძიმეს ვითარებაში, ვფიქრობ, ტალახი ყველას, მთელ ქვეყანას, ესხმება! პროპორციული გასაგებია, მაგრამ სულ მთლად ნუ დავაბნევთ უცხოელ _ ევროპელ პარტნიორებს, რომლებსაც თან დახმარებას ვთხოვთ! ბრძოლა უზურპატორის წინააღმდეგ გრძელდება _ „პუტინი კაბაში“ მეყოლება თუ შარვალში ამ ქვეყანაში, ჩემთვის დიდი მნიშვნელობა არ აქვს! მთავარია, სამშობლო და სახელმწიფო ერთად გვქონდეს!“ _ ეს განცხადება თაკო ჩარკვიანმა 3 დეკემბერს სოციალური ქსელით გაავრცელა.

უფრო დეტალურად, თუ რატომ მიიღო საკოორდინაციო საბჭოს დატოვების გადაწყვეტილება, „კანონი და სამართლის“ ლიდერი „ქრონიკა+“-სთან ინტერვიუში საუბრობს:

_ ქალბატონო თაკო, იმ საკოორდინაციო საბჭოში, რომელიც ოპოზიციამ არჩევნების პროპორციული სისტემის კანონპროექტის ჩაგდების შემდეგ შექმნა, ნინო ბურჯანაძე როგორ მოხვდა?
_ ეს არ ვიცი. უბრალოდ, ვიცი, რომ პროექტი _ „ყველას მინუს ერთი“ უნდა შემდგარიყო. საერთოდ, ამ პროექტში მონაწილეობა სწორედ რუსული ვექტორის გამო გამიჭირდა, მაგრამ ჩვენ ნორმალურ საარჩევნო პირობებს ვითხოვთ. ხელისუფლება რომ ხარ და მუდმივად თავებს ითვლი, მიტინგზე ორი ათასი ადამიანი მოვიდა თუ ხუთი ათასი, თუ ოპოზიციის შეკრებაზე ასე ცოტა ხალხი მოდის, აბა, რისი გეშინია და ყველას რატომ ამუნათებ, აი, „ნაციონალური მოძრაობა“ გაიმარჯვებსო?
მოკლედ, მიმაჩნია, „ოცნებამ“ ხალხში სახელი ისე გაიტეხა, რომ გამოიცნო, პროპორციულით ხელისუფლებაში ვეღარ მოვა.
რაც შეეხება ბურჯანაძეს, იგივე რუსულ ვექტორს, ვერ დავუშლი, რომ ჯანმრთელი საარჩევნო გარემოს შექმნის სურვილი მასაც ჰქონდეს. ამიტომ, ბევრი ვიფიქრე თუ ცოტა, ამაზე დავთანხმდი და, სხვა 30 პარტიასთან ერთად, პროპორციულის მოთხოვნას მეც მოვაწერე ხელი. ეს ხელმოწერა ისევ რჩება, მაგრამ ჩემთვის იმ მაგიდასთან დაჯდომა, სადაც, პრაქტიკულად, კაბიანი პუტინი ზის, აბსოლუტურად მიუღებელია!
_ ბურჯანაძის პრორუსული განწყობები აქამდეც ცნობილი იყო. ჰოდა, მაინც ვერ გავიგე, მასთან ერთად საკოორდინაციო საბჭოში ყოფნას თავიდანვე რატომ დასთანხმდით?
_ ვიმეორებ: პროპორციული არჩევნებისთვის ბრძოლას ვაგრძელებ _ პიკეტირებებშიც ვმონაწილეობ და მორჩა, არ მინდა, რომ ეს ურთიერთობა რაიმე პოლიტიკურში გადაიზარდოს.
_ უკაცრავად, პროპორციულის მოთხოვნაც ხომ პოლიტიკურია?
_ დიახ, მაგრამ ჩემი პოლიტიკური ვარაუდით, ეს პროექტი უნებლიეთ, შეიძლება, რუსული დაბალპროცენტიანი პარტიისა და მისი ლიდერის რეაბილიტაციას მოემსახუროს!
ადრეც ვთქვი და ახლაც ვიმეორებ, რადგან არ მინდა, გაუგებრობა მოხდეს: მე ვრჩები გაერთიანებულ ოპოზიციაში, ანუ „ძალა ერთობაშია“ _ იქ თორმეტი პარტიაა და აქედან ერთ-ერთი „კანონი და სამართალია“. საუბარი მხოლოდ იმ გაერთიანებაზეა, რომელიც ლეიბორისტების ოფისში იკრიბება ხოლმე და პროპორციულ სისტემაზე გადასვლის გამო შეიქმნა.
_ ეს გასაგებია, მაგრამ რატომ ფიქრობთ, რომ ეს პროექტი უნებლიეთ, შესაძლოა, ბურჯანაძის რეაბილიტაციას მოემსახუროს?
_ დასამალი არაფერია: ამ ქალბატონს, პროცენტულად, საშური პერიოდი არ აქვს.
_ ანუ?
_ ბურჯანაძე დაბალრეიტინგულია და მისთვის ძალიან დიდი მნიშვნელობა ჰქონდა, რომ რომელიმე ოპოზიციურ გაერთიანებაში ყოფილიყო. ჰოდა, როგორც კი ასეთ გაერთიანებაში მოხვდა, იმ წუთას მოსკოვში „გაცუნცულდა“. ალბათ, მკითხავთ, რატომო? ამ კითხვაზე პასუხის რამდენიმე ვარიანტი არსებობს, მაგრამ ერთ-ერთი და უმთავრესი ისაა, რომ იქ, სადაც აქამდეც ქმნიდა ხოლმე, ანუ პუტინის ადმინისტრაციაში, ახლაც შექმნა პოლიტიკური იმიტაცია, აი, ნახეთ, ამ გაერთიანების შექმნაში დიდი წვლილი მიმიძღვისო.
_ ამ იმიტაციის მიზანი, თქვენი აზრით, რა უნდა იყოს?
_ მოსკოვიდან ფული მოაქვთ ხოლმე და არჩევნების დროს ამ ფულს ისევ ქართული სახელმწიფოს წინააღმდეგ გამოიყენებდა. გამოვრიცხავ, რომ ნინო ბურჯანაძემ დასავლური ვექტორითვის თეთრი გაიღოს, ის მხოლოდ საკუთარი რუსული პარტიისთვის ზრუნავს.
_ ისე, გამორიცხავთ, რომ ამ საკოორდინაციო საბჭოში ქალბატონი ბურჯანაძე ხელისუფლებას შემოეგზავნა?
_ არა, აბსოლუტურად არ გამოვრიცხავ! მან ისეთი ნაბიჯი გადადგა, რომ ქვეყანა ტალახისთვის გაიმეტა!
_ „ტალახისთვის გამეტებაში“ რას გულისხმობთ?
_ გალაკტიონს აქვს: „დრო, დრო უნდა დაარქვა ყველაფერს“ და მართლაც, ასეა: დროის ფაქტორი მხოლოდ პოეზიასა თუ მუსიკაში კი არა, პოლიტიკაშიც არის. ბოლოს და ბოლოს, ნათქვამია, არის დრო ქვების სროლისა და არის დრო ქვების დაგროვებისაო. მთელი ოპოზიცია მუხლებზე ვდგავართ და დიპლომატიურ კორპუსს ვემუდარებით, დროზე, იქნებ, საქართველო ნატოს წევრი დაჩქარებული წესით გახდესო და შე „დალოცვილო“, ამ დროს რუსეთში მირბიხარ?!
სხვათა შორის, ერთ-ერთი ტელევიზიის პირდაპირ ეთერში ვიყავი, ამ ვიზიტის შესახებ რომ გავიგე და ობიექტურად გეტყვით, შიდა ჩატს რომ ჩავხედე, ამის თაობაზე ოპოზიციის რამდენიმე ლიდერმა არ იცოდა.
_ ანუ ოპოზიციის ზოგიერთმა ლიდერმა იცოდა, რომ ბურჯანაძე მოსკოვს მიემგზავრებოდა?
_ პაატა დავითაიამ თქვა, მე ვიცოდიო. სხვათა შორის, ჩატში მაშინვე დავწერე, _ ამას უყურადღებოდ არ და ვერ დავტოვებ-მეთქი. ისე, თუ პაატა დავითაიამ იცოდა, მაშინ ეს ჩვენთვის უნდა ეთქვა.
_ მოკლედ, შეიძლება ვივარაუდოთ, რომ ნინო ბურჯანაძე ერთ მშვენიერ დღეს, შესაძლოა, გაერთიანებული ოპოზიციის მეცამეტე წევრად ვიხილოთ?
_ არა!
_ ასეთი დარწმუნებული რატომ ხართ?
_ გრიგოლ ვაშაძისა და დასავლური ვექტორის პარტიების დამოკიდებულება ზუსტად ვიცი _ ამაზე არაერთხელ გვისაუბრია. გაერთიანებულ ოპოზიციაში ღირებულებებია, ანუ ჩვენ დასავლეთის გარშემო ვართ გაერთიანებულნი და ამიტომ გაერთიანებულ ოპოზიციაში რუსული ვექტორის პარტია ვერასოდეს იქნება!
_ ისე, ქალბატონო თაკო, იმ შემთხვევაში, თუ ვადამდელი არჩევნები დაინიშნება, გაერთიანებული ოპოზიცია ხომ არ დაიშლება?
_ არა! ასეთი შემთხვევისთვის ძალიან საინტერესო და კარგი გეგმა გვაქვს, მაგრამ ახლა ამაზე არ ვისაუბრებ. მოკლედ, „ძალა ერთობაშიას“ დაშლა არ ემუქრება!
_ სხვათა შორის, ბურჯანაძის მოსკოვური ვიზიტი „ოცნებამ“ ხელზე დაიხვია და, თუ არ მეშლება, კახა კალაძემ თქვა, „გერმანული მოდელი“ პუტინისგან უნდა ჩამოიტანონო. აქამდე პრორუსობაში ოპოზიცია ხელისუფლებას სდებდა ბრალს, ახლა კი რა გამოდის, როლები შეიცვალა?
_ აი, სწორედ ახლა, როცა ამ ინტერვიუს ვწერთ, გავრცელდა ინფორმაცია, რომ ამ ქალბატონმა გავრილოვის გამო კოსაჩოვს ბოდიში მოუხადა. ხალხი მოვკვდით და დავწყდით _ საქართველოს სახელმწიფოებრიობის დაცვა მოგვიხდა, ისე მწარედ მოგვიხდა, რომ ბაშვებს თვალები დაეთხარათ, ეს კი ბედავს და კოსაჩოვს ბოდიშს უხდის! იმ საქართველოს რა ვუთხარი, ამ განცხადების შემდეგ აეროპორტიდან უკანვე რომ არ გაუშვებს!
_ ქალბატონო თაკო, ხაზს უსვამთ, რომ ბურჯანაძის პარტია დაბალპროცენტიანია. ჰოდა, საკოორდინაციო საბჭოში ასეთი დაბალპროცენტიანი სუბიექტის ყოფნა რა აუცილებლობას წარმოადგენდა?
_ აქ პროცენტებზე არ ყოფილა საუბარი.
_ აბა, რაზე იყო?
_ ყველას მინუს ერთზე, ანუ ჩვენ საარჩევნო გარემოს შეცვლის გამო შევიკრიბეთ. ხალხო, წარმოუდგენელი სირცხვილია, 21-ე საუკუნეში ნორმალურ, ჯანმრთელ არჩევნებს ვითხოვთ! ამიტომ ოპოზიციის იმ წარმომადგენლებსაც არ ვამტყუნებ, ვინც ჩემნაირი გადაწყვეტილება არ მიიღო. ზოგმა თქვა, პროპორციულ ფორმატს ვუფრთხილდებიო. მე კი ჩემი პოლიტიკური დრო ასე ვიგრძენი და ჩავთვალე, რომ ეს გადაწყვეტილება საწრაფოდ უნდა მიმეღო და იმ ტალახს, რომელიც ბურჯანაძემ ისროლა, დასავლეთის თვალში ჩემს ქვეყანას ოდნავ მაინც ავაცილებდი და ასეც მოხდა _ ხალხისგან ძალიან სწორი რეაქცია მოყვა და ამის გამო საზოგადოებას მადლობას ვეუბნები. ეს ჭუჭყი და სიბინძურე არავინ უნდა ავიტანოთ _ მან ყველა და ყველაფერი გასვარა!
ჩვენი, მთელი საზოგადოების შეცდომა იცით, რა არის?
_ რა?
_ მგონი, გიორგი ახვლედიანმა თქვა, ვის რა უნდა ვკითხოთო, მაგრამ ოკუპაციის კანონი არსებობს და ოპოზიცია ოკუპანტთან კონფიდენციალურად სასაუბროდ რომ დაძრწის, ამ შეხვედრას ვინმე არბიტრი უნდა ესწრებოდეს, თორემ სხვა შემთხვევაში საიდან გვეცოდინება, ეს, მაპატიეთ და, „პოლიტიკანკა“ რაზე საუბრობს? საქართველოსთვის რა მოუტანია?
27 წელია, ბალტიის ქვეყნების გზას არ დავადექით, ანუ ამ ტიპის „პოლიტიკანკებთან“ წყალგამყოფი არ გავავლეთ და გეკითხებით, ამ ხნის განმავლობაში, ზიანის გარდა, საქართველოსთვის რუსულმა ვექტორმა რა მოიტანა?
_ კი ბატონო, რუსული ვექტორი მთელ ქვეყანას აზიანებს, მაგრამ მაინც ჩემს აზრზე ვრჩები, ანუ საკოორდინაციო საბჭოში პრორუსული პარტიებისთვის თავიდანვე უნდა ჩაგეკეტათ კარი.
_ პროპორციულის მოთხოვნის უფლება ყველას აქვს.
_ დიახ, მაგრამ ამ საბჭოს წევრი, მაგალითად, „პატრიოტთა ალიანსი“ არაა.
_ მესმის, მაგრამ პროპორციულს ეთანხმება.
_ ეთანხმება, მაგრამ დამოუკიდებლად. ჰოდა, რატომ არ შეიძლებოდა, რომ პროპორციული ბურჯანაძესაც დამოუკიდებლად მოეთხოვა და პროდასავლელ პოლიტიკოსებთან ხელჩაკიდებულს რუსთაველის გამზირზე არ ევლო?
_ ხომ გითხარით, რომ ეს არც მე მსიამოვნებდა და გადაწყვეტილება ძალიან რთულად მივიღე.
შემიძლია გითხრათ, რომ საკოორდინაციო საბჭოს დატოვება ჩემი მხრიდან სწორი და დროული იყო. მეტიც: ვფიქრობ, რომ იმ მაგიდასთან ნინო ბურჯანაძის ჯდომა შეცდომაა!
_ ქალბატონო თაკო, პირდაპირ გკითხავთ: ბურჯანაძეს გაერთიანებულ ოპოზიციაში ლობისტები ჰყავს?
_ ეს ტალახის გარდა არავის არაფერს მოუტანს!
_ ისე, მიხეილ სააკაშვილთან გუბაზ სანიკიძეც დაპირისპირებული იყო, მაგრამ ახლა ერთ პოზიციაზე არიან. ჰოდა, გამორიცხავთ, რომ საქართველოს მესამე პრეზიდენტი ნინო ბურჯანაძესაც შეხვდეს?
_ რასთან დაკავშირებით უნდა შეხვდეს?
_ თუნდაც პროექტის _ „ყველას მინუს ერთი“ ფორმატში.
_ ნინო ბურჯანაძემ რამდენიმე დღის წინ, მგონი, შალვა რამიშვილთან ინტერვიუში თქვა, _ მიხეილ სააკაშვილი ჩემი პირადი და პოლიტიკური მტერიაო. აქედან გამომდინარე, ასეთ რამეს სრულიად გამოვრიცხავ!
პროპორციულის ფორმატში დაჯდომა, როგორც გითხარით, ბურჯანაძის რეაბილიტაციის მცდელობა იყო და თუ სააკაშვილს შეხვდება, ეს ქულების ჩაწერა ბურჯანაძისთვის იქნება და არა _ სააკაშვილისთვის! ამიტომ ამას გამოვრიცხავ, თან ორი აზრი იმაზეც არ არსებობს, რომ სააკაშვილი ნიჭიერი პოლიტიკოსია და პოლიტიკური ინტუიცია უკარნახებს, რომ ბურჯანაძესავით პოლიტიკურად გარყვნილ და თაღლით „პოლიტიკანკასთან“ არაფერი ესაქმება!
ბაგრატის ტაძართან გრიგოლ ვაშაძე მე და პაატა ბურჭულაძემ პრეზიდენტობის კანდიდატად იმიტომ წარვადგინეთ, რომ გაერთიანებული ოპოზიცია ღირებულების გარშემოა შეკრებილი და ეს ღირებულება დასავლურია, მაგრამ გაერთიანება, რომელიც ღირებულების გარშემო არაა შეკრებილი, მგონია, რომ დიდ შედეგს ვერ დადებს!
_ ანუ საკოორდინაციო საბჭო შედეგს ვერ დადებს?
_ მგონია, რომ ბურჯანაძის იქ ყოფნა მხოლოდ ზიანს მოუტანს!
_ ე. ი., ყველაფერი ის, რასაც ვხედავთ, ერთგვარი თამაშია?
_ არა, არავითარ შემთხვევაში, ეს უკეთესის მცდელობაა. ბიძინა ივანიშვილმა, თავისი უზურპატორული ქმედებებით, საზოგადოება ძალიან დაღალა. ამიტომ ყველა პოლიტიკოსი გამოსავალს ეძებს და ეს საკოორდინაციო საბჭოც კარგის გაკეთების მცდელობაა, თუმცა ჩემი პოლიტიკური ინტუიციით მხოლოდ ამ მაგიდას გამოვეცალე, თორემ გაერთიანებულ ოპოზიციასთან ერთად პიკეტირებასაც ვაგრძელებ და პროტესტსაც!
_ სხვათა შორის, თავიდან ითქვა, რომ ბურჯანაძესთან ერთად მოსკოვში თითქოს გრიგოლ ვაშაძეც წავიდა.
_ ეს აბსოლუტური ტყუილი იყო!
_ დიახ, მაგრამ ამ ტყუილის გავრცელებას, ალბათ, რამე მიზანი ჰქონდა, არა?
_ რამდენიმე საიტი და გაზეთი ვიცი, რომლის დაფინანსებაშიც კონკრეტულად ამ ქალბატონის ოჯახია ჩართული!
_ ამით რისი თქმა გინდათ?
_ ეს ობობის ისეთი ქსელია, რომ არ გამორიცხოთ, ოპოზიციისა და ქართული დასავლური სურვილების ტალახის შესასხმელად ბურჯანაძე შემოგდებული ყოფილიყო! გაზეთი „საქართველო და მსოფლიო“ აიღეთ _ ამ რუსული ნარატივის გაზეთში ფეხები ღრმად აქვს ჩადგმული ბურჯანაძის ოჯახს თავის ნუგზარ ფოფხაძიანად. ეს გახმაურებული ამბავია და ყველამ იცის.
მოკლედ, პირადად მე მაგიდასთან პუტინი კაბაში არ მჭირდება!
_ ქალბატონო თაკო, როცა ლეიბორისტების ოფისში შეხვედრები იმართებოდა, ბურჯანაძე თუ დაგელაპარაკათ?
_ არა, არა. მე ჩემი პრინციპები მაქვს, რომელიც არასოდეს დაინგრევა.
_ რამდენჯერმე პოლიტიკური ინტუცია ახსენეთ და, რას ფიქრობთ, პროცესები როგორ განვითარდება? ფაქტია: ოპოზიცია გაჩერებას არ აპირებს და არც „ოცნება“ მოდის დათმობაზე. ჰოდა, ამდენ პროტესტს აზრი აქვს?
_ ბალტიის ქვეყნების გზას უნდა დავადგეთ და რუსეთის უშიშროებისგან მართულ პარტიებს ბრძოლა გამოვუცხადოთ, ანუ ისე არ გაიგოთ, რომ მათ სუნთქვას და არსებობას ვუშლი, მაგრამ არ შეიძლება, ოკუპირებულ ქვეყანაში ასეთ კორუმპირებულ პოლიტიკანებს ენის მოჩლექით ვესაუბროთ, რადგან ისინი ყოველთვის მოახერხებენ, რომ რუსეთის დახმარებით საქართველო მუდმივად ერთ წრეზე ატრიალონ!
სხვათა შორის, ბურჯანაძის ერთ-ერთ ინტერვიუში საოცარი რამ მოვისმინე, ანუ ჟურნალისტმა უთხრა, სააკაშვილმა ერთ ლარად აგარაკი გაჩუქათო და იცით, რა უპასუხა?
_ რა?
_ მეკუთვნოდა და მაჩუქაო. „მეკუთვნოდა“ _ აი, ეს არის მისი, როგორც პოლიტიკოსის კრედო. სანამ ამ ტიპის პოლიტიკანები ფიქრობენ, რომ ამ ოკუპირებულ სახელმწიფოში მათ რამე ერთ ლარად ეკუთვნით და სანამ ამ მენტალიტეტს ხელს არ შევუშლით, ქვეყანას არ ეშველება!
_ შეიძლება, მაგრამ სხვა რამ გკითხეთ, ანუ თუ ხელისუფლება დათმობაზე არ წამოვიდა და ოპოზიციამაც „დაბოქლომება“ გააგრძელა, 2020 წლის ოქტომბრამდე ამ ბაკქანალიაში უნდა ვიყოთ?
_ ყველაფერ ამაზე პასუხისმგებლობა მთლიანად ამ უგვან ხელისუფლებას ეკისრება! ზოგადად, დაუწერელი კანონია, რომ კრიზისიდან გამოსვლის გზას ხელისუფლება უნდა ეძებდეს!
_ ცხადია, მაგრამ იქნებ, ოპოზიციამაც დაუშვა შეცდომა, როცა მთელი ზაფხული ისე გაატარა, რომ პროპორციულზე, პრაქტიკულად, არაფერი უთქვამს?
_ არ გეთანხებით.
_ რაში არ მეთანხმებით?
_ ჯერ ერთი, ის, რაც ივანიშვილმა გააკეთა, „საუკუნის გადაგდება“ იყო.
_ ამაზე არ გეკამათებით, მაგრამ ოპოზიცია მშვიდად რატომ იყო და რატომ არ უშვებდა, რომ ივანიშვილი „გადააგდება“?
_ ეს მეორედ არ თქვათ, თორემ საწყენად მივიღებ _ მთელი ზაფხული მაღალმთიანი რაიონები არ დაგვიტოვებია და არ ჩაგვიმუხლავს. ოპოზიციონერობა მხოლოდ ტელევიზიით გამოსვლა არაა და მთელი ზაფხული ხალხთან მუშაობაში გავატარეთ.
_ ხალხის გარდა, ოპოზიციას, ალბათ, დიპლომატიურ კორპუსთანაც უნდა ემუშავა.
_ იმუშავა! იგივე გრიგოლ ვაშაძეს აშშ-სა და გერმანიში ამ თემებზე ბრწყინვალე შეხვედრები ჰქონდა.
_ იმის გარდა, რომ საერთაშორისო საზოგადოება შეშფოთდება, ოპოზიციას რა ბერკეტი აქვს, „ოცნება“ დათმობაზე წამოიყვანოს?
_ ბერკეტები გვაქვს.
_ ბერკეტი საჯარო უწყებების „დაბოქლომებაა“?
_ არა.
_ აბა, კიდევ რა?
_ ერთი ამბავი ატეხეს, აი, გვარამიამ სიტყვა დამხობა გამოიყენაო. ძალიან დიდი ბოდიში, მაგრამ ჩემი განცხადება პირდაპირ ასე დაწერეთ: ხელისუფლება კონსტიტუციურ უფლებას, ანუ არჩევნების უფლებას გართმევს და გეუბნება, მე მინდა, ასეთი არჩევნები იყოს, ხვალ მომინდება და გადაგაგდებ, ზეგ კი სხვა რამე მომინდება და იმას გავაკეთებო. ან ივანიშვილმა ხვალ შეიძლება გაიღვიძოს, დაამთქნაროს და თქვას, მომინდა და ქართული სახელმწიფო რუსულ სივრცეში უნდა დაბრუნდესო. მე, როგორც კანონმორჩილი მოქალაქე, გეკითხებით: ლექსიკონში ის სიტყვა ვიპოვოთ, რომელიც ქართული სახელმწიფოებრიობის დაცვას შეეფერება!
გარდა ამისა, გაეროს კონვენციით, როცა საქმე ქვეყნის სახელმწიფოებრიობას ეხება, ხალხს ჯანყის უფლებას ვერავინ წაართმევს!
_ ისე, თუ ბურჯანაძის ვიზიტის შემდეგ ოსი სეპარატისტები დატყვევებულ ქართველ ექიმს მართლა გაათავისუფლებენ, ამით ეს ქალბატონი მოსახლეობის თვალში ქულებს ხომ არ ჩაიწერს?
_ არა! ამას საქართველო არ „ჭამს“ იმიტომ, რომ ვაჟა გაფრინდაშვილისნაირ მოქალაქეებს, ბურჯანაძეს პატრონი რომ ჰყავს მოსკოვში პუტინის სახით, მუდმივად ის იტაცებს და ავიწროებს. ნინო ბურჯანაძის რეაბილიტაციის გამო გასაკვირი არ იქნება, რომ ჩვენი მოქალაქეები გამოუშვან ან ისევ დაიჭირონ _ მაგათთან ასეთი ბინძური თამაშები „მოსულა“. აგერ, ხომ ნახეთ, სტრასბურგმა დასკვნა დადო, რომ, თავის დროზე, ბესლანში ბავშვები თავად დახოცა და ეს ქალბატონი ამ ქვეყანაზე ამბობს, ადამიანურად შეშფოთებულია და ჩვენს შინაურ საქმეებში არ ერევაო. პუტინი, თურმე, ადამიანურად ყოფილა შეშფოთებული, წელგადახსნილ ბიჭებს რომ გვიგზავნის და ტატუნაშვილის ცხედარს არ გვატანდა! საქართველოში აღარავინაა, განსაკუთრებით ახალგაზრდობა, რომელიც რუსეთისკენ ხელგაწვდილი ამ „პოლიტიკანკას“ ზღაპრებს დაიჯერებს!
რაც შეეხება ქართველ ექიმს, ბატონი ვაჟა ვინც უნდა გაათავისუფლოს, ყველა შემთხვევაში გახარებული ვიქნები, მაგრამ არ მგონია, რომ ამ „პოლიტიკანკამ“ ეს მაინც შეძლოს და თუ შეძლებს, არც ეს იქნება გასაკვირი, რადგან ჩვენს მოქალაქეებს მისი პატრონი იპარავს!
ისე, შემოგდებული პუტინი კაბაში მხოლოდ რუსეთის ვასალ ხელისუფლებას აწყობს. ამიტომ ამ ქალთან ფრთხილად უნდა ვიყოთ და სასწრაფოდ უნდა გაწიონ _ ეს ჩემი პოლიტიკური რჩევაა!

გიორგი აბაშიძე