შეიძლება, სუბიექტური ვარ, მაგრამ მიმაჩნია, რომ საქართველოში გუბაზ სანიკიძის მსგავსი ინტელექტუალი და გამოცდილი პოლიტიკოსი იშვიათობაა. მეტიც, მისი პოლიტიკური პროგნოზი თითქმის ყოველთვის ასპროცენტიანი სიზუსტით მართლდება ხოლმე. აქედან გამომდინარე, გასაკვირი არაა, სანიკიძის მიხეილ სააკაშვილთან შეხვედრამ „ოცნების“ ფანკლუბი რატომაც შეაშფოთა, ანუ ყველა, ვინც კი პოლიტიკაში ოდნავ მაინც ერკვევა, ხვდება, რომ ივანიშვილის გუნდი ხელისუფლებიდან მიდის და, სხვათა შორის, ისიც მოსალოდნელია, რომ მოვლენები ე. წ. სომხური სცენარით განვითარდეს.
ისე, გუბაზ სანიკიძე „სომხურ სცენარზე“ დიდი ხანია, საუბრობს და ამ თემას, ცხადია, დღევანდელ ინტერვიუშიც შევეხეთ. ამას გარდა, კიევური ვიზიტის დეტალებზეც ვისაუბრეთ.

მოკლედ, რატომ უმტყუნებს ივანიშვილს ნერვები და რა გეგმები აქვს სააკაშვილს? _ „ქრონიკა+“ გთავაზობთ ინტერვიუს გუბაზ სანიკიძესთან:

_ ბატონო გუბაზ, თქვენს კიევურ ვიზიტზე ბევრი ითქვა და დაიწერა. ჩვენი საუბრის ერთ-ერთი მთავარი თემაც, ცხადია, ეს იქნება, თუმცა მანამდე ხელისუფლებისა და ოპოზიციის შაბათს გამართულ შეხვედრაზე გკითხავთ. „ოცნება“ ამტკიცებდა, პროპორციულის თემა დახურულიაო, თუმცა უცებ „პლასტინკა შეცვალა“ და მოწინააღმდეგე მხარეს მოლაპარაკება შესთავაზა. ამას რით ხსნით?
_ არ მგონია, ხელისუფლებას შეეთავაზებინა.
_ აბა, ვინ შესთავაზა?
_ დიპლომატიურმა კორპუსმა.
_ ანუ „ოცნება“ იძულებული გახდა, რომ დიპლომატების მოთხოვნას დასთანხმებოდა და მოლაპარაკების მაგიდასთან დამჯდარიყო?
_ დიახ, დიახ და „ოცნების“ წარმომადგენლებს ცხვირ-პირზეც ეტყობოდათ, რომ მოლაპარაკება არ უნდოდათ.
_ ეს შეხვედრა უშედეგოდ დამთავრდა, ანუ „ოცნება“ გაჯიუტდა და დათმობაზე არ წავიდა. ამის შემდეგ, თქვენი აზრით, პროცესები როგორ განვითარდება?
_ არ ვიცი, ვერ გეტყვით.
_ რატომ ვერ მეტყვით?
_ უნდა ვიმარჩიელო… ყველაფერი იმაზეა დამოკიდებული, ხელისუფლების უფროსი რა ჭკუაზე დადგება.
_ რაკი ზემოხსენებული შეხვედრა რეზულტატის გარეშე დასრულდა, ე. ი., „ოცნება“ საერთაშორისო თანამეგობრობის წინააღმდეგაც მიდის?
_ დიახ, აბა, რას შვრება?! დასავლეთიც უნდა დარწმუნდეს, რომ ხელისუფლებაა მოლაპარაკების ჩამშლელი, თორემ ოპოზიცია მოლაპარაკებისთვის მზად არის.
_ შექმნილი ვითარების გათვალისწინებით, დასავლეთმა რა ნაბიჯები უნდა გადადგას?
_ დასავლეთმა ის უნდა გააკეთოს, რომ ზეწოლა ქართულ სახელმწიფოზე კი არა, ხელისუფლებაზე გააძლიეროს!
_ ზეწოლაში რას გულისხმობთ?
_ ამის უამრავი ფორმა არსებობს, საიდანაც ბევრის შესახებ ვიცით, ბევრის კი _ არა.
_ რაც შეეხება თქვენი და ვალერი გელბახიანის კიევურ ვიზიტს, ამ თემაზე ინტერვიუ ვალერი გელბახიანთანაც ჩავწერე და მასთან საუბრის დროსაც აღვნიშნე _ სააკაშვილთან თქვენმა შეხვედრამ „ქოცები“ უზომოდ გაამწარა. ამას რით ხსნით, ბატონო გუბაზ? ისე, მიშას სხვებიც შეხვედრიან, მაგრამ „მეოცნებეებს“ წონასწორობა ასე არასოდეს დაუკარგავთ.
_ ბევრი ჩადის და მიხეილ სააკაშვილს ბევრი ხვდება, მაგრამ ასე ღიად, თან დაანონსებით, პირველი, მგონი, მე შევხვდი!
_ არ ჩათვალოთ, რომ გეპირფერებით, უბრალოდ, ფაქტია: ძალიან გონიერი და ჭკვიანი ადამიანი ხართ, შესაბამისად, ბევრ რამეს წინასწარ ხვდებით. ჰოდა, თქვენი კიევური ვიზიტი „ქოცებისთვის“, ალბათ, ერთგვარი სიგნალი იყო, რომ საქართველოში „ქოციანობა“ სრულდება და ამიტომაც გაწიწმატდნენ!
_ თქვენგან ასეთი შეფასება გამიხარდა და დიდი მადლობა.
_ სამადლობელი არაფერია, უბრალოდ, ის გითხარით, რასაც ვფიქრობ. ახლა კი კითხვა: თქვენი და სააკაშვილის შეხვედრა რა შედეგს მოიტანს?
_ ჩვენ _ მე და ვალერი გელბახიანმა, პრაქტიკულად, ყინული გავჭერით.
_ ანუ?
_ აქამდე ხელისუფლება მიხეილ სააკაშვილისა და „ნაციონალური მოძრაობის“ ბლოკადირებას მეტ-ნალები წარმატებით, მაგრამ მაინც ახერხებდა. აბსოლუტურად გააზრებული გვქონდა, რასაც ვაკეთებდით, ანუ ჩვენ შევეცადეთ, რომ ეს ბლოკადა მოგვეხსნა. მაგალითი სხვა პოლიტიკურ ლიდერებსაც მივეცით და ვფიქრობ, ეს ინტენსიური გახდება.
_ ე. ი., აქამდე სხვა პოლიტიკურ ლიდერებს მიშასთან შეხვედრა „უტყდებოდათ“?
_ დიახ, მიხეილ სააკაშვილის კომპლექსი ჰქონდათ.
_ ეს კომპლექსი, მგონი, თქვენც გქონდათ.
_ დიახ, რა თქმა უნდა.
_ აკი, თქვით კიდეც, სააკაშვილი თავგასიებულს მეძახდაო.
_ მთლად ტყუილს არ ამბობდა და ამ საკითხში სააკაშვილს ვეთანხმებოდი.
_ ხუმრობა იქით იყოს და, ბატონო გუბაზ, ვიცი, ყველაფერს არ მეტყვით, მაგრამ მოდით, თქვენი და სააკაშვილის შეხვედრის მნიშვნელოვანი დეტალები გამიმხილეთ.
_ ნაწილს გეტყვით, ნაწილს კი, ბუნებრივია, _ ვერა, თუმცა არ დაგიმალავთ, რომ მიხეილ სააკაშვილთან თანამშრომლობას ვაპირებ!
_ და ეს რა სახის თანამშრომლობა იქნება _ პიროვნული თუ პარტიული?
_ პიროვნული. საერთოდ, ეს კარგი შეკითხვაა, რადგან მე და ვალერი გელბახიანი კიევში ისე არ ვიყავით, როგორც პარტიის წარმომადგენლები. ეს ჩვენი პირადი ვიზიტი იყო.
რაც შეეხება პარტიულობას, მართალია, „გამარჯვებული საქართველოს“ საინიციატივო ჯგუფის დამფუძნებელი ვიყავი, მაგრამ დღეს თავს განვიხილავ, როგორც კერძო პირს.
_ „ჩავაზუსტოთ“: სააკაშვილს კერძო პირი, გუბაზ სანიკიძე შეხვდა და არა _ „გამარჯვებული საქართველოს“ წარმომადგენელი?
_ დიახ, კერძო პირი.
_ მიხეილ სააკაშვილი „ნაციონალური მოძრაობის“ თავმჯდომარე აღარაა, ანუ ის თქვენთვის კერძო პირია?
_ სააკაშვილი გავლენიანი პოლიტიკოსია და მის უკან გაცილებით დიდი პოლიტიკური ძალა დგას, ვიდრე _ ჩემი და ვალერის უკან, მიუხედავად იმისა, რომ საკმაოდ დიდი ხნის და გამოცდილი პოლიტიკოსები ვართ.
_ ბატონო გუბაზ, მაინც, ვერ გავიგე, სააკაშვილთან რა ტიპის თანამშრომლობას აპირებთ?
_ თანამშრომლობა თანამშრომლობაა. ვფიქრობ, ეს ბოლო შეხვედრა არ იყო და ახალი წლის შემდეგ კიდევ იქნება, თუმცა მასთან კომუნიკაცია გვაქვს და გაგრძელდება კიდეც.
_ სააკაშვილთან კომუნიკაცია შუამავლის საშუალებით დაამყარეთ?
_ რა თქმა უნდა. სხვათა შორის, სურვილი ორმხრივი იყო, ანუ შეხვედრა მასაც უნდოდა და _ ჩვენც.
საერთოდ, ახლა ქვეყანაში გაჭედილი სიტუაციაა _ ივანიშვილმა „გაჭედა“ და ქვეყანა გამოუვალ მდგომარეობაში აღმოჩნდა. მოკლედ, აქ ქვეყანაზეა საუბარი და არა _ პირადულზე. შუამავლების საშუალებით შეხვედრის თარიღზე შევთანხმდით და კიევში ჩავედით. ყველაფერი ეს, დაახლოებით, ერთ თვეს გრძელდებოდა.
_ ბატონო გუბაზ, მიშამ ის წლები თუ გაგახსენათ, როცა ივანიშვილის გვერდით იყავით და, ერთგვარად, ნიშნიც ხომ არ მოგიგოთ, რომ ქვეყნის გაჭედვაში წვლილი თქვენც შეიტანეთ?
_ საუბარი ორმხრივ შეცდომებზე იყო. სხვათა შორის, სააკაშვილი დღევანდელი გადმოსახედიდან მიიჩნევს, რომ 2012 წელს მის პოლიტიკურ ძალას არჩევნები უნდა წაეგო. ამასთან, ფიქრობს, რომ შეცდომები იყო დაშვებული.
მოგეხსენებათ, ვალერი გელბახიანი „ოცნების“ კოალიციის წევრი არ გახლდათ, ამიტომ ჩემი მხრიდან ითქვა, რომ როცა ივანიშვილთან ალიანსში ვიყავით, რაღაცებს წავუყრუეთ, ანუ კოალიციაში შემავალ პარტებს თავიდანვე პრინციპული პოზიცია უნდა დაგვეჭირა. კოალიციაში შემავალი პარტიების მთავარი შეცდომა ის იყო, რომ კოორდინაცია ვერ მოვახერხეთ, ანუ ცალ-ცალკე ვიყავით.
_ კოორდინაცია იმიტომ ვერ მოახერხეთ, რომ მზესთან, ანუ ივანიშვილთან ახლოს ყოფნა ყველას დამოუკიდებლად უნდოდა?
_ არ ვიცი, ყველას თავისი სუბიექტური თუ ობიექტური მოტივაცია ჰქონდა. ისე, პირადად მე ყველანაირად ვცდილობდი, რომ გარკვეული კოორდინაცია გვქონოდა, მაგრამ არ გამომივიდა _ საქმისთვის ასე ჯობს, _ ვიდრე სხვის კრიტიკაზე გადავალ, საკუთარი თავი გავაკრიტიკო.
მოკლედ, ჩვენ ალასანიას პარტიის რეპრესია არ უნდა დაგვეშვა. ვცდილობდით, რომ შიგნით სიტუაცია გაგვენეიტრალებინა _ „კაბელების საქმეზე“ დაპატიმრებულთა თავდებობაზე, მაგალითად, ხელიც მოვაწერე, მაგრამ უფრო მეტი უნდა გაგვეკეთებინა, ცოტა აგრესიულები უნდა ვყოფილიყავით და ალასანია არ უნდა დაგვეთმო.
_ აგრესიულები რომ ყოფილიყავით, თქვენსას გაიტანდით, ანუ ივანიშვილი უკან დაიხევდა?
_ რატომ ვერ გავიტანდით? სხვათა შორის, ირაკლისაც ვთხოვე, რომ კოალიცია არ დაეტოვებინა, მაგრამ ჩათვალა, რომ ასე უნდა მოქცეულიყო.
_ ყველაფერ ამის გათვალისწინებით, დღეს პოლიტიკაში ივანიშვილი მარტოხელა მოთამაშეა?
_ დიახ, მარტოხელაა. არქაული მეთოდებით მოქმედებს _ ესაა შიგნით შუღლის ჩამოგდება და, პლუს, მოსყიდვა, მაგრამ ვფიქრობ, რომ ყველაფერი ეს ამჯერად აღარ გამოუვა, რადგან მან მთავარი შეცდომა დაუშვა.
_ რას გულისხმობთ?
_ მას უკვე „გადამგდების“, ცრუს სახელი აქვს და არავინ აღარ ენდობა! მასთან თანამშრომლობა ვინმემ რომც მოინდომოს, გულის სიღრმეში ეჭვი მაინც ექნება, ეს კაცი გადამგდებიაო და ეს ეჭვი იმიტომ გაუჩნდება, რომ ივანიშვილმა ყველა გადააგდო!
საზოგადოებრივი ურთიერთობის კანონია ასეთი _ როცა ერთი ყველას აგდებს, მერე ყველა ამ ერთს აგდებს ხოლმე! ახლა წორედ ამ სტადიაში ვართ!
_ შეიძლება, მაგრამ მას შემდეგ, რაც „ახალმა მემარჯვენეებმა“ და უსუფაშვილმა მამუკა ხაზარაძესთან კოალიცია შექმნეს, პირადად მე ეჭვი გამიჩნდა, რომ ამ ახალი კოალიციით ივანიშვილი ოპოზიციის დაშლას და ე. წ. მართვადი ოპოზიციის შექმნას ცდილობს.
_ ასეთი შეფასების მომხრე არ ვარ.
_ რატომ?
_ უსუფაშვილსაც ძალიან კარგად ვიცნობ და „ახალ მემარჯვენეებსაც“, განსაკუთრებით, _ ფიქრიას. მართალია, მამუკას ნაკლებად ვიცნობ, მაგრამ მოდით, ასე ჩავთვალოთ _ ივანიშვილი პოლიტიკური კეთროვანია და მასთან მიკარება კეთრის გადადებას ნიშნავს.
_ შეიძლება, მაგრამ ფაქტია: ზემოხსენებული ახალი კოალიცია ოპოზიციის რადიკალურ ქმედებებს ემიჯნება.
_ ეს მისი უფლებაა, რომ ტაქტიკურ მოქმედებებზე საკუთარი შეხედულება ჰქონდეს. ეს შეხედულება სერიოზული ეჭვის საფუძველი არაა.
_ ეჭვი ეჭვია და „სერიოზულობა“ რა შუაშია?
_ ეჭვი ერთმანეთზე ყველას გვაქვს, მაგრამ ეს ეჭვი ნდობამ უნდა გადაძლიოს, ანუ ჩვენ იმისთვის ვართ განწირულები, რომ ერთმანეთს ვენდოთ! ოპოზიციასა და ქვეყანას სხვა გზა არ აქვს!
_ ნდობასთან ერთად, ალბათ, ისიც აუცილებელია, რომ ხელისუფლება მუდმივ დისკომფორტს გრძნობდეს.
_ დიახ და ეს დისკომფორტი აუცილებლად გაღრმავდება!
_ ბატონო გუბაზ, მიხეილ სააკაშვილი ოპოზიციის რადიკალურ ქმედებებს მხარს უჭერს?
_ რაც უნდა გაგიკვირდეთ, სააკაშვილი იმის მომხრეა, რომ ხელისუფლება არჩევნების გზით შეიცვალოს! იმაზე არჩევანი კი, ყველაფერ ამის თანმდევი რა უნდა იყოს, ხელისუფლებამ უნდა გააკეთოს! საერთოდ, ხელისუფლების უპირატესობა ის არის, რომ არჩევანს ის აკეთებს, არადანს კი _ ოპოზიცია. ჩვენ ახლაც არადანს ვთამაშობთ.
_ გასაგებია, რომ სააკაშვილს ხელისუფლების არჩევნებით შეცვლა უნდა, მაგრამ ვადამდელ არჩევნებს მხარს უჭერს თუ არა?
_ სააკაშვილისთვის ამას დიდი მნიშვნელობა არ აქვს.
ზოგადად, ხალხი ძალიან უკმაყოფილოა _ 2012 წლის არჩევნების წინ „ნაციონალური მოძრაობა“ ასე ცუდ მდგომარეობაში არ იყო და ამაში, მგონი, დამეთანხმებით. „ოცნება“ კი აბსოლუტურად დანგრეული და ეროზირებულია!
_ დიახ, გეთანხმებით, რომ 2012 წლის არჩევნების წინ ქვეყანაში, მინიმუმ, უკეთესი ეკონომიკური ვითარება იყო.
_ დიახ, ასე იყო, თან „ნაციონალებს“ მომხრეებიც ჰყავდათ და იერარქიაც მუშაობდა. ახლა ამათ შეხედეთ _ ცხვრებივით დადიან. ერთი გიჟი-გადარეული ჰყავთ კობახიძის სახით. სხვათა შორის, ამ ბიჭს უკვე ეტყობა, რომ ფსიქიკური გადახრები აქვს. უმრავლესობის უმრავლესობა კი იმალება _ სამზეოზე აღარ გამოდის და ბნელ ხვრელშია შემძვრალი. ადამიანი ასე რომ იმალები _ ტელეკამერებს ემალები და ქუჩაში გამოსვლისაც გეშინია, ეს ლპობის პროცესია! „ოცნების“ გადამწიფება დამთავრდა, გადამწიფება კი, იცით, სიდამპლეში გადადის ხოლმე.
_ ალბათ, იმის შესახებაც ისაუბრეთ, სააკაშვილი საქართველოში ჩამოსვლას აპირებს თუ არა.
_ დიახ, ვისაუბრეთ. საქართველოში, რა თქმა უნდა, ჩამოვა, მაგრამ რა პირობებში და როდის, ეს, მოდით, დახურულად დავტოვოთ!
ერთსაც გეტყვით: სააკაშვილი ქვეყანაში არეულობის ინიციატორი არავითარ შემთხვევაში არ იქნება! არეულობის ინიციატორი, შეიძლება, ხელისუფლება და ბიძინა ივანიშვილი იყოს!
_ „ოცნება“, როგორც შარშან, საპრეზიდენტო არჩევნების მეორე ტურის წინ, მიხეილ სააკაშვილისგან მტრის ხატის შექმნას ახლაც შეეცდება?
_ ამას ვეღარ შეძლებს! ჩვენი შეხვედრის ერთ-ერთი მიზანიც ამ სტერეოტიპის დანგრევა იყო. „ოცნების“ პროგრამაში მხოლოდ ის იქნება, აი, სააკაშვილი ჩამოვა და თავებს დაგვაყრევინებს ან ომი დაიწყებაო, მაგრამ ეს სიბნელე და სიბრიყვე იქნება!
სააკაშვილს სამი დღე ველაპარაკე და არ ეტყობა, რომ შურისმაძიებელი კაცი იყოს!
_ ისიც შეატყვეთ, რომ მიშა ძველ შეცდომებსაც არ გაიმეორებს?
_ რა თქმა უნდა, არა და ამაში დარწმუნებული ვარ! ზოგადად, იცით, როგორაა? _ სანამ სხვას დაარწმუნებ, მანამდე თავად უნდა დარწმუნდე. მოკლედ, დარწმუნებული ვარ, რომ სააკაშვილისგან შეცდომების განმეორების საფრთხე აღარ არსებობს, რადგან პოლიტიკური ფასი მხოლოდ მისმა პოლიტიკურმა გუნდმა კი არა, პირადად სააკაშვილმაც გადაიხადა.
სხვათა შორის, მან ხაზი გაუსვა, რომ ასაკის მატებასა და დროის გასვლათან ერთად ბევრი რამ სხვანაირად ჩანს. ჩემს შემთხვევაშიც ასეა.
_ ბატონო გუბაზ, სააკაშვილის მმართველობის დროს ყველა საპროტესტო აქციის ავანგარდში იდექით. მიშას ჰკითხეთ, ამდენ უსამართლობას რატომ სჩადიოდა? აი, მაგალითად, გირგვლიანის მკვლელებს ხელი რატომ დააფარა?
_ არ ვიცი, ეს უნდა ვთქვა თუ არა, მაგრამ მიშამ მითხრა, რომ გირგვლიანი მისი პირადი ტრაგედიაა!
_ ანუ ეს ტრაგედია მიშას გარემოცვამ მის წინააღმდეგ გამოიყენა?
_ გარემოცვის პრობლემებიც იყო, გუნდის შიგნით უთანხმოებებიც ჰქონდათ და დაპირისპირებებიც.
მიშას კითხვები თავის პოლიტიკურ დევნასთან დაკავშირებით ვალერი გელბახიანმა დაუსვა, რაღაცები დაზუსტდა და ჯობია, ამის შესახებ ვალერიმ მოგიყვეთ.
_ ვალერი გელბახიანმა უკვე მომიყვა და მისი ინტერვიუ ჩვენი გამოცემის ამავე ნომერში გამოქვეყნდება.
_ მოკლედ, ჩვენ ძალიან პროდუქტიული და გულახდილი საუბარი გვქონდა.
_ ერთი სიტყვით, თქვენი და მიხეილ სააკაშვილის შეხვედრით ქართულ პოლიტიკაში ახალი ერა დაიწყო?
_ ჩვენს ქმედებას ასე მონუმენტურად არ შევაფასებ, თუმცა მიმაჩნია, რომ ჩვენ, გარკვეუწილად, ყინულმჭრელები ვართ. სხვათა შორის, ვიცოდი, რომ ამ შეხვედრას დიდი ბოღმა და ღვარძლი მოყვებოდა. ისე, ისინი, ვინც ოცნებობენ, გაბრაზებულები აბსოლუტურად სწორად არიან, რადგან ძალიან ბევრ მათგანს, მათ შორის, ივანიშვილსაც კი არ ჰქონდა დაშვებული, რომ მე და მიშა ერთმანეთს შევხვდებოდით.
_ ბატონო გუბაზ, ერთ-ერთი ინტელექტუალური პოლიტიკოსი ხართ. ჰოდა, თქვენი და მიშას კოალიცია, „ოცნების“ მსგავსად, ოპოზიციის სხვა ფრთასაც ხომ არ გააღიზიანებს?
_ კოალიციას თავი დავანებოთ, რადგან უკვე გითხარით, რომ ისე ვმოქმედებ, როგორც კერძო პირი _ ამჟამად არც ერთი პარტიის წევრი არ ვარ.
ზოგადად, მე და ვალერი გელბახიანი რამე განსაკუთრებულობას არ დავიჩემებთ, მაგრამ, ალბათ, ატყობთ, რომ ბოლო დღეებში იმ ოპოზიციური პარტიის ლიდერებმა, რომლებიც მიხეილ სააკაშვილს აბსოლუტურად მიუღებლად თვლიდნენ, საუბარი უკვე შეცვალეს, ანუ ჩვენი მიზანი, თუნდაც ჩვენი საფლავებიდან ამოთხრის ფასად, მიღწეულია. ზოგადად, პოლიტიკოსი პოლიტოლოგისგან იმით განსხვავდება, რომ ისეთი გადაწყვეტილება მიიღოს, რომლითაც საკუთარ თავს გადაახტება. ისე, საუბარსა და დიალოგს მტრები და ოპონენტები იწყებენ და არა _ მეგობრები. მეგობრებთან საჩხუბარი არაფერია.
მოკლედ, ასეთ რამეზე შევთანხმდეთ: ქვა იმან გვესროლოს, თუ ვინმე ვალერი გელბახიანზე მეტად იყო რეპრესირებული. სხვათა შორის, იმ ხელისუფლების დროს, გარკვეულწილად, მეც დავზიანდი!
_ ბატონო გუბაზ, ნინო ბურჯანაძესთან გარკვეული ურთიერთობა გაქვთ. ჰოდა, თქვენი ნაბიჯი ქალბატონ ბურჯანაძესაც ხომ არ მისცემს სტიმულს, რომ სააკაშვილს შეხვდეს?
_ მერწმუნეთ, ის ნაბიჯი, რაც ნინო ბურჯანაძემ ამ აქციებთან დაკავშირებით გადადგა, პოლიტიკური გმირობაა და ამით კიდევ ერთხელ დაადასტურა, რომ ის ძალიან სერიოზული პოლიტიკოსია, რომელიც ქვეყანას სჭირდება!
_ ერთი სიტყვით, ყველა ერთის წინააღმდეგ კი არის, მაგრამ ის ერთი პოზიციის შეცვლას არ აპირებს. შესაბამისად, მთელი წელი, ანუ 2020 წლის შემოდგომამდე, აქციების რეჟიმში ვიცხოვრებთ?
_ მერე რა?
_ ყველაფერი ეს, მინიმუმ, ქვეყნის ეკონომიკას ხომ დაარტყამს?
_ ამაზე პასუხს ხელისუფლება აგებს! ხელისუფლებას პოლიტიკური მოვალეობა აქვს. თუ ამ მოვალეობას ვერ გრძნობს, მაშინ სახლში მიბრძანდეს და ხელისუფლება იმ პოლიტიკურ ძალებს დაუთმოს, ვინც პასუხისმგებლობას აიღებს!
ახლა ქვეყანაზე პასუხს ივანიშვილი აგებს და მგონი, ხვდება, რომ ყველაფერი მას „ეტენება“. იმასაც ხვდება, რაც ემუქრება, მაგრამ ამაზე არასწორ რეაგირებას ახდენს, ანუ ჰგონია, რომ ვინეს მისი შეეშინდება _ გამომივიდა ეგეც იოსებ სტალინი ან მაო ძედუნი! ერთი უნიჭო და გაუნათლებელი აფერისტია, რომელიც 90-იან წლებში აქედან გაიქცა და რუსეთში ფული იშოვა! მაშინ რუსეთში ფულს ყველა შოულობდა. ივანიშვილის გენიალურობა იმაში მდგომარეობს, რომ ეს ფული არ დაკარგა და ქურდების ნაცვლად „ფსბ“-ს შეეკრა. აი, ეს არის მისი მონაპარტიზმი, თორემ რამე უწარმოებია თუ გამოუშვია?
რაც შეეხება ქველმოქმედებას, რომელზეც სულ ლაპარაკობენ, ქველმოქმედება მაშინაა, როცა უპირობოდ გასცემ. ივანიშვილმა გასცა და სანაცვლოდ სახელმწიფო წაიღო, ეს როგორი ქველმოქმედებაა? ეს ჩვეულებრივი აფერაა _ რაც დახარჯა, ათი იმდენი ამოიღო!
_ ისე, ბატონო გუბაზ, მახსოვს, მუდმივად ამბობდით, საქართველოში პროცესები სომხური სცენარით განვითარდებაო, ანუ ის, რაც ახლა ხდება, სომხური სცენარია?
_ ამას ვუახლოვდებით.
ზოგადად, ეს ნერვების ომია. ნერვები კი ბიძინა ივანიშვილს უმტყუნებს და ეს მისი ბოლო ინტერვიუდანაც გამოჩნდა _ მიხეილ სააკაშვილი ორმოცჯერ ახსენა და ყვიროდა, საქართველოში ვერ ჩამოვაო. მოკლედ, ივანიშვილს სააკაშვილის ეშინია და ყველანაირად შევეცდები, რომ ამ შიშის ახდენაში ხელი შევუწყო!
და კიდევ ერთი: ამ ქვეყნის ინტერესები ამ ქვეყანაში ჩემზე უკეთესად შეიძლება, ორმაც არ იცოდეს. ამასთან, ამ ქვეყანას, თავისი წრსულითა და აწმყოთი, ჩემზე უკეთესად არავინ იცნობს. ყველა ტყვია, რომელიც საქართველოს ესროლეს, მე მომხვდა და, სხვებისგან განსხვავებით, როგორც ჩანს, კიდევ მომხვდება!

გიორგი აბაშიძე