შალვა თადუმაძის შემდეგ ერთგვარ სკანდალში მისი მეუღლე ეხვევა, ანუ საუბარი იმაზეა, რომ ქვეყნის მოქმედი მთავარი პროკურორისა და უზენაესი სასამართლოს უვადო მოსამართლეობის კანდიდატის ცოლი შპს „დაგის“ იურისტია და, როგორც ადვოკატი ვალერი გელბახიანი „ქრონიკა+“-ს ეუბნება, თადუმაძემ ამდენი ქონება სწორედ ასე დააგროვა, თუმცა გელბახიანის თქმითვე, პარლამენტის იურიდიული კომიტეტის მოსმენაზე თადუმაძემ საკუთარი ცოლის შემოსავლები დამალა.

ზოგადად, იმაში გასაკვირი არაფერია, რომ თანამდებობის პირის ოჯახის წევრი რომელიმე კერძო კომპანიაში იყოს დასაქმებული და დიდი შემოსავალიც ჰქონდეს, მაგრამ, ამ შემთხვევაში, პრობლემა ის გახლავთ, რომ „დაგის“ მფარველი, გელბახიანის თქმით, ბიძინა ივანიშვილია. მეტიც, როგორც ჩვენი რესპონდეტი ამბობს, თადუმაძის ცოლმა „დაგში“ მუშაობა „ოცნების“ ხელისუფლებაში მოსვლისთანავე დაიწყო.
შპს „დაგზე“ საუბრისას კიდევ ის არის საინტერესო, რომ ეს კომპანია, თავის დროზე, თურმე, სააკაშვილთან იყო დაახლოებული. ყოველ შემთხვევაში, „ნაციონალური მოძრაობის“ დროს მას მესტიაში ტენდერი მოუგია და ვალდებულება აუღია, რომ სვანეთში ახალი ტიპის საცხოვრებელ სახლებს ააშენებდა. თუმცა ვალერი გელბახიანის თქმით, მშენებლობას ისე შესდგომია, რომ პროექტი არ ჰქონია.
სხვათა შორის, ამის გამო „დაგსა“ და მესტიის მუნიციპალიტეტს შორის სასამართლო დავაც დაიწყო.
2014 წლის დეკემბერში რადიო „ათინათი“ ავრცელებს ინფორმაციას, სადაც ვკითხულობთ:
„ზუგდიდის საქალაქო სასამართლოში მესტიის მუნიციპალიტეტის გამგეობისა და შპს „დაგის“ სასამართლო პროცესი გაიმართა. მესტიის მუნიციპალიტეტი სამშენებლო კომპანიისგან 6 მილიონ 700 ათას ლარს ითხოვს. დავის საგანი მესტიის ცენტრის რეაბილიტაციაა, რომელიც სამშენებლო კომპანიამ, მესტიის გამგეობის მტკიცებით, კანონიერი საფუძვლის გარეშე, არაკეთილსინდისიერად და უხარისხოდ შეასრულა. სასამართლო პროცესი სამოქალაქო კოდექსის 385-ე მუხლით მიმდინარეობს, რაც უსაფუძვლო გამდიდრებას გულისხმობს და ვალდებულების გარეშე გადახდილი თანხის დაბრუნებას ითვალისწინებს.
შპს „დაგის“ წარმომადგენელმა გიორგი ნასყიდაშვილამა პროცესზე განაცხადა, რომ მესტიის მუნიციპალიტეტის საჩივარი უსაფუძვლოა და კომპანიას ბრალი „არაფერში მიუძღვის“. შპს-ს წარმომადგენელმა სასამართლოს მოწმეების დაკითხვის შუამდგომლობით მიმართა. ის ითხოვდა დაკითხულიყვნენ: ყოფილი დეპუტატი კანდიდ კვიციანი, მესტიის ყოფილი გამგებელი შმაგი ნაკანი, მესტიის ცენტრის რეაბილიტაციის პროექტის ავტორი მერაბ გუჯეჯიანი, კომპანიის ფინანსური მენეჯერი და მუშები. მოსამართლე ირაკლი აბშილავამ შუამდგომლობა ნაწილობრივ დააკმაყოფილა. მესტიის მუნიციპალიტეტის გამგეობის წარმომადგენელმა ვალერი გელბახიანმა აღნიშნა, რომ არც ერთ ობიექტზე, რომელსაც რეაბილიტაცია ჩაუტარდა, მიღება-ჩაბარების აქტი არ გაფორმებულა. მისივე მტკიცებით, მათ, ასევე, ვერ იპოვეს მესტიის ცენტრის რეაბილიტაციის პროექტი. ველერი გელბახიანის განმარტებით, შპს „დაგი“ სამშენებლო სამუშაოებისთვის თანხას წინასწარ, სრულად იღებდა და ეს მაშინ, როდესაც, ხელშეკრულების თანახმად, წინასწარ მხოლოდ 30% უნდა მიეღო.
მესტიის მუნიციპალიტეტის ცენტრის რეაბილიტაცია 2010-2012 წლებში განხორციელდა. შპს „დაგი“ მთელი ქვეყნის მასშტაბით ასრულებს სამშენებლო სამუშაოებს. სასტუმრო „ანაკლია“, განმუხურის ამფითეატრი, ქუთაისის საფეხბურთო სტადიონი, ქუთაისის ოპერისა და ბალეტის სახელმწიფო თეატრი, წყალტუბოს რეაბილიტაცია _ ეს იმ ობიექტების არასრული ჩამონათვალია, სადაც შპს „დაგიმ“ სამშენებლო სამუშაოები შეასრულა. შპს-ს სახელმწიფოსგან ათობით მილიონი ლარი აქვს მიღებული“.
ვალერი გელბახიანთან საუბრით ირკვევა, რომ „დაგი“ ჭიათურაშიც გაეხვია სკანდალში, ამის შესახებ დეტალურად გელბახიანის ინტერვიუდან შეიტყობთ:

_ ბატონო ვალერი, ბოლო დღეების გმირი თუ ანტიგმირი შალვა თადუმაძეა. იურიდიულ წრეებში ამ ადამიანზე რას ამბობენ?
_ სიმართლე რომ გითხრათ, პირადად არ ვიცნობ. ისე, ამბობს, რომ ბადრი პატარკაციშვილის ადვოკატი იყო, მაგრამ მე ვერ ვიხსენებ. ამიტომ არ ვიცი, უნდა დავეთანხმო თუ არა იმაში, რასაც ამბობს.
_ ანუ თადუმაძე იტყუება, როცა ამბობს, პატარკაციშვილის ადვოკატი ვიყავიო?
_ მე არ შემხვედრია. მაგალითად, სისხლის სამართლის საქმეში არ ყოფილა, სხვები იყვნენ _ ბარათაშვილი და შავგულიძე. არ მახსოვს, ბადრის სამოქალაქო საქმე ჰქონდა თუ არა, მაგრამ თავად თადუმაძე ამბობს, რომ სამოქალაქოს კი არა, სისხლის სამართლის სპეციალისტია. სისხლის სამართლის დავებში კი, როგორც გითხარით, არ მახსოვს.
თადუმაძესთან პიროვნული კვეთაც არასოდეს მქონია, თუმცა სხვებისგან ვიცი, რომ ბოროტი, ინტრიგანი ბიჭი ნამდვილად არ არის და არც შავი მაქინაციების დამგების ხასიათი აქვს, ანუ უფრო მის კეთილ თვისებებზე საუბრობენ, ვიდრე _ ნეგატიურ მხარეებზე!
ამიტომ მის მიმართ პიროვნულად და პერსონალურად ანტიპათია არ მაქვს, მაგრამ როგორც ირკვევა, იურისპრუდენციაში სახელმწიფო კი არა, უფრო თვითგანათლება აქვს მიღებული. უკეთესი იქნებოდა, რომ ეს არ გამეგო.
_ უკეთესი რატომ იქნებოდა?
_ არ შეიძლება, რომ ქვეყნის მთავარი პროკურორი ან უზენაესი სასამართლოს მოსამართლე ელემენტარულ სამართლებრივ განათლებას იყოს მოკლებული. საერთოდ, დიპლომი განათლებას არ ნიშნავს. დიპლომი ქაღალდია. იმას კი, ადამიანმა იურიდიულად რომ იაზროვნოს, კლასიკური განათლება სჭირდება, ანუ სამართალს სისტემურად უნდა იაზრებდეს და ისე აცნობიერებდეს, როგორც მოცემულობას. კანონის, კოდექსის წაკითხვა და აქედან საკუთარი ინტერპრეტაციის გაკეთება ნებისმიერს შეუძლია, მაგრამ მოაზროვნე იურისტი იმას ნიშნავს, რომ ყველაფერი ეს სამართლებრივად გაიაზროს და, აქედან გამომდინარე, იურიდიული ცოდნა, კრიტერიუმები და შეფასებები ჩამოუყალიბდეს.
მოკლედ, როცა თადუმაძის პარლამენტში გამოსვლას ვუსმენდი, ცოტა დაბნეული ვიყავი.
_ დაბნეული რატომ იყავით?
_ ქვეყნისთვის სამარცხვინოა, როცა გამოვლინდება, რომ მართლმსაჯულების უმაღლეს ქურუმს არამართლმსაჯულების ცოდნა და ცნობიერება აქვს! ასეთი რამ ნებისმიერ ქვეყანაში დაუჯერებელი იქნებოდა. ჩვენთან კი, სამწუხაროდ, რეალობაა.
_ ყველაფერი ეს იურიდიული წრეებისთვის შეურაცხმყოფელია, ბატონო ვალერი?
_ ცხადია. სხვათა შორის, ეს თადუმაძისთვისაც შეურაცხმყოფელია და აკი, თქვა კიდეც, უზენაესი სასამართლოს მუდმივ მოსამართლედ რომ არ ამირჩიონ, მთავარი პროკურორის თანამდებობაზე ჩემი ყოფნის საკითხი ავტომატურად დადგებაო, ანუ თვითონაც აცნობიერებს, რა მდგომარეობაშიც არის.
_ ამბობთ, თადუმაძე კარგი და უბოროტო ადამიანიაო. შესაძლოა, ასეც არის, მაგრამ ჩემი მეზობელი ჯუმბერიც კეთილი და გადასარევი პიროვნებაა, თუმცა ეს საკმარისი არ არის, რომ იგი თანამდებობაზე დავნიშნოთ. შესაბამისად, ჩნდება ლოგიკური კითხვა: ივანიშვილი მოწადინებული რატომაა, რომ უზენაესი სასამართლოს ჯერ უვადო წევრი, შემდეგ კი თავმჯდომარე, მაინცდამაინც, თადუმაძე გახდეს?
_ არ ვიცი. ისე, ეს პირველი შემთხვევა რომ იყოს, შეიძლება გვეთქვა, აი, ვინმეს გაეპარა და თავის დროზე ყურადღება არ მიაქციაო, მაგრამ ყველაფერ ამას ჩვენს სახელმწიფოში უკვე სისტემური ხასიათი აქვს.
_ ანუ?
_ ფარცხალაძე, ალბათ, გახსოვთ.
_ ბუნებრივია, მახსოვს _ ფარცხალაძის დავიწყება როგორ შეიძლება!
_ დიპლომი არც ფარცხალაძეს ჰქონდა და, ამავე დროს, კრიმინალურ საქმიანობაში იყო მხილებული.
_ დიახ, მედიამ ფარცხალაძეს ის ამბავი ამოუქექა, დასავლეთის ერთ-ერთ ქვეყანაში მაღაზიიდან ბოტასები რომ მოიპარა.
_ წულუკიანს, რომელსაც ქვეყნის იუსტიცია და, საერთოდ, სამართლებრივი სისტემის მართვა ანდეს, როგორც გაირკვა, იურიდიული განათლება არ მიუღია და ადმინისტრაციული კოლეჯი აქვს დამთავრებული, რომელიც, ჩვენს ენაზე რომ ვთქვათ, ჩვეულებრივი პროფტექნიკური სასწავლებელია!
სხვათა შორის, პირადად მე ვიცი, რომ რამდენიმე მოსამართლეს იურიდიული დიპლომი არ აქვს, ან ისეთი საგანმანათლებლო დაწესებულება „დაამთავრა“, რომელიც ფიზიკურად არ არსებობდა და მხოლოდ ქაღალდზე იყო, ანუ ამ მოსამართლეებს ჯიბეში დიპლომი კი უდევთ, მაგრამ განათლება არ გააჩნიათ.
მოკლედ, ყველაფერ ამას ქვეყანაში უკვე სისტემური ხასიათი აქვს და, შესაბამისად, უნდა ვივარაუდოთ, რომ ასეთი რაღაცები სპეციალურად ხდება!
_ ჰოდა, თქვენი აზრით, ამ, ასე ვთქვათ, სპეციალურობის მიზანი რა შეიძლება იყოს?
_ ეს ჩვეულებრივი კომპრომატია.
_ ანუ?
_ აი, ეს თანამდებობა არ გეკუთვნის, მაგრამ მაინც გნიშნავ და ამიტომ ჩემი მონა-მორჩილი უნდა იყოო. აი, სწორედ ეს არის კომპრომატი!
_ როცა ქვეყანა ასეთი კომპრომატებით იმართება, ეს, მგონი, არც არაფორმალური მმართველობაა და არც _ ავტოკრატია. არ ფიქრობთ, რომ ეს მმართველობის რაღაც ახალი მოდელია?
_ არაერთხელ მითქვამს და ახლაც გავიმეორებ, რომ ქვეყანაში სამართლებრივი ანარქიაა! იცით, ამ ტერმინს რატომ ვიყენებ?
_ რატომ?
_ უცოდინარობამ, რომელიც შექმნა უწესრიგობამ, სამართლებრივი ანარქია გამოიწვია! ადამიანს სამართალი აბარია და ამ დროს სამართალი არ იცის! აი, სწორედ ეს არის ანარქია!
_ ამ ანარქიით მხოლოდ ერთი ადამიანი სარგებლობს თუ მთელი მმართველი გუნდი?
_ იმ ადამიანთან, რომელსაც თქვენ გულისხმობთ, არასოდეს მისაუბრია, მაგრამ ლოგიკურად ჩანს, რომ მას აწყობს, ასეთი საკადრო კონტინგენტი ჰყავდეს, რადგან ადამიანები სრულ მორჩილებაში იყვნენ და თავიანთი არაკომპეტენტურობის გამო ვერასოდეს ამოიღონ ხმა. თუ რომელიმე მათგანი ხმას ამოიღებს, მაშინვე ეტყვიან, აბა, დაეგდე მანდო.
ეს ვითარება სამარცხვინო კი არა, საგანგაშოა! სამყაროში ვერც ერთი საზოგადოება იმას, რასაც ჩვენ ვითმენთ, ვერ მოითმენდა, მაგრამ, ეტყობა, ხალხს ასე უნდა და ასე ამიტომ ხდება, თორემ ხალხს ეს რომ არ უნდოდეს, სახლში ვინ გააჩერებდა? _ მაშინვე გარეთ გამოვარდებოდა და მოითხოვდა, _ ყველანი გადადექითო.
_ ხალხი ქუჩაში იმიტომ არ გამოდის, რომ ქვეყანაში შიშის სინდრომია?
_ არა!
_ აბა?
_ ასე იმიტომ ხდება, რომ ხალხს ასე უნდა. იმ ადამიანმა ამ ხალხის ფსიქიკა, ალბათ, იცის და ისიც იცის, რომ ყველაფერი, ბოდიში და, ერთ ადგილას კიდია! დიახ, ხალხს არ აინტერესებს, მოსამართლე ყაჩაღი იქნება თუ პატიოსანი!
_ შეიძლება, არც უამისობაა, მაგრამ სასამართლო ხომ ის, ასე ვთქვათ, სფეროა, რომელიც ნებისმიერ დროს შესაძლოა, ნებისმიერს შეეხოს?
_ დიახ, მაგრამ ხომ ხედავთ, ერთეულები იბრძვიან, დანარჩენი კი ცირკს უყურებს და ჰგონია, რომ „დაკა-დაკა“ სხვის პრობლემაზეა. ხალხი ვერ აცნობიერებს, რომ სამართალი მისთვისაა და ეს უცოდინარობა სწორედ მას შეეხება!
_ ბატონო ვალერი, ხალხის ნიჰილიზმისა და ინდიფერენტულობის მიზეზი, იქნებ, ისაა, რომ სამართლიანობისთვის ისინი იბრძვიან, რომელთა სახელთანაც იმ ყბადაღებული 9-წლიანი მმართველობის უსამართლობა ასოცირდება?
_ აი, საქმეც სწორედ ეგ არის. სამართალს ისინი იცავენ, რომლებსაც ამ სამართლის გამრუდებაში ედებათ ბრალი და ამის კონტრარგუმენტი არ არსებობს, რადგან თავად კონტრარგუმენტი, „ოცნების“ სახით, გამრუდებული და უსამართლოა!
_ ე. ი., სამართლებრივ ჩიხში ვართ?
_ ხომ გაგიგიათ, უძაღლო ქვეყანაში კატებს აყეფებენო?
_ დიახ, გამიგია.
_ ჰოდა, სწორედ ეს შემთხვევაა. ზოგადად, ანდაზები ტყულად არ ჩნდება. როგორც ჩანს, ჩვენს ქვეყანაში ასეთი ვითარება ადრეც იყო, ხალხმაც ეს ანდაზა გაითავისა და ახლა უკვე დამკვიდრებული ცნობიერებაა, რომ თუ ძაღლი არ გყავს, კატა უნდა ააყეფო!
_ ბატონო ვალერი, იმისთვის, რომ კატებმა აღარ იყეფონ, ძაღლი როგორ უნდა ვიპოვოთ?
_ ეს ცინიკური ნათქვამია!
_ შესაძლოა…
_ ვწუხვარ, რომ ქართული საზოგადოება ძალიან პასიურია და მხოლოდ მედიის აქტივობა საკმარისი არაა!
_ სწორედ მაგას გეკითხებით: საზოგადოება პასიური რატომ არის?
_ იმიტომ, რომ ხალხი ძალიან დაბალ ცნობიერებაში ცხოვრობს და მართლმსაჯულება თუ მართლწესრიგი ამიტომ არ აინტერესებს. აქედან გამომდინარე, ხელისუფლება უსამართლობასა და ანარქიას ამკვიდრებს!
_ როცა ადამიანების ჯგუფმა „გამარჯვებული საქართველო“ დააფუძნეთ, როგორც მახსოვს, იმედოვნებდით, რომ ქვეყანაში არსებულ რეალობას შეცვლიდით, მაგრამ ეს ვერ მოახერხეთ. ამას რით ხსნით?
_ „გამარჯვებული საქართველო“ ორგანიზაციულად ჯერ შექმნილი არ არის. მეორეც, საორგანიზაციო ჯგუფი 10 ივნისს დაარსდა. ათი დღის შემდეგ, ანუ 20 ივნისს კი ის „გავრილოვის ღამე“ მოხდა. მოკლედ, ახლად შექმნილი ორგანიზაცია უზარმაზარ სამართლებრივ პრობლემებში გაეხვია _ ხელისუფლებასთან დაპირისპირება უაზრობის გამო მოხდა, ანუ ხელისუფლებამ მიიჩნია, რომ ამ ახლად დაფუძნებული მოძრაობის დანგრევის საბაბი ჰქონდა და ეს ამოცანა შეასრულა _ ორგანიზაციის ერთ-ერთი ლიდერი დაიჭირა! აქედან, აბა, რაღა უნდა გამოსულიყო? როცა ჩანასახშივე განგრევენ, პირადად მე არაფერს არ დაველოდებოდი.
_ „ოცნებამ“ „გამარჯვებული საქართველოს“ განადგურება რატომ გადაწყვიტა, ანუ ოქრუაშვილის რატომ შეეშინდა?
_ ოქრუაშვილი, ალბათ, ერთ-ერთი ფაქტორი იყო.
_ რისი?
_ იმხანად, თუ გახსოვთ, ძალიან მწვავედ იდგა „რუსთავი 2-ის“ საკითხი და ხელისუფლებას არ უნდოდა, რომ ამ საქმეში მესამე მოდავე ჰყოლოდა. „ოცნებამ“ მაკიაველის ცნობილი ფრაზით იხელმძღვანელა _ თუ საშუალება მიზანს ამართლებს, ეს ყველაზე საუკეთესო ვარიანტია! ამ შემთხვევაში მნიშვნელობა არც იმას აქვს, ეს საშუალება კანონიერია თუ არა!
_ ბატონო ვალერი, თქვენი საუბრიდან ისეთი შთაბეჭდილება მექმნება, რომ „გამარჯვებული საქართველოს“ მუშაობაში არ ერევით. ასეა?
_ დიახ. დაფუძნების შემდეგ იქ, პრაქტიკულად, არ ვყოფილვარ, თუ რამე პრობლემა არ არის და არ მირეკავენ.
_ ანუ მხოლოდ სატელეფონო კავშირი გაქვთ?
_ დიახ… ორგანიზაციას, როგორც ვიცი, რეგისტრაცია არ გაუვლია. არადა, პარტიად უნდა ჩამოყალიბებულიყო და სექტემბერში დარეგისტრირებულიყო. ყოველ შემთხვევაში, გეგმა ასეთი იყო… მანამდე კი უნდა გვემუშავა რაიონული, საქალაქო და რეგიონული სტრუქტურების ჩამოყალიბებაზე. ოქრუაშვილის დაჭერის გამო ყველაფერი ეს გაჩერდა და, როგორც ვხედავთ, სტრუქტურულმა აღმშენებლობამ აზრი დაკარგა. მოკლედ, პროცესი ჩიხში შევიდა.
ისე, მეგონა, რომ ოქრუაშვილს გამოუშვებდნენ, თუმცა შევცდი. წესით, პოლიტიკური პატიმარი დიდხანს არ უნდა გაეჩერებინათ, მაგრამ კარგად იცით, რომ ამ ქვეყანაში ლოგიკა არ მუშაობს. არ ვიცი, ეს უკანონო პატიმარი როდემდე ეყოლებათ. თუ დროზე გამოუშვებენ, პარტიული მშენებლობა დღის წესრიგში შეიძლება, ისევ დადგეს, მაგრამ ახლა ძალიან სასაცილო მდგომარეობაში ჩავიგდებთ თავს, რომ ვისაუბროთ, არის ასეთი და ასეთი პარტია და ჩვენ ამას და იმას ვიზამთო.
_ ხომ არ ნანობთ, რომ პოლიტიკაში დაბრუნების გადაწყვეტილება მიიღეთ, მაგრამ რაღაცები ვერ გათვალეთ?
_ ვერავინ გათვლის, რომ ახლად დაფუძნებულ პოლიტიკურ სუბიექტს დევნას დაუწყებენ. არ მგონია, შეცდომა ყოფილიყო. ჩვენ ვფიქრობდით, რომ ამ ნაბიჯის გადადგმა დროული იყო, თან ხელის ამ დონეზე შეშლას არ ველოდით. ამ ორგანიზაციიდან ორი ადამიანი დაჭერილია, ოცამდე კი ადმინისტრაციულად არის დასჯილი.
_ ამ ვითარებაში უფრო მეტი აქტიურობა არ გმართებთ?
_ ჯერ ერთი, ამ ორგანიზაციაში ჩემს მონაწილეობას ასე არ ვგეგმავდი.
_ აბა, როგორ გეგმავდით?
_ მე ადვოკატი ვარ, ჩემი საქმეები მაქვს, ამ საქმიანობას ვერ მივატოვებდი და დღედაღამ პოლიტიკურ ღონისძიებებზე ვერ ვივლიდი. სხვათა შორის, შეთანხმებულიც მქონდა, რომ ადვოკატურ საქმიანობას არ მოვწყდებოდი…
_ ბატონო ვალერი, სანამ საუბარს დავასრულებთ, ისევ თადუმაძეზე დაგისვამთ კითხვას, ანუ, როგორც ვიცი, მის ოჯახზე გარკვეულ სკანდალურ ინფორმაციას ფლობთ. ვცდები?
_ თადუმაძეს პარლამენტში ჰკითხეს, _ ამდენი ქონება საიდან დაგიგროვდა, შეუძლებელია, სახელმწიფო სამსახურიდან ფული გეშოვაო. ამის პასუხად, შემიძლია, გითხრათ, რომ ეს გასაკვირი არ არის?
_ რატომ?
_ თადუმაძემ დამალა, რომ მის მეუღლეს სერიოზული შემოსავალი აქვს.
_ საიდან?
_ ის კომპანია „დაგის“ იურისტია და, მგონი, აქციებიც აქვს.
სხვათა შორის, ეს „დაგი“ სამშენებლო ოპერაციებში მონაწილეობს და სულ სასამართლო დავაშია.
ამის ერთ-ერთი მაგალითია ჭიათურა, სადაც საბაგირო გზის სადგურები არ აშენდა.
_ ეს სადგურები „დაგს“ უნდა აეშენებინა?
_ დიახ, „დაგს“ ტენდერი მოგებული ჰქონდა, მაგრამ თანხა, რომელიც ფრანგებმა გვაჩუქეს, შეიჭამა. ეს შეჭმული თანხა, ცხადია, სადმე დაილექებოდა.
_ „დაგი“ ვისი კომპანიაა?
_ მე როგორც ვიცი, ივანიშვილთან დაახლოებული პირის კომპანიაა.
_ დაახლოებული პირის თუ ივანიშვილის კომპანიაა?
_ არ მგონია, ივანიშვილის იყოს, მაგრამ „დაგს“ ბატონი ივანიშვილი მფარველობს. ამ ოჯახის შემოსავლებსაც „დაგი“ უზრუნველყოფს.
_ ანუ თადუმაძის ცოლმა „დაგის“ იურისტად მუშაობა მას შემდეგ დაიწყო, რაც თადუმაძე ივანიშვილის ადვოკატი გახდა?
_ როგორც კი „ქართული ოცნება“ ხელისუფლებაში მოვიდა, თადუმაძის ცოლს მეორე დღიდან „დაგში“ ვხედავთ.
სხვათა შორის, თავის დროზე, „დაგს“ ტენდერი მესტიაში ჰქონდა მოგებული და სააკაშვილის პროექტში იყო ჩართული.
_ მესტიაში „დაგს“ რა უნდა აეშენებინა?
_ მესტიაში, თუ გახსოვთ, თანამედროვე სახლების მშენებლობა დაიწყო და „დაგი“ იქ მშენებელი კომპანია იყო, თუმცა არც ერთი მშენებლობის პროექტი არ ჰქონდა და ისე მუშაობდა, ფული კი წინასწარ ჩაერიცხა. ეს მუნიციპალიტეტის ახალმა ხელმძღვანელობამ სადავო გახადა. ამაზე დავიდარაბა ატყდა, მაგრამ სასამართლოები ისე „ჩააქრეს“, რომ, საბოლოოდ, არავინ არაფერი მოიკითხა!
_ ე. ი., „დაგს“ ჯერ სააკაშვილი მფარველობდა და ახლა ივანიშვილი მფარველობს?
_ კი ბატონო, ზუსტად ასეა.
_ გამოდის, რომ „ნაცმოძრაობამ“ და „ოცნებამ“ მსხვილი ბიზნესები გადაინაწილეს?
_ კი ბატონო.
_ თუ ასეა, აბა, „ნაცმოძრაობა“ რას აპროტესტებს?
_ „ნაციონალურ მოძრაობას“ თავისი პოლიტიკური ინტერესები აქვს, მაგრამ ეკონომიკური ინტერესებით „ოცნებასთან“ ჯაჭვურ რეაქციაში არიან.
_ ანუ ყველაფერი, რასაც ვუყურებთ, ფარსია?
_ ამის დამტკიცება არ შემიძლია, ფარსია თუ არა, მაგრამ რაც ჩანს, ყველაფერში შეხმატკბილებულები არიან.
_ თანდათან ვიწრო და მოჯადოებულ წრეში შევდივართ. გამოსავალი სად არის?
_ გამოსავალი არჩევნებშია! ხალხი გონს უნდა მოეგოს და ეს ბაკქანალია შეწყვიტოს!
_ არჩევნებამდე ზუსტად ერთი წელია დარჩენილი.
_ რას ვიზამთ? არჩევნების გარეშე შეცვლა შეუძლებელია. მაგალითად, მე რევოლუციას არ ვემხრობი. სხვა თემაა, თუ თავად ივანიშვილი მოისურებს, რომ არჩევნებამდე დროებითი კოალიციური მთავრობა შეიქმნას, მაგრამ არ მგონია, რომ ეს ინებოს!

გიორგი აბაშიძე