იმაზე უკვე ბევრი ითქვა და დაიწერა, რომ სალომე ზურაბიშვილმა „ოცნებას“ და მის მომხრეებს დიდი თავის ტკივილი გაუჩინა. ამ მხრივ გამონაკლისი არც ყოფილი დეპუტატი, ხათუნა ხოფერიაა, რომელიც ამბობს, იმ შემთხვევაში, თუ გამოძიებით დადგინდება, რომ სკანდალური შეწყალებები შეცდომა კი არა იყო, სხვა რამით, მაგლითად, კორუფციით გახლდათ ნაკარნახევი, ამის გამო პასუხისმგებლობის აღება მათაც მოგვიწევს, ვინც არჩევნების დროს ხალხს მოვუწოდებდით, ხმა სალომეს მიეციო.

სხვათა შორის, ხათუნა ხოფერია „ქრონიკა+“-სთან ინტერვიუში არც იმას მალავს, რომ დღეს „ოცნება“ ივანიშვილის ქველმოქმედებაზე დგას და თუ სახელისუფლებო პარტია პოლიტსაბჭოს არ შეცვლის, 2020-ის არჩევნებში მნიშვნელოვან შედეგს ვერ აჩვენებს.
პარალელურად, ჩვენი რესპონდენტი ოპოზიციაში არსებულ ვითარებასაც აფასებს და აცხადებს, რომ ბოკერია ამომრჩეველთა ხმებზე, ასე ვთქვათ, ნადირობს, ანუ როგორც ხოფერია ამბობს, ბოკერიას დასავლეთში ნეოლიბერალური ძალების მხარდაჭერა კი აქვს, მაგრამ მან ვერ შეძლო, რომ მხარდამჭერები, ელექტორატის სახით, ქვეყნის შიგნით ეპოვა. ამიტომ სხვადასხვა გავლენიანი ორგანიზაცია ცდილობს, ილუზია შექმნას, რომ „ევროპული საქართველო“ ანგარიშგასაწევი ძალაა და ზოგიერთი უცხოელი ამიტომ გვირჩევს, რომ ბოკერია შევიყვაროთ.
ვინ შეიყვარებს ბოკერიას და, ზოგადად, როგორ განვითარდება ქართულ პოლიტიკაში პროცესები? _ ყველაფერ ამაზე „ქრონიკა+“ ხათუნა ხოფერიას ესაუბრა:

_ ქალბატონო ხათუნა, ბოლო დღეების მთავარი თემა პრეზიდენტის სკანდალური შეწყალებებია და ჩვენც საუბარი, ცხადია, ამით უნდა დავიწყოთ. თქვენი აზრით, რა ხდება და საქმე რასთან გვაქვს?
_ ყველაფერი დეტალურად არის გაწერილი, თუ ვისი შეწყალება შეიძლება, მაგრამ არ შეიძლება შეწყალებისა და მართლმსაჯულების აღრევა. ბოლო ფაქტებთან დაკავშირებით საუბარი იმაზე კი არაა, რომ ვინმე, ვთქვათ, კოლონიაში ცუდად იქცეოდა ან შეწყალების ვადები არ დაემთხვა, არამედ იმაზე, რომ თავის დროზე სასამართლომ სწორი გადაწყვეტილება არ გამოიტანა, ანუ მკვლელობის დეტალები განიხილება.
მოკლედ, ისე გამოდის, რომ პრეზიდენტი მართლმსაჯულებაში ჩაერია, ე. ი., სასამართლოს მიერ გამოტანილი მსჯავრი გაასაჩივრა თუ შეცვალა. აქედან გამომდინარე, პირადად მე, პრეზიდენტს ვურჩევ, თუ მასთან მოხვდება ისეთი საქმე, სადაც ადამიანის ბრალეულობაზე ეჭვი ჩნდება, შეწყალების აქტი კი არ გამოსცეს, არამედ ყველაზე მაღალ ინსტანციას, სტრასბურგის სასამართლოს მიმართოს. მოკლედ, პრეზიდენტმა საკუთარ თავზე მართლმსაჯულების ფუნქცია არ უნდა აიღოს! ყველაფერს თავი რომ დავანებოთ, ეს სახელისუფლებო შტოების ფუნქციების აღრევაა. ამასთან, მოგვწონს თუ არა, ეს ჩვენი სასამართლოა და არ შეიძლება, პრეზიდენტმა თავისი გადაწყვეტილებებით ამ სასამართლოს შეურაცხყოფა მიაყენოს და საზოგადოებაში მის მიმართ უნდობლობა გააჩინოს! ერთი სიტყვით, პრეზიდენტმა საკუთარ თავზე მეტი აიღო, ვიდრე ამის უფლება ჰქონდა!
_ ძნელია, არ დაგეთანხმოთ, რადგან ზურაბიშვილმა მხოლოდ მძიმე დანაშაულში მსჯავრდებულები კი არა, ძებნილიც შეიწყალა, რაც ერთგვარი „ნოუჰაუა“.
_ მსოფლიო პრაქტიკაში ცნობილია, როცა პრეზიდენტებისა თუ პრემიერების მხრიდან ასეთი დარღვევები ხდება. ამ შემთხვევაში კი, როგორც ვიცი, საქმე აღიძრა და პროკურატურა იძიებს, რადგან საზოგადოებას გაუჩნდა ეჭვი, ყველაფერ ამის უკან რამე სხვა ხომ არ დგას.
_ დიახ, კორუფციული ეჭვი საკმაოდ ლეგიტიმურია.
_ დიახ, ხომ არ მოხდა ვინმესგან „წახალისება“, რომ ასეთი რამ პრეზიდენტს საკუთარ თავზე აეღო. მოკლედ, კარგია, რომ გამოძიება დაიწყო და ყველაფერი გაირკვევა. უბრალოდ, ძალიან ცუდი იყო პრეზიდენტის განცხადება, _ ეს მე გავაკეთე და არ ვაპირებ, ვინმეს რამე ავუხსნაო. ისე, ძალიან უცნაურია, როცა შეწყალებულთა სიის გასაიდუმლოება ხდება, ეს რას ნიშავს? ვერ წარმომიდგენია, ქვეყანაში ასეთი ჰუმანური აქტი გამოიცემოდეს და მასში რამე დაფარული იყოს! ჩემი აზრით, შესაწყალებელთა სიის გამოქვეყნება შეწყალებამდე უნდა ხდებოდეს და საზოგადოებას იმის საშუალება მიეცეს, რომ ამ პროცესში უფრო ფართოდ ჩაერთოს! ბოლოს და ბოლოს, ეს პრეზიდენტი ჩვენი არჩეულია!
_ ქალბატონო ხათუნა, თქვენი არჩეულია, თორემ მე და კიდევ ძალიან ბევრს ზურაბიშვლისთვის ხმა არ მიუცია. თქვენ, როგორც „ოცნების“ მხარდამჭერი, რას მეტყვით, პრეზიდენტის ეს ნაბიჯები ხელისუფლების იმიჯზე ცუდად მოქმედებს?
_ იქიდან დავიწყოთ, რომ სალომე ზურაბიშვილი „ქართული ოცნების“, როგორც პოლიტიკური პარტიის წევრი არაა.
_ ამას რა მნიშვნელობა აქვს? მას „ოცნება“ უჭერდა მხარს.
_ საპრეზიდენტო არჩევნების პირველ ტურში „ოცნების“ მხარდამჭერების ნაწილმა ზურაბიშვილის მიმართ თავისი პოზიცია ნათლად გამოკვეთა, ანუ ის, რომ მისი კანდიდატურით მოხარული არ იყო, მაგრამ მეორე ტურში არჩევანი ორ პოლიტიკურ ძალას შორის დადგა და თუნდაც ჩემი გამოსვლები გემახსოვრებათ, როცა აქტიურად დავდიოდი და ხალხს მოვუწოდებდი, რომ სალომესთვის გამოეცხადებინა ნდობა, ანუ მისთვის მიცემული ხმა ჩვენთვის გამოცხადებული ნდობა იყო. პრეზიდენტის ამ, რბილად რომ ვთქვა, არაორდინალურმა ნაბიჯებმა კი „ოცნების“ წევრებსა და მის მხარდამჭერებსაც მოგვაყენა ჩრდილი!
სხვათა შორის, ახლობელს დავურეკე, რომელმაც მითხრა, _ შენს გალანძღვას ვაპირებდი, ახლა ამას ნამდვილად ვერ ვიზამ, მაგრამ ვცადე, ბევრი რამისთვის შენი თვალით შემეხედა და მივხვდი, შეცდომები დაუშვიო, ანუ ადამიანები რაღაცებში ჩვენ გვადანაშაულებენ!
_ ანუ, ქალბატონო ხათუნა, გრძნობთ პასუხისმგებლობას, რომ ხალხს ზურაბიშვილის მხარდაჭერისკენ მოუწოდებდით?
_ მაინც საბოლოო სამართლებრივ შეფასებას დაველოდები.
_ თუ გაირკვევა, რომ პრეზიდენტის ეს ნაბიჯები კორუფციული იყო, რას იზამთ?
_ მაშინ, რა თქმა უნდა, ყველამ უნდა ვაგოთ პასუხი!
_ მოკლედ, ზურაბიშვილი „ოცნებასთან“ ანტაგონიზმშია?
_ არც ამას ვამბობ და არც _ სხვა რამეს. უბრალოდ, როგორც ყველას, მეც მაინტერესებს, ამის უკან რა დგას _ კორუფცია თუ გარკვეული დავალება, რომელიც შეასრულა? ფაქტია, პრეზიდენტმა არასწორად იმოქმედა და მიუღებელი პრეცედენტი დაუშვა. მას პრეზიდენტობის ვადა ხუთ წელიწადზე მეტ ხანს კიდევ აქვს, მაპატიეთ და, ვერავინ ვიქნებით იმ განცდის ქვეშ, რომ ყოველ წუთს შეიძლება, ასეთი შეცდომები დაუშვას, ანუ აქ უკვე სამართლებრივ შეფასებაზეა საუბარი.
_ ასევე მომხდარს პოლიტიკური პასუხიც უნდა გაეცეს, ანუ გამორიცხავთ, რომ „ოცნებამ“ ზურაბიშვილის იმპიჩმენტი დაიწყოს?
_ ეს არ ვიცი, მაგრამ ყველაფერი უნდა შეისწავლონ, გამოიძიონ და სახელი დაარქვან! ყოველ შემთხვევაში, ქალბატონი პრეზიდენტის მიდგომა, _ მინდოდა და გავაკეთეო, _ უკვე დამთავრდა!
_ ისე, 7 წლის განმავლობაში, რაც ხელისუფლებაშია, „ოცნებამ“ სამართლიანობის აღდგენა რატომ ვერ მოახერხა?
_ სამართლიანობა ნაწილობრივ აღდგენილია და არავის აქვს პრეტენზია, რომ შესაძლოა, უსამართლობის ყველა ნიუანსი აღმოიფხვრას, მაგრამ კარგად ვიცით, ხელისუფლებაზე რა ზეწოლებია და რამდენ რამეს უნდა გაუწიოს ანგარიში.
_ ანუ?
_ გავიხსენოთ, თუნდაც, ეს თავსმოხვეული კოჰაბიტაცია, საიდან წამოვიდა. ახლახან ჩვენი ერთ-ერთი მეგობარი ქვეყნის წარმომადგენელმა გვითხრა, რომ მოგვიწევს, ბოკერია შევიყვაროთ.
ამ პოლიტიკური ლოზუნგის ფონზე იმის ახსნა, თუ რატომ ვერ მოახერხა „ოცნებამ“ სამართლიანობის აღდგენა, მგონი, უადგილოა. სხვათა შორის, ისიც ძალიან კარგად ვიცით, რამდენი მილიარდია იმ პროექტებში ჩადებული, რომლებზეც პასუხისმგებელი პირადად ბოკერია იყო.
ისე, „ნაცმოძრაობა“ გვერდზე რომ გავწიოთ, პირადად მე ვფიქრობ, რომ სამართლიანობის, მშვიდობიანობისა და სახელმწიფოებრიობის დამკვიდრების გზაზე ნომერ პირველი მტერი გიგა ბოკერია და მისი პოლიტიკური ჯგუფია! ესენი არიან ადამიანები, რომლებსაც ძალიან სერიოზული ლობისტური ჯგუფები ჰყავთ, ამაში დიდი ფულია ჩადებული და მათ პაუხისმგებლობა აქვთ აღებული, რომელიც არ შეუსრულებიათ!
_ თუ ასეა, აბა, „ოცნებამ“ „პატრიოტების“ პროექტს, რომელიც ბოკერია-სააკაშვილის მმართველობის რეჟიმად გამოცხადებას ითვალისწინებდა, მხარი რატომ არ დაუჭირა?
_ ამაში არ ვამართლებ და მიმაჩნია, რომ ეს არის ერთ-ერთი დიდი შეცდომა, როცა ეს პროექტი საერთოდ ჩააგდეს და არ განიხილეს! შეიძლება, ეს საკითხი ბოლომდე არ გასულიყო, მაგრამ ამაზე საპარლამენტო დებატები უნდა გამართულიყო და ჩვენთვის ლუსტრაციის საშუალება მოეცათ, მაგრამ არ დაგვანახვეს, ვინ რომელ მხარესაა და ვის რა უნდა.
_ ე. ი., ბოკერიას მხადამჭერები მარტო უცხოეთში კი არა, „ოცნებაშიც“ ჰყავს? სხვათა შორის, არსებობს ვერსია, რომ „ოცნება“ ცდილობს, ხელისუფლება „ევროპულ საქართველოს“ გადააბაროს.
_ გამორიცხულია! _ ხელისუფლებას არავინ არავის გადააბარებს, თუმცა ამის შესახებ გაგებულიც მაქვს და ყველაფერი იქითკენ მიდის, რომ კოალიციური მთავრობის შექმნა სავალდებულო ხდება!
ახლა ყველა პატრიოტის საზრუნავი ისაა, რომ ამ კოალიციურ მთავრობაში ისინი არ მოხვდნენ, ვინც სისხლიანი რეჟიმის სამართალმემკვიდრეები არიან!
ისე, ამ ხელისუფლებას საიმისო არაფერი სჭირს, რომ ვინმეს რამე გადააბაროს! ყოველ შემთხვევაში, ამ ხელისუფლებას ქვეყნის წინაშე დანაშაული არ ჩაუდენია და იმ სისხლიან რეჟიმთან, რომელიც 9 წლის განმავლობაში იყო, პარალელსაც ვერ გავავლებთ! ერთ-ერთი დემოკრატიული და მონდომებული ხელისუფლებაა, რომ ქვეყანაში პრინციპები დაამკვიდროს, თუმცა მეორე საკითხია, ეს რამდენად გამოსდის ან _ არა.
საერთოდ, შიდა მტერთან, ანუ ნეოლიბერალებთან ბრძოლა ძალიან რთულია. ანალოგიური ბრძოლაა აშშ-შიც და მათი დამარცხება იქაც კი უჭირთ.
წლების განმავლობაში ამ ქვეყანაში მილიონობით დოლარია შემოსული, რათა გარკვეული ჯგუფები გამაგრებულიყვნენ, ფეხზე დამდგარიყვნენ და მსოფლიოს ახალი წესრიგის დასაყრდენი ყოფილიყვნენ.
_ რასაც ახლა ამბობთ, ცნობილი თეორიაა, მაგრამ, ქალბატონო ხათუნა, ხომ არ ფიქრობთ, რომ იგივე 20 ივნისს „ოცნება“, ვთქვათ, ბოკერიას გუნდის პროვოკაციას წამოეგო?
_ 20 ივნისის მოვლენები უცნაურად განვითარდა, ანუ ის ორგანიზაცია, რომლის პრეზიდენტიც გავრილოვია, თუ არ ვცდები, 15 წელია, არსებობს და ამ ხნის განმავლობაში საქართველო მისი წევრია და ყველა კონგრესშიც მონაწილეობს. საიდუმლოს არც ის წარმოადგენდა, რომ ეს ორგანიზაცია რუსეთის ფრთის ქვეშაა შექმნილი.
იცით, პარლამენტში როგორ არის? _ დელეგაციებში ყველაფერი კვოტირებულია, ანუ ცუდი არ იქნება, ამ დელეგაციაში ვინ იყო და ვინ _ არა, ვიცოდეთ. შესაბამისად, უცხო არავისთვის უნდა ყოფილიყო, ამ საერთაშორისო კონფერენციაში ვინ მონაწილეობდა, სად გაიმართებოდა და ა. შ. ამაზე სრული ინფორმაცია ოპოზიციასაც ექნებოდა. ის, რომ ხოშტარიას მეთაურობით ბოლო წუთს ატყდა აჟიოტაჟი, აი, გავრილოვს მიჰყავს სხდომაო, რა თქმა უნდა, წინასწარ დაგეგმილი და მომზადებული იყო თავისი პლაკატებითა და დროშებით.
მინდა, ხაზგასმით გამოვყო: არაფერი ხდებოდა, ანუ ხალხიც არ იყო შეკრებილი, როცა სალომე სამადაშვილი გახარიას ეუბნება, უნდა გადადგეო, ანუ 20 ივნისის მთავარი ლოზუნგი _ „გადადგეს გახარია!“ _ ათი საათით ადრე გააჟღერა, თან მაშინ, როცა გახარიას დანაშაული არ იკვეთებოდა და ეს ძალიან უცნაურია! გავრილოვი პარლამენტის თავმჯდომარის სავარძელში ჩაჯდა თუ ოთახში ღამის ქოთანი მიართვეს, ამაზე გახარია პასუხისმგებელი ვერ იქნებოდა, თუმცა სამადაშვილმა ის, რაც მერე მოითხოვეს, წინასწარ თქვა.
ასე იყო თუ ისე, ყველაფერ ამას ხალხის გულწრფელი აღშფოთება მოყვა და ქუჩაში უამრავი ადამიანი გამოვიდა _ ამ რაოდენობის ადამიანების მეათედიც კი ვერ გამოჰყავს „ნაცმოძრაობას“ ბოლო შვიდი წელია. მოკლედ, როცა ნახეს, რომ ბევრი ხალხი მოგროვდა და ფონიც საკმაოდ ემოციური და აგრესიული იყო, ბოკერიას ფრთამ უკან გადაიწია და წინა პლანზე „ნაცმოძრაობა“ გადავიდა. ამის გამო ძალიან ბევრმა ადამიანმა იქაურობა დატოვა, ანუ ის საპროტესტო ტალღა გამეათედდა და, პრაქტიკულად, პარტიული და აგრესიული მუხტით შეაიარაღებული ადამიანები დარჩნენ.
აი, ეს არის 20 ივნისის ანატომია და ამის შემდეგ როგორ შეიძლება, ვინმემ გამორიცხოს, რომ ყველაფერი წინასწარ არ იყო დაგეგმილი?
_ პროვოკაცია რომ მზადდებოდა, სახელმწიფო უსაფრთხოების სამსახურებს არ უნდა სცოდნოდათ?
_ რა უნდა სცოდნოდათ?
_ ის, რომ სახელმწიფო გადატრიალება მზადდებოდა.
_ უსაფრთხოების სამსახურს, რა თქმა უნდა, გარკვეული ინფორმაცია უნდა ჰქონოდა, მაგრამ ის საიდან უნდა სცოდნოდა, რომ მშვიდობიანი და პატრიოტული მუხტის აქცია, რომელსაც სათავეში ედგა ქალი სამადაშვილი თუ ხოშტარია, შემდეგ ხელჩართულ ბრძოლაში, პოლიციელებზე თავდასხმასა და რაც მთავარია, პარლამენტის შტურმში გადავიდოდა?
_ ყველაფერ ამის მიუხედავად, „ენდიაის“ ბოლო გამოკითხვით, „ოცნებას“ 20% აქვს, „ნაცმოძრაობას“ კი _ 9. ეს რაზე მეტყველებს?
_ ამდენი წელია, მეგობრები ვართ და შევთანხმდეთ, რომ „ენდიაიზე“ არასოდეს არაფერს მკითხავთ! არც ვინტერესდები, რას აქვეყნებს!
ისე, ვფიქრობ, ეს შედეგი შიდა დალაგებისთვის სჭირდებოდათ.
_ ანუ?
_ ბოკერიას საერთაშორისო მხარდაჭერა ანტიტრამპისტებისა და ნეოლიბერალებისგან, რა თქმა უნდა, შენარჩუნებული აქვს. ერთადერთი, ბოკერიამ ის ვერ შეძლო, რომ ქვეყანაში თავისი მომხრეები გაეჩინა და მხარდამჭერები „ნაციონალური მოძრაობისთვის“ წაერთმია! ჩვენი პოლიტიკოსების ნაწილი ცდილობს, რომ „ნაცმოძრაობა“ და „ევროპული საქართველო“ ერთმანეთისგან არ გამიჯნოს, მეც არ ვმიჯნავ, მაგრამ გარკვეულ პიროვნულ ფაქტორებს ვუსვამ ხაზს.
მოკლედ, ყველა არჩევნებში ბოკერია იმის მესამედს იღებს, ვიდრე _ „ნაცმოძრაობა“. იგივე მოხდა საპრეზიდენტო არჩევნებში, მიუხედავად იმისა, რომ მისი კანდიდატი ბაქრაძე, თავის დროზე, პარლამენტის თავმჯდომარე იყო და ვაშაძესთან შედარებით, რომელსაც ბეჭები ეფხანება, რუსეთის უშიშროების იმხელა „პაგონები“ აქვს, ქარიზმატული და სუფთაცაა, მაგრამ ხმების „უწუ-პუწუ“ ნაწილი აიღო.
ერთი სიტყვით, ის, რაც ახლა ხდება, იმის მცდელობაა, რომ „ევროპულმა საქართველომ“ თავისი ხმების რაოდენობა რამენაირად დააფიქსიროს. სწორედ ამიტომ არის „ენდიაისა“ და ასევე „რადიო თავისუფლების“ მხრიდან მაქსიმალური ხელშეწყობა. სხვათა შორის, სოროსის ორგანიზაციებიც ხელს უწყობენ, რათა ილუზია შექმნან და ბოკერიამ 2020 წლის არჩევნებში მაქსიმალური მხარდაჭერა მიიღოს.
ისიც ფაქტია, რომ მომავალ არჩევნებში კოალიციები არ გვექნება და ყველა „ჭ“ კლასის პარტიას დამოუკიდებლად მოუწევს მონაწილეობა.
ამიტომ ასეთი გადაწყვეტილება უნდა მიიღონ _ იქნება ერთი პარტია, ყველა დანარჩენი კი თავის პარტიაზე უარს იტყვის, ანუ ეს უარი სახელმწიფო ბიუჯეტიდან იმ დაფინანსებაზე უარს ნიშნავს, რომელიც აქამდე ჰქონდათ. ამას გარდა, პარტიები უნდა გააუქმონ, ანუ საუბარი იმაზეა, როგორც პარტია, „ნაციონალური მოძრაობა“ დარჩება და ყველა, იმიან-ამიანად, მასში ძველებურად გაერთიანდება, თუ „ევროპული საქართველო“ იქნება, სადაც „ნაციონალური მოძრაობა“ შეუერთდება?
_ ანუ შიდა ოპოზიციური ბრძოლაა?
_ დიახ, თუმცა „ოცნებასთან“ მიმართებითაც იგივე პროცესები განვითარდება, ანუ „პატრიოტები“ არჩევნებში მონაწილეობას თავისთავად, დამოუკიდებლად მიიღებენ. ვფიქრობ, ბურჯანაძეც ცალკე გამოვა.
_ ზვიად ძიძიგურმაც განაცხადა, რომ 2020-ში „ოცნებასთან“ არ იქნება და „კონსერვატორები“ დამოუკიდებლად იყრიან კენჭს.
_ ზვიადს საკმაოდ ძველი პარტია აქვს და მისი თანაპარტიელი თანამდებობაზეცაა.
_ შეიძლება, მაგრამ ეს პარტია მრავალრიცხოვანი არ არის.
_ ადრე მარტო ზვიადი იყო, ახლა კი სახეები ჰყავს.
მოკლედ, არ ვიცი, სხვა პარტიები რას იზამენ, ანუ თავიანთ პარტიებს გააუქმებენ და ეცდებიან თუ არა, რომ „ოცნებაში“ ჩაეწერონ, მაგრამ ისიც საკითხავია, ამას თავად „ოცნება“ მოინდომებს თუ არა?
ისე, იმ ბალასტით, რომელიც ახლა „ქართულ ოცნებას“ ჰყავს და იმ სახეებით, ვინც ლიდერები არიან, ნამდვილად ვერ ვიტყვი, რომ 2020 წლის არჩევნებში დიდ შედეგს დადებს.
პირველი, რაც „ოცნებამ“ უნდა გააკეთოს, პოლიტსაბჭო შეცვალოს და პოლიტსაბჭოს ახალი სახეებით დააფიქსიროს, რომელი ტიპის ამომრჩეველზე აკეთებს აქცენტს, თორემ პოლიტსაბჭოს ამ სახეებით „ოცნებამ“ შეუძლია ჩათვალოს, რომ ელექტორატი არ ჰყავს!
_ ბოლოს, მამუკა ხაზარაძეზეც გკითხავთ, ქალბატონო ხათუნა.
_ ქართველებს არაფერი გვეშველება, სანამ ბოლომდე არ მივხვდებით და არ გავითავისებთ, პარტია, პოლიტიკა და მიტინგი რა არის.
_ ეს რა შუაშია?
_ უკვე მერამდენე შემთხვევაა, როცა ადამიანი პარტიას ქმნის დევიზით _ „ვერ დამიჭერ!“
მაინტერესებს, ეს ხაზარაძის პარტიაა?
_ დიახ, ასეა.
_ კი ბატონო, მაგრამ ხაზარაძე პოლიტიკასთან ჩარბენითაც რომ არ არის, ეს „ლელოს“ პრეზენტაციამაც აჩვენა! ეს პრეზენტაცია კი არა, ცუდი პერფორმანსი იყო.
ისე, როცა ხაზარაძეზე საუბრობენ, მეცინება.
_ რატომ?
_ მუდმივად ხელისუფლებისკენ მესიჯს უშვებს, რომ არ დაიჭირონ!
_ ანუ ხაზარაძეს პარტია თავის გადასარჩენად უნდა?
_ რა თქმა უნდა, თან პარტიაში თითო ადგილს, მგონი, 50 ადამიანზეა შეპირებული, პარლამენტში აუცილებლად გაგიყვანთო, მაგრამ, საბოლოო ჯამში, ის ადამიანები, რომლებიც მას გვერდით დაუდგნენ, შეიკრიბებიან, რომ ხაზარაძე როგორმე ციხისგან გადაარჩინონ!
ეს პოლიტიკური ძალა ვის რაში სჭირდება ან ქვეყანას რა მიმართულებით წაიყვანს?
ქვეყანაში იდეოლოგია არ არსებობს და ასე ცხოვრება აღარ შეიძლება!
_ იდეოლოგია არც „ოცნებას“ აქვს?
_ „ოცნება“ ხელისუფლებაშია და ბიძინა ივანიშვილის ქველმოქმედებაზე დგას, თორემ ამის იქით, ჯერჯერობით, არაფერი იკვეთება.
ძალიან დიდი იმედი მაქვს, რომ გახარია, როგორც მთავრობის მეთაური, შეძლებს და ძალიან კარგად გაწერილ სახელისუფლებო პროგრამას მოგვაწვდის, რათა ვიცოდეთ, ხელისუფლება საით მიდის და თუ მოგვინდება, დავუპირისპირდებით, მოგვინდება, გვერდით დავუდგებით, თუმცა ჯერ ასეთი გამოკვეთილი, სამწუხაროდ, არაფერია!

გიორგი აბაშიძე