თაკო ჩარკვიანი: „ივანიშვილი ბოკერიასაც მოატყუებდა!“

მასთან პოლემიკას ყველა ან თითქმის ყველა ერიდება, თუმცა პარტიის _ „კანონი და სამართალი“ ლიდერმა, გაერთიანებული ოპოზიციის წევრმა თაკო ჩარკვიანმა, თამარ ჩერგოლეიშვილს პირდაპირ ეთერში უთხრა, რომ ხალხის ხარჯზე ის მილიონებს ვერ გააკეთებს. მოგვიანებით, თაკო ჩარკვიანმა სოციალურ ქსელში ისიც დაწერა, რომ ამხელა საპროტესტო მუხტი ჩერგოლეიშვილის ხლართებს არ უნდა შეეწიროს. რას ხლართავს უშიშროების საბჭოს ყოფილი მდივნისა და ამაჟამად „ევროპული საქართველოს“ ერთ-ერთი ლიდერის, გიგა ბოკერიას ცოლი და, საერთოდ, რას ერჩის გაერთიანებულ ოპოზიციას? _ „ქრონიკა+“ თაკო ჩარკვიანს ესაუბრა:

_ ქალბატონო თაკო, ნავსი გატეხეთ და ის თქვით, რასაც არავინ ამბობდა.
_ რას გულისხმობთ?
_ ყველა ეჭვობდა, რომ ბოკერიასა და „ოცნებას“ შორის შესაძლოა, ფარული კავშირი იყოს, მაგრამ ამაზე ხმამაღლა საუბარს ყველა გაურბოდა და გაურბის.
_ ასე არ მითქვამს, კავშირი არსებობს-მეთქი. უბრალოდ, სოციალურ ქსელში გამოქვეყნებული ჩერგოლეიშვილის სტატუსები შევაფასე. წლების განმავლობაში ჟურნალისტიკაში ვიყავი და პირველი, რასაც ჟურნალისტი აკეთებს, ანალიზი და პროცესების შეფასებაა. ყველაფერს თავი რომ დავანებოთ, თავისი სტატუსებით ნიკა მელიას აჭერინებდა _ დაწერა, არა უშავს, ციხეში არ დადნებაო. იმ აზრისგან შორს ვარ, რომ ვინმემ ცოლის საქციელზე პასუხი უნდა აგოს, მაგრამ როცა ადამიანი პროცესშია ჩართული და ცდილობს, რაღაცები გააკონტროლოს, ბუნებრივია, პოლიტიკოსებსაც სთხოვ პასუხს, რა ხდებაო.
პირდაპირ ვთქვათ: საპრეზიდენტო არჩევნებზე ხალხმა გაერთიანებულ ოპოზიციას უდიდესი ნდობა გამოუცხადა და ვერ იტყვიან, ეს იმიტომ მოხდა, რომ ბიპოლარიზაცია იყოო. მაგალითად, საპრეზიდენტო კანდიდატი ბაქრაძეც იყო, მაგრამ მას ხმა არ მისცეს. შესაბამისად, „ოცნებისთვის“ კონკურენტი ის არის, ვინც 900 ათასი ხმა აიღო. მოკლედ, ინფორმაციების გარდა ამოვიკითხე, რომ ინტერესთა თანხვედრა მოხდა.
_ ბოკერია-ჩერგოლეიშვილისა და „ოცნების“ ინტერესი კონკრეტულად რაში დაემთხვა?
_ გაერთიანებული ოპოზიციის ჩახსნის ინტერესი ჰქონდათ. „ნაციონალური მოძრაობის“ ადვოკატად ვერ გამოვდგები, ჩემი პარტია _ „კანონი და სამართალი“ მაქვს, მაგრამ პროცესების შეფასების უფლება, როგორც გაერთიანებული ოპოზიციის ერთ-ერთ წევრს, მგონი, მაქვს. მოკლედ, ჩერგოლეიშვილი სოციალურ ქსელში სულ წერდა, ხალხნო, „ნაცებს“ არ ენდოთო და ეს ცოტა სასაცილოდ ჟღერდა. ვიხუმრე კიდეც, ესენი ცოტა ხანში „ნაცად“ თაკო ჩარკვიანს გამოიყვანენ ბოკერიას კი _ ფრთიან დემოკრატად-მეთქი. 7 ნოემბერს მისი ქმარი თავს რომ „გვირიგინებდა“, ჩერგოლეიშვილი დიდი პროტესტით რომ მახსოვდეს, მაშინ დავუჯერებდი. სხვათა შორის, „ფეისბუქში“ 7 ნოემბრის შემდეგ გიგა ბოკერიას განცხადება გააზიარეს და გეგონება, გახარია ლაპარაკობსო. მე მაშინდელ 7 ნოემბერსაც ვაპროტესტებდი და ახლანდელ უბედურებასაც ვაპროტესტებ. შეიძლება, ვინმე გაღიზიანდეს, მაგრამ რომ არ ვთქვა, ამის უფლებას საკუთარი თავი არ მომცემს: 7 ნოემბერს, დარბევამდე, გაფრთხილება მივიღეთ, დაგშლითო. ახლა კი, პირიქით იყო, 20 წუთით ადრე გვითხრეს, არ დაგარბევთო.
მოკლედ, ისიც რაღაცნაირად სასაცილოდ ჟღერს, „ნაციონალურ მოძრაობას“ ვემიჯნებითო. საკითხავია, „ევროპელები“ ვის ემიჯნებიან _ იმ ლიდერებს, რომლებიც „ნაცმოძრაობიდან“ „ევროპულ საქართველოსა“ და „ოცნებაში“ გადაპორტირდნენ თუ „ნაცმოძრაობის“ 400 ათას მხარდამჭერს? ფაქტია და ბევრი ლაპარაკი არ უნდა, რომ „ნაციონალურ მოძრაობას“ ძალიან ძლიერი ელექტორატი ჰყავს და არც იმაზე შემეკამათოთ, რომ მათი ხელისუფლებაში ყოფნის დროს ძლიერი ინსტიტუციები იქმნებოდა, რის პარალელურადაც დანაშაულებრივი ქმედებებიც ხდებოდა.
საერთოდ, რომ იცოდეთ, მთლიან „ევროპულ საქართველოსთან“ პრეტენზია არ მაქვს. იქ არიან ადამიანები, რომლებიც ძალიან მესიმპათიურებიან. პრეტენზია მასთან მაქვს, ვინც მუდმივად ამ ჭუჭყიან სტატუსებს წერს.
_ ქალბატონო თაკო, ადასტურებთ მოარულ ხმას იმის შესახებ, რომ ახალგაზრდების საპროტესტო მუხტი ჩერგოლეიშვილმა აიღო ხელში?
_ არა!
_ არც ამის მცდელობა ჰქონდა?
_ ვერ გეტყვით.
_ ისე, „გავრილოვის კრიზისს“ თუ ქრონოლოგიურად გავიხსენებთ, მას შემდეგ, რაც რუსი დეპუტატი პარლამენტის თავმჯდომარის სავარძელში ჩაჯდა, სხდომათა დარბაზში პირველი „ევროპელები“ შევიდნენ.
_ ვერ დაგეთანხმებით, თან პარლამენტარები არიან და რომ შევიდნენ, ამაში განსაკუთრებული რა არის? ეს „ოცნების“ თითიდან გამოწოვილი ბოდვაა! გავირლოვის თემა თავად „ოცნებამ“ გააჩალიჩა! სიმპათია არც ბოკერიას მიმართ მაქვს და არც _ ჩერგოლეიშვილის, მაგრამ შემიძლია, ერთი შვილი დავიფიცო, რომ ამასთან კავშირში არც „ევროპული საქართველო“ იყო და არც _ „ნაციონალური მოძრაობა“.
_ ანუ პროცესების სათავისოდ გამოყენებას „ევროპული საქართველო“ მერე შეეცადა?
_ დიახ.
_ ყველაფერ ამისგან ბოკერიას რა სარგებელი უნდა ენახა?
_ საერთოდ, გაერთიანებული ოპოზიცია დიდი და სერიოზული ძალაა, რაზედაც ამომრჩევლის ციფრიც მეტყველებს. აქედან გამომდინარე, გაერთიანებული ოპოზიცია, ბუნებრივია, ბევრისთვის კონკურენტია. სხვათა შორის, გაერთიანებასაც თავი რომ დავანებოთ, ცალკე აღებული „ნაციონალური მოძრაობაც“ ყველასთვის ძლიერი კონკურენტია. ვიღაცები ვერ იტანენ, მაგრამ ობიექტური ადამიანი ვარ და ვამბობ: მოვახერხოთ და იმ უძლიერესი პარტიიდან, რომელსაც „ნაციონალურრი მოძრაობა“ ჰქვია და, ზოგადად, ყველა კარგი პარტიიდან ძლიერი პროფესიონალები დავტოვოთ, რადგან საქართველო სწორედ ამ გაერთიანებული ძლიერი პროფესიონალებით გაიმარჯვებს-მეთქი. ახლა პროცესების დაშლისკენ წაყვანა მოღალატეობრივი გზა და საქართველოს გადაბარების მცდელობაა!
მოკლედ, არავის ვერჩი, მაგრამ ჩემი პრეტენზია, გნებავთ, შენიშვნა თუ ცოტა თითის დაქნევა იმას ემსახურებოდა, რომ ეს ქალი რაღაცნაირად გაეჩერებინათ. „ნაციონალებს“ მე არ ვლანძღავ, მთელი 9 წელი ოპოზიციაში რომ ვიყავი და ეს ვინ არის?
_ ქალბატონო თაკო, შენიშვნა კი არ მიეცით, არამედ, პირდაპირ ეთერში პირდაპირ თქვით, არ დავუშვებ, რომ ხალხის პროტესტით ჩერგოლეიშვილმა მილიონები იშოვოსო.
_ დიახ, ვუთხარი, ვაჭრობ-მეთქი.
_ ვაჭრობაში, კონკრეტულად, რას გულისხმობდით?
_ არაფერს ვგულისხმობ, ყველაფერს ვამბობ, ანუ მისი სტატუსები „ნაციონალური მოძრაობისა“ და, კონკრეტულად, გაერთიანებული ოპოზიციის განადგურებისკენ იყო მიმართული, რაც იმას ნიშნავს, რომ ამით „ოცნებისა“ და ივანიშვილის წისქვილზე ასხამდა წყალს. პოლიტიკაში ვაჭრობას სწორედ ეს ნიშნავს და ამის უფლება არ მივეცი!
_ ე. ი., ივანიშვილისთვის ბოკერია უფრო მისაღებია, ვიდრე _ გაერთიანებული ოპოზიცია?
_ რა თქმა უნდა, ამის მცდელობა ჩანდა. მე და ჩემს მსგავსად ბევრმა ადამიანმა ყველანაირი წყენა გადავყლაპეთ, „ნაციონალების“ დროს არსებულ ინსტიტუციურ მშენებლობას მოვეპოტინეთ და გაერთიანებული ოპოზიცია გავაკეთეთ, თან „ნაციონალური მოძრაობის“ ლიდერიც შეიცვალა და ეს შემთხვევით არ მომხდარა.
დღეს სათავეში რუსული ხელისუფლება გვიზის, რომელმაც გავრილოვი ჩამოათრია და, გეფიცებით, ასეთი შეგრძნება მხოლოდ ომის დროს მქონდა _ დილით ტელევიზორი ჩავრთე და საკანონმდებლო ორგანოში გავრილოვი რომ დავინახე, არ მახსოვს, სახლიდან როგორ გამოვედი. ამიტომ არ მჯერა ამ ჭუჭყიანი ნარატივის, ხალხი ქუჩაში „ნაციონალებმა“ გამოიყვანესო. იმ დღეს ქუჩაში გაღიზიანებული ადამიანები გამოვიდნენ და ყველანი ერთნაირად „ნიკა მელია“ ვიყავით! იმ დღეს პოლიტიკოსებსა და ხალხს შორის ზღვარი წაიშალა!
_ 2013 წელს გიგა ბოკერიას წინააღმდეგ გამოძიება ფულის გაფლანგვის მუხლით დაიწყო და საქმე უშიშროების საბჭოში მის მოღვაწეობას ეხებოდა. ბოკერია „ნაციონალურ მოძრაობას“ სწორედ ამის მერე ემიჯნება და ახალ პარტიას ქმნის, ანუ ქალბატონო თაკო, მომყვებით თუ არა იმ ლოგიკაში, რომ „ოცნებამ“ მისი გადაბირება სწორედ ამ სისხლის სამართლის საქმით მოახერხა?
_ პირადად თქვენ კარგად მიცნობთ და ისიც იცით, რომ არაფერს ვინახავ. მე ანგარიშვალდებული იმ დიდი სიყვარულის წინაშე ვარ, რაც ხალხს აქვს და მას არასოდეს ვუღალატებ. გარკვეული ინფორმაციაც მქონდა, სტატუსები შევაფასე და ამის საფუძველზე საშინელი შენიშვნა მივეცი, რაც თუ უნდათ, სილის გაწვნად მიიღონ! 2013 წელზე კი არაფერი ვიცი და ამიტომ ვერაფერს ვიტყვი.
_ სხვათა შორის, „ოცნებისა“ და „ევროპული საქართველოს“ ურთიერთკეთილგანწყობაზე კიდევ ერთი დეტალი მიანიშნებს, კერძოდ, პროპორციული არჩევნების ის მოდელი, რომელიც ხელისუფლებამ „გავრილოვის კრიზისის“ ფონზე შემოგვთავაზა, გაერთიანებული ოპოზიციისთვის მიუღებელია, „ევროპული საქართველო“ კი, მიუხედავად იმისა, რომ ამ სისტემის პრეზენტაციაზე არ მივიდა, ფიქრობს. მოკლედ, თუ „ევროპული საქართველო“, საბოლოო ჯამში, პროპორციული სისტემის შემოთავაზებულ მოდელს მხარს დაუჭერს, თქვენი ეჭვები დამტკიცდება?
_ გეტყვით, რაც ხდება: ეჭვების გარდა, შესაძლოა, აწყობდეს კიდეც.
_ ანუ?
_ დღეს „ქართული ოცნების“ ძლიერი კონკურენტი მხოლოდ გაერთიანებული ოპოზიციაა. ამიტომ სულ არ გამიკვირდება, რომ „ევროპულ საქართველოს“ ეს სისტემა აწყობდეს. ვხედავ, რომ ეს გაერთიანებული ოპოზიცია აწუხებთ და პირდაპირ გეუბნებით: ის, ვინც ამხელა გაერთიანებული ელექტორატის დანგრევას ცდილობს, ივანიშვილთანაა გარიგებული! ამაზე ორი აზრი არ არსებობს, მაგრამ ობიექტურად რომ ვთქვათ, ეს სისტემა „ევროპულ საქართველოს“ შესაძლოა, უბრალოდ, იმიტომ აწყობს, რომ როგორც პარტიას, მეტი შანსი ჰქონდეს.
_ „ევროპული საქართველო“ იმ კონსულტაციებში თუ მონაწილეობდა, რომელსაც გაერთიანებული ოპოზიცია და სხვა პარტიები არჩევნების რეგიონულ-პროპორციულ სისტემაზე გადასვლას ითვალისწინებდა და რომელზეც 200 ათასი ხელმოწერაც შეგროვდა?
_ დიახ, მონაწილეობდა, მაგრამ ყველაფერი ეს თვალების დათხრამდე იყო. 20 ივნისის ღამეს ყველაფერი ჩემი თვალით ვნახე _ „რედისონამდე“ გვდიეს. 7 ნოემბრის დარბევა მინახავს, 26 მაისისა _ არა იმიტომ, რომ ლიდერებს შორის ბევრი რუსეთის მომხრე დავინახე და 26 მაისის აქციებზე ჩემი ფეხი არ ყოფილა, თუმცა ხალხი მაშინაც გულწრფელი იყო. 20 ივნისის ღამეს საკუთარ ხალხზე წარმოუდგენელი და სამარცხვინო ნადირობა გამოაცხადეს!
თუ გახარიამ არ იცოდა, რა ხდებოდა, მაშინ სახელმწიფო საერთოდ არ გვქონია, არც უშიშროება გვყოლია და მთელი საქართველო გარეთ უნდა გამოვიდეთ! თუ იმის ან ამის ჩაწყობილია, მაშინ მთელი მთავრობა უნდა გადადგეს!
_ აი, საინტერესო თემას შეეხეთ: თუ ფიქრობთ, რომ სახელმწიფო არ გვაქვს და მთელი მთავრობა უნდა გადადგეს, ამ მოთხოვნას ხმამაღლა რატომ არ აჟღერებთ?
_ მე სულ ამას ვითხოვ და იგივე მიტინგზეც ჩემს ერთ გამოსვლასაც ვერ ნახავთ, სადაც მარტო გახარიას გადადგომაზე ვლაპარაკობ. რა გახარია? გახარია წავა და შმახარია მოვა, სისტემაა შესასცვლელი!
_ მთელი მთავრობის გადადგომის მოთხოვნა მიუღებელი ვისთვისაა?
_ ის საშინელი პირველი დღე რომ დამთავრდა, მოვლენებს ახალგაზრდები შემოუერთდნენ. ზოგი ამ ახალგაზრდებს აკრიტიკებს, მაგრამ ამის მომხრე არ ვარ და გეტყვით, რატომაც: შეიძლება, აჩქარებულია, მაგრამ მთავარია, რომ მაჯისცემა არსებობს, ანუ აქამდე მეგონა, რომ ახალ თაობას ეძინა, მაგრამ, თურმე, ღვიძავს, რაც ძალიან მაგარია, თუმცა აქ ერთი მომენტია _ ახალგაზრდებს ყველაფერი უმაგრესად მიჰყავთ, მაგრამ გამორიცხულია, რომ პოლიტიკა პოლიტიკოსების გარეშე გაკეთდეს!
_ უშვებთ იმის ალბათობას, რომ ამ ახალგაზრდებზე ზეგავლენა „ევროპული საქართველოს“ ჩერგოლეიშვილის ფრთამ მოახდინოს?
_ არაფერს გამოვრიცხავ, მაგრამ ასე არ არის.
_ თუ ყველაფერი ისე განვითარდებოდა, როგორც უნდოდა, ბოკერია რას მიიღებდა?
_ ბიძინასთან გარიგების შემთხვევაში?
_ დიახ, ანუ ამ გარიგებით „ოცნება“ ხელისუფლებას „ევროპულ საქართველოს“ გადააბარებდა?
_ ალბათ.
_ და ეს გადაბარება ვადამდელი არჩევნებით მოხდებოდა?
_ შეიძლება, ვერ გეტყვით. ისე, ვეჭვობ, რომ ივანიშვილი ბოკერიასაც აუცილებლად მოატყუებდა.
_ ერთი სიტყვით, ივანიშვილ-ბოკერიას შესაძლო გარიგება ჩაშალეთ?
_ ასეთი ამბიცია არ მაქვს.
_ შეიძლება, მაგრამ ამ თემაზე ხმამაღლა საუბარი, წეღანდელი თქმისა არ იყოს, თქვენ დაიწყეთ.
_ დიახ, ის ვთქვი, რაც დავინახე. ფოფხაძის ვიღაც ტროლები და შეგნებული ნაძირალები მიწერენ ხოლმე, მაგრამ ცხოვრებაში პოლიტიკას არ გავკარებივარ და არც რომელიმე პარტიაში ვყოფილვარ. ჩემი კოზირი გულწრფელობაა! ზოგი მეუბნება ხოლმე, ქალბატონო თაკო, პოლიტიკა თამაშიაო, მაგრამ არავითარ შემთხვევაში! ჩემთვის პოლიტიკა გულწრფელობა და კანონმორჩილებაა! როგორც კი დავინახავ, რომ ჩემთან ურთიერთობა იმ ადამიანებს უნდათ, რომლებიც გულწრფელები არ არიან, მათთან ურთიერთობას არ დავიჭერ!
გრიგოლ ვაშაძესთან, გიორგი ვაშაძესა და გაერთიანებულ ოპოზიციაში მყოფ სხვა ადამიანებთან ურთიერთობა იმიტომ მომწონს, რომ ჩვენ ზუსტად ვიცით, რას ვლაპარაკობთ. ბოკერია ერთს მელაპარაკებოდა, საღამოს კი სხვა სტატუსებს ვხედავდი და დარტყმა სულ გაერთიანებულ ოპოზიციაზე მოდიოდა. ამაზე კულუარებში ლაპარაკი არ დავაპირე, ან რატომ უნდა მელაპარაკა, რა, ჩემი ბიძაშვილია? როცა საქმე ჩემს ქვეყანას ეხება, არავის თამაშში არ შევდივარ!
ჩემს პარტიაშიც გულწრფელი ადამიანები არიან, რომლებმაც ის 9-წლიანი წყენა დაივიწყეს და გაერთიანებულ ოპოზიციას მისცეს ხმა. ამიტომ ბოლომდე ვიბრძოლებ, რომ ისეთი კანონი მივიღოთ, რომელიც ხელისუფლების ხელში ჩაგდების შანსს ერთ რომელიმე პარტიას აღარ მისცემს! ეს ცუდია? _ შემდეგი მთავრობა კოალიციური და კანონმორჩილი უნდა იყოს, რომლისგანაც პროკურატურა თავისუფალი იქნება!
მოკლედ, არავის მივცემ უფლებას, რომ სიმწრით შეკოწიწებულ გაერთიანებულ ოპოზიციას ურტყას და ამით სამომავლო არჩევნებში თავისი დივიდენდების ჩაწერას შეეცადოს!
_ ქალბატონო თაკო, დღევანდელი გადასახედიდან, ხომ არ გეჩვენებათ, რომ ყველაფერი ცუდი, რაც იმ 9 წელიწადს მოხდა, ბოკერიების კისერზეა?
_ თუ ნახეთ, სოციალურ ქსელში საშინელი სტატუსი დავწერე და ამ სიტყვებს უკან ახლაც არ წავიღებ, ასეთი ტიპების ხელში მიშა კიდევ კარგად ყოფილა-მეთქი.
შე მამაცხონებულო, გიგა რომ ხარ, ბოკერია და სააკაშვილის დროს უშიშროების საბჭოს მდივანი იყავი, არ გრცხვენია, კაცო, ყველაფერს იმას რომ აწმენდ? ეს არც კაცური საქციელია და არც _ პოლიტიკოსის. მე ასე მგონია და რა ვიცი…
ამ ინტერვიუს რომ წაიკითხავს, ვიღაც იტყვის, ადვოკატიაო, მაგრამ არავის ადვოკატი არ ვარ და, უბრალოდ, შორიდან ვაფასებ, როგორც ოპოზიციის გაერთიანების მომხრე.
მოკლედ, დავინახე, რომ ორ კურდღელს იჭერდნენ, ანუ „ნაციონალურ მოძრაობას“ და გაერთიანებულ ოპოზიციას ერთად ურტყამდნენ და ცოლ-ქმარი თავისი ჭკუით ორივეს რეცხავდა, მაგრამ არ ჩავარეცხინებ! ვერც ჩარეცხავს, რადგან გაერთიანებული ოპოზიციის უკან მილიონამდე ამომრჩეველი დგას და ბოლომდე ასე მივალთ! აი, ეს არის ჩემი პოზიცია!
სხვათა შორის, მინდა, „ნაციონალური მოძრაობის“ ელექტორატს ქათინაური ვუთხრა _ ბარაქალა მათ მონოლითურობას! ამ პარტიის წევრი არ ვარ, მაგრამ რასაც ვუყურებ, მონოლითურად შეკრულია, არავის არაფერზე ევაჭრება და ბოლომდე თავის პოზიციაზე დგას!
_ ქალბატონო თაკო, საუბრის დასაწყისში თქვით, ჩერგოლეიშვილი თავისი სტატუსებით ნიკა მელიას, პრაქტიკულად, აჭერინებდაო. „ევროპელებს“ მელიას დაჭერა რისთვის აწყობდათ?
_ ეს არ ვიცი, მაგრამ მერე მავნებელი და ბრიყვი ეძახა. სტატუსები სოციალურ ქსელში შეუგნებლად არ იდება და, მე, უბრალოდ, ვუპასუხე.
_ ჩერგოლეიშვილს პასუხი თავად „ნაცმოძრაობამ“ რატომ არ გასცა?
_ ეს მათი საქმეა. მე გაერთიანებული ოპოზიციის წევრი ვარ, სადაც „ნაციონალური მოძრაობაც“ შედის. გაერთიანებული ოპოზიციის ლიდერი გრიგოლ ვაშაძეა. მე წესი და რიგი ვიცი, რომელიც ოჯახში მასწავლეს. თუ ვინმე ამ წესსა და რიგს არღვევს და სწორად არ იქცევა, რადგან პოლიტიკაში ფეხი შემოვდგი, ვალდებული ვარ, ვუპასუხო! ყველანი თაკო ჩარკვიანის პასუხზე ბრაზდებიან, მაგრამ არასოდეს არაფერს ვიწყებ და არც ვინმეს ვიწვევ ხოლმე.
უშიშროების საბჭოს მდივანი რომ იყავი, ვერ გავიგე, ბოკერია ახლა რა „ნაცების“ დანაშაულზე ლაპარაკობს, იქნებ, ვინმემ გამარკვიოს?
ერთი ხელით გაერთიანებას ქადაგებენ და იგივე შალვა შავგულიძესთან დაკავშირებით ამბობდნენ, მოგვეხმარეთო, მაგრამ მერე, ტელევიზორში ხან ქმარი გამოხტება, ხან _ ცოლი და სხვა რამეს ამბობს. ყველაზე დიდი სიბინძურე კი ის იყო, ყველაფერი „ნაციონალების“ პროვოცირებული იყო და შედეგად, თვალებდათხრილი ოპოზიცია მივიღეთო. ამ სტატუსმა გამაოცა _ ამაზე დიდი სიბინძურე არც წამიკითხავს! ერთი-ერთში ოხანაშვილის განცხადებას ჰგავდა.
_ ერთი ანდაზისა არ იყოს, ცოლის გამო პასუხს ქმარს ვერ მოვთხოვთ, თან ჩერგოლეიშვილი მუდმივად ხაზს უსვამს, მე დამოუკიდებელი ვარ და თუ რამე პრეტენზია გაქვთ, ჩემს ქმარს მოჰკითხეთო.
_ ჰოდა, თამაშად ეს მივიჩნიე და მგონია, რომ მონოლითური ურთიერთობა აქვთ. უბრალოდ, გიგა უფრო ინტელექტუალური ადამიანია და ყველაფერს ჭკვიანურად აკეთებს.
ვიმეორებ, არავისი ადვოკატი არ ვარ, მაგრამ, უბრალოდ, იმის თქმა, რომ პროვოკაცია „ნაციონალურმა მოძრაობამ“ მოაწყო, უსინდისობაა! ამას არც „ევროპელებს“ ვაბრალებ, როგორ გეკადრებათ, მაგრამ მათგან ამის თქმა ჩვეულებრივი საზიზღრობა და ბინძური თამაშია! როცა ადამიანი ასეთ საზიზღრობას დაწერს, ელემენტარულად, ვიღაცამ ხომ უნდა ჰკითხოს, რა ხდებაო? მე პირდაპირ ვკითხე, ერთი-ერთში ბიძინასა და ოხანაშვილის მესიჯია და ვაჭრობ-მეთქი?
_ გაერთიანებულ ოპოზიციაში თქვენს ამ განცხადებაზე როგორი რეაქცია ჰქონდათ? საერთოდ, მგონია, რომ ოპოზიციური ფლანგი ჩერგოლეიშვილთან პოლემიკას ერიდება.
_ მე არ მოვერიდე და ვერ გავიგე, ვინმეს რატომ უნდა მოვერიდო? რა პრობლემაა, მეც ნუ მომერიდებიან. ცხოვრებაში რაღაცები არ მიკადრებია და არც ვიკადრებ. ერთი წლის წინათ, როცა ნიკა მელია და გრიგოლ ვაშაძე ჩემთან მოვიდნენ და მთხოვეს, ბაგრატზე გრიგოლ ვაშაძე, როგორც პრეზიდენტობის კანდიდატი, წარადგინეო, ოპოზიციონერობის მიუხედავად, პირდაპირ გეტყვით, დავიბენი _ ოპოზიციონერობა სხვაა და პირდაპირ ხუთიანის წარდგენა რთული იყო, მაგრამ რაღაცები გავაანალიზე და მივხვდი, რომ გაერთიანების გარეშე ეს ქვეყანა ვერაფერს მიაღწევს, ხან ოლიგარქი „მოაჯდება“, ხან _ რომელიმე პარტია. საქართველო ერთი პარტიის ხელში, ეს პარტია თუნდაც „კანონი და სამართალი“ იყოს, აღარ უნდა მოხვდეს! კოალიციური მთავრობა უნდა მოვიდეს და პროკურატურა პოლიტიკური წნეხისგან უნდა განთავისუფლდეს!
სხვათა შორის, მე გაფართოების გეგმა მაქვს და გამიხარდება, თუ ამაზე წამოვლენ.
_ „ევროპულ საქართველოს“ გულისხმობთ?
_ დიახ, ელენე ხოშტარიაც ძალიან მიყვარს, გიგი წერეთელიც… დარწმუნებული ვარ, რომ თვითონაც რაღაცები აქვთ გაანალიზებული და არ მჯერა, რომ ყველაფერი მოსწონდეთ.
დღეს საქართველო ძალიან მძიმე ვითარების წინაშე დგას და თუ დიდი ეროვნული კონსოლიდაცია არ მოხდა, არაფერი გამოვა, მით უმეტეს, რომ იმ დღეს საქართველოს საკანონმდებლო ორგანოში გავრილოვი კი არა, პუტინი იჯდა _ სახელმწიფო ინსტიტუცია ოკუპანტის მაღალჩინოსანმა დაიკავა, რამაც შოკი გამოიწვია. აი, იმ დღეს რა მოხდა.
ქართველები ძალიან მშვიდობიანი ხალხი ვართ _ ჩვენი კულტურა არაა და იმ დღეს ადამიანები ქუჩაში ხელკეტებით არ გამოვარდნენ, მაგრამ თუ ჩვენს საკანონმდებლო ორგანოში პუტინს დავინახავ და ვიტყვი, აქედან გაეთრიე და ძირს ხელისუფლება-მეთქი, ხელისუფლებამ მე უნდა დამიჭიროს, თუ ის უნდა გამოიძიოს, გავრილოვი იქ ვინ ჩასვა და საერთოდ, უშიშროება სად იყო ან ანზორ ჩუბინიძე ვინ გდია, რომ ჩვენს შვილებს თვალებს თხრის?!
პირველი, ვინც ჩვენს სამშობლოს უნდა გაეშვას, ეს ოლიგარქი ივანიშვილია! საქართველოში საფურთხებლად ქცეული კაცი ნუგზარ ფოფხაძეა, მაგრამ ის, ვინც მკვდარი პოლიტიკური ლეში, ნუგზარ ფოფხაძე, გააცოცხლა, მასზე უარესი ხომ გამოდის და ეს ივანიშვილია!

გიორგი აბაშიძე