მთავარი ინტერვიუ ლადო კახაძე: „ქვეყანაში პოლიტიკური კრიზისი არ არის…“

ლადო კახაძე: „ქვეყანაში პოლიტიკური კრიზისი არ არის…“

247
0
გაზიარება

„გავრილოვის კრიზისისა“ და ფართომასშტაბიანი ანტისაოკუპაციო აქციების ფონზე საქართველოს პარლამენტმა მთაწმინდის მაჟორიტარის _ ლადო კახაძის უფლებამოსილება ცნო, თუმცა ბატონ ლადოს იმ სხდომაში, რომელზეც ნიკა მელიას სადეპუტატო იმუნიტეტი მოუხსნეს, მონაწილეობა არ მიუღია, რადგან მაშინ, ასე ვთქვათ, სრულფასოვანი დეპუტატი არ იყო. ამიტომ „ქრონიკა+“-მა მთაწმინდის მაჟორიტარს ჰკითხა, შესაძლებლობა რომ ჰქონოდა, მელიასთვის იმუნიტეტის მოხსნას მხარს დაუჭერდა თუ არა? ამას გარდა, ჩვენს რესპონდენტს ბოლო დროს განვითარებული მოვლენებიც შევაფასებინეთ და დავინტერესდით, ყველაფერ აქედან გამომდინარე, ხომ არ ნანობს, პოლიტიკაში რომ ჩაერთო? რა გვიპასუხა ამ კითხვაზე და, საერთოდ, რას ფიქრობს ლადო კახაძე ე. წ. გავრილოვის კრიზისზე? _ ყველაფერ ამას წინამდებარე ინტერვიუდან შეიტყობთ.

_ ბატონო ლადო, საქართველოს საკანონმდებლო ორგანოს წევრი უკვე ოფიციალურად ხართ _ პარლამენტმა თქვენი, როგორც მაჟორიტარი დეპუტატის უფლებამოსილება საპროტესტო აქციების ფონზე ცნო. გილოცავთ, მაგრამ დეპუტატობა ერთობ რთულ ვითარებაში მოგიწევთ. ამ გამოწვევებისთვის მზად ხართ?
_ რასაკვირველია.
_ არადა, როცა მაჟორიტარობის კანდიდატი იყავით, ქვეყანაში შედარებით მშვიდი ვითარება იყო და მაშინ, ალბათ, ვერც წარმოიდგენდით, რომ ძალიან მალე პოლიტიკური კრიზისი შეიქმნებოდა.
_ კრიზისს არ დავარქმევდი _ კი ბატონო, საკმაოდ რთული მდგომარეობაა, გამოწვევებიც არსებობს, მაგრამ ყველაფერი ეს მაინც რეგულირებადია.
_ უკაცრავად, რეგულირებადი რა არის? ექიმი ხართ და თქვენ ყველაზე კარგად იცით, რას ნიშნავს, როცა ადამიანი თვალს კარგავს. მოკლედ, ყველაფერს რომ თავი დავანებოთ, 20 ივნისს, აქციის დაშლის დროს, მომიტნგეებს ჯანმრთელობა შეერყათ და ყველაფერ ამაზე, როგორც გუნდის წევრს, პასუხისმგებლობის აღება თქვენც მოგიწევთ.
_ ეს ქმედებანი, რომელთა შესახებაც ვსაუბრობთ, ლეგიტიმურობას მოკლებული არ არის. იქ ანტიკონსტიტუციური ქმედება არ ყოფილა, უბრალოდ, გადაცდომები იყო და ყველა ეს გადაცდომა მაღალი ხარისხით, საერთაშორისო დამკვირვებლებით და ყველა უფლებადამცველის მონაწილეობით უნდა იყოს გამოკვლეული. მას შემდეგ კი, რაც ყველაფერი გაირკვევა, კანონმა შესაბამისად უნდა იმოქმედოს.
_ ბატონო ლადო, 2007 წლის 7 ნოემბრისა და 2011 წლის 26 მაისის აქციების დარბევა ლეგიტიმური იყო?
_ პასუხს ამაზეც გაგცემთ: მაშინ ზუსტად აქციის დარბევა იყო.
_ 20 ივნისსაც აქციის დარბევა მოხდა.
_ თუ ძველში გადავალთ, ეს ცოტა რთული თემაა.
_ რატომ?
_ იქ იყო სადამსჯელო ოპერაცია.
_ სადამსჯელო ოპერაცია ახლაც იყო _ ადამიანებს დამიზნებით ესროდნენ!
_ კიდევ ერთხელ ვამბობ: მაშინ სადამსჯელო ოპერაცია იყო _ მომიტინგეებს გასასვლელი ჩაკეტილი ჰქონდათ და ადამიანები ყველა მხრიდან იმისთვის იყვნენ განწირულნი, რომ ფიზიკური დაზიანებები მიეღოთ.
20 ივნისის მშვიდობიან აქციას კი ხელი არავინ მოკიდა. მერე, სამწუხაროდ, იყო მოწოდება, რაც ქმედებაში გადავიდა და სწორედ ეს ქმედება აღკვეთეს. ამ ქმედებას შესაძლოა, ცუდი გაგრძელება მოჰყოლოდა, თუმცა არ მინდა, უდანაშაულობის პრეზუმპცია დავარღვიო, ეს გამოძიების ნაწილია და ყველაფერი აუცილებლად თავის ადგილზე დადგება.
მოკლედ, ჩვენ ყველამ კარგად ვნახეთ, რომ აქცია თავიდან, საღამოს 10 საათამდე, აბსოლუტურად მშვიდობიანი იყო და ხელი არავის არავისთვის უხლია, მაგრამ მას შემდეგ, რაც ჯერ მოწოდება დაიწყო, მერე _ შტურმის განხორციელება, ამ დროსაც პოლიცია მხოლოდ მოგერიების რეჟიმში მუშაობდა და ძალიან ცუდი საყურებელი იყო, როცა კონსტიტუციური უფლების დამცველებს, ანუ ფორმის ჩაცმის შემდეგ, თითოეული პოლიციელი კონსტიტუციაა და საღამოს ათი საათის შემდეგ, ფეხის ყოველ ნაბიჯზე, ხალხის აგრესიული ნაბიჯი კონსტიტუციას ურტყამდა _ პოლიციელებს ფარებს, ჩაფხუტებს ართმევდა, რიგებიდან გამოჰყავდა, ხელით ეხებოდა.
_ კონსტიტუციისთვის, ანუ ამ შემთხვევაში, პოლიციელისთვის ფიზიკური თუ სიტყვიერი შეურაცხყოფის მიყენება, ცხადია, დასჯადია, მაგრამ, ბატონო ლადო, თქვენ, როგორც პოლიტიკოსს, როგორ გგონიათ, არაფორმალური დაჯგუფებების შექმნა ან ასეთი დაჯგუფებების შექმნისკენ მოწოდება დასჯადია თუ არა?
_ კიდევ ერთხელ ვამბობ: ქმედება, რომელიც კონსტიტუციის საზღვრებს გასცილდება, დასჯადი უნდა იყოს! ვიცი, რასაც მეკითხებით, მაგრამ აბა, კითხვა დამისვით.
_ საქართველოს პარლამენტის წევრი ლადო კახაძე მოითხოვს თუ არა ლევან ვასაძის კანონის მთელი სიმკაცრით დასჯას?
_ თუ კონსტიტუციური ჩარჩო დარღვეულია, ანუ ფორმირების შექმნა დადასტურდება, რასაკვირველია.
_ ჩვენი კანონმდებლობით, არაფორმალური დაჯგუფებების შექმნა და ამის ორგანიზება დასჯადია.
_ პრეზუმპცია არ დავარღვიოთ, მაგრამ თუ შექმნა დადასტურდა, გეთანხმებით, დასჯადია.
_ პირდაპირ ეთერში ვუყურებდით, ლევან ვასაძის მოწოდების შემდეგ, ადამიანები არაფორმალურ დაჯგუფებაში როგორ ეწერებოდნენ. ეს შექმნა არ არის?
_ ვინმეს იარაღი დაურიგდა?
_ საბედნიეროდ, საქმე ცეცხლსასროლ იარაღამდე არ მივიდა, თორემ ვასაძის განცხადებით, ათეულები, ასეულები და ბოლოს, სახალხო ლეგიონი შეიქმნებოდა.
_ ამას ადასტურებთ?
_ მე კი არ ვადასტურებ, რაინდმა ვასაძემ ეს განცხადება პირდაპირ ეთერში გააკეთა, ბატონო ლადო!
_ თქმა და ქმედება სხვადასხვაა.
_ გარკვეული ქმედებაც იყო _ ლეგიონში გაწევრიანების მსურველთა სიების შედგენა დაიწყო.
_ ჩემი აზრი უკვე გითხარით და სიღრმეში მეტად აღარ წავალ.
_ კეთილი. 20 ივნისის „გავრილოვის ღამის“ შემდეგ შს მინისტრის გადადგომა თქვენც მოითხოვეთ, თუმცა მერე პოზიცია შეიცვალეთ. რა მოხდა?
_ არსად მითქვამს, რომ გახარია უნდა გადადგეს. სამწუხაროდ, ტექსტს არავინ კითხულობს და მარტო სათაური მოეწონათ. არადა, იმ ტექსტში ვამბობ, გახარიამ შესაძლო გადატრიალებისგან გადაგვარჩინა-მეთქი. საერთოდ, სულ მგონია, რომ განათლებულ ადამიანებთან მაქვს საქმე და ჩემს ნათქვამსაც ისე გაიგებენ, როგორც ვამბობ.
_ ბოლოს და ბოლოს, რა თქვით და საზოგადოებამ არასწორად რა გაიგო?
_ მაშინ დეპუტატი ჯერ ოფიციალურად არ ვიყავი და ვთქვი, როცა ვიღაცის შვილმა ან შვილისშვილმა ასეთი ტრავმა მიიღო, რიგითმა მოქალაქემ შეიძლება, იფიქროს, გახარია ხომ არ უნდა გადადგესო, მაგრამ მე სახელმწიფოებრივად ვუყურებ-მეთქი. ბოდიშს ვიხდი, მაგრამ ის ტრავმირებული ადამიანები, რევოლუცია რომ მომხდარიყო, გმირებად შეირაცხებოდნენ, მაგრამ რევოლუცია რომ არ გავიდა, მსხვერპლად გამოცხადდნენ. მოკლედ, პოლიტიკოსები ყველა სიტუაციას თავიანთ სასარგებლოდ ატრიალებენ ხოლმე.
_ ანუ თქვენი ნათქვამი არასწორად მედიამ გაიგო, თორემ შს მინისტრის გადადგომა არასოდეს მოგითხოვიათ?
_ კიდევ ერთხელ გეკითხებით: პოლიციამ მშვიდობიანი მიტინგი დაშალა?
_ იმ დროს, როცა დაშლა დაიწყო, პარლამენტის წინ ძალიან ცოტა ხალხი იდგა.
_ როგორც თქვენ მეკითხებით, ისე მეც გისვამთ კითხვას და პირდაპირ მიპასუხეთ: პოლიციამ მშვიდობიანი მიტინგი დაშალა?
_ მიტინგი, ერთ-ორ მოწოდებას თუ არ ჩავთვლით, მშვიდობიანი იყო.
_ მიპასუხეთ: მშვიდობიანი აქცია დაიშალა?
_ დიახ, მშვიდობიანი!
_ არ ხართ სწორი.
_ რატომ?
_ მშვიდობიანი აქცია საღამოს ათ საათამდე იყო. აი, მას შემდეგ, რამდენი ხანია, მშვიდობიანი აქციები იმართება ან ბოლო შვიდი წლის განმავლობაში რამდენი მშვიდობიანი აქცია მოეწყო, მაგრამ ოდესმე ძალა გამოიყენეს?
_ სხვათა შორის, ორი თვის წინ პანკისში ძალა გამოიყენეს _ აქციის მონაწილეებს რეზინის ტყვიები ესროლეს. საერთოდ, ბატონო ლადო, პრობლემა აქციის დაშლა კი არა, ადეკვატური ძალის გამოყენებაა.
_ ახლა, თქვენ ტექნიკურ მხარეს იხილავთ და, დიახ, პირველ რიგში, შს მინისტრია მოწოდებული და განაცხადა კიდეც, რომ სამართლებრივი კუთხით ყველა კონკრეტული შემთხვევა მსჯელობის საგანი უნდა იყოს და ამაში ყველა უნდა ჩაერთოს, მათ შორის, სახალხო დამცველიც.
_ ოკ, გასაგებია… ბატონო ლადო, თქვენი შეფასებით ქვეყანაში პოლიტიკური კრიზისი არის თუ არა?
_ ქვეყანაში პოლიტიკური კრიზისი არ არის!
_ აბა, რა არის?
_ ქვეყანა ვითარდება; სტრატეგიული პარტნიორი აშშ ცალსახა ორპარტიულ მხარდაჭერას გვიცხადებს და, ამავდროულად, სავაჭო ურთიერთობები შესაძლოა, ინდივიდუალურ რეჟიმში გადავიდეს; ამასთან, ევროატლანტიკური სივრცე _ ევროკავშირი და ნატო ჩვენთან ამაზე ახლოს არასოდეს ყოფილა. რუსეთი არასოდეს მოისვენებს და ყოველთვის შეეცდება, ჩვენთან დესტაბილიზაცია გამოიწვიოს და შიგნით ძალებსაც მოძებნის, რომელთაც დაეყრდნობა. ამისთვის სახელმწიფო მუდმივად მზად უნდა იყოს…
_ რუსეთი შიდა ნაღმებს მუდმივად რომ დაგვიდებს, მეც ვიცი, მაგრამ პოლიტიკურ კრიზისზე გკითხეთ, არის თუ არა-მეთქი. არ ვიცი, თქვენ რას ფიქრობთ, მაგრამ ფაქტია: ხელისუფლების მიმართ პროტესტი არსებობს. ჰოდა, კონკრეტულად გკითხავთ, _ ბახტაძის მსგავსად, თქვენც ფიქრობთ, რომ სააკაშვილი უნდა გადადგეს?
_ სააკაშვილი ვინ არის?
_ მიხეილი.
_ მიხეილ სააკაშვილი სად არის, კაცო?
_ უკრაინაში, მაგრამ პრემიერი ბახტაძე მის გადადგომას ითხოვს. ყოველ შემთხვევაში, მისი ბოლო ბრიფინგის მთავარი ლაიტმოტივი ექსპრეზიდენტის გადადგომა იყო.
_ მე ასეთი შთაბეჭდილება არ შემქმნია და თქვენ ასე რატომ იფიქრეთ?
_ ბახტაძემ ყველაფერი მიშას დააბრალა, ანუ სააკაშვილს ებრძვის.
_ სააკაშვილს არავინ ებრძვის, ის თავის ქვეყანას აქეთ ებრძვის! უფრო სწორად, ეს მისი ქვეყანა აღარ არის, მისი ქვეყანა უკვე უკრაინაა!
_ მოკლედ, თუ სააკაშვილი ექსტრემისტია, „ოცნებამ“ შვიდი წლის განმავლობაში მისი ალაგმვა რატომ ვერ მოახერხა? სხვათა შორის, უმრავლესობამ „პატრიოტების“ ინიციატივას, რომელიც „ნაცმოძრაობის“ აკრძალვას ითვალისწინებდა, მხარი არ დაუჭირა. თუ იცოდა, რომ „ნაცმოძრაობა“ დესტრუქციული ოპოზიციაა, რატომ არ აკრძალა?
_ კარგი კითხვაა და კიდევ ერთი პლუსი „ოცნებას“. აკრძალვას დიდი არგუმენტები სჭირდება. „ოცნებამ“ აცალა, რომ ამ პოლიტიკურ ორგანიზაციას თავისი გავლილი გზისა და ორიენტირებისთვის კიდევ ერთხელ გადაეხედა… მე, როგორც ერთი დეპუტატი, მიმაჩნია და მოვითხოვ, რომ დეტალურად გადაიხედოს ყველა დანაშაული და მხოლოდ დასაბუთებული არგუმენტების მეშვეობით, პარლამენტმა რეჟიმის მიმართ თავისი ვერდიქტი გამოიტანოს!
_ როგორც ვატყობ, „კუდიანებზე ნადირობის“ ახალი სეზონი დაიწყება. ისე, ბატონო ლადო, თქვენი სადეპუტატო უფლებამოსილება ცნობილი რომ ყოფილიყო, ნიკა მელიასთვის იმუნიტეტის მოხსნას მხარს დაუჭერდით?
_ დღესაც მხარს ვუჭერ, რომ ლადო კახაძეს ყოველგვარი იმუნიტეტი მოეხსნას! თუ იმუნიტეტი სისხლის სამართლის საქმისა თუ ნებისმიერი გაუგებრობის ასახსნელად ხელის შემშლელია, დიახ, თანახმა ვარ, ლადო კახაძეს მოეხსნას! ეს პასუხი ცალსახაა და ვინც უნდა იყოს _ მელია თუ კახაძე, მხარს დავუჭერ!
_ ის მოვლენები, რაც ახლა ვითარდება, ცოტა ადრე რომ დაწყებულიყო, „ოცნებას“ დასთანხმდებოდით, რომ მაჟორიტარად მისი სახელით გეყარათ კენჭი?
_ „ოცნების“ მიერ კონსტიტუციასა და მის ლეგიტიმაციასთან დაკავშირებით გატარებულ პოლიტიკასთან კითხვის ნიშნები არ მაქვს და ამიტომ დავთანხმდებოდი!
_ კითხვები არც იმაზე გაქვთ, თუ როგორ მოხვდა სერგეი გავრილოვი საქართველოს პარლამენტის თავმჯდომარის სავარძელში? სხვათა შორის, ასეთი ღონისძიებები სპონტანურად კი არა, რამდენიმე თვით ადრე იგეგმება და, როგორც წესი, ყველა დეტალი კარგად გაწერილ-შეთანხმებულია ხოლმე.
_ ამ ასამბლეაში, საქართველოსა და რუსეთის გარდა, კიდევ 23 ქვეყანაა და საქართველომ, რომელიც ღირსეულად აპირებს ურთიერთობას მსოფლიოსთან, რა უნდა თქვას, ამ ასამბლეიდან გავდივარო?
_ ბატონო ლადო, ერთი წუთით, სხვა რამეს გეკითხებით.
_ რა სხვა რამეს?
_ ამ ასამბლეის ჩატარება უმაღლეს საკანონმდებლო ორგანოში უნდა დაგეგმილიყო თუ არა?
_ უმრავლესობის ყველა დეპუტატმა ცალსახად თქვა, რომ ეს შეცდომა იყო.
_ შეცდომა თუ დანაშაული?
_ ხაზს ვუსვამ _ შეცდომა და ამაზე ჩვენმა ხელისუფლებამ დიდი პოლიტიკური პასუხისმგებლობა აიღო.
_ ანუ?
_ პარლამენტის თავმჯდომარე გადადგა!
_ უკაცრავად, მაგრამ ამ თავმჯდომარეს, ანუ კობახიძეს, საზოგადოებაში ავტორიტეტი, პრაქტიკულად, არ ჰქონდა და მისი გადადგომა-არგადადგომაც დიდი ვერაფერი შეღავათია.
_ არ მინდა, ასეთ რამეში წამოგყვეთ, მაგრამ უცბად შეურაცხყოფა მომაყენეთ.
_ კობახიძეზე ვთქვი, ავტორიტეტი არ ჰქონდა-მეთქი და შეურაცხყოფა თქვენ რატომ მოგაყენეთ?
_ კობახიძე საქართველოს პარლამენტის თავმჯდომარე იყო, რომლის მიერ არმიღებული კანონებითაც საშინაო და საგარეო პოლიტიკა ისაზღვრებოდა. თქვენი განათლებულობის მჯერა, მაგრამ ნებსით თუ უნებლიეთ, შეურაცხყოფას აყენებთ სრულიად საქართველოს, მის დეპუტაციას, მათ შორის, მეც და ამაში არ დაგეთანხმებით.
_ მომიტევეთ, მაგრამ კობახიძე პარლამენტის თავმჯდომარედ საქართველოს მოსახლეობამ კი არა, „ოცნების“ ვიწრო ჯგუფმა აირჩია და ამას ძალიან დიდი მნიშვნელობა აქვს!
_ საქართველოს პარლამენტის თავმჯდომარე საქართველოს მიერ არჩეულმა დეპუტაციამ აირჩია, ანუ ამ დეპუტაციას ამომრჩეველმა მისი სახელით საუბრისა და ქმედების ნება მისცა. ამიტომ ასეთი საუბარი არავის ეპატიება, მათ შორის, არც ჟურნალისტებს, მიუხედავად იმისა, რომ ამ ქვეყანაში გამოხატვის თავისუფლება არავის აუკრძალავს!
_ მე, როგორც ამ ქვეყნის მოქალაქეს, ხომ მაქვს უფლება, რომ, მაგალითად, სალომე ზურაბიშვილზე ჩემი დამოკიდებულება მქონდეს და მას პრეზიდენტად არ მივიჩნევდე?
_ ეს უფლება თქვენთვის არავის წაურთმევია!
_ ჰოდა, კობახიძეზეც ჩემი აზრი ვთქვი და შეურაცხყოფა რა შუაშია?
_ შეიძლება, არ მოგწონდეთ და ეს თქვენი კერძო აზრია. წინა რეჟიმებისგან განსხვავებით, დღეს საქართველოს მოსახლეობისთვის საკუთარი აზრის გამოთქმა არავის აუკრძალავს. აი, ზუსტად აქ არის „ოცნება“ აბსოლუტურად დემოკრატიული _ სამზარეულოში კი არა, როგორც წინა რეჟიმების დროს შიშით ლაპარაკობდნენ, არამედ, ტელევიზიით და მედიით ყველაფერს გაიგონებთ და მოისმენთ. ამის არავის არც ერიდება და არც ეშინია. კარგია, რომ ქვეყანას ისეთი ხელისუფალი მართავს, რომელიც სიტყვისა და გამოხატვის თავისუფლებას არასოდეს დაუპირისპირდება!
_ სხვათა შორის, სწორედ ეს ხელისუფლება აპირებს, რომ ე. წ. ცილისწამების კანონი მიიღოს, თუმცა ეს ცალკე საუბრის თემაა.
_ არა, ერთი წუთით, კარგი რამ თქვით: „ათი მცნება“ წაკითხული გაქვთ?
_ დიახ.
_ „მეცხრე მცნება“ მითხარით.
_ ასე თანმიმდევრობით არ მახსოვს, მაგრამ მგონი, არა ცილისწამოო.
_ დიახ.
_ ეს რა შუაშია?
_ ჩვენ არ ვამბობთ, ვინმე დამნაშავეა თუ არა, უბრალოდ, ცილი არ უნდა დასწამო.
_ ბატონო ლადო, ჩვენ სეკულარული სახელმწიფო ვართ და კანონებს ათ მცნებაზე ვერ მოვარგებთ!
_ ჩვენ ვართ სახელმწიფო, რომელმაც ნორმის პირობებში, დაწერილი და დაუწერელი კანონებით, ბიბლიით უნდა იხელმძღვანელოს. იცით თუ არა, რომ არასწორი სიტყვა შეიძლება, იარაღზე ათასჯერ საშინელი იყოს? მაშინ სად არის მორალი, ზნეობა, სინდისი და ადამიანზე ზრუნვა?
_ კარგი, რა, ბატონო ლადო, პოლიტიკაში რა სინდისსა და ზნეობაზე მელაპარაკებით _ ვერ ხედავთ, რა ხდება?
_ რახან ამას მეუბნებით, უზნეო პოლიტიკა მოგწონთ!
_ მე კი არ მომწონს, არამედ, რასაც ვუყურებთ, უზნეო პოლიტიკაა!
_ ასე რომ მივუდგეთ, ზოგი უზნეოს თქვენ გიწოდებთ.
_ ვიცი.
_ ზოგი უზნეოს ექიმს უწოდებს, ზოგი _ პოლიციელს, ზოგი _ აღმასრულებელ ხელისუფალს, ზოგი _ პარლამენტის წევრს და ზოგიც _ საბავშვო ბაღის გამგეს. ეს კარგია?
_ არ ვამბობ, რომ კარგია, მაგრამ ამ შემთხვევაში ზოგად ზნეობაზე კი არა, პოლიტიკაზე ვსაუბრობთ.
_ ყველაფერი ეს პოლიტიკის შემადგენელი ნაწილი არის თუ არა?
_ ვერ დაგეთანხმებით.
_ რატომ?
_ იმიტომ, რომ პოლიტიკა პრაგმატული მეცნიერებაა და, შესაბამისად, პოლიტიკაში ყველაფერი „მოსულა“.
_ სიტყვაზე „გიჭერთ“: ე. ი., მხარს უჭერთ, რომ პოლიტიკაში ყველაფერი „მოსულა“?
_ მხარს მე კი არ ვუჭერ, ფაქტის კონსტატაციას ვახდენ და იმას ვამბობ, რომ პოლიტიკაში მუდმივი ღირებულებები, მაგალითად, მუდმივი მტრობა და მეგობრობა არ არსებობს.
_ პოლიტიკაში ყველაფერი არ „მოსულა“, თუ ამას არ გაამართლებენ ნაყიდი მასმედიები და პოლიტიკურად ანგაჟირებული თუ მოუმზადებელი წრეები. თუ საღი აზრი დახვდება, პოლიტიკოსი, რომელიც არათუ ქცევის კოდექსს, არამედ მორალურ-ზნეობრივ საფეხურს გადასცდება, ყველამ უნდა მივუთითოთ და ამის მერე პასუხი უნდა მოეთხოვოს!
_ თქვენი პოზიცია გასაგებია და შეგეკამათებით, თუმცა სანამ დაგემშვიდობებით, ერთ თემასაც შევეხები: იზიარებთ პრემიერის შეფასებას, რომ 1991-92 წლების მოვლენების მსგავსად, „ვარდების რევოლუციაც“ სახელმწიფო გადატრიალება იყო?
_ ეს რუსეთის, ჩვენი მტრის მიერ საქართველოს დამოუკიდებლობის წინააღმდეგ ჩატარებული სადამსჯელო ოპერაცია იყო.
_ 1991-92 წლის მოვლენებზე ამბობთ თუ „ვარდების რევოლუციაზე“?
_ ორივეზე.
_ ანუ ამ ორი მოვლენის შედარება „ოცნების“ საერთო მესიჯბოქსია, არა?
_ ამაზე ლაპარაკი პირველად ძალიან დიდი ხნის წინ მე დავიწყე და მაშინ „ოცნება“ საერთოდ არ არსებობდა!
_ ბატონო ლადო, თუ პროცესები ისე წავა, რომ ვთქვათ, ვადამდელი საპარლამენტო არჩევნები დაინიშნა, ხომ არ ინანებთ, რომ პოლიტიკაში ჩაერთეთ?
_ შეკითხვაზე შეკითხვითვე გპასუხობთ: ვადამდელი არჩევნები როგორი წესით?
_ ვინაიდან პროპორციულის დაკანონება არ მოესწრება, თუ ვადამდელი დაინიშნა, ალბათ, არსებული წესით ჩატარდება.
_ ის ძალა, რომელსაც დესტაბილიზაცია უნდა, პროპორციულ არჩევნებს ებრძვის! თუ პროპორციული სისტემით ჩატარდება და თუ ამას გუნდი გადაწყვეტს, არჩევნებში მონაწილეობას, რასაკვირველია, მივიღებ, მაგრამ ეს ის საფრთხობელაა, ვისაც პროპორციული არჩევნები არ აწყობს!
_ მოკლედ, რაკი „ქოცი“ არ ვარ, ცუდი ტიპი ვარ?
_ თქვენ იმ დონის პროფესიონალი ხართ, ვისთანაც საუბარი არასოდეს მომწყინდება. თქვენს პროფესიონალიზმს ჩვენ, ყველანი, საერთო მდგომარეობის სწორად ორიენტირებისთვის უნდა ვიყენებდეთ. ამიტომ მნიშვნელობა არ აქვს, „ქოცი“ იქნებით, „ნაცი“ თუ დამოუკიდებელი. პირველ რიგში, საქართველოს მოქალაქე და დიდებული პროფესიის კარგი სპეციალისტი ხართ. ამიტომ თქვენი ნებისმიერი ქმედება ჩვენი ქვეყნის სტაბილურობისკენ უნდა იყოს მიმართული!
_ დიდი მადლობა და მინდა, საქართველოს პარლამენტში თქვენი სათქმელი თქვათ, ანუ გუნდურობა გასაგებია, მაგრამ თუ რამეზე განსხვავებული აზრი გექნებათ, ამის შესახებ ხმამაღლა თქვათ!
_ თუ ჩემს აზრს უმრავლესობა გაიზიარებს, მაშინ რა ვქნათ?
_ თუ გაიზიარებს, ამას რა სჯობია!
_ ჩემი აზრი ყოველთვის მქონდა და მაქვს!

გიორგი აბაშიძე

 

დატოვეთ კომენტარი