თაკო ჩარკვიანი: „არ უნდა შევეგუოთ, რომ ოლიგარქმა სამი თითი გვიწკაპუნოს და ლაგამი ამოგვდოს!“

პარტიის _ „კანონი და სამართალი“ ლიდერი, თაკო ჩარკვიანი, ერთ-ერთი ყველაზე რეიტინგული ოპოზიციონერია, რაც სოციალური ქსელიდანაც ჩანს _ „ოცნების“ „ტროლები“ მისი საჯარო გამოსვლების, როგორც იტყვიან, საკუთარ თარგზე მოჭრას ცდილობენ ხოლმე, თუმცა როგორც თაკო ჩარკვიანი „ქრონიკა+“-თან ამბობს, მას ასეთი რაღაცები არ აშინებს და ლაგამსაც ვერავინ ამოსდებს:

_ ქალბატონო თაკო, ოთხი თვეა, პოლიტიკოსის სტატუსი გაქვთ. ამ ხნის განმავლობაში თქვენს ცხოვრებაში რა შეიცვალა?
_ ძალიან დიდი მუშაობა და შრომაა. სხვათა შორის, ბოლო დროს პარტიაში ძალიან ბევრი ადამიანი წევრიანდება, განსაკუთრებით ახალგაზრდები აქტიურობენ და, სიმართლე გითხრათ, ამას არც ველოდით. აი, მაგალითად, გუშინ ოფისში დიდი ამბავი იყო _ ახალგაზრდები ფლაერებს ბეჭდავენ. მოკლედ, მუშაობის პროცესში ვართ.
_ ეს გასაგებია, მაგრამ იცით, რას გეკითხებით? _ იმ სიმართლეს, რასაც ახლა ამბობთ, აქამდეც ამბობდით. შესაბამისად, პარტია რაღად გინდოდათ?
_ პარტია იმისთვისაა საჭირო, რომ მობილიზაცია მოახდინო და ზემოქმედების მეტი ბერკეტი გქონდეს. სხვათა შორის, საკანონმდებლო ორგანოში უკვე ორი უმნიშვნელოვანესი კანონპროექტი წარვადგინეთ და პარტიაც სწორედ ამისთვისაა საჭირო. ზოგადად, „კანონსა და სამართალში“ პროფესიონალი და კვალიფიციური იურისტები არიან.
პარტია ხალხის კონსოლიდირებისთვისაა საჭირო. როგორც გითხარით, გაწევრიანება ძალიან დიდია. ამის მიზეზი შეიძლება ისაა, რომ პარტია ახალია. ამას წინათ ვთქვი, სიმართლის მეტი არაფერი გამაჩნია-მეთქი. ადამიანებამდე ეს სიმართლე და გულწრფელობა მიდის. ერთი სიტყვით, ხალხი „კანონსა და სამართალს“ იმედის თვალით უყურებს. როგორც ჩანს, მოსახლეობას პარტიის სახელიც ხიბლავს, რადგან ამ ქვეყანაში კანონიც გვაკლია და სამართალიც!
_ კანონისა და სამართლის დეფიციტი ამ ქვეყანაში უდავოდ არის, მაგრამ თქვენი თითქმის ყველა გამოსვლა, როგორც იტყვიან, ჰედლაინი ხდება. აი, მაგალითად, სოციალურ ქსელში ერთობ აქტუალურია თქვენი ფრაზა, ივანიშვილის სახლთან შიმშილობას დავიწყებო.
_ ახლაც იგივეს გავიმეორებ, _ თუ საჭირო იქნება, ვიშიმშილებთ კიდეც! გამორიცხულია, სიტყვა ისე ვისროლო! ეს ფრაზა მაჩალიკაშვილის მხარდასაჭერ აქციაზე ვთქვი და ამაზე პარტიაში შეთანხმებულები ვიყავით. მეტიც, გრაფიკიც კი გვქონდა, მჯდომარე აქცია როდის უნდა დაგვეწყო, ღამე ვინ დარჩებოდა და ა. შ.
ამ სიტყვისთვის მაპატიეთ, მაგრამ ოპოზიცია, ჩემი ჩათვლით, ყეფს! ჩვენ ვცდილობთ, რომ ყველაფერი კანონის ფარგლებში გავაკეთოთ… სხვათა შორის, 2016 წლიდან ოპოზიციის მხარდამჭერთა ნიშნული მატულობს.
_ ამას რის საფუძველზე ამბობთ?
_ ყოველთვის ვცდილობ ხოლმე, რომ უხერხულ სიტუაციაში არავინ ჩავაყენო, მათ შორის, არც საკუთარი თავი.
_ ოპოზიციის ნიშნულის მატებაზე გკითხეთ და „უხერხულობაში ჩაგდება“ რა შუაშია?
_ ავიღოთ, თუნდაც, ზუგდიდის მერის არჩევნები _ გაშვებული პრეზიდენტის ცოლმა, გაყალბების პირობებშიც კი, 45 პროცენტი აიღო და 2016 წლის არჩევნებთან შედარებით, ეს რიცხვი გაზრდილია, ანუ ოპოზიცია მზარდია.
ყველაფერს თავი რომ დავანებოთ, საპრეზიდენტო არჩევნებში მეორე ტური დაიდო. მოკლედ, სულ ვცდილობ, რომ კანონის ფარგლებში ვიყო, მაგრამ მაგალითად, პროკურატურა თავისუფალი არ არის. ამ დღეებში აშშ-ს სახელმწიფო მდივანი გამოვიდა და პირდაპირ გვითხრა, თქვენ აღარაფერი გაქვთ _ არჩევნებს აყალბებთ და სასამართლოს რეპუტაცია შელახულიაო. ასეთი შოკისმომგვრელი განცხადება აქამდე არასოდეს მომისმენია და სახელმწიფო მდივნის გვერდით პრემიერი ბახტაძე ატუზული შეგირდივით იდგა!
_ ერთი სიტყვით, თუ პროკურატურა დამოუკიდებელი არაა და სასამართლოს რეპუტაციაც გათელილია, რა უნდა გავაკეთოთ? _ პროტესტის ფორმა უნდა მოვძებნოთ და მე ეს ფორმა ვიპოვე.
_ კონკრეტულად, რა ფორმა იპოვეთ?
_ მინდა, აქციები დავიწყოთ და ჩინოვნიკებს დისკომფორტი შევუქმნათ! მარტო ოპოზიცია კი აღარ ამბობს, არამედ უკვე სახელმწიფო აუდიტი დებს დასკვნებს. სხვათა შორის, ერთხელ ივანიშვილმაც თქვა, ინფრასტრუქტურის უწყებიდან მილიარდ-ნახევარია გატანილიო, მაგრამ ის კაცი, ვისზედაც ეს თქვა, უკან დააბრუნა _ ღარიბაშვილს ვგულისხმობ. როცა ივანიშვილმა პრესკონფერენციაზე ეს თქვა, ვიფიქრე, ასე თამამად, ალბათ, იმიტომ ლაპარაკობს, რომ ძიება დაწყებულია და ხვალიდან ვიღაცას პასუხი მოეთხოვება-მეთქი, მაგრამ თქვენც არ მომიკვდეთ! მერე ლაპარაკი გაფლანგულ 600 და 700 მილიონებზე იყო. აბა, ბიუჯეტი მეტი კი არაფერია? ვიჯდე და ვუყურო, ბიუჯეტი როგორ იფლანგება, ეს ხომ შეურაცხმყოფელია?!
კრიჭაში ჩამდგარი ადამიანის პოზიციიდან არ ვსაუბრობთ და, მოდით, ერთი წამით პარტიებს თავი დავანებოთ. სხვათა შორის, აქამდე პარტიის წევრი არასოდეს ვყოფილვარ და იცით, რატომ? _ პასუხი ჩემს ნამოქმედარზე უნდა ვაგო! იგივე გაერთიანებულ ოპოზიციაში ჩემი გარანტიებით და პირობებით ვარ.
_ რა პირობებით?
_ გეტყვით. იცით, ძალიან ხშირად გრიგოლ ვაშაძეს რატომ ვახსენებ ხოლმე?
_ რატომ?
_ ყველაფერი, რაზედაც ვისაუბრეთ, შესრულდა და ამ ადამიანის მჯერა! საქართველოს ხელისუფლებაში აუცილებლად კოალიციური მთავრობა მოვა. ამას წინათ, ერთ-ერთ გადაცემაში ვიღაცამ მითხრა, ხელისუფლებამ პირობა უნდა დადოსო და გამეცინა, რადგან სახელმწიფოში პირობის ფენომენი არ არსებობს. სახელმწიფოში უზენაესი კანონია! შეიძლება, ვიღაცამ ისევ აურიოს და გადაწყვიტოს, რომ სახელმწიფოს მართვაში მანკიერი მხარეები შემოიტანოს. აქ რომელ პირობაზეა ლაპარაკი? პასუხისმგებლობას მე ჩემი პარტიით ვიღებ.
როცა გაერთიანებულ ოპოზიციაში შევედით, ჩემი პირობა იყო, რომ ყოფილი ხელისუფლებიდან მხოლოდ აღმშენებლობითი ნაწილი დარჩება, ყველა მანკიერი მხარე კი უკან გაიწევა. აი, როცა კოალიციური მთავრობა მოვა, ყველაფერ ამას გაკონტროლება ხომ სჭირდება? _ საამისოდ ოთხი უსერიოზულესი კანონია საჭირო. არ ვამბობ, ერთი და უპირობო-მეთქი _ ასე ლაპარაკი სწორი არ იქნება, მაგრამ ჩვენი პარტია ნამდვილად იქნება ერთ-ერთი გარანტორი, რომ სახელმწიფოს აღმშენებლობისთვის საჭირო ყველა კანონი შესრულდება!
_ ღმერთმა ხელი მოგიმართოთ, მაგრამ, ქალბატონო თაკო, ობიექტურად თუ შევხედავთ, მას შემდეგ, რაც პოლიტიკაში გამოჩნდით, თქვენს მრავალწლიან რეპუტაციას რაღაცნაირად ჩრდილი მიადგა.
_ პირიქით.
_ თუ ნებას მომცემთ, დაგიკონკრეტებთ, ჩრდილში რასაც ვგულისხმობ: გაერთიანებული ოპოზიციის, როგორც იტყვიან, ლოკომოტივი „ნაციონალური მოძრაობაა“. წლების განმავლობაში სწორედ „ნაცმოძრაობის“ შეურიგებელი ოპონენტი იყავით. ჰოდა, განა არ შეგეძლოთ, რომ „ოცნების“ წინააღმდეგ ბრძოლა სხვა ადამიანებთან ერთად დაგეწყოთ და არა _ მაინცდამაინც „ნაცმოძრაობასთან“?
_ არა!
_ რატომ?
_ რასაც ახლა გეტყვით, მინდა, მკითხველამდე ზუსტად მიიტანოთ: ამ გადმოსახედიდან კარგად ვხედავ, მაშინდელ ახალგაზრდა ხელისუფლებას როგორ ტალახსა და რუსეთის „ტროლების“ ქარხანაში მოუწია გავლა! დიდ აღმშენებლობასთან ერთად შეცდომებიც ზუსტად ამის შედეგია!
_ შეცდომა თუ დანაშაული?
_ დიახ, არათუ უბრალოდ დანაშაულებრივი ქმედებები, არამედ სასტიკი დანაშაულებრივი ქმედებები. იმ დროს ძალიან საინტერესო სახელმწიფოებრივი ინსტიტუციები აშენდა _ მათ ამის კეთების უნარი ჰქონდათ. ჩემთვის ვიფიქრე, იმ „ნაციონალურ მოძრაობას“, რომლის ოპოზიციაშიც 9 წელი ვიყავი, პირობითად, 400 თუ 450 ათასი სტაბილური ამომრჩეველი ჰყავს _ ეს ხალხი არსად წასულა. ეს ციფრი ერთობლივად გავზარდეთ და დღეს ოპოზიციის მხარდამჭერი უკვე 900 ათასამდეა.
_ ამ გაზრდაში პირადად თქვენი წვლილიცაა?
_ ცხადია, ალბათ, არის. იმასაც არ უნდა ლაპარაკი, რომ ეს გრიგოლ ვაშაძის დამსახურებაც არის. სხვათა შორის, თავდაპირველად ჩემთან ბატონი გრიგოლი მოვიდა და მერე ვიხუმრე კიდეც, სწორედ მან მოახერხა, ბაგრატის ტაძართან „ხუთიანი“ წარმედგინა და იმ დონის დიპლომატია, რომ ისიც ზუსტად ვიცი, ამ ქვეყანას დასავლური მასშტაბითაც მიხედოს-მეთქი. მე და ბატონი გრიგოლი ძალიან დიდი ხანია, ერთმანეთს ვიცნობთ _ ჯანსუღი მისი დის _ ნინოს ქორწილის თამადა იყო. დიახ, გრიგოლ ვაშაძე ძალიან ძლიერი დიპლომატია და იგივე აშშ-ის სახელმწიფო მდივნის განცხადება, რომელზედაც წეღან ვსაუბრობდით, შემთხვევითი არ გეგონოთ _ ამ კაცს თვეებია, არ ჩაუმუხლავს და საქართველოს ეხმარება, რომ ფონს გავიდეს, თორემ საგარეო საქმეთა სამინისტრო დასავლეთის კუთხით, პრაქტიკულად, არ მუშაობს. ხელისუფლებისთვის დასავლეთი, უბრალოდ, სიტყვის მასალაა და მეტი არაფერი!
ამას წინათ ერთ-ერთ გადაცემაში „ოცნების“ მხარდამჭერს ვკითხე, _ ხელისუფლებაში რომ მოხვედით, „ნაციონალური მოძრაობა“ დამნაშავე პარტიად გამოაცხადეთ-მეთქი? მიპასუხა, _ არაო. ანუ ეს პარტია არჩევნებში ლეგიტიმურად მონაწილეობს და მისი ამომრჩეველიც ლეგიტიმურია. ამ პარტიის წევრი არ ვარ, მაგრამ, ბატონებო, „ნაციონალური მოძრაობის“ ამომრჩევლები ჩვენი თანამოქალაქეები არიან და რა, გინდათ, რომ ეს 450 ათასი ადამიანი გაბოროტდეს? თუ ვინმე მაშინდელ დანაშაულებრივ ქმედებებში გარეული არ არის, რას ვერჩით? თუ ადამიანი პროფესიონალია და სამსახურიდან მხოლოდ იმის გამო უნდა გავუშვათ, რომ მაშინ მუშაობდა, ასე ხომ არ შეიძლება?
ერთი სიტყვით, ვიფიქრე, პროფესიული თვალსაზრისით ეს ძალიან მოტივირებული გუნდი რომ არ უნდა დაიშალოს და გაბოროტდეს-მეთქი. წეღანდელი თქმისა არ იყოს, ახლა ვხვდებით, ამ გუნდს რამხელა „ტროლთა“ ქარხანა ებრძოდა, თუმცა მაშინ სიტყვა „ტროლი“ არ ვიცოდით. სხვათა შორის, იგივე 90-იან წლებშიც ფოფხაძე-ყანდიაშვილები იყვნენ, უბრალოდ, „ტროლები“ არ ერქვათ და ერთმანეთზე ტვინები აგვასხმევინეს! ის კაცი, ვინც გამსახურდიას ედგა გვერდით, დღეს რუსეთის მხარესაა, თუმცა გამსახურდიამ არ იცოდა, სინამდვილეში ვინ იყო. ჩვენც არ ვიცოდით, ის ხალხი ვინ იყო, ვინც ჩვენს მხარეს იყო და დღეს რუსეთის მხარესაა. ყველაფერ ამის გამო მაშინ ერთმანეთი დავხოცეთ!
დღეს კი რაღაცები უფრო გაირკვა _ ლუსტრირება მოხდა.
მოკლედ, ჩემთვის ვიფიქრე, უკეთესი იქნება, იმ მოტივირებულ და პროფესიონალურად ძალიან საინტერესო გუნდს, ანუ 450 ათას ამომრჩეველს ლიდერად ისეთი რბილი, პროფესიონალი და კარგი კაცი ჰყავდეს, როგორიც გრიგოლ ვაშაძეა-მეთქი.
_ ქალბატონო თაკო, თუ ასე იფიქრეთ, მაშინ ვერ ვიგებ, დამოუკიდებელი პარტიული სტრუქტურის შექმნა რაღა საჭირო იყო, პირდაპირ „ნაცმოძრაობის“ წევრი და ერთ-ერთი ლიდერი გამხდარიყავით, არ სჯობდა?
_ „ნაცმოძრაობის“ წევრი რატომ უნდა გავმხდარიყავი? ჩემს საქციელზე პასუხს ჩემი პარტიით ვაგებ! ბევრ ღირებულებაში ვეთანხმები, მაგრამ რაღაცებზე განსხვავებული არზი მაქვს და ჩემი პარტიაც სწორედ ამ განსხვავებული აზრის გამო შევქმენი. მაგალითად, რუსეთთან მიმართებით მათ პოზიციას ვიზიარებ, ასევე სახელმწიფო ინსტიტუტების მშენებლობის მათი ტემპი მომწონს, მაგრამ ის სასტიკი დანაშაულებრივი ქმედებები არ მომწონდა და ამიტომაც პოლიტიკაში „კანონით და სამართლით“ მოვედი!
ამ კუთხით ძალიან საინტერესო მოლაპარაკება გვქონდა ბატონ გრიგოლთან და ყველაფერი, რაზედაც ვისაუბრეთ, ერთი-ერთში სრულდება. სხვათა შორის, ყველაფერი მემორანდუმით არის გაფორმებული.
ვინმემ რომელიმე პარტიას რამე დაუშალა? _ გამოჩნდნენ კიდეც, მაგრამ მეორე ადგილზე მაინც გაერთიანებული ოპოზიციაა. ე. ი., ამ გაერთიანებას სიძლიერე აქვს.
_ „ნაციონალების“ ზოგიერთ ლიდერს ის დანაშაულებრივი ქმედებები, რაც თუნდაც თქვენი ოჯახის მიმართ ჩაიდინეს, აპატიეთ?
_ ხომ იცით, სადაც გავიზარდე _ ჩემთვის, უპირველეს ყოვლისა, საქართველოა!
2008 წლის აგვისტოს ომის დროს მე და მამა ჯაჭვში რომ ჩავდექით, ვიღაცები გვირეკავდნენ და გვეუბნებოდნენ, _ მიშა სააკაშვილის ჯაჭვში რატომ იდექითო?! მახსოვს, ჯანსუღმა ამ ვიღაცებს უპასუხა, _ მიშა სააკაშვილის კი არა, საქართველო-რუსეთის ომია და რუსეთის წინააღმდეგ ჯაჭვში ვდგავარ, თქვე უგუნურებოო!
დიახ, მე ასე გავიზარდე _ რუსეთის წინააღმდეგ უნდა გავერთიანდეთ, აბა, რა უნდა ვქნათ?!
სხვათა შორის, ჩემი პარტიის ელექტორატი, ძირითადად, ის ელექტორატია, რომელზედაც თქვენ საუბრობთ.
_ ანუ?
_ ამ ადამიანებმა „ნაციონალური მოძრაობის“ მიმართ წყენა რუსეთის გამო დაივიწყეს და გაერთიანებულ ოპოზიციას მისცეს ხმა!
_ ქალბატონო თაკო, გეთანხმებით, რომ მტრის წინააღმდეგ ყველანი უნდა გავერთიანდეთ, მაგრამ ისევ შიდა პოლიტიკას დავუბრუნდები და უხერხულ თემას შევეხები, ანუ მუსირებს მოსაზრება, რომ ოპოზიციის ნაწილი ფარულად შესაძლოა, „ოცნებასთან“ თანამშრომლობდეს…
_ გაერთიანებულ ოპოზიციაზე ამბობთ?
_ თუნდაც…
_ ეს სასაცილოა! ყოველ შემთხვევაში, რასაც ვხედავ, ასე ნამდვილად არ არის!
_ კეთილი, მაგრამ ლეგიტიმურ კითხვას გისვამთ: საპრეზიდენტო არჩევნების პირველ ტურში გაერთიანებული ოპოზიცია თითქმის 900 ათას ხმას იღებს, თუმცა მეორე ტურამდე ერთ მიტინგს ზრდილობისთვისაც არ მართავს. ამას რით ხსნით?
_ აქცია რატომ უნდა გაემართა?
_ ჩემი აზრით, თუნდაც პრევენციის მიზნით უნდა გაემართა, ანუ ხელისუფლებისთვის დაენახვებინა, რომ თუ მეორე ტურს გააყალბებდა, მისი საქმე ცუდად წავიდოდა.
_ აქციები არ გვაკლდა. აი, მაგალითად, ის აქცია გახსოვთ, სადაც ვთქვი, _ აუ, რამდენი ვართ-მეთქი _ და მერე ამ ფრაზას „ტროლები“ რომ ატრიალებდნენ?
_ დიახ, მახსოვს, მაგრამ მაინც ჩემს აზრზე ვრჩები, რომ საპრეზიდენტო არჩევნების პირველსა და მეორე ტურს შორის გაერთიანებულ ოპოზიციას მაინცდამაინც აღარ უაქტიურია.
_ ვერ დაგეთანხმებით… აქციებს ყოველ წუთს არ აანონსებ, თან ყველაფერს მომწიფება სჭირდება. მაგალითად, ერთი თვის წინ სხვა სურათი იყო, ახლა კი რადიკალურად სხვა სურათია. ხალხს არ უნდა გადაახტე. გაერთიანებული ოპოზიციის იმ ფრთას მივეკუთვნები, რომელიც ფიქრობს, რომ პერმანენტული აქციები უნდა დაიწყოს და ჩვენი პარტია აქციებს დაიწყებს კიდეც.
სხვათა შორის, მაჩალიკაშვილის ამბების დროს სუს-თან მისვლა ჩვენი პარტიის გადაწყვეტილება იყო, ანუ გაერთიანებულ ოპოზიციაში სრული თავისუფლებაა და კაბალური შეთანხმებები არ გვაქვს. 24 საათი რუსთაველის გამზირზე არ ვარ, მაგრამ ის, როგორც ხელისუფლება მაჩალიკაშვილს ექცეოდა და ექცევა, ამორალურად მომეჩვენა. ამიტომაც ვთქვი, თუ დააკავებთ, კარვებს ჩვენ ჩავანაცვლებთ-მეთქი. ამდენი წელია, ერთმანეთს ვიცნობთ და ხომ ზუსტად იცით, რომ რაც ვთქვი, გავაკეთებდი?
_ დიახ, ამაში ეჭვიც არ მეპარება…
_ თავგასულ ხელისუფლებას უნდა უთხრა, ეი, შე თავხედო, ამას როგორ ბედავ!
მოკლედ, ხალხისგან ინიციატივა კი არა, სურვილი უნდა იგრძნო. ამ სურვილს უკვე ვგრძნობთ და ნახავთ, რომ ყველაფერი სულ სხვანაირად იქნება!
საერთოდ, ხალხი ძალიან ბრძენია და საოცარი მოთმინების უნარიც აქვს _ მოდი, ცოტას კიდევ ვაცლიო და სიტუაცია ბოლომდე მიჰყავს, ანუ პაშინიანის თემაა _ სომხეთის ყოფილ პრემიერს თავი ქუდში ჰქონდა, მაგრამ მეორე დღეს რევოლუცია მიიღო!
_ პაშინიანი გადარეულია, ქალბატონო თაკო. ჩვენს ოპოზიციაში კი, ჩემი სუბიექტური დაკვირვებით, ასეთი შერეკილი ლიდერი არავინაა.
_ ვნახოთ, რა იცით, რა ხდება. მე სხვა ინფორმაციები მაქვს.
_ მაინც, რა ინფორმაციები?
_ ის დაკმაყოფილდება, რაც ხალხის მოთხოვნაა! ხალხს ყელში უკვე ძალიან ამოუვიდა და განაწყენებულია…
_ ჩვენში დარჩეს და ასეთი მოსაზრებაც არსებობს, „ოცნება“ და გაერთიანებული ოპოზიცია ერთმანეთს კვებავსო.
_ იცით, ეს ვისი მოგონილია?
_ ვისი?
_ ვიცი, ვიღაცებს ეწყინებათ, მაგრამ გაიძახიან, აი, მესამე ძალა უნდა გამოჩნდესო. გამოჩნდნენ, ვინმემ დაუშალა? გაერთიანებულ ოპოზიციას რატომ გვიბრაზდებიან? აი, მაგალითად, მთაწმინდის არჩევნები აბსოლუტური ლუსტრირება იყო _ ელისაშვილის წარმომადგენელი და გეგელიაც სრულიად დამოუკიდებელი კანდიდატები იყვნენ, მაგრამ ხალხმა რომელიმეს რატომ არ მისცა ხმა?
_ სხვათა შორის, მთაწმინდაზე წარმატებას ვერც „ევროპული საქართველოს“ კანდიდატმა მიაღწია.
_ კი ბატონო, მეც ამას ვამბობ, რომ ეს ლუსტრაციაა.
_ ანუ მთაწმინდის შუალედური არჩევნები „ევროპული საქართველოს“ ლუსტრაცია იყო?
_ არა, აბსოლუტურად ყველასი. ხომ იცით, უკან არაფერზე ვიხევ, თუმცა შალვა შავგულიძე კიდევ სხვა ფენომენია _ „გირგვლიანის საქმის“ დროს ჩემ გვერდით მახსოვს.
სხვათა შორის, მთაწმინდაზე გაერთიანებულმა ოპოზიციამ კანდიდატიც არ დაასახელა. მეტსაც გეტყვით: თავის დროზე, შემომთავაზეს, რომ მთაწმინდის მაჟორიტარობაზე კენჭი მეყარა, მაგრამ უარი ვთქვი.
_ რატომ?
_ ამ კითხვას თქვენ არ უნდა მისვამდეთ, რადგან კარგად მიცნობთ _ დეპუტატობა რომ მდომოდა, 30 წლის განმავლობაში სადმე ვერ „გავეკვეტებოდი“?
_ ერთი სიტყვით, ქალბატონო თაკო, როგორც ვხვდები, მთავარი, რის გამოც „ოცნების“ ოპოზიციაში ხართ, მისი პრორუსულ რელსებზე დგომაა. ვთქვათ, ისე მოხდა, რომ მმართველმა გუნდმა მკვეთრი ანტიპუტინური განცხადებები გააკეთა…
_ მთავარი განცხადება კი არა, ქმედებაა.
_ კი ბატონო, ვთქვათ, „ოცნებამ“ რუსეთის წინააღმდეგ მკვეთრი ნაბიჯები გადადგა. ასეთ დროს თქვენი პოზიცია როგორი იქნება?
_ თუ „ოცნებამ“ ბიუჯეტიდან ფულის მოპარვა შეწყვიტა, აფხაზეთი საქართველოს დაუბრუნა და ქვეყანა დასავლეთის სრულფასოვანი წევრი გახადა, გაუმარჯოს, მაგრამ ამისი ვინმეს სჯერა? შვიდი წელი ხელისუფლებაშია და აქამდე ყველაფერი ეს რატომ არ გააკეთა? თუ დასავლეთის მიმართულებით რამე ინსტიტუცია იყო, თავზე ჩამოგვანგრია და ვერ გავიგე, ახლა რა უნდა შეცვალოს?
_ მას შემდეგ, რაც ოპოზიციაში ხართ, რომელიმე საჯარო ღონისძიებაზე ივანიშვილს შეხვედრიხართ?
_ არა.
_ რომ შეხვდეთ, რამეს ჰკითხავთ?
_ აღარ! ივანიშვილს, ჭკუა რომ ჰქონოდა, 2012 წლის ივლისში, საგაზეთო პუბლიკაციით ვკითხე, ანუ „რეზონანსში“ წერილი დავბეჭდე: „მე, ვასილ მაღლაფერიძე, გრომიკო და სამების ამშენებელი“. „მე-9 არხზე“ გადაცემას ვუყურე, რომელიც მაღლაფერიძეს მიჰყავდა, რაღაცები არ მომეწონა და ეს წერილიც ამიტომ დავწერე, ანუ ივანიშვილს, პრაქტიკულად, ვუთხარი, გრომიკოს გზას ხომ არ ირჩევთ-მეთქი? ამის შემდეგ ივანიშვილმა ალასანიას მიმართ დიდი სიმპათია გამოხატა და რაღაცნაირად დავწყნარდი, ვიფიქრე, რადგან ირაკლი ალასანიას მიმართ სიმპათია აქვს, დასავლეთია და, ალბათ, ეჭვი ტყუილად მღრღნის-მეთქი, მაგრამ რამდენიმე თვის შემდეგ ხელისუფლებაში მოვიდა თუ არა, ალასანიაზე დარტყმა დაიწყო და ყველას, ვინც დასავლელი იყო, იცილებდა. შესაბამისად, მივხვდი, რომ ჩემი ის წერილი ეჭვიანი ადამიანის დაწერილი არ იყო და ოპოზიციაშიც წავედი.
_ როგორ ფიქრობთ, ივანიშვილი ელოდა, რომ მისი ოპოზიცია გახდებოდით?
_ ალბათ, ეგონა, რომ იმ ლაგამამოდებულთაგან ერთ-ერთი ვიქნებოდი, რომელიც გარშემო ბევრი ჰყავს!
_ ქალბატონო თაკო, მას შემდეგ, რაც პარტია შექმენით, თქვენსა და თქვენს ოჯახზე ზეწოლის მცდელობა ხომ არ ყოფილა?
_ კი, როგორ არ ყოფილა, მაგრამ ჩემს ოჯახს ისეთი 70-იანი წლები აქვს გამოვლილი, რომ ჩვენი შეშინება აბსოლუტურად წარმოუდგენელია! სხვათა შორის, ამას წინათ, „ფარულ კონვერტში“ გია ბუღაძემ თქვა, ჯანსუღ ჩარკვიანს, მარიკა და გიგა ლორთქიფანიძეებს მადლობას ვუხდი და „თვითმფრინავის ბიჭების“ დახვრეტის წინააღმდეგ ხელმოწერები უკან არ წაიღესო. ეს გმირობის ტოლფასი იყოო. ამის გახსენებისთვის გია ბუღაძეს მადლობას ვუხდი.
ფოფხაძე-ყანდიაშვილების „ტროლთა“ ქარხანა ჩემი ბავშვობისდროინდელია და ივანიშვილს სწორედ იმას არ ვპატიობ, რომ ეს ქარხანა უკან მოაბრუნა! ესენი რამის გამკეთებლები არიან? ეს რუსეთის დასმული ხელისუფლებაა!
ხომ გახსოვთ ჯანსუღის სიტყვები: ტყვია მიზანში მოსახვედრიაო? იქ კიდევ სხვა საოცარი სტრიქონებიცაა: „როგორ დაცხრება, როგორ დაცხრება დაუცხრომელი ხალხის ბუნება, თავისუფლება და აღტაცება დაუცხრომლობით აღესრულება!“ ეს იმას ნიშნავს, რომ თავისუფლება შეუპოვრობით აღესრულება. დიახ, არასოდეს უნდა შევეგუოთ, რომ ოლიგარქმა სამი თითი გვიწკაპუნოს, ჯერ დაგვამშიოს და მერე ლაგამი ამოგვდოს. ჩემთვის ლაგამი არასოდეს არავის ამოუდევს და ეგ ვინ არის, რომ ეს გააკეთოს? ყველაფერს გავაკეთებ, რომ ამ ქვეყანაში კანონი და სამართალი აუცილებლად დამყარდეს!

გიორგი აბაშიძე