მთავარი ინტერვიუ გოგი წულაია: „ნაცსაც“ „ვევასები“, „ოცნებასაც“ და არაპარტიულსაც, მაგრამ ეს ხმებში არ...

გოგი წულაია: „ნაცსაც“ „ვევასები“, „ოცნებასაც“ და არაპარტიულსაც, მაგრამ ეს ხმებში არ აისახა!“

353
0
გაზიარება

19 მაისს საარჩევნო უბნების დახურვამდე რამდენიმე საათიღა იყო დარჩენილი, როცა „თავისუფალი საქართველოს“ ერთ-ერთმა ლიდერმა, გოგი წულაიამ, რომელიც ზესტაფონის მერის რიგგარეშე არჩევნებში მონაწილეობდა, ზესტაფონის მერად გამოაცხადა თავი.
„არ აქვს მნიშვნელობა, რა შედეგს გამოაცხადებს საოლქო კომისია. მე თავს ზესტაფონის მერად ვაცხადებ.
კოორდინატორები, რომლებიც მყავდა საარჩევნო უბნებზე, გამოიქცენ და დააშინენ. 10 კოორდინატორი უკვე ტელეფონსაც არ პასუხობს. ვაცხადებ, რომ ბოლომდე დავიცავ ჩემს ხმას და ჩემი ამომრჩევლის არჩევანს“, _ ეს განცხადება გოგი წუალიამ საოლქო საარჩევნო კომისიის შენობის წინ, კოორდინატორებთან ერთად გააკეთა.

მოგეხსენებათ, ზესტაფონში, როგორც ყველა იმ ოლქში, სადაც რიგგარეშე არჩევნები ტარდებოდა, „ოცნების“ კანდიდატებმა გაიმარჯვეს (ამ მხრივ გამონაკლისი მთაწმინდაა, სადაც მეორე ტური გაიმართება და მაჟორიტარობისთვის ერთმანეთს ლადო კახაძე და შალვა შავგულიძე შეებრძოლებიან). ჰოდა, წესით და კანონით, დღეს ზესტაფონში ორმერიანობა უნდა იყოს, თუმცა გოგი წულაია „ქრონიკა+“-ს ეუბნება, რომ ზემოხსენებული განცხადება სხვა კონტექსტში გააკეთა. ამასთან, „თავისუფალი საქართველოს“ ლიდერი იმასაც გვეუბნება, რომ ზესტაფონში მისი არათუ მომხრეები, არამედ დამკვირვებლებიც დააშინეს და სწორედ ამის გამო 15-მდე დამკვირვებელი, არჩევნების დამთავრების შემდეგ, წულაიას შტაბში ხელფასის ასაღებადაც აღარ მივიდა.

გული ხომ არ გაუტეხა არჩევნებმა და საერთოდ, როგორია გოგი წულაიას გეგმები? _ გთავაზობთ ინტერვიუს, რომელშიც რესპონდენტის კოლორიტული საუბრის სტილი, მეტ-ნაკლებად, შენარჩუნებულია:

_ ბატონო გოგი, 19 მაისს, შუადღისას, ანუ ჯერ კიდევ მაშინ, სანამ საარჩევნო უბნები დაიხურებოდა, განაცხადეთ, ცესკო-ს შედეგები არ მაინტერესებს და მე ზესტაფონის მერი ვარო.
_ მასე არ მითქვამს.
_ აბა, როგორ თქვით?
_ შეგიძლიათ, სრული ჩანაწერი მოისმინოთ, სადაც ვამბობ: ზესტაფონელებისგან იმდენი სითბო და სიყვარული დავინახე, რომ მათ წინაშე ვალდებული ვარ და ჩემს თავს ზესტაფონის მერად ვთვლი, რათა ყველანაირ საკითხში, რაც კი შემეძლება, გვერდით დავუდგე და მათი გულობისათვის ვიბრძოლებ-მეთქი.
_ თუ ზესტაფონელებისგან ამხელა სიყვარული და სითბო იგრძენით, არჩევნების შედეგები სხვანაირი რატომ აღმოჩნდა?
_ ეს ადამიანური თვისებაა.
_ ანუ?
_ იქ „ნაცსაც“ „ვევასები“, „ოცნებასაც“, „ედეპეშნიკსაც“, „არაედეპეშნიკსაც“ და არაპარტიულსაც. დიახ, სითბოს აბსოლუტურად ყველა გამოხატავდა, მაგრამ ეს ხმებში არ აისახა. მთავარი კი ისაა, რომ არც წესიერი შტაბი გვქონდა, არც _ ფული და არც ადამიანური რესურსი. ყველაფერი ეს არჩევნებზე გავლენას თავისთავად ახდენს და თავიდანვე აღვნიშნავდი, თუ შტაბი ნორმალურად იმუშავებს, მეტი სოლიდური ხმების დადება შემეძლება-მეთქი.
მოკლედ, ჩემ მიმართ სიყვარულს აბსოლუტურად ყველა გამოხატავდა. ჩემზე, როგორც პოლიტიკოსზე, ანტიპათია არც „ოცნების“ წევრებს აქვთ, თუ „ვერხუშკაში“ არ სხედან. უბრალოდ, ყველაფერი ეს იმდენ ხმაში არ აისახა, რამდენსაც ველოდი.
_ ე. ი., ხელისუფლებამ არჩევნები არ გაგიყალბათ?
_ როგორ არ გამიყალბა! დაშინებაც იყო, ფულით მოსყიდვა და კიდევ ძალიან ბევრი რამ. ჩემდა სამწუხაროდ, მხოლოდ ზუგდიდი შუქდებოდა და იგივე „რუსთავი 2-სა“ და, საერთოდ, ყველა ტელევიზიას ზესტაფონში მხოლოდ თითო-თითო ჟურნალისტი ჰყავდა გამოშობილი და იმ საზიზღრობების ასახვას ვერ ახერხებდნენ, რაც ხდებოდა. ზესტაფონის არჩევნები ყურადღების ცენტრში არ იყო მოქცეული, თორემ იგივე პოლიცია და ჩამოსულები სოფლებს არეკეტებდნენ. „იმედის“ ტელევიზიაში, დებატების დროს, ამ ხალხის სახელები და გვარებიც დავასახელე, ვინც ჩამოსულები იყვნენ.
_ არქივში ქექვა რომ არ დავიწყო, აგერ ვსაუბრობთ და იმ ჩამოსულთა გვარები, ვინც ზესტაფონს საარჩევნოდ „არეკეტებდნენ“, მეც მითხარით.
_ ჩამოსული იყო სამეგრელო-ზემო სვანეთის სამხარეო უფროსის მოადგილე ჯუღელი, ასევე იყო კუკავა, ზვიადი ჰქვია თუ მამუკა, აღარ მახსოვს.
_ ზესტაფონში ეს ზვიად თუ მამუკა კუკავაც სამეგრელოდან ჩამოვიდა?
_ ეს სასაზღვრო ჯარების უფროსის მოადგილეა. ასევე იყო ჩამოსული დიასამიძე, რომელიც სამხარეოს უფროსის ძმაა. სახელმწიფო დაცვის პოლიციიდანაც იყო ჩამოსული. საერთოდ, ძალიან ბევრნი იყვნენ _ ფურცელზე მეწერა და სახელები და გვარები, აღარ მახსოვს. მგონი, ისიც საკმარისია, ვისი ვინაობაც გითხარით.
_ ეს ჩამოსული ადამიანები თქვენ წინააღმდეგ მუშაობდნენ თუ ზესტაფონის მერობის გაერთიანებული ოპოზიციის კანდიდატის?
_ თუ დამიჯერებთ, ესენი უფრო მეტად ჩემ წინააღმდეგ მუშაობდნენ.
_ დაგიჯერებთ, მაგრამ „ოცნებისთვის“ ასეთი საშიში ხართ?
_ „ნაციონალურ მოძრაობას“ თავისი ხმები აქვს და ამ ხმებზე ვერც ზევით ადის და ვერც ქვევით ჩამოდის. ყოველ შემთხვევაში, ზესტაფონში ასეა. თანხა რომ მქონოდა, სწორად შერჩეული აგიტატორები და დამკვირვებლები მეყოლებოდნენ, მაშინ ხმების რეზერვიც მექნებოდა.
სხვათა შორის, ზესტაფონში „ნაციონალებიც“ მე მებრძოდნენ.
_ ამას რის საფუძველზე ამბობთ?
_ ჩემს ბუკლეტებს მე თვითონ ვარიგებდი და აი, მაგალითად, საკოლმეურნეო ბაზარში შევედი, ნახევარ საათში „ნაციონალური მოძრაობაც“ შემოვიდა და ბუკლეტების დარიგება დაიწყო. გავიდა რამდენიმე დღე, ზესტაფონში ფეხბურთის მატჩი იმართებოდა, ზესტაფონის „ზესტაფონი“ ზესტაფონის „მარგვეთს“ ხვდებოდა. იქაც მივედი, მაგრამ მივედი თუ არა, 15 წუთში „ნაციონალების კანდიდატიც“ მოვიდა. არადა, ვიცოდი, რომ იქ მოსვლას არ აპირებდა, პირიქით, სხვა შეხვედრაზე მიდიოდა.
_ „ნაციონალები“ რატომ გებრძოდნენ?
_ კაცო, მე ვიყავი მზარდი _ ხმებს ყველას მე ვართმევდი. მებრძოდა და, რა ვიცი, რატომ მებრძოდა, ამის შესახებ იმგენს ჰკითხეთ. მებრძოდა თუ არ მებრძოდა, მე ფაქტს გეუბნებით და შეგიძლიათ, „ნაციონალებს“ ჰკითხოთ, გოგი რომ იყო ბაზარში ბუკლეტების დასარიგებლად, ნახევარ საათში თქვენი კანდიდატიც მივიდა თუ არა-თქო?
_ ერთი სიტყვით, ბატონო გოგი, ოპოზიციას თავიდანვე თქვენთვის რომ დაეჭირა მხარი და იგივე გაერთიანებულ ოპოზიციას კონკურენტი არ ჩაესვა, დღეს ზესტაფონის მერი იქნებოდით?
_ ახლა რამის თქმა ძნელია, მაგრამ მიმაჩნია, რომ ერთ-ერთი სერიოზული კანდიდატი ვიქნებოდი.
_ ოპოზიციას თავიდანვე რატომ არ შესთავაზეთ, რომ თქვენთვის დაეჭირა მხარი და სხვა კანდიდატი არ დაესახელებინა?
_ მოლაპარაკება არავისთან მქონია. „ნაციონალური მოძრაობა“ ფიქრობს, რომ თვითონ და იმ სატელიტური პარტიებით, რომელიც დაიმატა, შეუძლია ბიძინა ივანიშვილი გადმოაგდოს, მაგრამ ღმერთმა იცის, უკვე მერამდენე მარცხი განიცადა და საზოგადოებაშიც მერამდენე გულის ტკივილი და გულაცრუება გააჩინა. ამის მიუხედავად, „ნაციონალური მოძრაობა“ იმას კი არ ამბობს, ერთად ვიყოთ და ერთად ვიბრძოლოთ, ჩემთან მოდითო. ეს მოლაპარაკების ფორმა არ არის.
_ სხვათა შორის, თქვენი პარტიის ლიდერი კახა კუკავა მიიჩნევს, რომ გაერთიანებულმა ოპოზიციამ, კერძოდ, „ნაციონალურმა მოძრაობამ“, საპრეზიდენტო არჩევნების მეორე ტური გაყიდა. მერების რიგგარეშე არჩევნებზეც ეს ხომ არ მოხდა, ანუ გოგი წულაიაც ფიქრობს, რომ „ნაციონალური მოძრაობა“, შესაძლოა, „ოცნებასთან“ თანამშრომლობდეს?
_ სხვაგან რა ხდება, არ ვიცი, მაგრამ პირადად მე არ მახსოვს და ჟურნალისტი ხართ, ალბათ, თქვენც არ შეგიმჩნევიათ, „ნაციონალურ მოძრაობას“ ზესტაფონის არჩევნებზე რამე საპროტესტო რომ ეთქვას? ახლა, არ მითხრათ, ზესტაფონი არჩევნების ოაზისი იყოო. მე სახელებსა და გვარებს ვამბობ, იმასაც ვამბობ, ხალხს პურის ფქვილის ტომრები როგორ დაურიგეს, მაგრამ რაცხა არ მგონია, რომ „ნაციონალურ მოძრაობას“ ამაზე პროტესტი გამოეთქვა.
_ ე. ი., იზიარებთ მოსაზრებას, რომ „ნაცები“ და „ქოცები“ შესაძლოა, თანამშრომლობდნენ?
_ რა თქმა უნდა, ვიზიარებ.
_ ამ თანამშრომლობის მიზანი, თქვენი აზრით, რა უნდა იყოს?
_ მათ ერთი რამ უნდათ _ სხვა ძალა არ გამოჩნდეს და ორივე ერთად თამაშობს, ანუ ერთმანეთს ავსებს. არ ვამბობ, რომ ბიძინა და მიშა სადმე კაბინეტში ზიენ, ჩურჩულობენ და გეგმებს აწყობენ, მაგრამ მათ ინტიუტიურად აქვთ განცდა, რომ ერთმანეთის გარეშე არაფერს წარმოადგენენ. მათი ამოცანები ერთმანეთს ემთხვევა და, „ვსიო“, ერთად თამაშობენ!
მე ფაქტებს გეუბნებით და შეგიძლიათ, დაურეკოთ და ჰკითხოთ ბაკურ ხიჯაკაძეს, _ გოგი რომ იყო ბაზარში, იქ ნახევარ საათში მართლა მიხვედით თუ არაო?
_ სიმართლე რომ ვთქვთ, ბატონ ხიჯაკაძესაც ჰქონდა უფლება, თავისი ბუკლეტები ზესტაფონის ბაზარში დაერიგებინა.
_ რა თქმა უნდა, მაგრამ რა „პონტია“, მე რომ შევედი და უკან მომყვა? მეორე დღეს შესულიყო ან წინა დღეს მისულიყო. უფლება, ცხადია, ჰქონდა, მაგრამ იმას ვამბობ, რომ ჩემს ქმედებაზე რაღაც ქმედების მოყოლება საეჭვოა და მეტი არაფერი!
_ ბატონი გოგი, წეღან აღნიშნეთ, კოორდინატორები არასწორად გვყავდა შერჩეულიო. ეს ხომ თქვენი და თქვენი პარტიის სისუსტეზე მეტყველებს?
_ რა თქმა უნდა, ჩემი სისუსტეცაა, მაგრამ იცით, რა არის? _ სხვა თემაა, „ნაციონალური მოძრაობა“ მომწონს თუ არა. ფაქტია: მას ნაღდად ჰყავს გამოცდილი და ათას არჩევნებში გამოჯეკილი კოორდინატორები, დამკვირვებლები, კომისიის წევრები, რომლებმაც ყველაფერი ზეპირად იციან _ სახლში რვეულები აქვთ შენახული, სადაც წერია, რომელი გვარი აძლევს ხმას, რომელი _ არა, რომელი ოჯახი რას ფიქრობს. ჩვენ კი უფულო პარტია ვართ, ხელისუფლებაში არასოდეს ვყოფილვართ და ყოველ წელიწადს ახალ-ახალი ადამიანები აგვყავს.
მოკლედ, იმის თქმა მინდა, რომ ისეთი გამოცდილი კადრი, როგორიც „ნაციონალებს“ ჰყავთ, არც ჩვენ გყვავს და არც _ სხვა რომელიმე ოპოზიციურ პარტიას. წელს, შეიძლება, დობორჯგინიძე ავიყვანოთ, მაგრამ მეორე წელს ის აღარ მოვიდეს და სიკინჭილაშვილი ავიყვანოთ _ ეს ყველა ოპოზიციური პარტიის პრობლემაა. არსებობს ადამიანების კასტა, რომელიც მოდის და საკუთარ თავს გთავაზობს, _ აუ, ასეთი ვარ, ისეთი ვარ, ხუთასი კაცი მომყავს და ამიყვანეო. ამ დროს არაფერი _ იმაზე არიან გამწარებულები, ფული როგორ გააკეთონ! ამას უმრავლესობაზე არ ვამბობ, მაგრამ ასეთი ადამიანების ძალიან დიდი კასტაა!
სხვათა შორის, ჩვენ ზესტაფონში ორგანიზაციაც არ გვქონდა. ჩავედით და შეუძლებელია, სამ კვირაში ადამიანები აარჩიო, დატესტო და ერთგულები აღმოაჩინო. ეს რაღაც ზღაპრის თემაა და მეტი არაფერი!
_ თუ ზესტაფონში „თავისუფალი საქართველოს“ რაიონული ორგანიზაციაც არ არსებობდა, აბა, საარჩევნო ბრძოლაში თავიდანვე რატომ ჩაებით?
_ აბა, ხელს ხომ არ ჩავიქნევ? ვთქვი, წავალ იქ, სადაც ქარიშხალია _ თუ კიდევ სადმე იქნება არჩევნები, მივალ და იქაც ვიბრძოლებ!
სამაგიეროდ, ამ ბრძოლით ის მივიღეთ, რომ ზესტაფონის არჩევნებში მესამე ადგილი ავიღეთ. უფულოდ და უყველაფროდ სამ კვირაში 6% ცუდი შედეგი არ არის, ანუ დავტესტეთ და მომავალ არჩევნებზე ზესტაფონში ცარიელ ნიადაგზე აღარ ვიქნებით! ამიტომ, არც ერთ არჩევნებს არ „გავმაზავ“!
_ კი ბატონო, მაგრამ „ქოცებისა“ და „ნაცების“ ის მოჯადოებული წრე ამ 6 პროცენტით როგორ უნდა გაარღვიოთ?
_ ამის ახსნა ცოტა ძნელია და დიდი სასაუბროა.
_ შეიძლება, მაგრამ ხომ იცით, გრძელი სიტყვა მოკლედ რომ ითქმის. ჰოდა, თქვენც მოკლედ მითხარით.
_ მაინც მგონია, რომ ადამიანები მივლენ ამ დონემდე და თვითონ „ნაცმოძრაობის“ შიგნითაც მზადდება.
_ რა მზადდება?
_ ის მზადდება, რომ მათი „დამატორმუზებელი“ მიშა სააკაშვილია, ანუ მიშა სააკაშვილი შეიქმნა „ტორმუზი“ თავისი გამოხტომებით და კივილით, _ მოვდივარ, მოვდივარო.
_ იმას ამბობთ, რომ სააკაშვილი „ტორმუზი“ მთელი ოპოზიციისთვის არის?
_ რა თქმა უნდა. მისი ასეთი გამოხტომებით ინარჩუნებს ხელისუფლებას ბიძინა ივანიშვილი. ამას შიგნითაც ხვდებიან _ ახლა, ხომ არ შეიძლება, რომ ყველა ომი წააგო? ყველა ომის წინ კი გამარჯვების სასწაულ მოლოდინს აჩენდე. ახლაც ასე იყო _ ზუგდიდში „ოცნების“ დამარცხების უდიდესი მოლოდინი გაჩნდა, მაგრამ იცით, უკვე რამხელა გულგატეხილობა მოდის? ამ გულგატეხილობის დაძლევა ძალიან ძნელია. ამხელა მოლოდინს არ უნდა აჩენდე, არიქა, ხმლით, თოფით, დამბაჩით და უბედურობით შემოვვარდებიო, მაგრამ მერე ბრახ და არაფერი _ გამოდიხარ და რაღაცებს ჩერჩეტობ. ასეთი ქმედებები გულგატეხილობას იწვევს და ყველაფრის „ტორმუზია“.
_ საზოგადოებაში გაჩენილი ეს გულგატეხილობა, თქვენი აზრით, როგორ უნდა აღმოიფხვრას, ბატონო გოგი?
_ ამას თავდაუზოგავი ბრძოლა, შრომა, ხალხში სიარული და ახსნა უნდა. ამაში „ქართული ოცნების“ ქმდებებიც შეგიწყობს ხელს _ აი, ლარი გააქციეს, დავითგარეჯას კარგავენ და მინისტრი ამბობს, არ ვიცოდი, თუ იქ რამე მშენებლობა მიდიოდაო. ტელევიზიამ საგარეო საქმეთა მინისტრს ინფორმაციის მოპოვება როგორ უნდა დაგასწროს?
ამნაირ სისულელეს მაგენი მილიონს გააკეთებენ დ აი, ზუსტად ესაა ის, რასაც ადამიანებს ოპოზიციისკენ შემოატრიალებს!
_ რა ამის პასუხია და მთაწმინდის არჩევნების მეორე ტურში „თავისუფალი საქართველო“ შავგულიძეს მხარს უჭერს თუ არა?
_ მოდით, სიმართლეს გეტყვით _ ამ თემაზე კახა კუკავასთან ჯერ არ მისაუბრია, მაგრამ პირადად მე, გოგი წულაია, შინაგანად მხარს დავუჭერ, ანუ შავგულძეს კი არა, „ოცნების“ დამარცხებას დავუჭერ მხარს, რაც მის რიგებში რღვევას დააჩქარებს!
_ ერთი სიტყვით, „ნაციონალებისგან“ სააკაშვილის გამიჯვნა და „ოცნებაში“ რღვევის დაწყება ერთდროულად უნდა მოხდეს. თქვენი პოზიცია სწორად გავიგე, არა?
_ კი ბატონო.
_ ორ ფრონტზე ბრძოლა რთული არ იქნება?
_ ჩვენი ბედი ეს არის და ახლა, რა ვქნათ?
_ ბატონო გოგი, ისევ ზესტაფონის არჩევნებზე გკითხავთ: ხელისუფლება ამომრჩეველზე ისე ძალადობდა, როგორც, მაგალითად, ზუგდიდში?
_ არა, არა. ვთქვათ, ზესტაფონში პოლიციის სიმრავლე არ იგრძნობოდა და ქალაქი ჩვეულებრივი რიტმით ცხოვრობდა, „დაჟე“ მკვდარი და დაბომბილი მეგონა _ ადამიანები კანტიკუნტად დადიოდნენ, მაგრამ როგორც კი საარჩევნო უბანთან მიხვიდოდით, იქ იგრძნობდით, რომ ტერორი იყო.
_ და ეს ტერორი რაში გამოიხატებოდა?
_ უამრავი ადამიანი, კოორდინატორი და „მარშრუტკა“ იდგა. მაგალითად, ერთ-ერთ უბანზე იმდენი მანქანა იდგა, ვთქვი, _ სტალინს ამდენი ტანკი ბერლინის აღების დროს არ გამოუყენებია-მეთქი!
_ ზუგდიდი გასაგებია, მაგრამ ზესტაფონში გამარჯვება „ოცნებისთვის“ ასეთი მნიშვნელოვანი რატომ იყო?
_ ამათ ხომ „ნაცებს“ გაასწრეს! ერთ-ერთ წელს, ზუსტად აღარ მახსოვს, დიდუბეში ასეთი შუალედური არჩევნები იყო და „ნაციონალებმა“ „ედეპეშნიკ“ გურამ ჩახვაძეს გაამარჯვებინეს, ანუ „ნაცები“ ფიქრობდნენ, რომ პარლამენტში ერთი „ნაციონალით“ მეტი იქნებოდა თუ ნაკლები, ამას მნიშვნელობა არ ჰქონდა, თან რაღაც დემოკრატიულობის „იმიჯობისთვის“ ასე აჯობებდა და არც იგი იყო მაინცდამაინც ავტომატიანი „ანტინაცი“. ჰოდა, ადგნენ და ჩახვაძეს გაამარჯვებინეს!
მათ, „ნაციონალებს“, ტვინი და ალღო ეყოთ, რომ ერთი მანდატისთვის ომის გამართვა არ ღირდა _ ახლა, ჩახვაძე რაც უნდა „ანტინაცი“ ყოფილიყო, პარლამენტში რას იზამდა?
მოკლედ, „ქოცებს“ რაღაც სულელური იდეაფიქსი აქვთ, არ უნდა წავაგოთ და ყველაფერი ჩვენს ხელში უნდა იყოსო.
_ ზესტაფონის მერი თქვენ რომ გამხდარიყავით, ეს ხომ ერთგვარად ორხელისუფლებიანობა იქნებოდა? ყოველ შემთხვევაში, „ოცნებას“, მეტ-ნაკლებად, ხელ-ფეხი შეეკრებოდა და ეს რაში აწყობდა?
_ ორხელისუფლებიანობა რატომ იქნებოდა? თქვენ მაინც ხართ დემოკრატი და განვითარებული ადამიანი და, შობელძაღლი, ჩვენც გადაგვედგა დემოკრატიისკენ რაცხა ერთი ნაბიჯი, რას ვუზამდი ზესტაფონს _ ავტონომიას გამოვაცხადებდი, რუსეთს მივუერთებდი თუ რა სიკვტილს ვიზამდი?
რად გიღირს, ყველაფერს რომ ჩაფრენილხარ, მაგრამ ამგენს ტვინი არ აქვთ და არ იციან, რომ ეს მათთვის უკანასკნელი არჩევნები იყო. ასეთი მიდგომები მათ დაღუპავს და ისე დაღუპავს, რომ „ქართული ოცნება“ პოლიტიკიდან საერთოდ გაქრება. როგორც „მოქალაქეთა კავშირი“ გაშპა, აი, ასე გაშპება „ქართული ოცნებაც“!
_ ისე, ბატონო გოგი, იმის გამო, ზესტაფონის მერი რომ ვერ გახდით, გული ხომ არ გაგიტყდათ?
_ არა, შვილებს ვფიცავარ. ბრძოლას გავაგრძელებ და, როგორც გითხარით, ხვალ რიგგარეშე არჩევნები კიდევ სადმე რომ გამოცხადდეს, აუცილებლად მივიღებ მონაწილეობას, აუცილებლად ხმებს დავიმატებთ და იქ აუცილებლად შევქმნით ერთ-ერთ დიდ და კარგ ორგანიზაციას!
_ საქმე საქმეზე რომ მიდგეს და დღის წესრიგში დიდი ოპოზიციური გაერთიანების შექმნა დადგეს, რომელშიც „ნაცმოძრაობაც“ იქნება, „თავისუფალი საქართველო“ რა პოზიციაზე დადგება, ამ გაერთიანებაში შევა?
_ თუ ეს რაღაც ისეთი იქნება, ანუ ყველას მინუს ერთი, ე. ი. „ოცნების“ გარდა ყველა პარტია ერთად, რა თქმა უნდა, შევალთ, რაზეა საუბარი?!
ამგენმა უკვე ისე მოგვაბეზრეს თავი, აი, ბოკერია საერთოდ რომ არ მიყვარს და არც _ „ევროპული საქართველო“, შავგულძეს დავუჭერ მხარს, მაგრამ მიმაჩნია, რომ ამით შავგულძეს კი არა, „ოცნების“ დამარცხებას დავუჭერ მხარს!
_ სხვათა შორის, ხმა დადის, „ოცნება“ ხელისუფლებას ბოკერიას აბარებსო.
_ არ მგონია, საქმე ასე იყოს და ქართველმა ერმა ეს დაუშვას! ამას არჩევნები იტყვის, თან არ მგონია, ერთი შავგულიძის გამარჯვება, არიქა, „ევროპული საქართველოს“ ტრამპლინის საფუძველი იქნება, მაგრამ ეს „ქართული ოცნების“ რღვევისთვის ერთი ნაბიჯი კი ნამდვილად იქნება!
წეღანაც გითხარით და კიდევ გეუბნებით, რომ ეს ჩემი პირადი მოსაზრებაა და ამ თემაზე კახა კუკავასთან ჯერ არ მილაპარაკია _ არჩევნების შემდეგ თბილისისკენ არ გამომიხედავს!
_ ბატონო გოგი, საუბრის ბოლოს რეზიუმესავით გავაკეთოთ და მითხარით: თქვენ, როგორც ზესტაფონის მერობის კანდიდატს, რამდენი პროცენტი გაგიყალბეს?
_ არჩევნების დღეს ერთი კაცი _ დამკვირვებელი _ დამიჭირენ და უბნიდან გამომიგდენ. შემდეგ სამი თუ ოთხი საათი სასამართლო პროცესი არ გამართენ და ყველაფერს მოწყვეტილები ვიყავით, ეს ადამიანი რომ დაგვეცვა; ამას გარდა, შტაბი არ მქონდა ნორმალური. მოკლედ, ყველაფრიდან გამომდინარე, მიმაჩნია, რომ არჩევნებში ორნიშნა ციფრს დავდებდი, ანუ 12-დან 15 პროცენტამდე.
_ ე. ი., ყველაფერი კანონის მიხედვით რომ ყოფილიყო, ზესტაფონში მერის არჩევნების მეორე ტური გაიმართებოდა და ერთმანეთს თქვენ და „ოცნების“ კანდიდატი შეერკინებოდით?
_ დიახ, ალბათ, საუბარი მეორე ტურზე იქნებოდა.
_ და თუ მეორე ტურში მთელი ოპოზიცია მხარს დაგიჭერდათ, „ოცნების“ დამარცხებას შეძლებდით?
_ როგორ არა, შევძლებდი! ამას ტრაბახით არ ვამბობ _ მე უფრო სხვანაირ ტიპად მოვიაზრები და ჩემდამი მხარდაჭერა დისკომფორტს არც ერთ პოლიტიკურ პარტის არ შეუქმნიდა! აი, იგივე შავგულიძესთან მიმართებით მხარდაჭერა ვიღაცებს დისკომფორტს უქმნის. შალვა შავგულძეს ბოდიშს ვუხდი, თუ ამ სიტყვებს ცუდად მიიღებს, მაგრამ ჩემი პიროვნებისთვის მხარდაჭერა დისკომფორტის შემცველი არ იქნებოდა! ყოველ შემთხვევაში, მე ასე მგონია.
_ ერთი სიტყვით, ოპოზიციამაც გაგწირათ, ბატონო გოგი, არა?
_ რა თქმა უნდა. ზესტაფონში ყველა ძალა მე მებრძოდა! მეორე დღესვე, სადაც კი კარგ შეხვედრას გავმართავდი, იმ სოფლის გადამუშავებას იწყებდნენ! მეტი რაღა გითხრათ? მე ფაქტებს ვამბობ და ახლა, თუ უნდათ, ასე ახსნან ან ისე.
სხვათა შორის, 15-მდე დამკვირვებელი, რომელსაც ხელფასი ეკუთვნოდა, არჩევნების მერე საერთოდ აღარ გამოჩენილა. ახლა მეუბნებიან, ფაქტი დადეო. ვინ ცოლის დაჭერით შეაშინეს და ვინ _ შვილის, ეს როგორ უნდა დავამტკიცო, მაგრამ ამ გაჭირვების დროს კაცი ხელფასის ასაღებად რომ არ მოვა, ის დაშინებულია, აბა, რა სიკვტილია?!
_ თითო დამკვირვებელს ხელფასი რამდენი უნდა აეღო?
_ დამკვირვებლის სახელმწიფო ხელფასია 80 ლარი, მაგრამ საერთოდ გათიშეს ტელეფონები.

გიორგი აბაშიძე

 

დატოვეთ კომენტარი