19 მაისის შუალედური არჩევნების მთავარ ინტრიგად გაერთიანებული ოპოზიციისა და „ნაციონალური მოძრაობის“ პოლიტსაბჭოს ხელმძღვანელის, ნიკა მელიას განცხადება იქცა. მართალია, „ანტიოცნებელები“ ამბობენ, რომ გაუგებრობა ამოწურულია და ბრძოლას ყველანი ერთად ვაგრძელებთო, მაგრამ მაინც, საინტერესოა, რატომ გაემიჯნა საარჩევნოდ ნიკა მელია სანდრა რულოვსის განცხადებას, რომელმაც უბნების დახურვის შემდეგ, პრინციპში, რევოლუცია დააანონსა? ასევე საზოგადოებას აინტერესებს, თუ რა ეტაპზეა საარჩევნო სისტემის შესაცვლელად დაწყებული მილიონი ხელმოწერის შეგროვების კამპანია, რომელიც გაერთიანებულმა ოპოზიციამ რამდენიმე თვის წინ დიდი ზარზეიმით დაიწყო? _ ყველაფერ ამაზე „ქრონიკა+“ „ნაციონალური მოძრაობის“ პოლიტსაბჭოს წევრს, თბილისის საკრებულოს დეპუტატ ლევან ხაბეიშვილს ესაუბრა:

_ კონსტიტუციისა და კანონის ჩარჩოებში უნდა ვიყოთ რადიკალურები და, დიახ, ამას აკეთებს ნიკა მელია! მეტი უნდა ვიაროთ მოსახლეობასთან და, დიახ, ამას აკეთებს მელია _ რაიონ-რაიონ და სოფელ-სოფელ დადის! ერთობლიობაში, საზოგადოებამ, კი ბატონო, ისე აღიქვა, რომ მელიამ თითქოს რაღაც მოულოდნელი თქვა, მაგრამ თუ ფუნდამენტურად დავაკვირდებით, მის განცხადებაში ისეთი არაფერი ყოფილა. უბრალოდ, ეს ადამიანი ამბობს, რაღაც თარიღი არ უნდა დავკიდოთ, რომელმაც მერე, შეიძლება, რაღაც ზიანი მოიტანოსო, მაგრამ ეს თარიღი არავის დაუკიდია და არავის უთქვამს, პირობითად, 25 მაისი იქნება, 8 ივნისი თუ 9 აგვისტოო. ამიტომ, მგონია, რომ მელიას განცხადებაში უფრო ტექნიკური ხასიათის პრობლემა იყო _ არჩევნები მორჩა და უცებ განცხადება გაკეთდა, თუმცა მერე თავისი პოზიცია მელიამ აბსოლუტურად ადეკვატურად და კარგად ახსნა.
ჟურნალისტებისაც მესმის, მაგრამ დამერწმუნეთ, რომ ნიკა მელია „ნაციონალურ მოძრაობაში“ იქნება _ პოლიტსაბჭოს თავმჯდომარეა და, ბევრი განსხვავების მიუხედავად, ბრძოლას ჩვენს თანაგუნდელებთან ერთად გავაგრძელებთ! ისე, „ნაცმოძრაობის“ პოლიტსაბჭოში ასზე მეტი წევრია და განსხვავებული აზრი, რა თქმა უნდა, იქნება.
_ განსხვავებული აზრი პრობლემა არ არის, მაგრამ, ლევან, ახლა იმის გარკვევას ვცდილობ, „ნაციონალური მოძრაობა“, რეალურად, რას აპირებს, ანუ საარჩევნო უბნების დახურვის შემდეგ სანდრა რულოვსმა, უბრალოდ, ემოციურად განაცხადა, სოფელ-სოფელ დავიწყებთ სიარულსო თუ პარტია მძაფრი საპროტესტო ტალღის აგორებას მართლა გეგმავს?
_ მეც მგონია, რომ ასე უნდა გავაკეთოთ.
_ ანუ როგორ?
_ მელიასაც არ აქვს განსხვავებული პოზიცია და ისიც ამბობდა, სოფელ-სოფელ უნდა ვიაროთო.
_ სოფელ-სოფელ სიარული ერთია, მაგრამ რულოვსმა ისიც თქვა, ხელში იარაღს ავიღებო, ანუ ეს, შეიძლება, ფიგურალური ნათქვამი იყო, მაგრამ შევთანხმდეთ, რომ რევოლუციები არ იგეგმება და ხალხი ქუჩაში სპონტანურად გამოდის ხოლმე.
_ აგერ, 7-8 წელია, „ნაციონალურ მოძრაობას“ რევოლუციისა და არეულობის მოწყობას აბრალებენ, მაგრამ საზოგადოებამ უკვე კარგად იცის, რომ ივანიშვილის ხერხია, ხან საბურავების შეგროვება დაგვაბრალოს და ხანაც _ გადატრიალების მოწყობა და სიტუაციის ესკალაცია. მსგავსი არაფერი ხდება, პირიქით _ ამ წლების განმავლობაში ერთი შემთხვევა მაინც გამახსენეთ, როცა „ნაციონალური მოძრაობა“ ან დაპირისპირებაზე წავიდა, ან რაღაც რევოლუციური სცენარი ჰქონდა, თუმცა თუ ჩემი სუბიექტური აზრი გაინტერესებთ, გეტყვით: აბსოლუტურად ყველა ფორმა, რომელიც კონსტიტუციით დადგენილ ნორმებში ჯდება, უნდა გამოვიყენოთ, მთ შორის, ქუჩის თუ ლოკალური აქცია. დიახ, მე პროტესტის ყველა ფორმას ვემხრობი, მათ შორის, ყველაზე რადიკალურსაც, მთავარია, კანონით იყოს დაშვებული და ამაში არანორმალური არაფერია!
_ კი ბატონო, ყველაფრის გაკეთება შეიძლება, რაც კანონით არ იკრძალება, მაგრამ გაერთიანებული ოპოზიცია ამტკიცებს, ზუგდიდში არჩევნები გაყალბდაო. კენჭისყრა არადემოკრატიულად რომ ჩატარდა, ეს საზოგადოებამაც ნახა, მაგრამ ხმების დაცვას როგორ აპირებთ _ ოქმების ბათილად ცნობას სასამართლოს ძალით მოითხოვთ?
_ თქვენი გაზეთის მეშვეობით მინდა, საზოგადოებას ვუთხრა, რომ ზუგდიდის არჩევნებზე ერთი რამ მოვახერხეთ, კერძოდ, არჩევნების დღეს საარჩევნო ყუთებში ბიულეტენები ვერ ჩაყარეს, რაც, მაგალითად, 2018 წლის საპრეზიდენტო არჩევნებზე გააკეთეს და ამის ამსახველი ვიდეომასალაც გავასაჯაროვეთ. მაშინ კარუსელებსაც ატრიალებდნენ. ამ არჩევნებზე კი ის მოვახერხეთ, რომ ყველაფერ ამის გაკეთების საშუალება საარჩევნო უბნებზე არ მივეცით, თუმცა წინა დღეებში ბეჭდები და ბიულეტენები გაიტაცეს და ესეც ყველამ ვნახეთ. მთავარი პრობლემაც ეს იყო _ არჩევნები არჩევნებამდე გაგვიყალბეს. ოპოზიცია ყველა ხერხს მიმართავს, რომ ივანიშვილი არჩევნების გზით დაამარცხოს და ასევე საზოგადოებას არჩევნებიდან არჩევნებამდე გაშიშვლებული სისტემა ვანახოთ, სისტემა, რომელიც გვეუბნება, რომ, თურმე, ლიბერალური და ადამიანზე ორიენტრებულია. სინამდვილეში კი გაცხოველებული, გაკრმინალებული და პირდაპირ ქურდებზეა დამდგარი! რა, პირდაპირ ეთერში არ ნახეთ, „ქართული ოცნების“ დეპუტატი რომ ლაპარაკობს, თუ რამდენი სული ქურდი უნდა ჩართონ და ადამიანები როგორ უნდა გაიტაცონ? სხვათა შორის, „ოცნების“ ამ დეპუტატმა ჯერ თქვა, _ ამ ვიდეოში მე არ ვარო; მერე კი გამოვიდა და განაცხადა, _ ეგ ორი წლის წინ ვთქვიო. კაცო, რა მნიშვნელობა აქვს, ორი წლის წინ თქვა, ორი თვის თუ ორი დღის?
მოკლედ, ყველაფერ ამის საწინააღმდეგოდ საჭიროა პრევენცია, მეტი ბრძოლა და მეტი რადიკალიზმი.
_ რადიკალიზმში რას გულისხმობთ, ლევან?
_ ყველა ქალაქსა და სოფელში ოპოზიციამ მიტინგები უნდა გამართოს, მორჩა! ყველას უნდა გავაგებინოთ, რომ ასე გაგრძელება აღარ შეიძლება! ქვეყანა თავზე გვექცევა და თქვენ, ჟურნალისტს, ის გაინტერესებთ, „ნაციონალურ მოძრაობაში“ რა ხდება. მე კი ის უფრო მაინტერესებს, ჩვენს ქვეყანაში რა ხდება!
_ მე, როგორც ჟურნალისტს, ყველაფერი მაინტერესებს, მათ შორის, „ნაციონალების“ ამბებიც, რადგან სწორედ „ნაცმოძრაობას“ აქვს პრეტენზია, რომ მთავარი ოპოზიციური ძალაა და ოპოზიციას ე. წ. მეინსტრიმსაც ის აძლევს.
_ დიახ, მაგრამ პარტია „ნაციონალური მოძრაობა“ და გაერთიანებული ოპოზიცია კი არა, ქვეყანა დავკარგეთ, კაცო!
თამამად გეტყვით: ზუგდიდის, ასევე ზესტაფონის ძალიან ბევრი სოფელი მოვიარე. გურიის სოფლებშიც ვიყავი და, უკაცრავად, „ნაციონალური მოძრაობა“ არათუ მთავარი ოპოზიციური ძალა, არამედ ის პარტიაა, რომელმაც 2003-დან 2012-წლამდე ქვეყანა ჭაობიდან ამოიყვანა და მოშიშვლებული ტერიტორიიდან სახელმწიფო შექმნა! ამ სახელმწიფოს ისტორიაში „ნაცმოძრაობის“ გარდა არავის არასოდეს არაფერი შეუქმნია და ამის ერთ ფაქტსაც ვერ მეტყვით! „ნაციონალური მოძრაობა“, მათ შორის, თავის შეცდომებზე ნასწავლი, გაზრდილი, დაღვინებული და გამჭვირვალე პარტიაა!
_ ყველაფერი ეს გასაგებია, მაგრამ სხვა რამე გკითხეთ და პასუხი არ გამეცით, ამიტომ კითხვას გაგიმეორებთ: გაერთიანებული ოპოზიცია საერთაშორისო საზოგადოებას როგორ დაუმტკიცებს, რომ ზუგდიდში არჩევნები გაყალბდა და, საერთოდ, თქვენს ხმებს როგორ დაიცავთ?
_ ხომ ხედავთ, უცხოელები რას ამბობენ?
_ რას?
_ კორუფციაა და ბიძინა ივანიშვილმა ქვეყანა თავზე დაიმხოო. ამ მიმართულებით ჩვენც ვმუშაობთ და ამ ხალხს ფაქტებს ვაწვდით. უკაცრავად, 2018 წელს დასკვნა დაიდო და უცხოელები წერდნენ: არჩევნებზე მოსყიდვა, დაშინება და სახელმწიფო რესურსის გამოყენება იყოო.
_ დიახ, საპრეზიდენტო არჩევნები სადამკვირვებლო მისიებმა მძიმედ შეაფასეს, მაგრამ ამით არაფერი შეიცვალა. ყოველ შემთხვევაში, ამტკიცებთ, რომ „ოცნებამ“ ზუგდიდის არჩევნები ისევ გააყალბა.
_ იცით, რა ხდება? _ სისტემა თავიდან ბოლომდე გაშიშვლებულია. ყველაფერ ამაზე 2014 წელს რომ მესაუბრა, დამცინებდით და მეტყოდით, კარგი, რა, „ქართულ ოცნებას“ საერთაშორისო მხარდაჭერაც აქვს და არჩევნები ახლა კი არა, წინა ხელისუფლების დროს ყალბდებოდაო. დღეს კი სხვა რეალობაა და ყველანი შეთანხმებულები ვართ, რომ ამ ქვეყანაში არჩევნები აღარ ტარდება და ყველა მიმართულებით აყალბებენ! ამას საერთაშორისო დამკვირვებლებიც ხედავენ და ნიადაგი იმისთვისაა მომზადებული, რომ ეს ხელისუფლება წავიდეს!
ზოგადად, შუალედური არჩევნები ყველაზე უმნიშვნელოა ხოლმე. ჩვენთვის, ოპოზიციისთვის მნიშვნელოვანი იყო, რომ ეს არჩევნები საერთო ეროვნული არჩევნების ჭრილში გადაგვეტანა, მაგრამ ხელისუფლებამაც იგივე გააკეთა იმიტომ, რომ თავიდან ბოლომდე გაშიშვლებულია და ფიქრობდა, _ თუ ზუგდიდში არჩევნებს წავაგებ, ყველაფერი ჩამოგვეშლებაო. დიახ, სწორად ფიქრობდა და ასეთი მობილიზებაც ამიტომ გამოაცხადა _ სერგეენკოდან დაწყებული, ყველა მინისტრი ზუგდიდში იყო. არჩევნების დღეს დავით ნარმანიას მუმიები გააცოცხლეს და საარჩევნო უბნებზე მიიყვანეს! ივანიშვილი სოფელ-სოფელ, ტალახ-ტალახ დადიოდა და ხალხს მილიონებს ჰპირდებოდა, მაგრამ ამ ზეწოლის მიუხედავად, ოპოზიციამ 43% აიღო, ხელისუფლებამ 7 თუ 8%-ით მოიგო და ირაკლი ღარიბაშვილმა შამპანური გახსნა. სხვათა შორის, ღარიბაშვილი გვეუბნებოდა, „ნაციონალური მოძრაობა“ რადარებიდან გაქრაო.
_ სხვათა შორის, ზუგდიდის არჩევნების მერე ღარიბაშვილი „ნაციონალებს“ დაგემუქრათ, ცოტა ფრთხილად იყავით, თორემ შეიძლება, ციხეში აღმოჩნდეთო.
_ ყურებზე ხახვი არავის დააჭრას და ფრთხილად თვითონ იყოს იმიტომ, რომ დარწმუნებული ვარ, ეგ ხალხი _ ღარიბაშვილით დაწყებული, კობახიძით გაგრძელებული და ივანიშვილით დამთავრებული, ჩვენი დასაცავი იქნება!
_ ამას რატომ ამბობთ?
_ ხალხი კეტით გაეკიდება! მაგათ შამპანური რომ გახსნეს, „ნაციონალურ მოძრაობას“ მოვუგეთო, ერთი დოლარი 2.80 ლარი გახდა და რა, ზუგდიდში არჩევნების ასეთი დემონსტრაციული გაყალბება ქვეყანას ააშენებს? ის შამპანური რომ გახსნეს, რას ზეიმობდნენ _ ეკონომიკა გააჯანსაღეს თუ ქვეყანაში მშიერი ადამიანების რაოდენობა შემცირდა?
_ ცხადია, არაფერი გაუმჯობესებულა, მაგრამ ისიც ხომ ბრძოლის ერთგვარი ფორმა იქნებოდა, რომ შუალედურ არჩევნებში ხელისუფლება მარტო დაგეტოვებინათ და მონაწილეობა არ მიგეღოთ? ასე „ოცნების“ არადემოკრატიულობას ხაზს უფრო ხომ არ გაუსვამდით?
_ არავითარ შემთხვევაში! პოლიტსაბჭოში შესაძლოა, ვიღაცას ჰქონდა იდეა, რომ ამ არჩევნებში მონაწილეობა არ უნდა მიგვეღო და, დიახ, პირობითად გეუბნებით, რომ ესეც განიხილებოდა, მაგრამ პირადად მე ამის კატეგორიული წინააღმდეგი ვიყავი და იცით, რატომ? _ თუ ვერ გავიმარჯვეთ, ყველა არჩევნებზე, მინიმუმ, ის მაინც შევძელით, რომ ივანიშვილი უფრო მეტად გავაშიშვლეთ! ხელისუფლებამ რეალური სახე მაშინ აჩვენა, როცა რეალურ წინააღმდეგობას წააწყდა, თორემ თუ არჩევნებში არ შევალთ და ბრძოლაში არ ვიქნებით, მაშინ გვეტყვიან, ანგელოზები ვართო. ჩვენი აქტივისტები და ლიდერები ბოლომდე რომ ვიბრძვით, სწორედ ამიტომაა სისტემა გაშიშვლებული და ისიც ჩვენი ბრძოლის შედეგია, არასამთავრობო და საერთაშორსო ორგანიზაციები რომ ამბობენ, არჩევნები გაყალბდაო.
ყველაფერ აქედან გამომდინარე, 2020-ისთვის ხელისუფლება თავიდან ბოლომდე გაშიშვლებულია და გეუბნებით: უფრო მეტი მობილიზება და დიდი ბრძოლა იქნება! ამას გარდა, ცალსახად დარწმუნებული ვარ, რომ ეს ხელისუფლება არჩევნებით უნდა წავიდეს. ისე, როგორ ფიქრობთ, 2012-ში ხელისუფლება არჩევნებით შეიცვალა თუ რევოლუციით?
_ ამას რა კითხვა უნდა? _ არჩევნებით!
_ 2012 წელს რევოლუცია არჩევნების გზით მოხდა და 2020-შიც, დიახ, ასეთი რევოლუცია უნდა მოხდეს!
_ კულუარებიდან ჟონავს ინფორმაცია, რომ თითქოს ვადამდელი საპარლამენტო არჩევნები დაინიშნება და ამის თაობაზე ივანიშვილიც დაითანხმეს.
_ ამის გაკეთება სამართლებრივადაც გაუჭირდებათ.
_ შეიძლება, მაგრამ პოლიტიკური კრიზისი გამძაფრდება და ვადამდელის დანიშვნის საბაბი შესაძლოა, ეს გახდეს.
_ კი ბატონო, მაგრამ მალე ე. წ. ვადიან საარჩევნო წელიწადში გადავდივართ.
_ მესმის, მაგრამ თუ „ოცნებამ“ კანონს ანგარიში ამ კუთხითაც არ გაუწია და ვადამდელი საპარლამენტო არჩევნები დანიშნა, ეს ოპოზიციისთვის წამგებიანი იქნება, არა?
_ არავითარ შემთხვევაში! არჩევნებს როცა დანიშნავენ, მაშინ წააგებენ! დიახ, საარჩევნო რევოლუცია უნდა მოხდეს!
ქვეყანას ხელისუფლება აღარ ჰყავს და რაზე ვსაუბრობთ? _ „ოცნება“ კრიმინალურ ბანდად ჩამოყალიბდა.
სხვათა შორის, ზუგდიდის არჩევნებზე ხალხს ეუბნებოდნენ და აშინებდნენ, მხოლოდ მერს ირჩევ, თორემ ყველა დანარჩენი იგივე იქნება _ პოლიციის უფროსიც რჩება და პარლამენტის დეპუტატიც, ამიტომ დედას გიტირებთო, მაგრამ საერთო ეროვნულ არჩევნებში განსხვავებული ვითარება იქნება _ მაშინ ყველას კარგად ეცოდინება, რომ ეს ხელისუფლება დასრულებულია და იგივე პოლიციის ხელმძღვანელობასაც არჩევნებში ღიად ჩართვა ძალიან გაუჭირდება.
_ ლევან, საარჩევნო რევოლუციისთვის, ჩემი აზრით, საარჩევნო სისტემის შეცვლაა აუცილებელი.
_ დიახ, ამაში ცალსახად გეთანხმებით.
_ რამდენიმე თვის წინ გაერთიანებულმა ოპოზიციამ საარჩევნო სისტემის შეცვლის მოთხოვნით კამპანია დაიწყო და დაგვპირდა, რომ მილიონ ხელმოწერას შეაგროვებდა, თუმცა ამ კუთხით აღარ აქტიურობთ. რატომ?
_ არ მგონია, რომ საქმე მილიონ ხელმოწერაში იყოს _ ამდენი მარტო მხარდამჭერი გვყავს, ბოლოს და ბოლოს, საპრეზიდენტო არჩევნებზე 900 ათასმა ადამიანმა მოგვცა ხმა.
_ კი ბატონო, მაგრამ სხვა რამეს გეკითხებით, _ გაერთიანებულმა ოპოზიციამ დააანონსა, საარჩევნო სისტემის შესაცვლელად მილიონ ხელმოწერას შევაგროვებო და მაინტერესებს, უკვე რამდენი ხელმოწერა გაქვთ ან ეს კამპანია რა ეტაპზეა?
_ ეს ხელმოწერები პარლამენტში შევა.
_ როდის?
_ ყველაფერი 2020-მდე უნდა მოესწროს, თორემ ეს საარჩევნო სისტემა ერთ-ერთი შემაფერხებელი პრობლემაა, რომელზედაც ხელისუფლებას მარტო ოპოზიცია კი არა, არასამთავრობო ორგანიზაციები და იგივე „ვენეციის კომისიაც“ ედავება.
_ ლევან, კონკრეტულ კითხვას გისვამთ და კონკრეტულად მიპასუხეთ: რა ბედი ეწია მილიონი ხელმოწერის კამპანიას?
_ გაერთიანებული ოპოზიციის გურიის ხელმძღვანელი ვარ და სანამ საარჩევნო კამპანია აქტიურ ფაზაში შევიდოდა, ხელმოწერები გროვდებოდა და ახლაც გროვდება.
მოკლედ, პარლამენტში ეს მილიონი ხელმოწერა შევა და დარეგისტრირდება, მაგრამ მერე მთავარი პოლიტიკური ნება იქნება, თორემ ხელისუფლებას ოდნავ საღი აზრი რომ ჰქონდეს, საარჩევნო სისტემის შეცვლაზე ამ ხელმოწერების გარეშეც წავიდოდა იმიტომ, რომ ამ საკითხთან დაკავშირებით მარტოა დარჩენილი. სხვათა შორის, წინა ხელისუფლების დროსაც ბევრი იყო ისეთი საკითხი, როცა „ნაციონალური მოძრაობა“ მარტო დარჩა და ვნახეთ, 2012 წელს რაც მოუვიდა _ არჩევნები წააგო.
აქვე, იმასაც ვიტყვი, რომ „ნაციონალური მოძრაობის“ აშენებული სახელმწიფოდან ამათ, ბოდიში და, პირდაპირ ტრა…ში წაგვიყვანეს!
_ მესმის, რომ ემოციური ხართ და პოლიტიკური ბილწსიტყვაობაც გეპატიებათ, მაგრამ მითხარით, „ოცნებასთან“ ბრძოლაში „ნაცმოძრაობას“ შეცდომა დაუშვია თუ არა?
_ შეცდომები, რა თქმა უნდა, გვაქვს.
_ ოპოზიციის მთავარ შეცდომად რას მიიჩნევთ?
_ შეცდომა ძალიან ბევრი გვაქვს. მაგალითად, ოპოზიციის პრობლემა შესაძლოა, დაკომპლექსება იყოს.
_ ანუ?
_ ივანიშვილი მაქსიმალურად ცდილობს, რომ მარტო გაერთიანებული ოპოზიცია კი არა, მთელი ოპოზიცია იმ ცხრა წლით დააკომპლექსოს. პირადად მე ერთ-ერთ მთავარ პრობლემად სწორედ ის მიმაჩნია, რომ ვიღაცები იმ 9 წლით არიან დაკომპლექსებულნი. ეს სუფთა „კაგებეშნიკური“ მეთოდია და იცით, მუდმივად 9 წელზე რატომ ლაპარაკობენ?
_ რატომ?
_ იმიტომ, რომ მუდმივად ძირს ვეგდოთ, გვირტყან და გვითხრან, აი, 9 წელი, 9 წელიო, მაგრამ იციან, როგორც კი ფეხზე ავდგებით, ინტელექტით, პატრიოტზმით, ღირებულებებით და პროგრამებით, მოკლედ, ყველაფრით ვაჯობებთ! ამიტომ ამ თემაში არ მოგვყვებიან და მარტო იმას გაიძახიან, აი, 9 წელი და სისხლიანიო, თან არ დაგავიწყდეთ: ამას ის ხალხი გველაპარაკება, რომელიც „ნაციონალური მოძრაობის“ მთავრობაში იყო.
_ კონკრეტულად, ვის გულისხმობთ?
_ მაგალითად, ქალბატონ თურნავას.
_ ისე, გულწრფელად რომ ვთქვათ, იმ 9 წლის კომპლექსი მარტო ოცნებელებს კი არა, მაგალითად, ბოკერიასაც აქვს.
_ ეს ტრაგედიაა! იმას კი არ ვამბობ, რომ მაშინ პრობლემები არ იყო. რა თქმა უნდა, იყო, მაგრამ, მაგალითად, თალაკვაძე გამოდის და ამბობს, რეჟიმი და სისტემა უნდა გავასამართლოთო. არადა, მაშინ მიშა სააკაშვილის ტაშისმკვრელი იყო და მისი დღევანდელი განცხადებები ცოტა სასაცილოა! მაშინ ცოცხალი მიხეილ სააკაშვილი მე არ მინახავს, თალაკვაძე კი ბანაკში დასდევდა და ერთ-ერთი უნივერსიტეტის თვითმმართველობის პრეზიდენტი იყო! აი, ეს ადამიანები მელაპარაკებიან რეჟიმის გასამართლებაზე. ეს ფარისეველი ხალხია.
ივანიშვილს გირგვლიანი და 7 ნოემბერი 2012 წელს გაახსენდა და, რა, მანამდე ეს ამბები მომხდარი არ იყო? როგორც კი ხელისუფლებაში მოვიდა, გირგვლიანის მოსამართლე დააწინაურა.
_ ბოკერიაზე გითხარით, მგონი, იმ 9 წლის კომპლექსი აქვს-მეთქი და სიტყვა ბანზე ამიგდეთ.
_ ხომ იცით, რომ ბოკერიასთან დაკავშირებით სიტყვას ბანზე არ ავაგდებ და პრობლემა არ არის, ყველაფერს პირდაპირ გეტყვით.
_ ჩემზე კარგად გეცოდინებათ, კულისებში რომ ამბობენ, ივანიშვილმა ხელისუფლება შესაძლოა, ბოკერიას გუნდს გადააბაროსო.
_ ასე არ არის.
_ ანუ ამ ორ სუბიექტს შორის თანამშრომლობას გამორიცხავთ?
_ ბოკერიასა და, ზოგადად, „ევროპული საქართველოს“ მიმართ ჩემი დამოკიდებულება ყველამ კარგად იცის, თუმცა, ვფიქრობ, დღეს სტრატეგიულად სწორად მოიქცევიან, თუ დიდ ოპოზიციურ გაერთიანებაში მონაწილეობას მიიღებენ. ჩვენი ქვეყნის საკეთილდღეოდ მეც და ჩემი თანაგუნდელებიც მზად ვართ, რომ ამ რეჟიმის დასასრულებლად ნებისმიერთან ვითანამშრომლოთ!
ყველა ის ადამიანი, რომელიც გადაწყვეტს, რომ ივანიშვილის ხელისუფლებას ცალკე დაამარცხებს, დიახ, ივანიშვილის წისქვილზე დაასხამს წყალს!
ხაზს ერთსაც გავუსვამ: მთავარი ის კი არ არის, ვინმეს სასახლეში ხვდები თუ არა. შეიძლება, არ შევხდე და არც დაელაპარაკო, მაგრამ საკითხავია, ვისი ინტერესების სასარგებლოდ იქცევი? სხვა რამეა, თუ პოლიტიკურ პარტიას სამი პროცენტი, კვალიფიციური სუბიექტის სტატუსი და მერე ფული ჰქონდეს, მაგრამ ვიმეორებ: ის, ვინც იტყვის, რომ ივანიშვილის რეჟიმს ცალკე მოვერევიო ან პოლიტიკურად დეგენერატია, ან, უბრალოდ, მავნებელია! მართალია, „ნაციონალური მოძრაობა“ ყველაზე დიდი ოპოზიციური პარტიაა, მათ შორის, გაერთიანებულ ოპოზიციში, ჩვენც კი არ ვაბობთ, სხვები არ გვჭირდება და ამ რეჟიმის შეცვლას მარტო შევძლებთო. ამის თქმა პოლიტიკური იმბეცილიზმი იქნება!
_ სხვათა შორის, ლევან, კომპანია „ნილთან“ დაკავშირებით თქვენი ინფორმაციები გამართლდა და მერიამ ახლა აღიარა, რომ ამ კუთხით საქმე ცუდად არის.
_ დიახ, 2018 წლის დეკემბერში ვთქვი, რომ ასე მოხდებოდა და მერიას ისიც ვუთხარი, _ „ნილს“ ხელშეკრულება არ გაუფორმო და 40 მილიონი არ მისცე, რადგან ინკასო ადევს, ვალებშია, ვალდებულებებს ვერ შეასრულებს და 60 ათასი ბავშვი მშიერი დარჩება-მეთქი. ახლა „ნილს“ ხელშეკრულება გაუუქმეს და გეკითხებით, ამ ექვს თვეზე პასუხისმგებელი ვინ არის? ამ კითხვებს რომ დავსვამ, მეტყვიან, აი, სპეკულირებთო, მაგრამ ნებისმიერმა გონიერმა ადამიანმა იცის, რომ იმაზე, რაც დღეს მოხდა, გასული წლის დეკემბერში ვამბობდი!
_ საუბარი განყენებული თემით დავასრულოთ, კერძოდ, ადა მარშანიამ განაცხადა, საქართველოში 10 პოლიტიკოსიდან 8 შიზოფრენიკიაო. თქვენც ხომ არ ფიქრობთ, რომ ქართული პოლიტიკის ყველა ფლანგზე შიზოფრენიკები მრავლად არიან?
_ შეიძლება, ვინმე ფიქრობს, მეც ცოტა შიზოფრენიკი ვარ! არ ვიცი, მარშანიამ რა იგულისხმა, მაგრამ ამ მტარვალებთან ადამიანი ღია ომში რომ შედის, ალბათ, ამ მიმართულებით შიზოფრენიკებიც ვართ!
ისე, გულწრფელად რომ გითხრათ, ქართულ პოლიტიკაში, მათ შორის, ოპოზიციაშიც ბევრ ახალ ადამიანს ვისურვებდი. ხელისუფლების მთავარი თამაში და მიმართულება ასეთია _ პოლიტიკა ბინძურია და პოლიტიოსები ბინძურები არიანო. ესეც რუსული მეთოდია, რადგან ახალგაზრდები პოლიტიკით არ დაინტერესდნენ და მუდმივად თვითონ იყვნენ. პოლიტიკაში 50-წლიანი გამოცდილება არ მაქვს და მე, როგორც გაერთიანებული ოპოზიციის ერთ-ერთი ახალგაზრდა ლიდერი, ყველაფერს გავაკეთებ, რომ პოლიტიკაში რაც შეიძლება მეტი მცოდნე ახალგაზრდა მოვიდეს!

გიორგი აბაშიძე