„ქრონიკა+“-ს „თავისუფალი დემოკრატების” პოლიტიკური მდივანი, ნინო გოგუაძე ესაუბრება:
_ ქალბატონო ნინო, ჩვენი საუბარი დავიწყოთ აქტუალური თემით: რით ახსნით „თავისუფალი დემოკრატებისა“ და „ევროპული საქართველოს“ თანამშრომლობას, რადგან საზოგადოებაში არაერთი შეკითხვა გაჩნდა. მოგეხსენებათ, სწორედ სანდრო გირგვლიანის ოჯახის ადვოკატი გახლდათ შალვა შავგულიძე.
_ ამ საკითხს რამდენიმე პუნქტად დავყოფ და ყველაფერს გიამბობთ. ჩვენ დიდხანს ვიბრძოდით „ნაციონალური მოძრაობის“ წინააღმდეგ. ჯერ მე, როგორც მოქალაქე, ისე ვიბრძოდი და ყველა აქციაზე ვიყავი, მერე „თავისუფალი დემოკრატების“ პარტიაში შევედი, სადაც მე და შალვა შავგულიძე ირაკლი ალასანიას გუნდის დამფუძნებლები ვიყავით, შემდეგ ბიძინა ივანიშვილის „ქართულ ოცნებაში“ გავერთიანდით და ძალიან კარგად მახსოვს, თუ რა დაპირებით მოვედით ხელისუფლებაში. გარდა იმისა, რომ მოსახლეობის უმეტესობას სიღარიბისგან თავის დაღწევის პერსპექტივა ჰქონდა, ძალიან კარგად მახსოვს, რომ მთავარი დაპირებები იყო დემოკრატიული, სამართლებლივი სახელმწიფოს მშენებლობა. „ნაციონალების“ ხელისუფლება ძალიან რეპრესიული იყო. ჩემთვის დემოკრატიული სახელმწიფოს მთავარი ღირებულება არის ადამიანი, მისი უფლებები, სიცოცხლე და კეთილდღეობა. დიახ, ჩვენ ძალიან მძიმე, რთული, მსოფლმხედველობრივი და ფიზიკური დაპირისპირება გვქონდა „ნაციონალურ“ მოძრაობასთან და მათ შორის, ის ადამიანები, რომლებიც დღეს „ევროპულ საქართველოში“ არიან, მიხეილ სააკაშვილის მმართველობას წარმოადგენდნენ. 2012 წლის მერე ისინი ძალაუფლებას ჩამოშორდნენ. პრინციპში, ეს არის ერთადერთი გუნდი, რომელსაც გამოცდილება აქვს.
_ გამოცდილებაში რას გულისხმობთ?
_ როცა ძალაუფლებას ჩამოშორდები და მერე ჩვეულებრივი ადამიანი ხდები, ისევე გეხება ადამიანის უფლებები, როგორც ყველა დანარჩენს. თუკი ბიძინა ივანიშვილის მმართველობას დავაკვირდებით, ძველი „ნაციონალური მოძრაობის“ წარმომადგენლებზე არავისზე უარს არ ამბობს, არც მათ რეპრესიულ სისტემაზე, მთავარია, აღიარო ის, რისი აღიარებაც იმ მომენტისთვის აქტუალურია ბიძინა ივანიშვილისთვის და ისე გადადიან ხელისუფლებაში მყოფი „ნაციონალური მოძრაობის“ წარმომადგენლები ხელისუფლებაშივე, რომ არანაირი ასეთი გზა მათ არ გაუვლიათ. ისინი სულ არიან ძალაუფლებაში და შანსი არ არის, ასეთმა ადამიანებმა გადაფასება მოახდინონ, თუნდაც იმ შეცდომების, რომელიც მათ „ნაციონალური მოძრაობის“ პერიოდში დაუშვეს. ისინი უკვე 7 წელია, რაც ოპოზიციაში არიან, ჩვენ „თავისუფალი დემოკრატები“ უკვე მეხუთე წელია, ოპოზიციაში ვართ. დავრწმუნდით, რომ ბიძინა ივანიშვილი სწორედ იმ რეპრესიული სისტემის მშენებლობისა თუ აშენებული მართვის გზას დაადგა, რომელსაც ჩვენ „ნაციონალების“ პერიოდში ვებრძოდით, ეს ჩვენს თავზე გამოვცადეთ „კაბელების საქმეზე“. ეს იყო თავიდან ბოლომდე პოლიტიკური საქმე, _ პოლიტიზებული პროკურატურა და შემდეგ სასამართლო ივანიშვილმა გამოიყენა, როგორც ირაკლი ალასანიას დევნის ობიექტი. რისთვისაც ვიბრძოდით, ვხედავდით, რომ რეალურად არაფერი იცვლებოდა, ამიტომ ავდექი და ოპოზიციაში წამოვედი. გული დამწყდა, რომ ამდენი ბრძოლის შემდეგ მივიღეთ ხელისუფლება, რომელიც იმავე გზას დაადგა, რა გზასაც _ „ნაციონალური მოძრაობა“ და ასეთ ხელისუფლებაში ჩემი და ჩემი გუნდის ადგილი აღარ იქნებოდა.
_ კითხვას დავუბრუნდები, რატომ „ევროპული საქართველო“?
_ რა გააკეთა ბიძინა ივანიშვილმა? _ „ნაციონალური მოძრაობის“ რეპრესიული სისტემები, იქ მომუშავე ადამიანებით, პროკურორებით თუ მოსამართლეებით თუ სუსით, ეს ყველაფერი გადმოიბარა, რამდენიმე ადამიანის მიმართ სისხლის სამართლის საქმე აღძრა. ჩემთვის ძალიან რთულია, ამას რომ ვამბობ, მაგრამ დარწმუნებული ვარ, ივანიშვილის ხელისუფლება შესაცვლელია და ის უნდა შეიცვალოს არჩევნების გზით. რატომ „ევროპული საქართველო“? ამ ხნის განმავლობაში ჩვენ, როგორც ოპოზიციურ პარტიებს, შეხვედრები და საუბრები გვქონია, მათ შორის, წარსულის შეფასებასთან დაკავშირებით. „ევროპული საქართველოს“ ლიდერები ყველაზე მკაფიოდ და გასაგებად ამბობენ და აღიარებენ, რომ ხელისუფლებაში მათი ყოფნის პერიოდში მოხდა დანაშაულებები, ეს იყო სისტემური ჩავარდნა და ჩვენ ამაზე პასუხისმგებლობას ვიღებთო. ისინი შეწუხებულები არიან იმის გამო, რაც ზოგადად მოხდა.
_ სიტყვის დონეზე ენდობით?
_ ესეც ძალიან მნიშვნელოვანია, რადგან თუ არ იტყვი და არ აღიარებ, შეცდომას ვერც ვერასოდეს გამოასწორებ. ჩვენთვის ძალიან მნიშვნელოვანია, თუ როგორი სახელმწიფო უნდა გვქონდეს სამომავლოდ და ის პრინციპები, რომლისთვისაც მიხეილ სააკაშვილის წინააღმდეგ ვიბრძოდით, ჩვენთვის არ შეცვლილა. რასაკვირველია, წარსული უნდა გვახსოვდეს, რადგან დაშვებული შეცდომები გავაანალიზოთ, მაგრამ არ შეიძლება, წარსულში დავიკარგოთ ისე, რომ მომავალი გამოგვრჩეს.
_ შეგიძლიათ ჩამოგვითვალოთ ის მთავარი პრინციპები და ღირებულებები, რაშიც თქვენ და „ევროპულ საქართველოს“ თანხვედრა გაქვთ?
_ ორივე პარტიას მიგვაჩნია, რომ საქართველოში აღარასოდეს აღარ უნდა განმეორდეს ერთი პირის მმართველობა. აუცილებლად ხელისუფლება უნდა იყოს დაბალანსებული, შეკავებებისა და გაწონასწორებების მექანიზმებით აღსავსე, რომ სახელმწიფოს უნდა მართავდეს ინსტიტუტები და არა რომელიმე ერთი პირი და ინსტიტუტების კომპეტენცია უნდა იყოს კანონით და კონსტიტუციით გაწერილი. ასევე სასამართლო უნდა იყოს დამოუკიდებელი და სიტყვის თავისუფლება _ შეუზღუდავი. ეს არის ის ძირითადი პრინციპები, რაც დემოკრატიულ სახელმწიფოს სჭირდება. ამ პრინციპებიდან ნებისმიერი გადახვევა იქნება დემოკრატიიდან გადახვევა. თვითონ ეს პრინციპები იძლევა შესაძლებლობას, რომ სახელმწიფო დემოკრატიულად იმართოს. აი, ეს არის მოკლე ჩამონათვალი იმისა, რომ ჩვენ დავაახლოვეთ წარსულის შეფასება ერთმანეთთან და იმ ძირითად პრინციპებზე შევთანხმდით, რომელიც დემოკრატიული სახელმწიფოსთვისაა დამახასიათებელი და სწორედ ეს პრინციპები „ევროპულ საქართველოსთან“ ყველაზე მეტად გვაახლოვებს.
_ კოალიციური მმართველობის მომხრე ხართ?
_ აუცილებელია, რომ ერთი ხელისუფლება არ შეიცვალოს აბსოლუტური ძალაუფლების მქონე ხელისუფლებით, რადგან აბსოლუტური ძალაუფლება არის წყევლა და ყველამ ვიცით, თუ როგორ დაუმთავრებიათ აბსოლუტური ძალაუფლება. ეს არის საშინელება და უკან გადადგმული ნაბიჯი, ჩვენ ასეთ სახელმწიფოში ვცხოვრობდით და მას ერქვა საბჭოთა კავშირი, სადაც იყო ერთი პარტია, ერთი ადამიანი ფიქრობდა, აკეთებდა მეორეს და ამბობდა მესამეს. ეს დიდი ტყუილი ჩვენ გამოვიარეთ და 29 წელიწადია, თავს ვაღწევთ ამ საბჭოთა მემკვიდრეობიდან გამოსვლას. თვითონ ის ფაქტი, რომ „ევროპულმა საქართველომ“ მაჟორიტარობის კანდიდატად შალვა შავგულიძე დაასახელა, ესეც იმის ნიშანი იყო, რომ მათ სხვანაირად გაიაზრეს თავიანთი წარსული, აღიარეს ის შეცდომები, რაც სწორედ ადამიანის უფლებების დაცვის კუთხით დაუშვეს და ამიტომ დაასახელეს შალვა შავგულიძე. ამ დროს „ქართული ოცნება“-ბიძინა ივანიშვილის ბურჯი ხდება მურუსიძე-ჩინჩალაძის სასამართლო. სწორედ ბიძინა ივანიშვილი დაადგა „ნაციონალების“ იმ გზას, რომელსაც ჩვენ ვებრძოდით და „ევროპულმა საქართველომ“, „თავისუფალ დემოკრატებთან“ ერთად, თავის მაჟორიტარ კანდიდატად დაასახელა შალვა შავგულიძე.
_ თქვენი აზრით, როგორია შალვა შავგულიძის შანსები მთაწმინდის ოლქში?
_ ოპტიმისტი ადამიანი ვარ. მთელ ოპოზიციას მოგვიწევს ერთმანეთთან კოორდინაცია სხვადასხვა რანგსა და ხარისხში. მაგალითად, პროპორციული არჩევნების თემაზე მთელი ოპოზიცია გავერთიანდით და ამოცანების გარშემოც უნდა შევძლოთ გაერთიანება. აქ მოხდა კოორდინაცია „ევროპულ საქართველოსა“ და „ნაციონალურ მოძრაობას“ შორის. „ევროპულმა საქართველომ“ არ დააყენა თავისი კანდიდატი ზუგდიდში, ხოლო „ნაციონალებმა“ არ დააყენეს კანდიდატი მთაწმინდაზე და მხარდაჭერა გამოუცხადეს შალვა შავგულიძეს. ეს არის ძალიან კარგი იმიტომ, რომ ბიძინა ივანიშვილმა უნდა იცოდეს, _ როდესაც ყველა კარს კეტავს და არავის ელაპარკება, ამ კარს მიღმა დარჩენილი, თუნდაც ძალიან განსხვავებული ადამიანები, მოძებნიან ერთმანეთთან სავალ გზებს და შეთანხმების ფორმულას. ასე რომ, მადლობა ყველა ოპოზიციურ პარტიას, მათ შორის, „რესპუბლიკელებს“, რომელმაც მხარდაჭერა გამოუცხადა შალვა შავგულიძეს, გაერთიანებულ ოპოზიციას და ა. შ. „ქართულმა ოცნებამ“ კარგად იცის, რომ შალვა შავგულიძე არის ის ძალიან მაგარი ადვოკატი, რომელიც ყოველთვის იცავდა ადამიანის უფლებებს, რომელსაც მოგებული აქვს არაერთი საქმე და იყო ძალიან მებრძოლი პოლიტიკოსი, როდესაც ის შემოვიდა „თავისუფალი დემოკრატების“ პარტიაში. ეს არჩევნები უნდა იყოს იმის დემონსტრირება მთაწმინდის მოქალაქეების მხრიდან, რომ ბიძინა ივანიშვილს ყველაფერი არ გაუვა, რომ მან უნდა შეცვალოს პოლიტიკა და თუ ხალხს გავაგებინეთ, რომ ასე გაგრძელება აღარ შეიძლება, ეს უნდა იყოს სიგნალი ივანიშვილისთვის, რომ მას ყველაფერი ვერ გაუვა. მე დარწმუნებული ვარ შალვას გამარჯვებაში.
_ იქნება თუ არა შუალედური არჩევნების შედეგები მნიშვნელოვანი მომავალი საპარლამენტო არჩევნებისთვის?
_ ძალიან მნიშვნელოვანი არჩევნებია. მიუხედავად იმისა, რომ შუალედური არჩევნების შედეგად ხელისუფლება არ იცვლება და მოქალაქეებს თითქოს ისეთი მოტივაცია არ აქვთ, რომ გამოვიდნენ და არჩევნებზე მივიდნენ, მაინც, ხელისუფლებასა და მოსახლეობას უნდა დავანახოთ, რომ პოლიტიკური პარტიების კოორდინაციამ შედეგი გამოიღო, რომ ეს არჩევნები შეიძლება იყოს გარდამტეხი 2020 წლის არჩევნებისთვის და საერთოდ, საზოგადოებას, ჩვენს მოქალაქეებს არ ვაბრალებ არაფერს, რადგან თუ რამე არ გამოვიდა ისევ ჩვენი, პოლიტიკოსების ბრალი იქნება, თუ ბოლომდე ვერ დავარწმუნეთ ადამიანები ამ არჩევნების მნიშვნელობაში.
_ როგორ გამოეხმაურებით ბიძინა ივანიშვილის განცხადებას შალვა შავგულიძესთან დაკავშირებით? მან თქვა, რომ პარადოქსია, როცა შავგულიძე გმირთან ასოცირდებაო.
_ ბიძინა ივანიშვილმა გადაწყვიტა, მარტო ისტორია კი არ შეგვიცვალოს, არამედ ადამიანების ბიოგრაფია შეცვალოს და მის ყოველ სიტყვას ისეთი დამაჯერებლობა აქვს, თითქოს ჰგონია, ადამიანები დაიჯერებენ იმას, რომ მთელი ეს პროცესები ისე ხდებოდა, როგორც ბიძინა ივანიშვილმა გვიამბო. არადა, სწორედ ივანიშვილი იმიტომაც ბედავს და ამბობს ამას, რომ არანაირი ემოციური ბმა იმ პროცესებთან, რომელიც ჩვენ ყველამ ერთად გამოვიარეთ, მას არ გააჩნია და არც იცის, რა მოხდა. თითქმის ყველა მისი თანამებრძოლი, 2012 წელს რომ გუნდი შეკრიბა, იმაში დაადანაშაულა, თითქოს ისინი თავიდანვე შეკრულები იყვნენ „ნაციონალურ მოძრაობასთან“ და საერთოდ როგორ მოხვდნენ მასთან, ამაზეც კი დასვა კითხვა. ბიძინა ივანიშვილს მინდა შევახსენო, რომ სანამ ის პოლიტიკაში მოსვლას დააანონსებდა, მანამდე, სწორედ ივანიშვილი, სანდრო გირგვლიანის დროს, ბუტა რობაქიძისა და 7 ნოემბრის დროს, იყო „ნაციონალების“ მთავარი დამფინანსებელი ბურჯი და როგორც თვითონ ამბობს, გადაწყვეტილებების მიმღებ ჯგუფში შედიოდა: თვითონ გვიამბო, _ უჩემოდ მნიშვნელოვან გადაწყვეტილებებს ვერ იღებდნენო. არც ერთ ამ ფაქტზე და ძალადობრივ შემთხვევებზე მას არანაირი რეაქცია არ ჰქონია. ვის, ვის და ივანიშვილს ნამდვილად არაფერი ეთქმის ამ ადამიანებთან და სწორედ მათი, ანუ ოპოზიციური სპექტრის მეშვეობით მოიგო 2012 წლის არჩევნები. შალვა შავგულიძის ქონება არის მისი ბიოგრაფია და როდესაც ამ ადამიანს ბიოგრაფიას უცვლი, დამიჯერეთ _ მოსახლეობა ამას არ გაპატიებთ.
_ დამაჯერებლობაზე გამახსენდა. როგორ ფიქრობთ, დღეს ვინმეს სჯერა ბიძინა ივანიშვილის? საპრეზიდენტო არჩევნებზე ჩვენ კარგად დავინახეთ, რომ ივანიშვილმა აბსოლუტურად გამოიყენა თავისი რესურსი და ბოლოს ხალხში კარტოფილის დარიგებაც კი დაიწყო…
_ ყველაზე მძიმეა, როდესაც სიტყვა უფასურდება. ბიძინა ივანიშვილს ჰგონია, რომ ჭეშმარიტება უპყრია ხელთ. რა სახელსაც დაარქმევს ამა თუ იმ მოვლენას, იმ სახელით უნდა აღიქვას ის საზოგადოებამ. თუ ეს ასე არ ხდება და საზოგადოება იმ სახელს არ არქმევს, რომელიც ბიძინა ივანიშვილმა დაარქვა, ძალიან უკვირს და მაშინ იწყებს ლაპარაკს, რომ ეს „რუსთავი 2-ის“ ბრალია, ზოგადად მედიის ან „ნაციონალების“. ხშირად ვამბობდი, რომ ჰიპნოზს აკეთებს-მეთქი, გაიძახის, _ მიშა მოდის, მიშა მოდის და ამ ფობიებით მოიგო არჩევნებიც. თითქოს ადამიანებს ის შიშები გაუღვიძა და ამიტომაც მიიღო საკონსტიტუციო უმრავლესობა, რაც ძალიან ცუდია მისთვისაც და ქვეყნისთვისაც. 2016 წლიდან კიდევ 3 წელი გავიდა და მისი ყოველი გამოჩენა თუ ინტერვიუ მის სიტყვას ფასს უკარგავს. ბიძინა ივანიშვილის გარდა დღეს არავის სჯერა მისი სიტყვის მაგიურობის. როდესაც ივანიშვილს უჭირდა, მაშინ ისეთი გარემოცვა შეიკრიბა, ვისაც აზრს ეკითხებოდა, რომლის აზრის გათვალისწინებაც იცოდა, რომ მნიშვნელოვანი იყო, მაგრამ როცა გაიმარჯვებენ ხოლმე, მერე ავიწყდებათ ყველაფერი. გარემოცვას კი არ ვაბრალებ, რომ ბიძინა ივანიშვილი არაადექვატურია, არამედ მან თვითონ შეარჩია ეს გარემოცვა. თუმცა ის, რომ დღეს არაადექვატურია, ეს ნაწილობრივ გარემოცვის ბრალიცაა, რადგან ის არ ეუბნება რეალურ განწყობებს, რასაც მოსახლეობაში ვხვდებით. დღევანდელ გარემოცვაში აღარავინ დარჩა ისეთი, ვინც გაუბედავს და სიმართლეს ეტყვის.
_ გაუბედავენ და თანამდებობების გარეშე დარჩებიან.
_ რასაკვირველია, როდესაც ამდენი ხანი ძლებ, შენთვის მთავარია, ამ ადამიანის კეთილგანწყობა და პირადი ინტერესები. ამის გამო აკეთებ იმას, რაც მას სურს.
_ დღემდე სააკაშვილი ჰგონია პრეზიდენტი და „ნაციონალური მოძრაობა“ _ ხელისუფლებაში.
_ არაფერიც არ ჰგონია, ეს არის მისი პოლიტტექნოლოგიის მთავარი ხერხი, ამ სიძულვილით განპირობებული.
_ ის, რომ საქართველო უსაფრთხო ქვეყნად გამოაცხადეს, ის, რომ ქართველების მინიმალური ხელფასი შეადგენს 1102 ლარს, ის, რომ ხუთშვილიანი ოჯახისთვის საკმარისი თანხაა 361 ლარი და 20 თეთრი და ბევრი სხვა რამ შეგვიძლია ჩამოვთვალოთ, თქვენი აზრით, რასთან გვაქვს საქმე? როგორ უნდა ავხსნათ ეს არარეალური ფენომენი? რა უნდა, საბოლოო ჯამში, ბიძინა ივანიშვილს ქართველი ხალხისგან?
_ უსაფრთხო ქვეყნად რომ გამოაცხადეს საქართველო, ეს იმას ნიშნავს, რომ პოლიტიკურ თავშესაფარს ჩვენს მოქალაქეებს აღარ მისცემენ. უსაფრთხო ქვეყნის სტატუსით რომ ამაყობენ, სინამდვილეში, ეს არის ძალიან რთული პრობლემა ჩვენი მოქალაქეებისთვის და ხელისუფლებას ამ უსაფრთხო სტატუსის მოპოვებისას თავის მოქალაქეებზე უნდა ეფიქრა და უცხოელებთან უნდა ევაჭრა. სხვათა შორის, ძალიან ბევრი ადამიანი მეუბნება, რომ თავიდან როგორ ვერ მიხვდიო? სულ ვამბობდი, რომ ადამიანებში კარგს ვხედავ. ადამიანების ნდობა თუ დავკარგე, რა მინდა პოლიტიკაში ან საერთოდ ცხოვრებაში? სულ ვფიქრობდი, ადამიანს, რომელსაც აქვს ამხელა ქონება და ასე გარისკა, ვიფიქრე, რომ მას ქვეყნისთვის კარგი უნდოდა. აბა, რას წარმოვიდგენდი, იგივეს მივიღებდით, რასაც ვებრძოდით?! რა უნდა და თავისი ძალაუფლების განხორციელება, ეს სახელმწიფო საკუთარი ჰგონია, რომ ქვეყანა მისი სურვილების განხორციელების ასპარეზია. საქართველოს განვითარება რომ არ უნდა, ფაქტია; ამ ქვეყნის დემოკრატიზაცია რომ არ უნდა, ეგეც ფაქტია; სამართლებრივი სახელმწიფო რომ არ უნდა, ფაქტია. მას აინტერესებს მხოლოდ რამდენიმე სისტემა, რომლის მეშვეობითაც მართავს ამ სახელმწიფოს. ეს არის უშიშროება, პოლიტიზებული პროკურატურა, პოლიციის ნაწილი, ოღონდ კრიმინალური პოლიცია და სასამართლო. სასამართლო ყველა სამართლებრივ, დემოკრატიულ სახელმწიფოში არის სახელმწიფოს ფუნდამენტი და მან გადაწყვიტა, რომ ყველა ეს სახელმწიფო ინსტიტუტი და ბერკეტი მისი საკუთრებაა და ამ სახელმწიფო ბერკეტს ყველაზე და ყველას წინააღმდეგ იყენებს, ვისაც ამოიჩემებს. ჩემთვის ბოლო მაგალითია მამუკა ხაზარაძე. როგორც ვხედავ, არც მოსახლეობის გაჭირვება ანაღვლებს. მიუხედავად იმისა, რომ კვირიკაშვილი თითქოს იმიტომ მოხსნა, რომ „იუნისეფმა“ აჩვენა, თუ რა გაჭირვებული ქვეყანაა და ეს რომ გავიგე, რამდენიმე ღამე არ მეძინაო. შემდეგ ავიწყდება ხოლმე ის, რაც ნათქვამი აქვს და ყველა გამოსვლაში გვეუბნება, რომ, თურმე, არც ისე ცუდად არის საქმე და არც ისე უჭირს ამ ხალხს, როგორც „რუსთავი 2“ ან სხვა მედიასაშუალება აჩვენებს. საფრთხეშია ინვესტიციები, ჩვენი ეკონომიკა და რომელი ერთი ჩამოვთვალო? ინვესტიციის შემოდინება ამ ქვეყანაში სულ უფრო და უფრო გაჭირდება და ეს ეკონომიკას ძალიან ცუდად წაადგება. მისი თქმით, თურმე, „ვენეციის კომისიამ“ პოლიტიკური შეფასება დაწერა; რომ ეუთოს არავინ არაფერს ეკითხება. რასაც მე ვუყურებ, მთელი ჩვენი პოლიტიკა, ეს იქნება სასამართლო, პროკურატურა, მოწადინებულია, რომ კი არ დავუახლოვდეთ დასავლეთს, არამედ დავშორდეთ. რა უნდა? უნდა, რომ თავისი ახირებები განახორციელოს და ჰგონია, რომ ეს ქვეყანა მისია. რატომღაც, ავიწყდება, რომ ეს სახელმწიფო ჩვენია, ხალხის, ეს ქვეყანა ოდითგანვე არსებობდა, ახლაც არსებობს და ჩვენ რომ არ ვიქნებით, მის მერეც იარსებებს. მოქალაქეებმა უნდა დავიჯეროთ, რომ ჩვენ ვართ ამ ქვეყნის ბატონ-პატრონი, როგორ არჩევანსაც გავაკეთებთ, სწორედ ისეთი ქვეყანა გვექნება და ვერავინ შეუშლის ხელს ჩვენი თავისუფლებისთვის ბრძოლას. დარწმუნებული ვარ, ბიძინა ივანიშვილსაც ისევე მშვიდად გავისტუმრებთ ხელისუფლებიდან, როგორც წინა ხელისუფლება გავისტუმრეთ.
_ მოსამართლეების არჩევის წესთან დაკავშირებით „ქართული ოცნება“ პოზიციებს არ თმობს.
_ როგორ დათმობს?! რასაც ბიძინა ივანიშვილი იტყვის, ყველაფერი ისე იქნება.
_ როგორ გგონიათ, რატომ მიდის მმართველი გუნდი ამ რისკზე?
_ სხვა გზა არ აქვთ. ერთადერთი „ქართული ოცნება“ იმას ასრულებს, რაც ბიძინა ივანიშვილს უნდა და მათთვის რისკია ივანიშვილის სურვილების საწინააღმდეგოდ წასვლა. ქართველ ხალხთან რომ არანაირი ანგარიშვალდებულება არ გააჩნიათ, ეს ფაქტია. ბიძინა ივანიშვილმა ყველაფერი გააკეთა, რომ ის ადამიანები, რომლებსაც საკუთარი რეპუტაცია, პოლიტიკური ავტორიტეტი ჰქონდათ, ჩამოეშორებინა საკუთარი კოალიციიდან, თუმცა ამ უმრავლესობაშიც არსებობენ ადმიანები, რომლებმაც თავიანთი სახე შეინარჩუნეს და პირველი ვინც მახსენდება, ეს არის რომან კაკულია. მე მას არ ვიცნობ, მაგრამ აშკარად გამოირჩევა ამ უმრავლესობის ფონზე. დანარჩენი ყველა უსიტყვოდ ასრულებს ბიძინა ივანიშვილის სურვილს. ამიტომ თუ „ვენეციის კომისია“ ეწინააღმდეგება ბიძინა ივანიშვილის სურვილს, მით უარესი „ვენეციის კომისიისთვის“ _ ზუსტად ასეთი დამოკიდებულება აქვს მას. ივანიშვილს უნდა აბსოლუტურად დამორჩილებული სასამართლო და ეს სასამართლო მხოლოდ იმისთვის სჭირდება, რომ მისი ინტერესი სადაც არის, იქ აღსრულდეს მისივე უზენაესი ნება. ივანიშვილს მურუსიძისა და ჩინჩალაძის სასამართლო სჭირდება თავისი სურვილების განსახორციელებლად.
_ რამდენად ძლიერია დღეს ოპოზიცია და რას აკეთებს იმისთვის, რომ 2020 წლის არჩევნებზე „ქართული ოცნება“ დაამარცხოს?
_ ბიძინა ივანიშვილმა ყველაფერი გააკეთა, რომ მთელი რიგი პარტიები მოესპო, მათ შორის, ჩემი პარტია. „თავისუფალი დემოკრატები“ ამის მაგალითი ვართ, რომელსაც წესების გარეშე ებრძოდა. ხშირად მსმენია, ეს ხელისუფლება უფრო ჰუმანურია, ვიდრე „ნაციონალებიო“, მაგრამ ჩემი პარტიის მაგალითზე ამას ვერ ვიტყვი და არ ვიტყვი. შეიძლება, მასობრივად არ ეხება ეს რეპრესიული სისტემა, მაგრამ ჩვენ წინააღმდეგ აბსოლუტურად ყველა მეთოდი გამოიყენეს, ადამიანობის მიღმა არსებული მეთოდები და ვერანაირად ვიტყვი, რომ ბიძინა ივანიშვილის ხელისუფლება უფრო ჰუმანურია. სამაგიეროდ, „ქართული ოცნების“ ხელისუფლების მიმართ ხალხის უკმაყოფილება იზრდება, რაც ოპოზიციამ საკუთარ ხმებში უნდა გადაიტანოს. შემდგომი პარლამენტი უნდა იყოს დაბალანსებული, მრავალფეროვანი, რომლის საფუძველზეც უნდა შეიქმნას კოალიციური მთავრობა. მიუხედავად იმისა, რომ ბიძინა ივანიშვილს აბსოლუტური ძალაუფლება და უდიდესი ფინანსური რესურსი აქვს, რომლის მსგავსიც არავის არ გააჩნია და არც ექნება საქართველოში, ოპოზიციას, რასაკვირველია, მოგვიწევს კოორდინება და გაერთიანება ამა თუ იმ თემატურ საკითხთან დაკავშირებით.
_ თუკი ბიძინა ივანიშვილმა თავისი პოზიციები არ დათმო, გამორიცხავთ ქუჩის აქციებს?
_ ქუჩის აქციებს არასოდეს გამოვრიცხავ, რადგან მთელი ცხოვრება რუსთაველზე გავატარე. მთელი ჩემი ცხოვრება ერთი უწყვეტი აქცია იყო და არ გამოვრიცხავ, თუმცა არ მინდა, რომ ეს პროტესტი კონსტიტუციურ ფარგლებს გასცდეს.
_ დაბოლოს, სამომავლოდ თუ იგეგმება „თავისუფალი დემოკრატებისა“ და „ევროპული საქართველოს“ ხანგრძლივი თანამშრომლობა?
_ ვფიქრობთ, ვმსჯელობთ, ერთად გვაქვს საარჩევნო ბლოკი, რომლის მაჟორიტარი კანდიდატიც შალვა შავგულიძეა და მაშინვე ვთქვით, რომ ჩვენ განვიხილავთ თანამშრომლობას 2020 წლის არჩევნების ასპექტში.

გიორგი საკარული