რამდენიმე დღის წინ ცნობილი გახდა, რომ „ომეგა ჯგუფმა“ ხელისუფლებას სტოკჰოლმის არბიტრაჟში დავა მოუგო. კერძოდ, საუბარია იმაზე, რომ შემოსავლების სამსახური ოჯთ-ის („ომეგა ჯგუფის თამბაქო“ _ OGT) ქონებას აუქციონზე ვეღარ გაყიდის. ამასთან, იგივე არბიტრაჟის გადაწყვეტილებით, საქართველოს სახელმწიფო ვალდებულია, რომ „ომეგას“ დამფუძნებელ ზაზა ოქუაშვილს, რომელმაც „ოცნების“ ხელისუფლება კორუფციასა და რეკეტში ღიად პირველმა ამხილა, კომპენსაციის სახით, 300 ათასამდე ლარი გადაუხადოს.

შეგახსენებთ: „ომეგა ჯგუფის“ მფლობელობაში არსებული სიგარეტის ქარხნის შეტყობინება მიიღო, რომ ფაბრიკა აუქციონზე იძულებით ქონებას შემოსავლების სამსახურმა ჯერ ყადაღა დაადო, შემდეგ კი აღსრულებას გადასცა. „ომეგამ“ მიმდინარე წლის 22 თებერვალს აღსრულების ეროვნული ბიუროდან,აუქციონზე გაიყიდებოდა. კომპანიამ ეს გადაწყვეტილება ჯერ სააპელაციო სასამართლოში გაასაჩივრა, თუმცა სააპელაციომ წინა ინსტანციის გადაწყვეტილება ძალაში დატოვა. ამიტომ 22 მარტს ოჯთ-მ სტოკჰოლმის საერთაშორისო საარბიტრაჟო სასამართლოს მიმართა. როგორც „ომეგაში“ ამბობენ, მას შემდეგ, რაც საქმე აღსრულების ეროვნულ ბიუროს გადაეცა, მას შესაძლებლობა ჰქონდა, აუქციონი ნებისმიერ დროს დაენიშნა. სტოკჰოლმის საარბიტრაჟო სასამართლომაც ამიტომ მიიჩნია, რომ აღსრულების შეჩერება გადაუდებელ აუცილებლობას წარმოადგენდა.

რა პროცესები ვითარდება ამჯერად „ომეგას“ გარშემო და სტოკჰოლმის არბიტრაჟის ზემოხსენებული გადაწყვეტილება არის თუ არა იმის წინაპირობა, რომ „ოცნების“ ხელისუფლებამ ბიზნესმენ ოქუაშვილთან დაკავშირებით უკან დაიხიოს და საკუთარი შეცდომები აღიაროს? _ ამ თემებზე „ქრონიკა+“ პარლამენტის დამოუკიდებელ დეპუტატ ნატო ჩხეიძეს ესაუბრა:

_ ქალბატონო ნატო, ვიღაცები სკეპტიკურად იყვნენ განწყობილნი, „ომეგა“ საერთაშორისო არენაზეც ვერაფერს მიაღწევსო, მაგრამ სტოკჰოლმის არბიტრაჟმა ოჯთ-ის სიგარეტის ფაბრიკის გაყიდვა არათუ უკანონოდ ცნო, არამედ, საქართველოს სახელმწიფოს ზაზა ოქუაშვილის სასარგებლოდ სოლიდური თანხის გადახდაც დააკისრა, ანუ „ომეგას“ საქმეზე ყინული დაიძრა?
_ არ ვიცი, სკეპტიკურად ვინ იყო განწყობილი.
_ ვინ და, როგორც იტყვიან, „ობერ ქოცები“.
_ ალბათ, ასე უნდა გამოეხატათ, რომ სკეპტიკურად იყვნენ განწყობილნი, თუმცა ჩვენ ამ საქმის დაწყებისთანავე ვამბობდით, როგორც კი საკითხები საქართველოს საზღვრებს გარეთ გავიდოდა, სადაც ნორმალური და დემოკრატიული ქვეყნებისთვის დამახასიათებელი სასამართლოები არსებობენ და არგუმენტებს ობიექტურად აფასებენ, „ომეგა“, მისი დამფუძნებელი და, საერთოდ, ძალიან ბევრი ადამიანი დარწმუნებული იყო, სამართლიანობა იზეიმებდა. სტოკჰოლმში არბიტრაჟი დაჩქარებული წესით იმიტომ გაიმართა, რომ საქმე დასაჩქარებელი გახდა.
_ ანუ საქმის დაჩქარებული განხილვა საჭირო იმიტომ გახდა, რომ ფაბრიკა არ გაყიდულიყო?
_ დიახ, ეს არის მთავარი, ანუ ის მოხდა, რაც, წესით, არ უნდა მომხდარიყო. როგორც ჩანს, წარმოების გაყიდვა და ამით ზაზა ოქუაშვილის დასჯა მას შემდეგ მოიფიქრეს, რაც „იმედის“ ეთერში ის ცნობილი წერილი არ წაიკითხა. ამის შემდეგ „ომეგასთვის“ პროცესები ბევრად უარესად განვითარდა, რაც მოსალოდნელიც იყო.
_ „ბევრად უარესად განვითარება“ რით გამოიხატებოდა?
_ ყველა ის დაპირებული, ასე ვთქვათ, სიკეთე უკუღმა შეტრიალდა.
_ დაპირებული, მაინც, რა იყო?
_ მათგან იყო შემოთავაზებული, რომ დეკლარირებულ 50 მილიონის დავალიანებას საურავები ჩამოაკლდებოდა. ასევე ძირ თანხას კიდევ 30 მილიონი ჩამოაკლდებოდა და გადასახდელი სულ 11 მილიონი დარჩებოდა. ცოტა მორიდებულ ვითარებაში იყვნენ, თეთრი ყვავებივით რომ არ გამოვჩნდეთ, თორემ ამ 11 მილიონსაც ჩამოვაკლებთო. მოკლედ, ამ დარჩენილი თანხიდან მილიონი იმიტომ უნდა გადახდილიყო, რომ ყველაფერ ზემოთქმულის დაწყება შეძლებოდათ, ანუ საზოგადოებისთვის უნდა დაენახვებინათ, აი, „ომეგამ“ ბიუჯეტში მილიონი შეიტანა და ჩვენც ნაბიჯი გადავდგითო. დარჩენილი 10 მილიონი ხუთ წელიწადზე უნდა გადანაწილებულიყო. სხვათა შორის, ეს მილიონები ერთ-ერთ ბიზნესმენს შემოატანინეს, რომელსაც ვითომ მანქანები უნდოდა.
_ გაგვახსენეთ: ამ მოლაპარაკებას ხელისუფლებიდან ვინ აწარმოებდა?
_ ფინანსთა მინისტრი ივანე მაჭავარიანი და მისი იმჟამინდელი მოადგილე მიხეილ დუნდუა. მათ „ომეგასა“ და ფაბრიკის დირექტორებს უთხრეს, რესტრუქტურიზაციაზე განაცხადი ამ პირობებით ორშაბათს შემოიტანეთო. საერთოდ, წესია, რომ რესტრუქტურიზაციაზე განაცხადი კომპანიის ხელმძღვანელობას შეაქვს და ეს წესი ხომ უნდა დაეცვათ?! შეხვედრა პარასკევს შედგა და, სხვათა შორის, აქციზური მარკები იმავე საღამოს გასცეს. ალბათ, დარწმუნებული იყვნენ, რომ იმ ტექსტს, რომელიც გადასცეს, ზაზა ოქუაშვილი წაიკითხავდა. იქ კიდევ სხვა თემებიც იყო, რომლებზედაც ახლა ლაპარაკი აღარ ღირს.
ამის მერე ის მოხდა, რაც მოხდა, ანუ ზაზა ოქუაშვილმა ის ტექსტი არ წაიკითხა.
_ თქვენი ვერსიით, ტექსტი, სადაც ოქუაშვილს ყველაფერი გვარამია-სააკაშვილისთვის უნდა დაებრალებინა, ყანდიაშვილ-ნაცვლიშვილის დაწერილი იყო თუ სხვა ვინმესი?
_ ვერსიებზე ნუ ვისაუბრებთ. ალბათ, იმ ცნობილი გვარების კოლექტიური შემოქმედება იყო, რომლებზედაც ამბობენ, რომ ასეთ წერილებს წერენ. ვერ დავიჩემებ, ამან თუ იმან გააკეთა-მეთქი, თუმცა საქმე არც ისეა, რომ არ ვიცოდეთ.
_ ანუ არაპირდაპირ ადასტურებთ, რომ ამ ტექსტის ავტორები ყანდიაშვილ-ნაცვლიშვილი იყვნენ?
_ ჯერჯერობით, არაფერს ვადასტურებ… ამის შემდეგ მათ, უფრო სწორად, ბიძინა ივანიშვილმა ზაზა ოქუაშვილის დასჯა მის ხელთ არსებული საშუალებებით გადაწყვიტა და ეს საშუალებები, რა თქმა უნდა, სახელმწიფო უწყებებია. მოკლედ, სასამართლოში შუამდგომლობა შეიტანეს, _ ეს თანხა რომ ამოვიღოთ და ბიუჯეტს არაფერი დააკლდეს, საჭიროა, ფაბრიკა გაიყიდოსო. სხვათა შორის, ფაბრიკის ფასი ბევრად მეტია, ვიდრე ის 50 მილიონი. სასამართლომ ეს შუამდგომლობა დააკმაყოფილა და პროცესები ისე წავიდა, როგორც უნდა წასულიყო. ეს ინფორმაცია „ომეგაში“ დეკებერში მივიდა და მაშინვე დაიწყო მოქმედება, რომ საერთაშორისო სასამართლოსთვის მიგვემართა და ფაბრიკა არ გაყიდულიყო. მოკლედ, სარჩელი სტოკჰოლმის არბიტრაჟში შევიდა და მან ის გადაწყვეტილება გამოიტანა, რაც სამართლიანად მიიჩნია.
_ ქალბატონო ნატო, თავიდან ითქვა, რომ ლონდონის სასამართლომ დაკითხვაზე ქუმსიშვილი, ხადური და სხვა ყოფილი თუ მოქმედი მაღალჩინოსნები გამოიძახა. არსებობდა იმის ალბათობაც, რომ დაკითხვაზე თავად ივანიშვილიც დაებარებინათ. ამ კუთხით რა სიახლეა?
_ ეს სხვა პროცესია, რომელსაც, სამწუხაროდ, ვერ დააჩქარებ.
_ გასაგებია, რომ, სტოკჰოლმის არბიტრაჟის გადაწყვეტილებით, ფაბრიკა არ გაიყიდება, მაგრამ საწარმო მუშაობას მაინც ვერ ახერხებს, რადგან აქციზურ მარკებს არ აძლევენ. ამ გადაწყვეტილებაში მარკებზე არაფერია ნათქვამი?
_ არა. არბიტრაჟმა გადაწყვეტილება იმის მიხედვით მიიღო, რაც შუამდგომლობა იყო. აქციზური მარკების არმოცემასთან დაკავშირებით უკვე სხვა სახის მოთხოვნებია წაყენებული, რაც, პროცედურულად, დაჩქარების გარეშე ჩატარდება.
_ ისევ სტოკჰოლმში?
_ დიახ, საზღვარგარეთ.
სტოკჰოლმის არბიტრაჟში მოპასუხე სახელმწიფოა და ასეთი წესია _ პროცესის დაწყებამდე სახელმწიფოს, ანუ, ამ შემთხვევაში, იუსტიციის სამინისტროს, ატყობინებენ, რომ სარჩელის შეტანას აპირებ. სახელმწიფომ უნდა გააანალიზოს, ყველაფერი ეს მისთვის რა შედეგის მომტანი იქნება. როგორც ჩანს, გააანალიზეს, რომ ამაში მათთვის საინტერესო და მნიშვნელოვანი არაფერი იყო. შესაბამისად, შეტყობინებაზე პასუხი არ გაიცა. განაჩენის გამოტანის შემდეგ იუსტიციის სამინისტროს 24-საათიანი დრო კიდევ ეძლევა, დანარჩენ საკითხებზე დავას გააგრძელებს თუ არა. ამ 24 საათში მიიღო გადაწყვეტილება, რომ სახელმწიფო „ომეგასთან“ მოლაპარაკებას არ გეგმავს. კეთილი და პატიოსანი _ პროცედურები უცხოეთის იურისდიქციის მიხედვით გაგრძელდება.
_ ე. ი., წაგების მიუხედავად, სახელმწიფომ მაინც ქვა ააგდო, თავი შეუშვირა და „ომეგას“ სიგარეტის ფაბრიკისთვის აქციზების მიცემას არ აპირებს?
_ მართალია, წააგო, მაგრამ მაინც უნდა, რომ „ომეგა ჯგუფი“ მაქსიმალურად დააზიანოს _ როცა აქციზური მარკები და პროდუქცია არ გაქვს, ვერ ფუნქციონირებ.
_ სტოკჰოლმის არბიტრაჟის გადაწყვეტილებით სახელმწიფომ ზაზა ოქუაშვილს რამდენი უნდა გადაუხადოს?
_ დაახლოებით, 300 ათასი ლარი, თუმცა აღსანიშნავია, რომ სახელმწიფოს ფრანგული საადვოკატო კომპანიისთვის საკმაოდ სოლიდური ჰონორარი უკვე გადახდილი აქვს. საერთოდ, რაც უნდა კარგი საადვოკატო კომპანია იყოს, თუ არგუმენტები არ გააჩნია, საქმეს კარგად ვერ წარმოაჩენს. მოკლედ, როცა იციან, რომ საქმე წაგებული აქვთ, ბიუჯეტიდან თანხების გაცემას არ ერიდებიან. ამის თქმის საშუალებას ბევრი რამ მაძლევს, მაგრამ კონკრეტულად „ომეგას“ საქმეზე ვიტყვი: იუსტიციის სამინისტრომ, შესაბამისად, წულუკიანმა, განაცხადა, რომ ამ ჯარიმას არ გადაიხდის.
_ ამის უფლება აქვს?
_ ყველაფრის უფლება აქვს, მაგრამ ამაზეც ჯარიმაა დაწესებული.
აქვე, აუცილებლად უნდა ვთქვა, _ ამ საქმეს ასე ჰქვია: „ზაზა ოქუაშვილი საქართველოს სახელმწიფოს წინააღმდეგ“, ანუ ზაზა ოქუაშვილმა რომ მოიგო და ამის შემდეგაც მოიგებს, ყველაფერი სახელმწიფომ, ანუ საქართველოს ბიუჯეტმა უნდა გადაიხადოს, რაც მე, როგორც ქართველ დეპუტატს, ძალიან არ მომწონს. წესით, ეს თანხა მან უნდა გადაიხადოს, ვინც „ომეგა ჯგუფი“ აზარალა და ეს ბიძინა ივანიშვილია, მაგრამ რადგან ივანიშვილი თავის შურისძიებას თუ, პირდაპირ ვიტყვი, სიხარბეს, რომ „ომეგას“ ქონება წაეღო, სახელმწიფო უწყებების საშაულებებით ახორციელებდა და ახორციელებს, იურიდიულად, საქმე სწორედ სახელმწიფო უწყებებთან გაქვს. ამიტომაც ვამბობ, რომ სახელმწიფო ბიუჯეტი არაფრად უღირთ _ ქალბატონი წულუკიანის ნათქვამი, დაკისრებულ ჯარიმას ზაზა ოქუაშვილს არ გადავუხდიო, იმას ნიშნავს, რომ ამ თანხას დღეში 2% ემატება. მართალია, თქვა, რომ ამ გადაწყვეტილებას გაასაჩივრებს, მაგრამ სანამ გაასაჩივრებს, თვეები გავა და წულუკიანს რა გარანტია აქვს, რომ ამ გასაჩივრებას მოიგებს? მე თუ მკითხავთ, თეორიულად ერთი პროცენტია, რომ გასაჩივრება მოიგოს. შემიძლია გითხრათ, რომ ამ პროცესსაც წააგებს და ბიუჯეტიდან გადასახდელი კიდევ ხომ უფრო მეტი ექნება?
_ ანუ „ოცნებას“ ბიუჯეტი ფეხზე ჰკიდია?
_ ბიუჯეტი მხოლოდ მაშინ ანაღვლებთ, როცა უნდათ, საკუთარი თავი კარგად წარმოაჩინონ და საზოგადოებას უთხრან, აი, ხალხზე როგორ ვზრუნავთო, მაგრამ, რეალურად, ბიუჯეტსაც ისე იოლად ანიავებენ, როგორც ხალხისთვის მიცემულ დაპირებებს! მათი გადასაწყვეტია, რას იზამენ და უკვე გადაწყვიტეს _ წულუკიანმა უკვე თქვა და ნათქვამს არ გადავა. ეს, ალბათ, პრინციპულობად მიაჩნია, მაგრამ ძალიან ცუდია, რომ თავიანთი მოქმედებებით მარტო „ომეგას“ კი არა, დანარჩენ საქმეებშიც, სახელმწიფოსა და მოსახლეობას დიდ ზიანს აყენებენ!
_ ადრე თუ გვიან, სახელმწიფო ზაზა ოქუაშვილს ზემოხსენებულ თანხას გადაუხდის. ამ კომპენსაციას „ომეგა“ რაში დახარჯავს?
_ ზაზა ოქუაშვილი ამ თანხას ისევ საქართველოს სახელმწიფოსთვის გამოიყენებს, ანუ ისევ ქართულ წარმოებაში, ქართულ ტელევიზიაში და ქართული სინამდვილის ცოტა გაუმჯობესებაში ჩადებს. ამ თანხას ბანკში არ შევინახავთ!
_ კეთილი, მაგრამ, ქალბატონო ნატო, თქვენი ოჯახი დაუპირისპირდა კაცს, რომელიც მსოფლიოს უმდიდრესი ადამიანების ორასეულშია შესული. გქონდათ იმედი და გარანტია, რომ თუნდაც იმ შედეგს მიიღებდით, რაც სტოკჰოლმის არბიტრაჟში დადგა?
_ ძალიან მეეჭვება, ივანიშვილს იმდენი მილიარდი ჰქონდეს, რამდენიც ამ ჩამონათვალში მის სახელზე წერია. ამის ეჭვს ის გარემოება მაძლევს, რომ ნამდვილად მილიარდერი კაცი სხვის ქონებს თვალს არ დაადგამს და არ მოინდომებს, რომ თვითონ წაიღოს.
_ მას ქონება რუსული სქემით აქვს ნაშოვნი. ჩრდილოეთში კი ფული, როგორც ამბობენ, ზუსტად სხვისი ქონების მითვისებით კეთდება.
_ არ ვიცი, რუსეთში ფული როგორ კეთდებოდა, მაგრამ მე კლასიკური ბიზნესმენის ხასიათზე ვსაუბრობ, ანუ როცა სიაში შენი გვარის გასწვრივ ამდენი მილიარდი წერია, სიგარეტის თითო კოლოფიდან ორნახევარი თეთრის წაღება არ უნდა მოინდომო. საერთოდ, ბევრი რამ არ უნდა მოინდომო. თქვენ კი ამბობთ, სხვა სტილის ბიზნესმენიაო, მაგრამ, მგონი, საკუთარ თავს ბიზნესმენს არ უწოდებს. ყოველ შემთხვევაში, მე არ გამიგია, ოდესმე ეთქვა, ბიზნესმენი ვარო, თუმცა უთქვამს, ბანკიც მაქვს, ესეც მაქვს და ისიცო, მაგრამ მის აღქმაშიც არ არის, რომ ბიზნესმენია, თუმცა ეს ცალკე ანალიზის თემაა.
რაც შეეხება კითხვაზე პასუხს, გარანტია ერთადერთია _ სიმართლე, ანუ იცი, რომ აბსოლუტურად მართალი ხარ და ისიც იცი, რომ დამოუკიდებელი სასამართლო ვითარებას რეალურად შეაფასებს. ეს და ამაზე მეტი ფულიც კი დამოუკიდებელ სასამართლოებზე ვერ მოქმედებს. უცხოეთში სასამართლო მართლაც, მესამე ხელისუფლებაა. იქ ხელისუფლებებიც ნორმალურია და _ სასამართლოც. სახელმწიფოს სიძლიერე კი იმით განისაზღვრება, თუ რამდენად დამოუკიდებელია სასამართლო! პროფესიონალი მოსამართლეები, რაღა თქმა უნდა, ჩვენთანაც არიან, მაგრამ თავიანთი პროფესიონალიზმის გამოვლენის ნება ყოველთვის არ აქვთ და ამ ნების გამოვლენის ნებას სწორედ ქვეყანაში არსებული ნაკლებდემოკრატიულობა არ იძლევა. როცა ქვეყანაში პროფესიონალიზმის გამოვლენის ნება არ არსებობს, ამ ნებას გაბედული ადამიანები ავლენენ. პროფესიონალიზმი და გაბედულება კი ყოველთვის ერთ რანგში არაა. ეს უკვე ხასიათია, ანუ ადამიანმა შეიძლება, ბევრი რაღაც იცოდეს, მაგრამ ბრძოლის ხასიათი არ ჰქონდეს. მოკლედ, დღევანდელ ქართულ სასამართლოში ნასწავლები კი არიან და ისიც იციან, კანონის მიხედვით, შინაგანი გონებით, განაჩენი როგორი გამოიტანონ, მაგრამ ყველას ვერ აქვს შინაგანი ხასიათი, რომ ქვეყანაში შექმნილ არადემოკრატიულობას წინააღმდეგობა გაუწიოს!
_ თქვენი ოჯახი პირველი იყო, რომელმაც ბიზნესტერორზე ხმამაღლა ლაპარაკი დაიწყო. ქალბატონო ნატო, თქვენი აზრით, ივანიშვილმა ზაზა ოქუაშვილის ბრძოლისუნარიანობა სათანადოდ ვერ შეაფასა და საქმე აქამდე იმიტომ მივიდა?
_ გეთანხმებით: ამ შვიდი წლის განმავლობაში ზაზა ოქუაშვილი პირველი იყო, რომელმაც თქვა, _ ეს მმართველი ძალა და ვერტიკალი უუნარო კი არა, კორუფციაშია ჩაფლულიო. მან კიდევ სხვა სიტყვებიც გამოიყენა, რომელსაც ახლა სხვებიც უკვე ადვილად ამბობენ.
რა თქმა უნდა, ვიცოდით, რომ რისკზე მივდიოდით, მაგრამ როგორც გითხარით, სიმართლე დიდ ძალას გაძლევს და თუ ასე არ მოიქცევი, მაშინ ჭაობს უნდა ჩაჰყვე, მაგრამ ამის უფლებას არც ღირსება გაძლევს და არც _ ხასიათი.
რაც შეეხება ივანიშვილს, მან თავისებურად სათანადოდ შეაფასა და ფაბრიკის გაყიდვის პროცედურა ვითარების სწორედ ივანიშვილისეული შეფასებაა, _ დამიპირისპირდა? ახლა ნახეთ, რას ვუზამო. მათ ქონების მოპოვება ისეთი მნიშვნელოვანი ჰგონიათ, რომ რა მოხდა მერე, თუ ვიღაცას რაღაცას დააბრალებ და თავზე ნაცარს დაიყრი, სამაგიეროდ, რაღაცებს დაგპირდებიან, აღიარებულ ვალს ჩამოგაწერენ. ყველაფერი ეს იმდენად მომხიბლავია, რომ ვერ წარმოუდგენიათ, ამაზე ვინმემ უარი რატომ უნდა თქვას.
_ ეს ამ ამბის შუა პროცესია, მაგრამ დასაწყისზე გეკითხებით, ანუ ივანიშვილმა ოქუაშვილის ბრძოლისუნარიანობა თავიდანვე სათანადოდ ვერ შეაფასა, თორემ მასთან ვაჭრობას ხომ არ დაიწყებდა? რაც შეეხება ჩაყოლას, პირველი ნაბიჯი გადადგით _ „პატრიოტთა ალიანსის“ წევრები გახდით და ალბათ, იმედი გქონდათ, რომ წნეხს აირიდებდით, არა?
_ ეჭვიანმა ჟურნალისტმა შესაძლოა, ასეც შეაფასოს.
_ მე კი არ ვაფასებ, არამედ ზაზა ოქუაშვილმა თავად თქვა, სურვილი არ მქონდა, მაგრამ პარტიას ვაფინანსებდიო.
_ სურვილზე არ არის.
_ აბა, რაზეა?
_ იცით, როგორ არის? _ როცა ორგანიზაციაში ხარ, გარკვეულ მოქმედებებს კისრულობ და ეს ჩვეულებრივი ამბავია.
_ პარტიაში თქვენი სურვილით მიხვედით?
_ „პატრიოტთა ალიანსიდან“ შემოთავაზება ნამდვილად იყო. ვითარებას რომ გადავხედეთ და პარლამენტის წევრი რატომაც არ უნდა ვყოფილიყავი? ყველაზე მისაღები ეს პარტია გახლდათ, თან სახელწოდებაც ძალიან მომხიბლავი იყო. ამ პარტიის სულისკვეთებასთან, ჩვენი ტარდიციონალისტობიდან გამომდინარე, სიმართლე გითხრათ, პრობლემა არ გვქონია.
_ არ დაგიშვიათ, რომ ყველაფერ ამით ივანიშვილი თქვენ „დავერბოვკებას“ ცდილობდა?
_ ვინც რა უნდა ეცადოს, საბოლოო ჯამში, გადაწყვეტილებას თავად იღებ. ამდენად, სხვების მცდელობები ჩვენთვის საშიში არ არის იმიტომ, რომ იმ მცდელობების აზრსაც, არსსაც და მიზანსაც, მადლობა ღმერთს, გონება გვაქვს და ვხვდებით ხოლმე.
_ დღეს დამოუკიდებელი დეპუტატი ხართ და ხშირად მწვავე განცხადებებსაც აკეთებთ. ის, რომ პოლიტიკური ზურგი არ გაგაჩნიათ, დისკომფორტსა და დაუცველობის განცდას არ გიქმნით, მით უმეტეს, იმის ფონზე, რაც გადაიტანეთ?
_ სწორედ იმის გამო, რაც გადავიტანეთ, დაუცველობის განცდა ნამდვილად არ მაქვს _ მაშინ პარლამენტში ჩვენი დამცველი არავინ ყოფილა.
_ უმცირესობა გიცავდათ.
_ თავიდან ისე იყო, აი, ცივი თავაზიანობა რომ ჰქვია. ნელ-ნელა კი ყველაფერი ის მაშინ ითქვა, საჩინო გახდა. მაშინდელი ნათქვამი ელდასავით იყო _ უუნარო მთავრობა, თურმე, კორუფციაში იყო ჩაფლული და რეკეტით დაკავებული.
_ ისე, „ომეგას“ საქმის ერთ-ერთი ფიგურანტი, მამუკა ხაზარაძე, ისევ პირველ ჩვენებას „აწვება“, ანუ დღესაც „თიბისიდან“ ფულის გატანის ხელისუფლებისეულ ვერსიას ავითარებს. თქვენი აზრით, რატომ?
_ იცით, რა? _ ამ საქმეში ერთად იყვნენ. დოსტოევსკი ერთგან ამბობს, _ ყველაზე მყარი ერთობა დანაშაულებრივი ერთობააო. არ გამოვრიცხავ, რომ „ომეგას“ საქმე ხაზარაძისთვის, ერთგვარად, სავაჭრო თემა იყო!
_ ამას რატომ ამბობთ?
_ კონკრეტული ეპიზოდის ახსნა იმაზეა დამოკიდებული, ხაზარაძე სიმართლეს რამდენად იტყვის, თუმცა სიმართლის გამომჟღავნება მარტო ხაზარაძეზე არ არის დამოკიდებული და იქ ბევრი რამეა საიმისო, რომ როცა დამოუკიდებელი სასამართლო ამ საქმის განხილვას დაიწყებს, სიმართლე ხაზარაძის აღიარების გარეშეც თვალსაჩინო გახდეს.
ისე, ხაზარაძე კი არა, კობა გვენეტაძეც კი არ აღიარებს და ეროვნული ბანკის პრეზიდენტს პასუხი აქვს, _ კონფიდენციალურიაო. მაგრამ რა არის კონფიდენციალური _ „თიბისიდან“ თანხის გატანის ეპიზოდი შეისწავლა თუ არა? გასაგებია, რომ მანაც მშვენივრად იცის, რა უნდა დამალოს და მალავს.
_ ისე, „ომეგას“ საქმეზე საქართველოში დაწყებული გამოძიება რა სტადიაშია?
_ საქმე თაროზე შემოიდო _ ჩემი დაკითხვა, ლამის, ბოლომდეც არ მიიყვანეს, ანუ ვეუბნებოდი, კიდევ მკითხეთ-მეთქი, მაგრამ მპასუხობდნენ, _ ეგენი ვიცით და რატომ უნდა გკითხოთო?
_ ვიდრე საუბარს მოვრჩებით, კიდევ ერთ თემას უნდა შევეხო: ითქვა, რომ ოქუაშვილმა „ომეგას“ საქმის მოგვარება თითქოს ეკა ბესელიას სთხოვა.
_ ეს ჭორი კი არა, აბსოლუტურად შეთხზული და გადმოგდებული ამბავი იყო. ასე რომ, ასეთი რაღაცების ნამდვილად არ მეშინია! ასეთი ჭორების რომ მეშინოდეს, ბევრ რამეზე თავს შევიკავებდი და მოვერიდებოდი, _ ასე ან ისე არ თქვან-მეთქი. ყველანაირ ნათქვამზე ძალიან არგუმენტირებული პასუხი მაქვს!
_ ბოლოს, ქალბატონო ნატო, პრეზიდენტმა ზურაბიშვილმა ქალების დისკრიმინაციაში დაგდოთ ბრალი.
_ ქალბატონ ზურაბიშვილამდე სექსიზმში ბრალი ერთ-ერთმა ინტერნეტგამოცემამ იმის გამო დამდო, რადგან „ომეგასთან“ ვარ დაკავშირებული, თითქოს შესაბამისი აზროვნებით ვერ გამოვირჩევი და დასაძრახი ვარ. არადა, სექსისტური არაფერი მითქვამს, პირიქით, ქალბატონ მაია ცქიტიშვილს ძალიან მორიდებით ვუთხარი, ინფრასტრუქტურის სამინისტრო რთული უწყებაა იმიტომ, რომ ძალიან ბევრ, მათ შორის, კორუფციულ რისკსაც შეიცავს, ეს კი ადამიანისთვის დიდი ტვირთია და ქალისთვისაც-მეთქი. მოკლედ, ამ ნათქვამის ქვეტექსტი ის იყო, გამეტებული ხართ-მეთქი, მაგრამ სწორედ ეს ფრაზა გამოიყენეს და არც გამიკვირდა, რომ ქალბატონმა პრეზიდენტმაც ამას მიაქცია ყურადღება, თუმცა აქვე იმასაც ვიტყვი: შს მინისტრის მოადგილემ, ქალბატონმა ნათია მეზვრიშვილმა, პრაქტიკულად, იგივე თქვა, _ ჩვენ, ქალებს, მწვერვალების დასაპყრობად მეტი ძალისხმევა გვჭირდებაო, მაგრამ არავის მოსვლია აზრად, რომ მისთვის სექსისტობა დაებრალებინა!
ქალი და მამაკაცი თანასწორები და თანაბრები, რა თქმა უნდა, კანონის მიმართ არიან, მაგრამ ერთნაირები ვერ იქნებიან და ამიტომაც არის, რომ თუნდაც სპორტში შტანგის აკვრისას ქალებისთვის უფრო ნაკლები წონაა განსაზღვრული!
_ ქალბატონო ნატო, ბოლოდრონდელმა ამბებმა ადამიანების ნამდვილი სახე დაგანახათ?
_ ბევრი მეგობარი შემაძენინა _ გამოჩნდა, რომ უცხო ადამიანები თანაგვიგრძნობენ. ეს გარკვეულ სიმტკიცეს გაძლევს. რა თქმა უნდა, ზოგი ადამიანის სახეც აშკარად გამოიკვეთა, თუმცა რომ გითხრათ, გამიკვირდა-მეთქი, ასე არ არის!

გიორგი აბაშიძე