„ქართული ოცნების“ თავმჯდომარეს გუბაზ სანიკიძე ძალიან არ უყვარს. მეტიც, ბოლო სატელევიზიო გამოსვლისას ბიძინა ივანიშვილმა კოალიციის ყოფილ წევრს „ნაციონალებთან“ ურთიერთობაში დასდო ბრალი, ანუ ივანიშვილის თქმით, ახლანდელი გადასახედიდან ძნელი დასაჯერებელია, რომ ის „ნაციონალური მოძრაობის“ ოპოზიციაში იყო. ამ ბრალდებას სანიკიძე ბრალდებითვე პასუხობს და „ქრონიკა+“-თან ინტერვიუში ივანიშვილს იმ დროს ახსენებს, როცა ის „ნაციონალური მოძრაობის“ მეკავშირე იყო.

_ ბატონო გუბაზ, ივანიშვილი ვერ გივიწყებთ.
_ კი, ჩემ მიმართ სენტიმენტები აქვს.
_ ამას რით ხსნით _ თქვენზე ძალიან გაბრაზებულია თუ ის ვერ გადაუტანია, რომ დაგკარგათ?
_ გაბრაზებულია!
_ გაბრაზებული რატომ არის?
_ მის მიმართ, მაინცდამაინც, დიდი დითირამბებით არ გამოვირჩევი და, ეტყობა, ნაწყენია.
_ ივანიშვილს დითირამბებს არც სხვა „ყოფილები“ უძღვნიან, მაგრამ მათ არც კი ახსენებს.
_ მის გულთან, როგორც ჩანს, ჩემი სიტყვა უფრო ახლოს არის.
_ არაერთხელ გითქვამთ, ივანიშვილს ვეუბნებოდი, ასე და ასე დაგემართებაო, ანუ თქვენი წინასწარმეტყველება ახდა და სწორედ იმას არ გპატიობთ, თავის დროზე, სიმართლე რომ უთხარით?
_ დიახ.
_ ივანიშვილი „ნაციონალებთან“ ალიანსში გდებთ ბრალს და არც იმის თქმას ერიდება, რომ, თავის დროზე, სააკაშვილის ფსევდოოპოზიცია იყავით. ეს აზრი, როგორ ფიქრობთ, თავად მოუვიდა თუ ნაცვლიშვილ-ყანდიაშვილმა და სხვებმა მიაწოდეს?
_ უბრალოდ, ჩამოყალიბებული მანიაკია. მანიაკის თვისება ისაა, რომ ყველას ყველაფერი დააბრალოს, თავად კი ანგელოზი იყოს! რომ გითხრათ, ღმერთია მოწამე, ბიძინა ივანიშვილი უკვე მეცოდება!
_ რატომ?
_ იმიტომ მეცოდება, რომ გალიაში მოქცეული არსებასავითაა. მარტო დარჩა და, პრაქტიკულად, ყველაფერი, რაც ვუთხარი, დაემართა. ეს სამწუხარო მარტო მისთვის კი არა, ქვეყნისთვისაცაა!
ზოგადად, ეჭვიანი კაცია და ახლა რაღაც ხომ უნდა დამაბრალოს? ხომ ვერ დამაბრალებს, 150 კილოგრამიაო, თუმცა ეს თემაც შეუძლია, განავითაროს. ჰოდა, იმას მაბრალებს, რაც წლების განმავლობაში თვითონ იყო. როგორც ჩანს, საქართველოს უახლესი ისტორია აშკარად არ ახსოვს.
_ იმას გულისხმობთ, თავის დროზე, „ნაციონალური მოძრაობის“ ხელისუფლებას რომ აფინანსებდა?
_ აფინანსებდა კი არა, როდის მიხვდა, სააკაშვილი რომ არ ვარგოდა? _ 2011 წლის 26 მაისის მერე და ეს დოკუმენტურად ცნობილია, ანუ როცა პოლიტიკაში შემოვიდა, თქვა, _ 26 მაისს მივხვდი, რომ ეს კაცი აღარ ვარგაო. 26 მაისამდე კი ის ხელისუფლების პარტნიორი იყო.
_ სხვათა შორის, პარტია „ოცნების“ კი არა, კოალიცია „ქართული ოცნების“ წევრი იყავით, თუმცა ივანიშვილმა ისე გაგასაღათ, როგორც ყოფილი „მეოცნებე“. ჰოდა, როცა კოალიციაში იყავით, ივანიშვილთან იგივე 26 მაისამდელ პერიოდზე თუ გისაუბრიათ?
_ ყველა, მთელი დედამიწა, ვინც მისკენ არის, „ოცნება“ ჰგონია. ის კი, ვინც მისი მტერია, „ნაცი“ ჰგონია. სამყაროს ძალიან პრიმიტიულად ყოფს.
სხვათა შორის, ბევრი რაღაც არ იცის და იგივე ჩემი პროფესია მაშინ გაიგო, როცა უკვე დეპუტატი ვიყავი. არცოდნა არცოდვაა, მაგრამ ხომ შეიძლება, ადამიანმა იკითხო? ივანიშვილს ხუთჯერ-ექვსჯერ ვარ შეხვედრილი, მაგრამ შევატყვე, რომ ბევრი რაღაც არ იცის. ხომ გითხარით, უკვე წინა მოწვევის პარლამენტის დეპუტატი ვიყავი, როცა ჩემი სპეციალობა გაიგო.
_ თქვენ უთხარით, პროფესიით ვინ ხართ თუ სხვას ჰკითხა?
_ საუბარი ჩამოვარდა და ვიღაც კაცმა უთხრა.
_ ვინ „ვიღაც კაცმა“?
_ ამის თქმა ახლა საჭირო არ არის, მაგრამ იმან უთხრა, ეგ, კაცო, აღმოსავლეთმცოდნე და ისტორიკოსიაო. არ ვიცი, მანამდე რა პროფესიის ვეგონე ან მასზე რა შთაბეჭდილებას ვტოვებდი.
_ ასეა თუ ისე, როგორც ბოლო საჯარო გამოსვლიდან გახდა ნათელი, ივანიშვილს, სლენგით რომ ვთქვათ, „ჩახვევა“ სამ-ოთხ ადამიანზე აქვს. მინდა, ეს თემა გავშალოთ და თქვენი აზრი მოვისმინო _ თქვენ, უსუფაშვილსა და ხუხაშვილს იმიტომ ვერ გივიწყებთ, რომ გენდობოდათ და ეიმედებოდით?
_ არ ვიცი, ბიძინა ივანიშვილის გულისნადების სპეციალისტი არ ვარ და ვერ გეტყვით. ჰაფიზიც არ ვარ, რომ მისი გულის სამყაროზე ლექსები ვწერო. რა უნდა და რა სჭირს, ვერ გავიგე. როგორც ჩანს, ჩემი კრიტიკა არ მოსწონს. ზოგადად, კრიტიკა არ მოსწონს. მართალია, უზრდელობაში არ გადავდივარ, მაგრამ ჩემი კრიტიკა მწვავეა. ჰოდა, გულზე ხვდება. ეს წმინდა ადამიანური საკითხია და ამაში სასწაული არაფერია.
ისე, ცოტა ღრმად რომ ჩაფიქრდეს, მე კი არ ვარ მისი მტერი, არამედ, ისინი ღუპავენ, ვინც გარშემო ჰყავს შემოკრებილი, მაგრამ ეს მისთვის ძალიან რთული კომბინაციაა და ვერ გაიგებს.
_ გარშემო, მგონი, აღარავინ დარჩა და ვისღა უსმენს?
_ ვინც ჰყავს, ვინც ტექსტებს უწერს, ძველი „პუტჩისტები“.
_ ხაინდრავას გულისხმობთ?
_ არ ვიცი, არ ვიცი. თვითონ ხომ იცის, ვინც ჰყავს. ერთი წამოსცდა _ შალვა რამიშვილი.
_ დიახ, თქვა, პატარა შალვაო…
_ „შალვა მცირე“…
_ ბატონო გუბაზ, „პუტჩი“ ახსენეთ და მოდით, საუბარს ამ თემით გავაგრძელებთ: ზვიად გამსახურდიას გვერდით იყავით და, თქვენი აზრით, პირველი პრეზიდენტისა და 1989 წლის 9 აპრილის თემის წამოწევა რას ემსახურება _ გრძელვადიანი გათვლაა თუ კონკრეტულად ზუგდიდის მერის არჩევნებს უკავშირდება?
_ ეს ამბავი ზუგდიდის არჩევნებამდეა, ანუ ზუგდიდის არჩევნებამდე ივანიშვილი „ზვიადისტიც“ გახდა, მორწმუნეც და ეროვნულობასაც „აწვება“. რომ ვუთხარი, სატანისტი ხომ არ ხარ-მეთქი, მეორე დღესვე გაიქცა და საპატრიარქოში პატრიარქთან მივიდა, თითქოს ცნობის გამორთმევა უნდოდა, რომ სატანისტი არ არის.
_ ამ შეხვედრის შემდეგ ცნობილი გახდა, რომ სამების მოხატვას ივანიშვილი დააფინანსებს… ზვიად გამსახურდიას გარდაცვალების გამოძიება 19 მაისამდე არ მოესწრება. ამიტომაც, მგონია, რომ ყველაფერი ეს ზუგდიდის მერის კი არა, მომავალ საპარლამენტო არჩევნებს უკავშირდება.
_ ვნახოთ… მას ხომ სირცხვილის შეგრძნება არ გააჩნია: ერთ დღეს ვიღაცას რომ გალანძღავს, მეორე დღეს მის ქებას დაიწყებს. ხომ გვახსოვს, ზვიადზე რა აქვს ნათქვამი, მმართველობაც დაუწუნა და მანერებიც, ბოლოს კი საქმე იქამდე მიიყვანა, აი, მე ვარ, რაც ვარო.
_ ეს თემა, როგორ ფიქრობთ, ე. წ. ზვიადისტურ საზოგადოებაზე დადებითად იმუშავებს?
_ არა, რა თქმა უნდა, არ იმუშავებს.
_ ივანიშვილმა თურქული სერიალები ეროვნული საფრთხის რანგში აიყვანა და განაცხადა, რომ „ქართუ“ ქართული სერიალებისა და ფილმების გადაღებას დააფინანსებს…
_ იმედი მაქვს, რომ მთავარ გმირებს თვითონ ითამაშებს!
_ სარკაზმი იქით იყოს და კინოს, როგორც პროპაგანდის იარაღს, კომუნისტები იყენებდნენ. თქვენ, როგორც ისტორიკოსი, რას ფიქრობთ, ივანიშვილის მიზანი საშუალებას გაამართლებს?
_ ზოგადად, ისტორიული სერიალების გადაღების მოწინააღმდეგე არ ვარ იმიტომ, რომ დღევანდელ მსოფლიოში სხვადასხვა ქვეყანა ექსპანსიას სწორედ ისტორიული სერიალებით ახდენს. ავიღოთ, მაგალითად, თურქული სერიალები, იგივე სულეიმანზე გადაღებული, რომელშიც ისტორიული საკითხები აბსოლუტურად დამახინჯებულია, მაგრამ ბევრს მოსწონს.
მოკლედ, სერიალების წინააღმდეგი არ ვარ, ოღონდ არ ვიცი, ვის და რას გადააღებინებს, რა სცენარებს დაწერენ და გმირები რა ენაზე იმეტყველებენ. თუ ისტორიულ სერიალებში გმირებმა თბილისური „ტო“ და „შე ჩემა“ იძახეს, ეს წყალწყალა სერიალები იქნება!
_ სხვათა შორის, ივანიშვილის დაფინანსებული ერთი სერიალი უკვე ვნახეთ _ „ოცნებას“ იმედი ჰქონდა, რომ 2016 წლის საპარლამენტო არჩევნების წინ „ჰეროკრატია“ ქართულ პოლიტიკას ააფეთქებდა, მაგრამ ასე არ მოხდა.
_ ახლაც ასეთივე მდარე ხარისხისას გადაიღებენ.
_ სერიალების კონტექსტში „ჩემი ცოლის დაქალები“ გაგახსენდათ და ერთ-ერთ ინტერვიუში თქვით, ივანიშვილმა ბაქარ ორჯონიკიძეში საკუთარი თავი ამოიცნოო.
_ სერიალები სახელმწიფოს ემუქრებაო და, ახლა, გამორიცხვის მეთოდით რომ ვიმსჯელოთ, ქვეყნის უსაფრთხოებას რომელი სერიალი ემუქრება? _ თურქული სერიალები არ ემუქრება, ბრაზილიური თუ იაფფასიანი ინდური სერიალებიც არ ემუქრება. რჩება „ჩემი ცოლის დაქალები“, რომელიც ძალიან საინტერესოა _ მე რომ მკითხოთ, ეს სერიალი ქართული საზოგადოების ასლი და სარკეა. ამ სერიალზე ბევრი ნერვიულობს, მაგრამ არ ვიცი, რა ანერვიულებს _ ეტყობა, საკუთარ თავს ხედავს: „მეშჩანური“ ქართული ცხოვრება… ერთ-ერთი პერსონაჟი ყველამ ვიცანით და, როგორც ჩანს, საკუთარი თავი მაგანაც ამოიცნო. ამაზე ნერვიულობს და ამას სახელმწიფო უსაფრთხოებას უკავშირებს.
ამიტომ ვაბობ, რომ ივანიშვილის ლოგიკური სამყარო საკმაოდ მწირი და ვიწროა. ამ კაცს მასშტაბები არ აქვს.
_ ბატონო გუბაზ, ივანიშვილის ბოლო ინტერვიუ იმაზე ხომ არ მიანიშნებდა, რომ საზოგადოების მუჭში მოქცევას უფრო მეტად შეეცდება?
_ ქართული საზოგადოების გახედვნა დიდმა იმპერიებმაც ვერ შეძლეს და ბიძინა ივანიშვილი როგორ შეძლებს? მისი ეს მცდელობა კომიკურ სახეს მიიღებს და უკვე მიიღო კიდეც _ მისი ყველა განცხადება სასაცილოა. საერთოდ, დიქტატორი იქ მთავრდება, როცა დასცინიან!
_ გგონიათ, რომ დღეს ივანიშვილს ხალხი დასცინის?
_ მთელი თბილისი ხარხარებს, ვისაც იუმორის გრძნობა აქვს და ვისაც არ აქვს, ის ქვეყნის ბედზეა ჩაფიქრებული იმიტომ, რომ სახელმწიფოს ისეთი კაცი მართავს, რომელიც ლოგიკური აზროვნების ველიდან გასულია. ეს ძალიან სამწუხაროა.
_ ამ სიტუაციიდან გამოსავალს ქუჩაში გასვლაში ხედავთ. ყოველ შემთხვევაში, ერთ-ერთ განცხადებაში ასე თქვით.
_ არა, ეს არ მითქვამს.
_ აბა, რა თქვით?
_ გამოსავალი მისი არჩევნებით გაშვებაა. ზოგადად, ორი მოდელია: ერთი ცვლილების სომხური მოდელია, მეორე კი _ უკრაინული. უკრაინაში პოროშენკო უსისხლოდ და არეულობის გარეშე მიდის, თუმცა ისიც ოლიგარქიული მმართველობით იყო მოსული. თუ ესეც პოროშენკოსავით წავა, კარგი იქნება, მაგრამ თუ წესიერ არჩევნებს არ ჩაატარებს, აგერ არის პაშინიანი და მისი ჯანი!
_ არჩევნებამდე წელიწად-ნახევარია დარჩენილი, ბატონო გუბაზ და, ამ ხნის განმავლობაში, ქვეყანას რა ეშველება?
_ ეგეც ცალკე თემაა, ამ წელიწად-ნახევარს როგორ მიაღწევს. არ არის გამორიცხული, რომ რიგგარეშეზე წავიდეს.
_ რიგგარეშე საპარლამენტო არჩევნების გამოსაცხადებლად რამე საბაბია საჭირო.
_ გამოვა და იტყვის, პარლამენტი არ ვარგა, ქვეყნის განწყობებს აღარ გამოხატავსო. ამის სათქმელად რამე შეუშლის ხელს თუ იქ ვინმე წამოიკნავლებს და რამეს იტყვის?
_ ივანიშვილის განცხადებით ვადამდელის დანიშვნა ხომ ძალიან ანტიკონსტიტუციური იქნება?
_ ანტიკონსტიტუციური რატომ იქნება?
_ იმიტომ, რომ ივანიშვილი ქვეყნის ოფიციალური მმართველი არ არის.
_ იტყვის, კარგი მინდოდა, მაგრამ არ ვარგაო. ისე, „ოცნებიდან“ ხალხი პანტაპუნტით გამორბის, თუ უმრავლესობა დაიშალა და უმცირესობა გახდა, რა თქმა უნდა, რიგგარეშეზე წავა.
კიდევ ერთხელ გეუბნებით: მისი სპეციალისტი არ ვარ და არ ვიცი, აზრად რა მოუვა. ჩემი ადრესატი ქართველი ხალხი და ქართული საზოგადოებაა. ივანიშვილთან საუბარს, მისთვის ჭკუის სწავლებასა და რჩევების მიცემას კარგა ხანია, თავი დავანებე!
_ მესმის, მაგრამ თქვენ, როგორც პოლიტიკის სპეციალისტი, შექმნილი სიტუაციიდან ორ გამოსავალს ხედავთ _ სომხურ ან უკრაინულ სცენარს, მაგრამ ორივე სცენარი გრძელვადიანია.
_ არა, რატომ არის გრძელვადიანი? არჩევნებამდე რაღა დარჩა?
_ წელიწად-ნახევარი ისტორიისა და პოლიტიკისთვის შესაძლოა, არაფერია, მაგრამ ხალხისთვის ბევრია, ბატონო გუბაზ.
_ მაშინ გადაწყვეტილებას ხალხი მიიღებს! მე წესებს მივყვები _ რახან ეს პარლამენტი არ ვარგა, ამიტომ საპარლამენტო არჩევნებს უნდა დაველოდოთ. 2016-ში ეს პარლამენტი მე კი არა, ამ ხალხმა აირჩია. ამიტომ შექმნილ ვითარებაზე პასუხისმგებელი საზოგადოებაც არის და ყველაფერს ერთ კაცს ნუ დავაბრალებთ. ეს კაცი ჩვენი საზოგადოების პროდუქტია _ მაშინ ხალხს უთხრა, აი, ეს პატარა პარტიები და პოლიტიკოსები ხელს მიშლიანო. ხალხმაც ტაში დაუკრა, _ ბიძინა, რახან შენ გიშლიან, მაგათ ჩამოგაშორებო და აქტიურ პოლიტიკურ ცხოვრებას ხალხმა ჩამოგვაშორა _ კანონმდებლობისა და პოლიტიკის განსაზღვრაში არ ვმონაწილეობთ, ანუ პირადად მე, პასუხს არაფერზე ვაგებ, რადგან სახლში ვზივარ და ჩემი სპეციალობით ვმუშაობ.
_ თუ გასულ საპრეზიდენტო არჩევნებს და ყბადაღებულ მოსყიდვა-დაშინებას გავითვალისწინებთ, ხალხი ობიექტურ გადაწყვეტილებას ვერც 2020-ში მიიღებს.
_ ამის გამო დაემხობა. ყველაფერი ძალიან მარტივია, რა.
_ მარტივი როგორაა?
_ სომხეთის პრეზიდენტმა პრემიერობა, ანუ ხელისუფლებაში კიდევ დარჩენა მოინდომა და სომხებმა გააპანღურეს. აქაც ასე მოხდება.
_ ამ ფონზე ზუგდიდის მერის არჩევნები კატალიზატორი იქნება?
_ რა თქმა უნდა.
_ ანუ თუ ზუგდიდში საარჩევნო მუშტი-კრივი გაიმართება, ეს პროცესებს დააჩქარებს?
_ მუშტი-კრივი უკვე დაიწყო, კაცო. ყველაფერი ეს საკმაოდ სახიფათო და ყურადღებამისაქცევია. თუ არჩევნები არ გაყალბდება, როგორც ჩანს, ზუგდიდში „ნაციონალების“ კანდიდატი მოიგებს. ყოველ შემთხვევაში, ზუგდიდელებისგან ასეთი ინფორმაცია მაქვს _ ათიდან ათივე მეუბნება, „ნაციონალები“ მოიგებენო, მაგრამ თუ გააყალბეს, მაშინ ეს ყველასთვის ნიშანი იქნება, რომ საპარლამენტო არჩევნების ჩატარებასაც „ოცნება“ ასე აპირებს, ანუ საპარლამენტოსაც გააყალბებს. ე. ი., ჭკუა არ ისწავლა და ის წითელი ბარათები, რაც აშშ-სა და ევროპიდან აჩვენეს, ვერ დაინახა.
თუ „ოცნება“ ქართულ საზოგადოებას ანგარიშს არ გაუწევს, ანგარიშს აღარც ჩვენ გავუწევთ. სქემა ძალიან მარტივი, უბრალო და ყველასთვის გასაგებია.
_ თუ რევოლუცია მოხდება და ხელისუფლება ამ გზით შეიცვლება, ეს მსოფლიოს თვალში ლეგიტიმური იქნება?
_ რევოლუცია, რომელიც პროგრესზე არის ორიენტირებული, რა თქმა უნდა, ლეგიტიმურია! თუ რევოლუციაში ხალხის ფართო მასები მონაწილეობენ, ის ლეგიტიმურია! თუ რევოლუციაში რაღაც პატარა შეიარაღებული ბანდა მონაწილეობს, მაშინ ის „პუტჩია“.
აქაც ისეთივე მშვიდობიანი გამოსვლები იქნება, როგორც სომხეთში იყო _ ახალგაზრდობა ქუჩაში ცეკვა-თამაშით გაერთობა. მთელი საქართველო ქუჩაში გამოვა და მისი სახლის წინ დადგება! ყველაფერი ამით დამთავრდება! მაგ კაცისთვის არც ერთი პოლიციელი და ჯარისკაცი გამოიდებს თავს! ამალა კი ისეთი ჰყავს, რომ ყველა ვირთხებივით დაიფანტება და ბიძინაზე ჩვენებების მიცემაში პასტას ვეღარ გააგდებინებთ! რა, არ ვიცით, გარშემო რა ხალხი ჰყავს?
_ დიახ, ყველამ ყველაფერი ვიცით, მაგრამ ხელისუფლება ნებისმიერ პროტესტს ვიწრო პოლიტიკური ინტერესით ხსნის. იგივე ტაქსისტების აქციაზე კახა კალაძემ თქვა, ხალხი რა შუაშია, ეს „ლეიბორისტების“ აქცია იყოო.
_ იცით, რა მიკვირს?
_ რა?
_ ვინმე რამე პროტესტს რომ გამოხატავს და ამ პროტესტზე რომელიმე პოლიტიკოსი მივა, ხელისუფლების წარმომადგენლები ამბობენ, ეს პროტესტი პოლიტიკურ ელფერს იძენსო, მაგრამ კახა კალაძეს ან „ქართულ ოცნებას“ პოლიტიკა რა ჰგონია? ბარემ სია მოგვცენ, როდის შეგვიძლია, რომ საკითხებში ჩავერთოთ. დარწმუნებული ვარ, კალაძემ პოლიტიკის პირდაპირი მნიშვნელობა არც იცის. „ოცნებაში“ პოლიტიკის მნიშვნელობა შეიძლება, ერთი-ორმა კაცმა იცის, მაგრამ ისინიც არ ამხელენ.
პოლიტიკა სამოქალაქო ცხოვრებაა, მორჩა და გათავდა! პოლიტიკოსის მოვალეობაა, რომ საზოგადოების რაღაც ფენის ინტერესები გამოხატოს. ამ შემთხვევაში „ლეიბორისტული პარტია“ გამოხატავს და კოორდინებას უწევს ტაქსისტების პროტესტს. ეს პოლიტიკაა, მაგრამ, როგორც ჩანს, ამათ საბავშვო ბაღის ლექციები უნდა წავუკითხოთ, პოლიტიკა რას ნიშნავს.
მათ პოლიტიკა ქვეყნის ძარცვა, ენის გადაყლაპვა და ყველაფრის ერთ კაცზე დაჯერება ჰგონიათ.
ისე, ივანიშვილი შერიგებას რომ გვთავაზობს, ვის ან რის გარშემო უნდა შევრიგდეთ? ჩვენი შერიგების მთავარი აზრი რა არის? ხომ არ უნდა, რომ მის გარშემო შევრიგდეთ? მის გარშემო შერიგება გამორიცხულია იმიტომ, რომ ეს კაცი სამკურნალოა!
_ მგონი, შეურაცხყოფას აყენებთ.
_ რატომ ვაყენებ? შალვა შავგულიძეზე ამბობს, გირგვლიანის მკვლელია, მურუსიძე კი მხსნელიაო. ახლა, ამ კაცის გარშემო როგორ უნდა გავერთიანდეთ?
_ თქვენი აზრით, ივანიშვილი მურუსიძესა და, ზოგადად, კოლექტიურ მურუსიძეებს რატომ ეპოტინება?
_ სასამართლოს აბსოლუტური კონტროლი უნდა იმიტომ, რომ ხელისუფლებიდან ნებით წასვლას არ აპირებს!
_ არასამთავრობო სექტორსაც ამ მოტივით ესხმის თავს? სხვათა შორის, „ოცნება“ ამბობს, აშშ-ის სახელმწიფო დეპარტამენტი და ევროსაბჭო შეცდომაში კაპიტან გიგაურსა და სხვა „ენჯეოშნიკებს“ შეჰყავთ, თორემ, სინამდვილეში, ქვეყანაში ყველაფერი იდეალურად არისო.
_ ხომ ხედავთ, კაცს როგორი მწირი აზროვნება აქვს, რომ ამბობს, გიგაურს აშშ-ის სახელმწიფო მართავსო. ეს ხომ ჩამორჩენილობის ნიშანია? ე. ი., აშშ-ს არც დაზვერვა აქვს, არც _ საგარეო დაზვერვა, არც _ კონტრდაზვერვა, არც _ საელჩო და საელჩოში არც პოლიტიკური ოფიცერი ზის. მთელი დედამიწა ყანა და სოფლის ბოლო ჰგონია!
_ ბატონო გუბაზ, საქართველოს ასეთი ხელისუფლება ოდესმე ჰყოლია?
_ არა! ასეთი მდაბიო ხელისუფლება არასოდეს გვყოლია და მგონი, არც არავის ჰყოლია!
_ საზოგადოებამ რატომ დაუშვა, რომ ქვეყნის სათავეში ასეთი, როგორც ამბობთ, მდაბიო ხელისუფლება მოსულიყო?
_ ჩვენ ხომ არხეინი ხალხი ვართ და პასუხისმგებლობის სხვაზე გადაბარება გვიყვარს.
_ ადამიანებზე, იქნებ, იმანაც იმუშავა, აი, ივანიშვილს ფული აქვს, დაგვირიგებს და კარგად ვიცხოვრებთო?
_ რა თქმა უნდა, ამან ითამაშა, თორემ მარტივ კითხვას დავსვამ: გარშემო ამდენი მომხრე რომ ჰყავს, ფული რომ არ ჰქონდეს, ისევ მისი მომხრეები იქნებიან?
_ თქვენი აზრით, იქნებიან თუ არა?
_ ქუჩაში მანქანას არ გაუჩერებენ! მისი მიმდევარი რომ იყო, ჯერ ერთი, იდეალები უნდა გქონდეს, მაგრამ ივანიშვილს რა იდეალები აქვს? _ უკეთეს შემთხვევაში, წვრილი ბურჟუის აზროვნება აქვს და ეგ არის!
_ მიუხედავად იმისა, რომ ივანიშვილს ფული აქვს, ბესელიამ, ფოფხაძემ, შაქარაშვილმა, ჯიშკარიანმა და სხვებმა მაინც აქციეს ზურგი.
_ ბესელია და ეს თემა მათი შიდა თემაა. საერთოდ, სულთნის კარზე დაპირისპირება ყოველთვის არის.
_ ეს დაპირისპირება იმაზე ხომ არ მიანიშნებს, რომ ივანიშვილი ოპოზიციის ალტერნატივის შექმნას „ოცნების“ წიაღშივე ცდილობს?
_ არ ვიცი. ადამიანზე, რომელიც ალოგიკურად აზროვნებს, არ შეიძლება, პროგნოზები აკეთო, თორემ შენც სულელი გამოხვალ! ყველამ დასკვნა გამოიტანოს _ ჭაობში ცხოვრება უნდა თუ ნორმალურ სახელმწიფოში? ეს კაცი ჭაობში გვაცხოვრებს და თუ ასე გავაგრძელებთ, ცოტა ხანში ყიყინს დავიწყებთ!
_ გაერთიანებული ოპოზიცია ის ძალაა, რომელსაც ქვეყანაში პოლიტიკური ცვლილებების განხორციელება შეუძლია?
_ არა. ზოგადად, ვინმეს გარშემო გაერთიანებას უნდა გადავეჩვიოთ. ძველმა კელტებმა იცოდნენ _ ბრძოლის წინ ბელადების სახელებს ბღაოდნენ. ჩვენ რამე იდეის გარშემო უნდა გავერთიანდეთ და ეს იდეა სამართლიანი არჩევნებია.
_ ყველა ოპოზიციური ფლანგი ამ იდეის გარშემო ხომ გაერთიანდით?
_ კი, მგონია, რომ დინამიკა კარგია.
_ ხელისუფლება ამ მილიონ ხელმოწერას ანგარიშს გაუწევს?
_ არ გაუწევს და არჩევნებს ძველი კანონით ჩაატარებს, გააყალბებს და რევოლუცია მოხდება. ეს მარტივი სქემაა. თუ არაფერს გაითვალისწინებს, ბიძინა ივანიშვილი დაპანღურებულ იქნება! საარჩევნო ზეწოლა არის და კიდევ უფრო გაძლიერდება. ევროკავშირის ელჩმა პირდაპირ გვითხრა, თუ საარჩევნო კანონმდებლობაზე გაერთიანდებით, ჩვენ მოგეხმარებით, მაგრამ თუ ცალ-ცალკე იქნებით, თქვენ თავს მიხედეთო.
_ ბოლოს, ბატონო გუბაზ, მას შემდეგ, რაც ივანიშვილმა „ნაციონალებთან“ თანამშრომლობაში დაგდოთ ბრალი, თქვენდამი ხალხის დამოკიდებულება ხომ არ შეიცვალა?
_ არა! ქუჩაში მხრებგაშლილი დავდივარ, ხალხი მესალმება, მადლობას მეუბნება და მეკითხება, ამ ქვეყანას როდის უშველითო? ქუჩაში თავს კომფორტულად ვგრძნობ, კაბინეტში კი ვიხუთები _ ეს ჩემი საქმე არ არის!

გიორგი აბაშიძე