მედეა ვასაძე: „ოცნება“ პოლიტიკურ ლიდერებს CV-ით და პოდიუმზე გავლით ვერ იპოვის!“

იყო დრო, როცა „ქართული ოცნების“ რეგიონულ ლიდერად მიიჩნეოდა და 2012 წელს არათუ აჭარის უმაღლესი საბჭოს დეპუტატი გახდა, არამედ პოლიტიკური თანამდებობაც მიიღო _ ადამიანის უფლებათა კომისიის ხელმძღვანელის პოსტი დაიკავა, თუმცა მისი და ხელისუფლებაში სამართლიანობის აღდგენის ეგიდით მოსული პოლიტიკური გუნდის იდილია, სულ რაღაც, ორ წელს გაგრძელდა.

„იმდენად დავშორდი „ქართული ოცნების“ პრინციპებს ჩვენს რეგიონში, რომ სურვილი მაქვს, გავემიჯნო იმ პროცესებს, რომელიც 2 წლისა და 4 თვის განმავლობაში აჭარის ავტონომიური რესპუბლიკის აღმასრულებელ ხელისუფლებასა და საკანონმდებლო ხელისუფლებას შორის არის“, _ ეს განცხადება მედეა ვასაძემ 2015 წლის თებერვლის დასაწყისში გააკეთა და იმ დღიდან „ოცნებას“ ოპოზიციაში ჩაუდგა.
დღეს „ოცნების“ ყოფილი წევრი გაერთიანებული ოპოზიციის წევრია. მოგეხსენებათ, ამ გაერთიანებაშია „ნაციონალური მოძრაობაც“, ანუ ის პარტიაც, რომელსაც მედეა ვასაძე და მისი თანამოაზრე მურმან დუმბაძე 9 წლის განმავლობაში ებრძოდნენ. ამის მიუხედავად, ქალბატონი მედეა ამბობს, რომ ოპოზიციური ველიდან ყოფილი სამთავრობო პარტიის განდევნა წარმოუდგენელია. მეტიც: მედეა ვასაძე „ნაციონალური მოძრაობის“ თავმჯდომარედ გრიგოლ ვაშაძის არჩევას მიესალმება, რადგან მიიჩნევს, რომ ის ღირსეული ადამიანი და დიპლომატია.
რაც შეეხება იმას, თუ რატომ უღალატა „ქართულმა ოცნებამ“ პრინციპებს, ქალბატონი მედეას აზრით, ყველაფერი ეს პარტიის ხელმძღვანელისგან, ანუ ბიძინა ივანიშვილისგან მოდის და იმ ხმების, რომ „მეფე კეთილია“, ანუ ივანიშვილმა არაფერი იცის, არ სჯერა.

„მასთან შეუთანხმებლად პარტიაში ნაბიჯსაც ვერავინ დგამს“, _ ამბობს „ქრონიკა+“-თან მედეა ვასაძე და აქვე ივანიშვილთან გამართულ შეხვედრებსაც იხსენებს.
რა ხდებოდა ამ შეხვედრებზე და რა სთხოვა ყოფილმა პრემიერმა მას? _ ამ დეტალებს წინამდებარე ინტერვიუდან შეიტყობთ:

_ ქალბატონო მედეა, თავდაპირველად, ბანალურ კითხვას დაგისვამთ: ქვეყანაში არსებულ პოლიტიკურ ვითარებას როგორ აფასებთ?
_ ძალიან მძიმე ვითარებაა: სახელისუფლებო პარტია, რეალურად, დაშლის პირასაა _ ძირითადმა ბირთვმა „ქართული ოცნების“ რიგები უკვე დატოვა, თუმცა ამ ბირთვის მიმართ გარკვეული მოსაზრებები მაქვს.
_ კერძოდ?
_ რასაც ეს ბირთვი „ოცნების“ დატოვების მიზეზად ასახელებს, ამის გაგებას შვიდი წელი არ სჭირდებოდა. მოგეხსენებათ, ყველაფერს რეგიონში ორი წლის შემდეგ მივხვდი და „ოცნება“ დავტოვე, მიუხედავად იმისა, რომ პარტიაში საკმაოდ მაღალი თანამდებობა მეკავა _ ხუთკაციანი სარევიზიო კომისიის წევრი ვიყავი.
ამ ვითარებაში, ძველ სახეებსა და მათ შორის, ეკა ბესელიასაც, რომელიც, ბიძინა ივანიშვილთან ერთდ, „ოცნების“ დამფუძნებელი იყო, ერთხელაც არ დაურეკავს და არ უკითხავს, ამ ძალიან მძიმე ნაბიჯს რატომ ვდგამდი. არადა, ერთ მიმართულებას ვხელმძღვანელობდით _ აჭარის უმაღლეს საბჭოში ადამიანის უფლებათა კომისიის თავმჯდომარე გახლდით.
ამიტომ ყველაფერი ის, რაც დღეს ხდება, მოჩვენებითი მგონია.
_ ე. ი., ფიქრობთ, რომ ბესელიამ „ოცნება“ ივანიშვილთან შეთანხმებით დატოვა, ანუ ივანიშვილი „ოცნების“ ოპოზიციას „ოცნებაშივე“ ქმნის?
_ გამორიცხული არ არის, რომ ივანიშვილი ე. წ. მესამე ძალას ქმნიდეს, მით უმეტეს, საზოგადოებაში არსებობს მოთხოვნა, რომ პოლიტიკურ სივრცეში შეიქმნას ე. წ. მესამე ძალა, რომელიც „ოცნებასაც“ და „ნაციონალურ მოძრაობასაც“ „არას“ ეტყვის. ამ მესამე ძალის შექმნა ვერ ხერხდება. ამიტომ არსებობს რაღაც გარკვეული მოქმედებები. ყოველ შემთხვევაში, ვხედავთ მიზანს, რომ შეიქმნას ე. წ. მესამე ძალა, მაგრამ ის შემადგენლობა, რომელიც ცდილობს, მესამე ძალა დაირქვას, ამას ვერ შეძლებს!
_ ასეთი განცდა რატომ გაქვთ?
_ იმიტომ, რომ ძმებ გაჩეჩილაძეებზე ჩემი მოსაზრება მაქვს. ასევე ძალიან მძიმე შეხედულება მაქვს რამდენიმე ადამიანზე. მართალია, „დაიცავი საქართველო“ კარგა ხნის დაფუძნებულია და თავისი ისტორია აქვს.
დავით მაღრაძეს, როგორც ნიჭიერ და პატრიოტ ადამიანს, პატივს ვცემ, მაგრამ ჩემში, გარკვეულწილად, კითხვის ნიშანს ის ბადებს, რომ პოზიცია ძალიან მოკლე ხანში შეიცვალა _ ვიცით, რომ საპრეზიდენტო არჩევნებში სალომე ზურაბიშვილის აქტიური მხარდამჭერი იყო.
_ ყველა აღიარებს, რომ „ოცნებაში“ შიდა კრიზისია. საუბარი თქვენც იმით დაიწყეთ, რომ მმართველი გუნდი იშლება. შესაბამისად, არ მესმის, მძიმე ვითარება რატომღა გვაქვს? „ოცნების“ დაშლა ხომ გაერთიანებული ოპოზიციის წისქვილზე ასხამს წყალს?
_ ყველაფერ ამაში ოპოზიციის სამომავლო წარმატებებს ვხედავ.
მოგეხსენებათ, 9 წელი „ნაციონალურ მოძრაობასთან“ ოპონირების რეჟიმში ვიყავი.
თუ გახსოვთ, აჭარაში ხელისუფლება ერთი წლით გვიან _ 2004 წელს შეიცვალა. როცა „ნაციონალურმა მოძრაობამ“ ასლან აბაშიძე ხელისუფლებიდან გაუშვა, ჩვენს გუნდს ხელვაჩაურის რაიონი ჩაგვაბარეს _ ეს გონიოს მთელი ზღვისპირა ხაზია, რომელსაც სერიოზული პერსპექტივა ჰქონდა. სხვათა შორის, ეს სანაპირო ისეა გაყიდული, რომ ერთი გოჯიც არ არის თავისუფალი.
ხელვაჩაურის რაიონის ხელმძღვანელობაში ჩვენმა გუნდმა მხოლოდ ერთი თვე დაჰყო და 2004 წლიდან „ნაციონალურ მოძრაობასთან“ ოპონირებაში ვიყავით.
_ უკაცრავად, სხვა რამ გკითხეთ და ამას რატომ მიყვებით, ქალბატონო მედეა?
_ იმის თქმა მინდა, რომ სანამ ხელისუფლებაში მოვიდოდა, „ნაციონალური მოძრაობის“ ყველა აქციაში აქტიურად ვმონაწილეობდით, მაგრამ როცა ხელისუფლებაში მოვიდა, მასთან მარტო ერთი თვე დავყავით.
მაშინ მურმან დუმბაძესა და ჩემთან ერთად თამაზ დიასამიძეც იყო. ჩვენ ვთქვით, რომ „ნაციონალურმა მოძრაობამ“ თავისი პოზიტიური როლი ამოწურა _ ასლან აბაშიძე და ედუარდ შევარდნაძე ხელისუფლებიდან წავიდნენ.
მოკლედ, ჩვენ „ნაციონალურ მოძრაობასთან“ 9-წლიანი ისტორია გვაქვს და, სხვათა შორის, მიხეილ სააკაშვილი სულ აღნიშნავს, _ მურმან დუმბაძე და მედეა ვასაძე ის ადამიანები არიან, რომლემბაც 9 წელი სისხლი გაგვიშრესო.
აქვე იმასაც ვიტყვი, რომ იმ 9 წლის განმავლობაში მარტო ცენტრალური კი არა, რეგიონული ხელისუფლების წნეხის ქვეშაც ვიყავით _ აჭარაში ძალიან მძიმე სიტუაცია იყო.
ყველაფერ ამის მიუხედავად, დღეს ჩვენ გაერთიანებულ ოპოზიციაში ვართ.
_ ესეც ვიცი, ქალბატონო მედეა, მაგრამ კითხვაზე მიპასუხეთ: „ოცნების“ დაშლა ოპოზიციისთვის შანსია თუ არა?
_ დიახ, შანსია. მთავარ ოპოზიციურ ძალად „ნაციონალური მოძრაობა“ რჩება და, მიუხედავად იმისა, რომ ამ პარტიის წევრი არ ვარ, „ნაციონალური მოძრაობის“ გვერდით ყოფნა მიწევს, რადგან ოპოზიცია ვარ და ოპოზიციური პოლიტიკური ველიდან „ნაციონალების“ განდევნა არც მოხერხდებოდა და ამის ძალა და რესურსიც არ გაგვაჩნდა. ამიტომ ერთად ყოფნა გვიწევს.
_ კი ბატონო, დღეს კი ხართ გაერთიანებული ოპოზიციის წევრი, მაგრამ სანამ ოპოზიციაში წახვიდოდით, ორი წლის განმავლობაში, აჭარაში „ოცნების“ აქტიური სახე იყავით და ყველას, ვინც კი „ოცნებას“ აკრიტიკებდა, უპირისპირდებოდით და უპასუხოდ არ ტოვებდით. ქალბატონო მედეა, დღევანდელი გადასახედიდან საკუთარ შეცდომად ხომ არ მიიჩნევთ, რომ, თავის დროზე, „ოცნებას“ კბილებით იცავდით?
_ იცით, რა? ისეთ ფაქტს ვერ ვიხსენებ, როცა „ქართული ოცნება“ კბილებით დავიცავი!
_ კარგი, მე გაგახსენებთ: ადგილობრივ ჟურნალისტს, რომელმაც ჟურნალისტური გამოძიება ჩაატარა, დაუპირისპირდით.
_ ჟურნალისტთან დაპირისპირების დროს აჭარის უმაღლესი საბჭოსა და ჩემს ღირსებას ვიცავდი. იმ რაღაც ჟურნალისტურ საგამოძიებო პროდუქტში 11 ეპიზოდი იყო ჩადებული. ამ საქმის განხილვა ჟურნალისტური ეთიკის ქარტიას ვანდე და მისი წევრები ბათუმში ჩამოვიდნენ, მათ შორის, ექსპერტი ია ანთაძე, რომელიც იმ დროს გარკვეულ ავტორიტეტს წარმოადგენდა.
_ მომიტევეთ და ია ანთაძის ავტორიტეტულობა საკამათო თემაა: ვისთვის იყო და ვისთვის _ არა.
_ რა ვიცი, მედიაექსპერტი იყო, ტელევიზიით ხშირად გამოდიოდა და ვცდილობდით, მოგვესმინა.
_ სხვათა შორის, ქალბატონი ანთაძე ივანიშვილის „მე-9 არხის“ თანამშრომელი იყო, ახლა კი, თუ არ ვცდები, „საზოგადოებრივი მაუწყებლის“ მენეჯმენტშია.
_ დიახ, „საზოგადოებრივ მაუწყებელშია“ და თავისი პოზიციით, მე თუ მკითხავთ, საკუთარი ავტორიტეტი სრულიად დაასამარა, მაგრამ მგონია, რომ, თავის დროზე, ავტორიტეტი ჰქონდა. დღეს ეს ქალბატონი, როგორც მედია ექსპერტი, დაკარგულია.
მოკლედ, ჩვენი საკითხის განხილვას ქალბატონი იაც ესწრებოდა და 11 ეპიზოდიდან ოთხზე დადგინდა, რომ ჟურნალისტს „ეთიკის ქარტიის“ გარკვეული მოთხოვნები დარღვეული ჰქონდა და ეს მოთხოვნები საზოგადოებისთვის ობიექტური და მიუკერძოებელი ინფორმაციის მიწოდებას ეხებოდა.
სხვათა შორის, იშვიათობა იყო, რომ პოლიტიკური თანამდებობის პირთან დავაში საკითხების გადაჭრა ჩვენ სასარგებლოდ მოხდა და ამას მილოცავდნენ.
_ ისე, ჩვენს საუბარს არ ეხება, მაგრამ სიტყვამ მოიტანა და აღვნიშნავ, რომ „ეთიკის ქარტია“ სადამსჯელო ორგანიზაცია კი არა, ჩვეულებრივი არასამთავრობო ორგანიზაციაა, რომლის „სანქციები“ მხოლოდ მის წევრებზე ვრცელდება.
_ მოკლედ, იმ თემას ვუბრუნდები, რომ „ქართული ოცნების“ თავგადაკლული დამცველი არასოდეს ვყოფილვარ, თუ საკამათო საკითხი აშკარად უსაფუძვლო არ იყო.
ადამიანის უფლებათა კომისიის თავმჯდომარე ვიყავი და ამ მიმართულებით რეგიონში არსებულ ძალიან სერიოზულ ფაქტებზე 60 ბრიფინგი მაქვს ჩატარებული. აი, მაგალითად, ციხეებთან დაკავშირებით პირველად მე ვთქვი, სისტემური პრობლემები კვლავ შეინიშნება-მეთქი. სხვათა შორის, შესვლა მხოლოდ ერთ _ მე-3 იზოლატორში შემეძლო და, დიახ, პირველი ვიყავი, ვინც გავბედე და სისტემურ დარღვევებზე განცხადება გავაკეთე.
_ ამის გამო გუნდში პრობლემები შეგექმნათ?
_ უშიშროების სამსახურმა ჩვენი დისკრედიტაცია დაიწყო და ეს კი არ მეჩვენებოდა, არამედ ამაში დარწმუნებული ვარ!
_ დისკრედიტაცია რაში გამოიხატებოდა?
_ აი, მაგალითად, ალბათ, გახსოვთ, თანაშემწე, რომელიც ჩემი შერჩეული და სამსახურში მიყვანილი იყო, დამიპირისპირდა და თქვა, რომ ჩემთან მოსულ ქალბატონს თითქოს ისე ვცემე, რომ ტვინის შერყევა მიიღო. ეს ბრალდება ყოველგვარ რეალობას იყო მოკლებული.
ამას გარდა, მე და მურმან დუმბაძეს უცნობი მამაკაცი მოგვადგა, რომელმაც მურმანს უთხრა, ჩემგან ქრთამის სახით 10 ათასი დოლარი გაქვს აღებული და ეს ფული უნდა დამიბრუნოო. ეს მერიის შენობაში ხდებოდა და დაცვის საშუალებით შესაძლებლობა მოგვეცა, ეს ადამიანი შეგვეკავებინა. ამ ფაქტზე გამოძიება დაიწყო, მაგრამ დღემდე არ უთქვამთ, ეს კაცი ვინ იყო, ვისი დავალებით მოქმედებდა ან მურმანს ქრთამი მართლა ხომ არ ჰქონდა აღებული.
მოკლედ, ის ორი წელი, სანამ „ქართულ ოცნებაში“ ვიყავით, პროვოკაციებში ვცხოვრობდით _ შიგნიდან გვებრძოდნენ.
_ შიგნიდან უშუალოდ ივანიშვილი გებრძოდათ თუ ყველაფერი მასთან შეუთანხმებლად და ზურგს უკან ხდებოდა?
_ ვფიქრობ, რომ ივანიშვილს სპეცსამსახურებისთვის ასეთი მითითება ჰქონდა მიცემული, რომ მურმანისთვის თვალი ედევნებინათ. სწორედ ამიტომ დაინიშნა მამაცაშვილი აჭარის სუსის უფროსად. ის ორი წელი კიდევ დიდი დრო იყო, რაც „ქართულ ოცნებაში“ გავძელით. მოგეხსენებათ, მერე ყველაფერი ეს როგორ დამთავრდა მურმანთან მიმართებით. შესაბამისად, მეც გადავწყვიტე, რომ „ოცნება“ დამეტოვებინა, რადგან იქ ჩემს ადგილს ვეღარ ვხედავდი.
სხვათა შორის, ივანიშვილთან შეხვედრა ძალიან ხშირად გვიწევდა. მაშინ პრემიერი ღარიბაშვილი იყო და მას თვეში ორჯერ ვხვდებოდით. ამ შეხვედრებზე უსერიოზულესი მასალები გვაქვს ჩატანილი, განგვიხილავს და ყოველთვის იყო დაპირება, რომ ყველაფერს გამოიძიებდნენ და პასუხს აუცილებლად მეტყოდნენ, მაგრამ, სამწუხაროდ, ეს საკითხები ღიად დარჩა. ისიც არავის უთქვამს, _ მედეა, სწორი არ ხარ და რაღაცებს არასწორად აფასებო.
ყველაფერ ამას ისიც დაემატა, რომ იმ ადამიანების დაწინაურება დაიწყო, რომლებიც ჩვენს გუნდში იყვნენ და რომლებზედაც კომპრომატები გვედო. ეს უკანასკნელი წვეთი იყო, რომელმაც მაფიქრებინა, რომ „ოცნება“ აუცილებლად უნდა დამეტოვებინა!
_ ქალბატონო მედეა, „ოცნება“, თავის დროზე, კეთილი და დიადი მიზნების მისაღწევად შეიქმნა, თუმცა დღევანდელი მოცემულობა აბსოლუტურად განსხვავებულია. თქვენი აზრით, „ოცნებას“ ეს ყველაფერი რატომ დაემართა?
_ პირველ პირს დიადი მიზნები არ აღმოაჩნდა! ყველაფერი, რა თქმა უნდა, პარტიის თავმჯდომარიდან მოდის _ მასთან შეუთანხმებლად ნაბიჯსაც ვერავინ გადადგამს! აღმოჩნდა, რომ მას პირადი „დიადი ინტერესები“ ჰქონდა, რამაც ახლა იჩინა თავი.
არ ვიცი, ამ ხელისუფლების დროს სასამართლოს ძველ შემადგენლობაზე ლაპარაკი როგორ შეიძლება?
თუ ზემოდან გადმოხედავთ, ეს გაუგებარია, მაგრამ თუ ყველაფერ ამის არსი იცით, გაუგებარი არაფერია, ანუ მას უნდა დამორჩილებული სასამართლო, რადგან მედიაზე ზეწოლა გააგრძელოს და ამის მაგალითია „რუსთავი 2“. საერთოდ, ასეთი ძალიან ბევრი საკითხია.
_ ყველაფერი ეს „ოცნებას“ დაღუპვამდე მიიყვანს, თუ რამე მეთოდი გამოიძებნება, რომელიც გადაარჩენს? სხვათა შორის, მმართველი გუნდი, როგორც ცნობილი გახდა, ახალ სახეებს ეძებს.
_ თქვენ გგონიათ, რომ პოლიტიკურ ლიდერს „ოცნება“ CV-ით და პოდიუმზე გავლით იპოვის? პოლიტიკურ ლიდერს ცხოვრება აყალიბებს, მას ბიოგრაფია უნდა ჰქონდეს, რადგან პოლიტიკური ლიდერი მის მიერ განვლილი ცხოვრებით ფასდება.
მესმის, რომ ბევრი ნიჭიერი ახალგაზრდაა და, კი ბატონო, აღმასრულებელ ხელისუფლებაში გაუღონ კარი, მაგრამ პოლიტიკური ლიდერის ხელოვნურად შექმნა არ გამოვა!
პოლიტიკურ ლიდერობაზე თავს არ ვდებ, მაგრამ ეროვნულ-განმათავისუფლებელი მოძრაობიდან მოვდივარ და მთელი შეგნებული ცხოვრების ძალიან დიდი ნაწილი ამ ბრძოლაში ვარ, ვიცი, ეს როგორი რთული გზაა.
CV-ით ვინ უნდა მოვიდეს, რომ ქვეყნისადმი სიყვარულსა და იმ მიზანსწრაფვაში, რომ ჩემი ქვეყანა გამართული, დემოკრატიული და სამართლიანი იყოს, გამეჯიბროს!
მგონია, პოლიტიკური ლიდერების მოძებნა „ქართული ოცნების“ მორიგი შეცდომაა!
_ ქალბატონო მედეა, თქვენი ინფორმაციით, რყევები „ოცნების“ აჭარის წარმომადგენლობაშიც არის?
_ უმაღლესი საბჭოს წევრებს „შლაგბაუმა დეპუტატებს“ ვეძახით.
_ რატომ?
_ მათ იციან, რომ ყველაფერზე ხელი უნდა აწიონ!
აჭარაში „ქართული ოცნების“ გუნდი მით უფრო არ არის, რადგან აქ ყველა ყოფილი ხელისუფლების ნაკრებია, რაც, ვფიქრობ, მთავრობის ყოფილი თავმჯდომარის ბრალია. აჭარის უმაღლეს საბჭოში „ოცნება“ 14 კაცით არის წარმოდგენილი და საკონსტიტუციო უმრავლესობაა, მაგრამ ეს გუნდი არ არის!
აქედან ერთი ცოტნე ანანიძეა, რომელსაც პოლიტპატიმრის სტატუსი აქვს და რომელსაც ახლა ადამიანის უფლებათა კიმისიის თავმჯდომარის პოსტი უკავია. აჭარის უმაღლესი საბჭოს თავმჯდომარის მოადგილე ასლან აბაშიძისა და „ნაციონალური მოძრაობის“ დროსაც აჭარის ტელევიზიის დირექტორის მოადგილე გახლდათ და ტელევიზიის თანამშრომლებს ცოტნე ანანიძის წინააღმდეგ მობილიზებას უკეთებდა, რათა ცოტნეს მიმართ მტკიცებულებები შექმნილიყო და დაეპატიმრებინათ. საბოლოო ჯამში, ცოტნე დააპატიმრეს და სასჯელი მოიხადა კიდეც.
ახლა, გეკითხებით, როგორ შეიძლება, ესენი ერთ გუნდში მოვიაზროთ?
_ ქალბატონო მედეა, როცა „ოცნება“ დატოვეთ, სხვებმა მხარი რატომ არ აგიბეს _ ვერ გაბედეს თუ კომფორტის ზონიდან არ უნდოდათ გამოსვლა?
_ კომფორტის ზონიდან გამოსვლა არ უნდოდათ. სხვათა შორის, 2016 წლის მოწვევის უმაღლეს საბჭოში ერთი მათგანიც ვეღარ მოხვდა.
_ ამ კითხვას მარტო აჭარის კონტექსტში არ გისვამთ. იგივე ცენტრალური ოფისის „ფეისებმა“ პარტიიდან თქვენი წასვლა რატომ არ გააპროტესტეს?
_ მართალია, აჭარა დიდი შესაძლებლობების რეგიონია და ცენტრს მის მიმართ გარკვეული ინტერესი ყოველთვის ჰქონდა, ანუ ცდილობდა, რომ აჭარაზე გავლენები ჰქონოდა იმიტომ, რომ აქ მთელი სანაპიროს უმეტეს ნაწილზე შესყიდვები ცენტრიდან არის განხორციელებული.
ამის საწინააღმდეგო, რა თქმა უნდა, არაფერი მაქვს, მაგრამ ცენტრს რეგიონისადმი ყოველთვის რაღაც პროვინციული დამოკიდებულება აქვს.
_ ანუ თქვენ და მურმან დუმბაძეს, როგორც რეგიონის წარმომადგენელს, „ოცნების“ თბილისელი „ფეისები“ საკუთარ ტოლად და სწორად არ მიგიჩნევდნენ?
_ მოგეხსენებათ, მურმან დუმბაძე პარტიიდან განსხვავებული აზრის გამო გარიცხეს. მე კი პარტიული სასჯელი იმიტომ დამადეს, რომ მთავრობის თავმჯდომარის იმპიჩმენტს მოვაწერე ხელი, ეს გუნდთან არ იყო შეთანხმებულიო.
საერთოდ, სიტყვა „გუნდს“ თუ „ვალდებულებებს“ ისეთ კონტექსტში იყენებენ და ეს ლამაზი სიტყვა ისე გაცვდა, რომ უკვე ყურს ეხამუშება, მით უმეტეს, რომ ამით უღირსი ადამიანები აპელირებენ ხოლმე!
ერთადერთი იმის თქმა შემიძლია, რომ ჩემ მიმართ პარტიული სანქციის გამოყენებით მაშინდელი პრემიერი შეწუხდა, დამირეკა და მითხრა, _ მედეა, ახლა საზღვარგარეთ მივფრინავ, მაგრამ ბათუმის აეროპორტში დავჯდები, შევხვდეთ და ერთხელ კიდევ დავილაპარაკოთო.
_ შეხვდით?
_ არა, უარი ვუთხარი.
_ რატომ?
_ ბრიფინგი უკვე დანიშნული მქონდა და ჟურნალისტებმა იცოდნენ, რომ პარტია უნდა დამეტოვებინა. ამიტომ ვუთხარი, _ ამ საკითხს ვერ გადავდებ, თან თქვენთან, პრაქტიკულად, ყველაფერი გარკვეული მაქვს-მეთქი.
_ მაშინ პრემიერი, როგორც მახსოვს, ღარიბაშვილი იყო. არადა, დუმბაძე სწორედ მას დაუპირისპირდა. ამ ფონზე უცნაურია, ღარიბაშვილმა თქვენ რატომ დაგირეკათ?
_ ღარიბაშვილმა ივანიშვილის დავალება გაახმოვანა და შეასრულა. ამან ის გამოიწვია, რომ აჭარის უმაღლესი საბჭოს თვმჯდომარეს დავუპირისპირდი და ამ დაპირისპირების მიზეზი ორი რამ იყო.
_ სახელდობრ?
_ მან ან იცოდა, რომ მურმან დუმბაძეს „ოცნებიდან“ რიცხავდნენ, მაგრამ არაფერი თქვა, ან საერთოდ არაფერი ჰკითხეს. ის ამბობდა, ჩემთვის რატომ უნდა ეკითხათ, ეს პარტიული ღონისძიება იყოო, მაგრამ დაუჯერებელია, რომ აჭარის უმაღლესი საბჭოს თავმჯდომარეს არ ჰკითხეს, მურმან დუმბაძის პარტიიდან გარიცხვა, რომელიც რეგიონში ლიდერია, რა პროცესებს გამოიწვევდა?
აჭარის უმაღლესი საბჭოს მაშინდელი თავმჯდომარე ჩვენი 30 წლის მეგობარია, მაგრამ ამ კითხვებზე პასუხი არ ჰქონდა.
_ მასთან ახლაც მეგობრობთ?
_ სამწუხაროდ, ამ სრულიად უპრინციპო მიდგომების გამო ერთმანეთი დავკარგეთ. გამოვიდა, რომ ეს ბრძოლა, თურმე, სკამისთვის, მაღალი ხელფასებისა და ძალაუფლებისთვის იყო, თუმცა უპრინციპო ადამიანი ძალაუფლებას ვერ იკრეფს!
სხვათა შორის, ქუჩაში მე გაცილებით მეტი ადამიანი მესალმება, ვიდრე ყოფილი თანამდებობის პირებს. ჩემი აზრით, საზოგადოება ჩემს პოზიციას ახლა უფრო უჭერს მხარს, ვიდრე იმ ადამიანებისას, რომლებსაც სახელისუფლებო იერარქიაში ჩემზე მაღალი თანამდებობები ეკავათ!
_ ბოლოს, ქალბატონო მედეა, ხელისუფლება, მართალია, არ აღიარებს, მაგრამ ყველა ვხვდებით, რომ ქვეყანაში პოლიტიკური კრიზისია. თქვენი აზრით, გამოსავალი რა არის?
_ ამაზე ძალიან ხშირად მიფიქრია.
_ კონკრეტულად, რაზე?
_ აუცილებლად უნდა ჩატარდეს ვადამდელი საპარლამენტო არჩევნები, მაგრამ არა _ ამ საარჩევნო კანონმდებლობით.
_ აბა, რომელი სისტემით?
_ მაჟორიტარული სისტემა აუცილებლად უნდა მოისპოს იმიტომ, რომ მაჟორიტარები პარლამენტს ამძიმებენ.
_ ამას რატომ ამბობთ?
_ მოგეხსენებათ, მაჟორიტარები ბიზნესთან არიან დაკავშირებულნი, ანუ პარლამენტში თავიანთი ბიზნესის ლობირებისთვის სხედან _ პარლამენტის სხდომებზე თავი ტელეფონებში აქვთ ჩარგული და იქ რა ხდება, არავის აინტერესებს. არადა, პარლამენტის წევრობა ძალიან მაღალი პოლიტიკური თანამდებობაა და ამიტომ, არჩევნების დროს, მაჟორიტარები ამომრჩეველს საკუთარი ფინანსებით ყიდულობენ!
_ ილუზია, მგონი, არავის აქვს, რომ ხელისუფლება საარჩევნო სისტემას შეცვლის. ასე რომ, გამოსავალი რა შეიძლება იყოს?
_ ძალიან აქტიური პოლიტიკური პროცესი იწყება.
_ რას გულისხმობთ?
_ მილიონი ხელმოწერის შეგროვებას ვიწყებთ და მერე ვნახოთ, ამ მილიონ ხელმოწერას, რომელიც საარჩევნო სისტემას შეეხება, პარლამენტი იგნორირებას როგორ გაუკეთებს.

გიორგი აბაშიძე