კვირაზე მეტია, აჭარის უმაღლეს საბჭოს ახალი დეპუტატი ჰყავს _ უფლებადამცველი მერაბ ბლადაძე კანონმდებელი მას შემდეგ გახდა, რაც ზაზა ოქუაშვილს სადეპუტატო უფლებამოსილება შეუწყდა.

უფრო სწორად, თავიდან მოვლენები ასე განვითარდა: 2018 წლის შემოდგომაზე, „ომეგა ჯგუფის“ დამფუძნებელმა, ზაზა ოქუაშვილმა, „ქართული ოცნება“ და, კერძოდ, ბიძინა ივანიშვილი ბიზნესის ზეწოლაში დაადანაშაულა. „ომეგას“ სკანდალი კარგა ხანს იყო ქართული მედიისა და არასამთავრობო სექტორის, ასევე პოლიტიკური წრეების განხილვის მთავარი თემა. საპრეზიდენტო არჩევნების მეორე ტურის შემდეგ, კერძოდ, გასული წლის 20 დეკემბერს, ოქუაშვილმა აჭარის უმაღლეს საბჭოს განცხადებით მიმართა და საბჭოს წევრის უფლებამოსილების ვადამდე შეწყვეტა მოითხოვა, თუმცა მას თავისი გადაწყვეტილების მიზეზი არ დაუსახელებია.
ზაზა ოქუაშვილისთვის აჭარის უმაღლესი საბჭოს დეპუტატის უფლებამოსილების ვადაზე ადრე შეწყვეტის საკითხზე კენჭისყრა 24 იანვარს გაიმართა, რომელზეც ოპოზიციამ განაცხადა, _ ოქუაშვილი პოლიტიკური დევნილია და ხელისუფლებამ იძულებული გახადა, სადეპუტატო მანდატზე უარი თქვასო. ამასთან, ოპოზიციამ კენჭისყრაში მონაწილეობა არ მიიღო.
საბოლოოდ, „ომეგა ჯგუფის“ დამფუძნებელს დეპუტატის უფლებამოსილება მაინც შეუწყდა და აჭარის უმაღლეს საბჭოში ის „პატრიოტთა ალიანსის“ სიის მეორე ნომერმა, მერაბ ბლადაძემ ჩაანაცვლა.

ვინ არის მერაბ ბლადაძე?

ბლადაძემ საქართველო იმ დროს დატოვა, როცა ხელისუფლებაში „ნაციონალური მოძრაობა“ იყო და წლების განმავლობაში ბელგიაში ცხოვრობდა. იმ დროს ბლადაძე ბელგიაში აქტიურად ატარებდა „ანტინაციონალურ“ მანიფესტაციებს. ზუსტად მაშინ დაუახლოვდა „პატრიოტთა ალიანსის“ ლიდერებს. ხელისუფლების შეცვლისას, რამდენიმეწლიანი ემიგრაციის შემდეგ მერაბ ბლადაძე საქართველოში დაბრუნდა და, მიუხედავად იმისა, რომ თავის დროზე „ოცნების“ მხარდამჭერი იყო, ახალი ხელისუფლების კრიტიკას მიჰყო ხელი. ამ ხნის განმავლობაში უფლებადამცველმა არაერთხელ განაცხადა, რომ აჭარის პოლიცია ბრალდებულებს აწამებდა _ რამდენიმე წლის წინ სწორედ ამ ნიადაგზე მან შიმშილობაც დაიწყო. ასევე საზოგადოებას ახსოვს, რომ პოლიციასთან დაპირისპირების შემდეგ ბლადაძეს საკუთარ სახლთან თავს დაესხნენ. ამას გარდა, საქართველოში დაბრუნებული მერაბ ბლადაძე იპოთეკით დაზარალებულთა ინტერესებსაც იცავდა.
„ქრონიკა+“-თან საუბრისას მერაბ ბლადაძე ამბობს, რომ იპოთეკით დაზარალებულთა უფლებებს ამიერიდან უმაღლესი საბჭოდან დაიცავს. სხვათა შორის, ბლადაძე არც იმის თქმას ერიდება, რომ ცალკეულ საკითხებზე, როგორც დეპუტატმა, შესაძლოა, „ნაციონალურ მოძრაობასთანაც“ ითანამშრომლოს და იმ შემთხვევაში, თუ დაინახავს, რომ „ოცნება“ ხალხისთვის სასარგებლო რამეს აკეთებს, მმართველი გუნდის ინიციატივებსაც დაუჭერს მხარს.

გთავაზობთ ინტერვიუს აჭარის უმაღლესი საბჭოს დეპუტატ მერაბ ბლადაძესთან:

_ ბატონო მერაბ, დეპუტატის უფლებამოსილების შესრულებას უკვე შეუდექით?
_ დიახ, 11 თებერვალს წარმადგინეს და უკვე უმაღლესი საბჭოს დეპუტატი ვარ.
_ გილოცავთ, მაგრამ ამიხსენით და დამისაბუთეთ, თქვენი გადეპუტატებით აჭარის უმაღლესი საკანონმდებლო ორგანოს მუშაობა რა კუთხით შეიცვლება?
_ აჭარის უმაღლესი საბჭოს წევრობა ჩემთვის, რა თქმა უნდა, დიდი პატივია, მაგრამ აქვე იმასაც გეტყვით, რომ დეპუტატობა ჩემთვის თანამდებობა კი არა, ტრიბუნაა, ანუ ის პრობლემები, რომელთა შესახებაც აქამდე ვსაუბრობდი და ვაპროტესტები, ახლა შემიძლია, რომ მაღალი ტრიბუნიდან გავაჟღერო და ამასთან, შევეცადო, შედეგსაც მივაღწიო. მგონი, თქვენც დამეთანხმებით, რომ აჭარის უმაღლესი საბჭოდან ხელისუფლებამდე ხმის მიწვდენა უფრო ადვილია, ვიდრე _ ქუჩიდან.
_ კი ბატონო, გეთანხმებით, მაგრამ დღეს აჭარაში მთავარი პრობლემა რა არის?
_ სოფლის მეურნეობა ძალიან ცუდ დღეშია. საბედნიეროდ, სოფლის მეურნეობის მინისტრი ძალიან კარგი პიროვნებაა _ თავისი საქმის პროფესიონალია, მაგრამ აჭარელი გლეხი, უმეტესად, ციტრუსზეა დამოკიდებული და პრობლემები სწორედ ამ კუთხითაა. ხელისუფლება გამოდის და ამბობს, მანდარინის უპრეცედენტო მოსავალი მოვიდაო და ამით ქულების დაწერას ცდილობს, მაგრამ რეალობა აბსოლუტურად განსხვავებულია.
_ და ეს რეალობა როგორია?
_ ხალხს ციტრუსი ულპება.
_ რატომ?
_ იმიტომ, რომ ვერ აბარებს _ როგორ შეიძლება, ერთ კილოგრამ მანდარინს 10 და 20 თეთრად იბარებდნენ? ეს ხომ აბსურდია და არაფერში წერია?
_ ეს პრობლემა, წესით, აღმასრულებელმა ხელისუფლებამ უნდა მოაგვაროს. თქვენ, როგორც დეპუტატს, რისი გაკეთება შეგიძლიათ, მით უმეტეს, რომ აჭარის უმაღლეს საბჭოში, საქართველოს პარლამენტის მსგავსად, უმრავლესობა „ოცნების“ ხელშია?
_ მესმის, რომ უმრავლესობა „ოცნების“ ხელშია, მაგრამ ვიბრძოლებ. ზოგადად, მთელი ცხოვრება ვიბრძვი და ამ ბრძოლით ბევრ რამეს მივაღწიე.
_ მაინც, რას მიაღწიეთ?
_ ალბათ, გახსოვთ, რამდენიმე წლის წინ შიმშილობა გამოვაცხადე და ამით გავაპროტესტე, რომ აჭარაში ბრალდებულებს აწამებდნენ _ პოლიცია დაკავებულებს მორალურ შეურაცხყოფას აყენებდა და, საერთოდ, სასტიკად ექცეოდა. მარტო მე ვიცი, ამის გაპროტესტებით რა გადავიტანე…
_ როგორც მახსოვს, თავს დაგესხნენ კიდეც.
_ ზუსტად ამ ბრძოლის შედეგია, რომ დღეს აჭარის პოლიციაში ხალხს აღარ აწამებენ! მოკლედ, ბრძოლას შედეგი მოაქვს და თუ არ ვიბრძოლებ, მაშინ უნდა დავჯდე და იმ პრივილეგიებით დავტკბე, რომელსაც უმაღლესი საბჭო მაძლევს, მაგრამ მე ამის კაცი არ ვარ! ჩემთვის ყველაზე დიდი პრივილეგია ის არის, რომ უმაღლესი საბჭოს წევრი ვარ _ ნებისმიერი სამინისტროს კარი ღიაა და ნებისმიერ დოკუმენტზეც მიმიწვდება ხელი.
_ აჭარის უმაღლეს საბჭოში სულ რამდენი ოპოზიციონერი ხართ?
_ აჭარის უმაღლეს საბჭოში ხუთი „ნაციონალური მოძრაობიდანაა“, ერთი _ „ევროპული საქართველოდან“, ერთი _ ბურჯანაძის პარტიიდან და ერთიც _ მე, ანუ „პატრიოტთა ალიანსიდან“.
_ „ნაციონალური მოძრაობისა“ და „ევროპული საქართველოს“ წარმომადგენლებთან ითანამშრომლებთ?
_ ოპოზიციასთან, რა თქმა უნდა, ვითანამშრომლებ. ასევე იმ კანონებსაც სიამოვნებით დავუჭერ მხარს, რომელსაც უმრავლესობა წარმოადგენს და რომელიც ხალხისთვის სასიკეთო იქნება. ზოგადად, კონსტრუქციული ოპოზიცია ვარ: კარგი მიხარია, ცუდი კი მწყინს!
_ დაპირისპირებას კოსტრუქციული კრიტიკა, რასაკვირველია, სჯობია, მაგრამ „ნაციონალებთან“ როგორ ითანამშრომლებთ, როცა თქვენი პარტია, ანუ „პატრიოტთა ალიანსი“, „ნაცმოძრაობის“ აკრძალვას ითხოვს და საამისოდ ხელმოწერებიც შეაგროვა?
_ როცა აიკრძალება, „ნაციონალურ მოძრაობასთან“ აი, მაშინ აღარ ვითანამშრომლებ!
მინდა, სწორად გამიგოთ, ლაპარაკი რაზეა: ვთქვათ, „ნაციონალური მოძრაობა“ კონსტრუქციული წინადადებით გამოვიდა და რახან „ნაციონალური მოძრაობაა“, რა ვქნა, ამ კონსტრუქციულ წინადადებას იგნორირება გავუკეთო? ყველაფერს, რაც ჩემი კუთხისთვის სასიკეთო იქნება, აუცილებლად დავუჭერ მხარს!
_ აშკარად ახლებური მიდგომა გაქვთ. ისე, თავის დროზე, „პატრიოტთა ალიანსმა“ უმაღლესი საბჭოს სიაში პირველ ნომრად რატომ არ ჩაგწერათ?
_ არ ვიცი, ეს ჩვენი შეცდომა იყო თუ არა, მაგრამ ამის თაობაზე შეკრება გვქონდა, ვიმსჯელეთ და გადავწყვიტეთ, რომ პარტიული სიის პირველი ნომერი დავით თარხან-მოურავი იქნებოდა, რომელმაც ზაზა ოქუაშვილს დაუთმო ადგილი… როგორც დრომ აჩვენა, ეს შეცდომა იყო, რადგან აჭარა სპეციფიკური კუთხეა და ეს ცვლილება ხალხმა არ მიიღო.
_ აქედან გმომდინარე, ხომ არ ფიქრობთ, რომ ეს ორი წელი „პატრიოტთა ალიანსმა“ აჭარის უმაღლეს საბჭოში, უბრალოდ, დაკარგა?
_ ზაზა ოქუაშვილს არ ვიცნობ. სამაგიეროდ მის მეუღლეს, ქალბატონ ნატოს ვიცნობ და ძალიან დიდ პატივს ვცემ, მაგრამ, მიუხედავად ამისა, მიმაჩნია, რომ ეს ორი წელი „პატრიოტთა ალიანსმა“ აჭარაში თუნდაც იმიტომ დაკარგა, რომ ბატონი ოქუაშვილი ერთი ინიციატივითაც არ გამოსულა და, საერთოდ, პარტიაშიც არ მოსულა!
_ ბატონო მერაბ, თქვენი, როგორც ახალბედა დეპუტატის პირველი ინიციატივა რა იქნება?
_ ამ თემაზე ვმუშაობ. არ დაგიმალავთ და ძალიან მაინტერესებს ის ფირმები, რომელსაც ციტრუსის შესაწამლი შხამ-ქიმიკატები შემოაქვს.
_ ამ ფირმებით რატომ დაინტერესდით ან დაინტერესება რით გამოიხატება?
_ ეს შხამ-ქიმიკატები ძალიან ძვირი და აბსოლუტურად უხარისხოა. ამიტომ საინტერესოა, ეს ფირმები ვისია და აღნიშნული შხამ-ქიმიკატები რა კრიტერიუმით შემოაქვთ?!
სხვათა შორის, წინა წლებში არაერთი პროგრამა არსებობდა. მაგალითად, ერთ-ერთი ასეთი ნერგების დარიგების პროგრამა იყო, ანუ სოფლის მეურნეობის სამინისტრო კაკლისა და თხილის ნერგებს არიგებდა. თავის დროზეც მქონდა ინფორმაცია, რომლის შესახებაც ხმამაღლა ვსაუბრობდი, რომ ამ პროგრამაში კორუფციული სქემა იყო ჩადებული, _ ველური თხილისა და კაკლის ნერგები შემოჰქონდათ, რომელიც ნაყოფს არ იძლევა.
_ მერე, აქ კორუფციის ნიშნები სად დაინახეთ?
_ ზოგადად, თხილმა და კაკალმა მოსავალი რომ მოგცეთ, დაახლოებით, სამიდან ხუთი წელი უნდა გავიდეს, მაგრამ აჭარაში მოქმედებდნენ პრინციპით, _ ხუთ წელიწადში ან ვირი მოკვდება, ან _ ვირის პატრონიო. მოკლედ, სამი და ხუთი კი არა, უფრო ბევრი წელი გავიდა და მაინტერესებს, ამ ნერგებმა როგორი ნაყოფი გამოიღეს და სწორი ვიყავი თუ არა, როცა ვამბობდი, ამ ნერგებიდან ნახევარზე მეტი ველური ჯიშისაა-მეთქი.
_ ე. ი., საუბარი იქითკენ მიგყავთ, რომ აჭარაში კორუფცია ყვავის?
_ დიახ, საუბედუროდ, კორუფცია აბსოლუტურად ყველა დარგშია, თუმცა ამას პოლიციაზე ვერ ვიტყვი.
_ ერთი წუთით, წეღან ის დრო გაიხსენეთ, როცა რამდენიმე წლის წინათ პოლიციაში ბრალდებულებს აწამებდნენ. ახლა კი ამბობთ, აჭარის პოლიციაში კორუფცია არ არისო.
_ დიახ, პოლიციაში მწამებლები იყვნენ, რომელთა ნაწილიც განთავისუფლდა, ნაწილი კი ისევ მუშაობს, მაგრამ არასოდეს მითქვამს, პოლიციაში კორუფციაა-მეთქი.
_ კაკლისა და თხილის ნერგების გარდა, კორუფციის სხვა მაგალითების დასახელება შეგიძლიათ?
_ ყველაფერს გადამოწმება უნდა. ხომ ვამბობდი, ველური ნერგები შემოდის-მეთქი. აი, ახლა, კომისიის შექმნას მოვითხოვ, რათა შემოწმდეს, აჭარის სოფლის მეურნეობაში კორუფცია არის თუ არა.
სხვათა შორის, ბუჯეტიდან არაერთი არაფრისმომცემი პროექტი დაფინანსდა, რაშიც კოლოსალური თანხა დაიხარჯა. არადა, სავსებით შესაძლებელი იყო, რომ ეს თანხა სხვა სფეროს განვითარებას მოხმარებოდა.
_ აჭარის უმაღლესი საბჭოს „ოცნების“ უმრავლესობა, ასე ვთქვათ, ანტიკორუფციული კომისიის შექმნას მხარს დაუჭერს?
_ თუ არ დაუჭერს, საზოგადოება ამასაც გაიგებს.
_ სხვათა შორის, წლების განმავლობაში ყურადღებას კიდევ ერთ პრობლემაზე ამახვილებდით და ამბობდით, აჭარაში არალეგალური სასწავლებლები არსებობს, სადაც მუსლიმ სასულიერო პირებს ამზადებენო. უმაღლეს საბჭოში ამ თემასაც ხომ არ წამოწევთ?
_ რა თქმა უნდა, წამოვწევ. სიმართლე გითხრათ, ჯერ ბოლომდე არ ვარ გარკვეული, რეგლამენტით რისი უფლება მაქვს, მაგრამ ერთი ცხადია: აჭარაში რაღაც რელიგიური სასწავლებლები იხსნება.
_ ეს სასწავლებლები საფრთხის შემცველი რატომ არის?
_ საერთოდ, ტრადიციული ისლამის წინააღმდეგი არ ვარ _ აჭარაში ტრადიციული ისლამი იყო და ახლაც არის, მაგრამ ამას გარდა, აჭარაში სხვადასხვა მუსლიმური დაჯგუფება არსებობს.
ასევე სალაფიტებიც არიან. სალაფიზმი, როგორც ვიცი, ვაჰაბიზმის ერთ-ერთი განშტოებაა, რასაც უნდა შევებრძოლოთ იმიტომ, რომ ეს ტერორიზმის ბუდეა. იცით, დიდი მემედ აბაშიძე რას ამბობდა? _ ჩვენს ქართველ ძმებთან ერთად მუსლიმი ძმებიც ვართო. ვაჰაბისტებისთვის კი ქართველი ძმა არ არსებობს! მათთვის ძმა მხოლოდ მუსლიმია და მეტი არავინ! ხვდებით, რა შორსმიმავალი გეგმები აქვთ?
მოკლედ, ჩვენ უნდა შევეცადოთ, იმ მუსლიმური სკოლების სასწავლო პროგრამები განათლების სამინისტრომ დაამტიცოს. დღეს არავინ იცის, ასეთ სასწავლებლებში რას ასწავლიან!
ამას გარდა, იცით, კიდევ რა კანონია მისაღები?
_ რა კანონი?
_ მათ, ვინც თურქეთში, ირანსა თუ არაბეთში რელიგიურ განათლებას მიიღებს და უკან დაბრუნდება, საქართველოში მაღალი თანამდებობის დაკავების უფლება არ უნდა ჰქონდეთ!
_ რატომ?
_ მაგალითად, თურქეთში ერდოღანმა კანონი მიიღო, რომლის თანახმადაც, მოლას, რომელსაც განათლება სხვა ქვეყანაში აქვს მიღებული, თანამდებობის დაკავების უფლება არ აქვს და მას შეუძლია, უბრალოდ, მოლა იყოს და სასულიერო იერარქიაში წინ ვერ წავა.
_ შეიძლება, მეშლება, მაგრამ ანალოგიური კანონი, მგონი, აზერბაიჯანშიც მოქმედებს.
_ ასეთი კანონი საქართველოშიც უნდა მივიღოთ და რატომ არ შეიძლება, რომ, მაგალითად, თბილისის სახელმწიფო უნივერსიტეტში სპეციალური ფაკულტეტი გაიხსნას, სადაც ახალგაზრდები თეოლოგიას შეისწავლიან?
_ უცხოეთში რელიგიის სკოლადამთავრებულმა ხალხმა საქართველოში მაღალი თანამდებობა მაინც, რატომ არ უნდა დაიკავოს?
_ იმიტომ, რომ ამ ხალხის მენტალიტეტი შეცვლილია და ქართულ ინტერესებს ვეღარ გაატარებს.
_ ამ ინიციატივის თუნდაც კანონპროექტის დონეზე განხილვა, ვფქირობ, დიდ აჟიოტაჟს გამოიწვევს.
_ შეიძლება, მაგრამ თუ თეოლოგიის შესწავლა გინდა, მაინცდამაინც თურქეთში რატომ უნდა წახვიდე? თუ ვინმეს მუფტობა უნდა, კეთილი ინებოს და რელიგიური განათლება საქართველოში მიიღოს!
დამერწუნეთ, იმ ახალგაზრდების 99 პროცენტი, ვინც რელიგიურ განათლებას თურქთსა და ირანში იღებს, საქართველოში ქართული აზროვნებით აღარ ბრუნდება. სწორედ ეს ხალხი ქმნის დღეს აჭარაში პრობლემებს და მეტი არავინ!
_ ბატონო მერაბ, ამ საკითხს, ვატყობ, კარგად იცნობთ და ისიც გეცოდინებათ, ახალგაზრდები თურქეთში, ირანსა და სხვა აზიურ ქვეყნებში რელიგიური განათლების მისაღებად როგორ ხვდებიან?
_ ძალიან დიდი დაფინანსება მოდის, სპეციალურად გაჭირვებულ ოჯახებს არჩევენ, მათი შვილები მიჰყავთ და ყველანაირ პრივილეგიას უქმნიან _ ასწავლიან, საცხოვრებლითა და საკვებითაც უზრუნველყოფენ.
_ ანუ ეჭვობთ, რომ ყველაფერ ამის უკან უცხოური სპეცსამსახურები დგანან?
_ დიახ.
სხვათა შორის, ზოგს არ უნდა აღიაროს, მაგრამ არსებობს თურქეთის საგარეო საქმეთა ყოფილი მინისტრის, დავით ოღლუს სატელევიზიო განცხადება, სადაც ის პირდაპირ აკეთებს მინიშნებას, ოდესმე ბათუმს აუცილებლად დავიბრუნებთო.
_ ბატონო მერაბ, უკვე კანონმდებელი, ანუ საჯარო პირი ხართ და თქვენი ნებისმიერი განცხადება საზოგადოების მხრიდან შესაძლოა, სხვანაირად იყოს აღქმული. ამასთან, იმითაც უნდა დაინტერესდეთ, რამდენიმე დღის წინ ბათუმში მოღვაწე თურქმა ინვესტორმა რომ განაცხადა, _ ჩემთან მოვიდნენ და მითხრეს, საქართველო უნდა დავტოვო, თორემ პრობლემები შემექმნებაო.
_ პირველ რიგში, უფლებადამცველი ვარ და თუ ეს ადამიანი მომმართავს, მის უფლებებს, რა თქმა უნდა, დავიცავ, მაგრამ ჩემთვის არ მოუმართავს.
_ თურქმა ბიზნესმენმა მუქარის შესახებ საჯარო განცხადება გააკეთა და ეს საკმარისი არ არის, რომ მისი უფლებები დაიცვათ?
_ გჯერათ, რომ მასთან ვინმე მივიდა და უთხრა, აქედან წადი, თორემ პრობლემები შეგექმნებაო?
_ ამაში დაუჯერებელი რა არის, მით უმეტეს, რომ თურქეთისა თუ ირანის მოქალაქეების წინააღმდეგ საქართველოში საპროტესტო აქცია არაერთხელ გამართულა.
_ მე არ მჯერა.
_ რატომ არ გჯერათ?
_ იმიტომ არ მჯერა, რომ შეიძლება, ამ ადამიანს რამე დანაშაული ჰქონდა ჩადენილი, თორემ ვერ წარმომიდგენია, დღეს აჭარაში ვინმე ინვესტორთან მივიდეს და ქვეყნის დატოვება მოსთხოვოს. პირიქით, ინვესტორებს მივესალმებით.
_ სხვათა შორის, იმ პოლიტიკური პარტიის წარმომადგენელი ხართ, რომელიც ბათუმში მეჩეთის მშენებლობის წინააღმდეგ გამართული აქციების ავანგარდში იდგა.
_ არა, ეს ძალიან დიდი შეცდომაა.
_ შეცდომა რატომ არის? რა, „პატრიოტთა ალიანსი“ ბათუმში მეჩეთის მშენებლობას არ აპროტესტებდა?
_ პირადად მე ვარ იმის ინიციატორი, რომ ბათუმში ასე ვთქვათ, ერთი ქოლგის ქვეშ აშენდეს მეჩეთიც, მართლმადიდებლური და კათოლიკური ეკლესიები და ასევე სინაგოგაც. სხვათა შორის, ეს იდეა, ჯერ კიდევ, მაშინ გაჟღერდა, როცა ქალაქის თავი ანდრონიკაშვილი იყო, მაგრამ მაშინ ამ იდეის განხორციელებას პირველმა მსოფლიო ომმა შეუშალა ხელი. ამ იდეის შესახებ მოლაპარაკებები მუსლიმებთან გვაქვს, რომლებმაც ეს წამოწყება კარგად მიიღეს. ახლა ამ იდეის შესახებ მოლაპარაკებას საპატრიარქოსთან ვაპირებთ.
„პატრიოტთა ალიანსი“ ქართული მეჩეთის აშენების წინააღმდეგ არასოდეს გამოსულა. ეს ტყუილი და ცუდი ჟურნალისტების მიერ არის ინტერპრეტირებული!
_ უკაცრავად, ჟურნალისტებს რაში გვდებთ ბრალს?
_ ჩვენ აზიზიეს სახელობის მეჩეთის წინააღმდეგები ვიყავით, რომელიც თურქეთის დაჟინებული მოთხოვნით ბათუმის ცენტრში უნდა აშენებულიყო. სინამდვილეში, ეს მეჩეთი კი არა თურქეთის დაზვერვის რაღაც ცენტრი იქნებოდა.
თუ მეჩეთი გვინდა, მას ადგილობრივი მოსახლეობის გამოკითხვით ავაშენებთ და არა _ თურქეთის მოთხოვნით!
_ ბატონო მერაბ, თქვენი განვლილი ცხოვრება იმის თქმის საფუძველს მაძლევს, რომ რევოლუციონერად და მეამბოხედ შეგრაცხოთ. ამბოხებებსა და მინირევოლუციებს აჭარის უმაღლეს საბჭოშიც ხომ არ მოაწყობთ ხოლმე?
_ არა, მე მხოლოდ და მხოლოდ სიმართლეს ვიტყვი! წეღანდელი თქმისა არ იყოს, ჩასაფრებული არ ვარ!
_ ანუ „ოცნებას“ შეურიგდით?
_ არა! „ოცნებას“ როგორ შევურიგდები, როცა ჩემი ქვეყანა უკან და უკან მიდის, მაგრამ ხომ შეიძლება, რამე კარგი გააკეთოს და ამას მხოლოდ მივესალმები! თუ „ოცნება“ სისულელეებს გააკეთებს, რა თქმა უნდა, თავს შევაკლავ!
_ შვიდი წელია, „ოცნება“ ხელისუფლებაშია და თუ პირველ პერიოდს არ ჩავთვლით, მმართველ გუნდს მუდამ აკრიტიკებთ და რატომ გგონიათ, რომ ახლა კარგს გააკეთებს? სხვათა შორის, მახსოვს, აქტიურად იბრძოდით ბათუმის „ოცნების ქალაქის“ მოსახლეობის უფლებებისთვის, ასევე ბანკებისა და კერძო მევახშეებისგან დაზარალებულებსაც იცავდით. ეს პრობლემები არც დღეს მოგვარებულა…
_ რას ჰქვია, ეს პრობლემები დამავიწყდა? იპოთეკით დაზარალებულებს დღესაც გვერდით ვუდგავარ.
_ უმაღლეს საბჭოში ამ კუთხით არ იმუშავებთ?
_ რა თქმა უნდა, აუცილებლად. საერთოდ, პრობლემა უამრავია.
სხვათა შორის, ითქვა, რომ „ოცნების ქალაქში“ ასი მილიონი ჩაიდება, მაგრამ საინტერესოა, როდის? „ოცნების ქალაქის“ მცხოვრებლები ითხოვდნენ, მიწა მოგვეცით, ანუ სადმე დაგვასახლეთო, მაგრამ ეს პრობლემა მეშვიდე წელია, გაიწელა. ბავშვები გაიზარდნენ და ამ ხალხის პირობაც შეიცვალა.
_ „ოცნების ქალაქის“ მოსახლეობა დღეს რას ითხოვს?
_ ბათუმში გაზრდილი ბავშვი საცხოვრებლად ნინოწმინდასა და წალკაში აღარ წავა. ამიტომ ხელისუფლებამ საკუთარი შეცდომა თავადვე უნდა გამოასწოროს და „ოცნების ქალაქის“ ადგილას კორპუსები ააშენოს, სადაც ეს ხალხი დასახლდება. ეს მოთხოვნა ხელისუფლებამ გაიგო და რამდენიმე კვირის წინ რიჟვაძემ განაცხადა, ამ ტერიტორიაზე კორპუსების მშენებლობა დაიწყებაო. ეს არ უნდა გამიხარდეს და ამას არ უნდა მივესალმო? აი, ასეთ კონსტრუქციულ ურთიერთობაზეა საუბარი.
_ გასაგებია, მაგრამ თქვენს კონსტრუქციულობას ზოგმა შესაძლოა, სხვა სარჩული გამოაკეროს და თქვას, „პატრიოტები“ ოცნებასთან თანამშრომლობენო.
_ „ქართული ოცნება“ „პატრიოტთა ალიანსს“ უფრო ებრძვის, ვიდრე _ „ნაციონალურ მოძრაობას“!
_ ეს საიდან მოიტანეთ?
_ ახლავე გეტყვით: იგივე საპრეზიდენტო არჩევნებში იძულებულები ვიყავით, სალომე ზურაბიშვილისთვის მიგვეცა ხმა და ჩვენი მხარდამჭერების მობილიზება გაგვეკეთებინა.
_ რატომ გახდით იძულებული, რომ ზურაბიშვილისთვის დაგეჭირათ მხარი?
_ იძულებულები იმიტომ გავხდით, რომ „ნაციონალების“ დაბრუნების წინაპირობა არ შექმნილიყო. ორ კედელს შუა ამიტომაც გავიჭყლიტეთ, მაგრამ იმედი მაქვს, რომ ძალიან მალე კიდევ უფრ გავძლიერდებით და ხალხიც მიხვდება, რომ „პატრიოტთა ალიანსი“ ის პოლიტიკური ძალაა, რომელსაც სახელმწიფოს მართვა შეუძლია.
_ მაინც ვერ დამისაბუთეთ, რაში გამოიხატება, რომ „ქართული ოცნება“ „პატრიოტთა ალიანსს“ თუნდაც აჭარაში ებრძვის?
_ 2016 წელს გაგახსენებთ, როცა არჩევნებამდე ზუსტად 20 დღით ადრე „პატრიოტთა ალიანსმა“ ბათუმის ერას მოედანზე, დაახლოებით, 20-25 ათასი ადამიანი შევკრიბეთ, მაგრამ იცით, ცესკომ რა დაწერა?
_ რა?
_ ცესკომ დაწერა, რომ აჭარაში თითქოს მხოლოდ ხუთი ათასმა ამომრჩეველმა მოგვცა ხმა. ეს ხომ აბსურდია და ვინ დაიჯერებს? საბოლოო ჯამში, აჭარის უმაღლეს საბჭოში ერთი კაცით შევედით და ეს მაშინ, როცა, მინიმუმ, ოთხი დეპუტატი უნდა გვყოლოდა.
_ ლაპარაკია, რომ შესაძლოა, ვადამდელი საპარლამენტო არჩევნები დაინიშნოს. თუ ასე მოხდა, დეპუტატის მანდატის დატოვება მოგიწევთ. ამ მოცემულობაში, არ გერჩიათ, რომ ისევ გარედან გებრძოლათ?
_ გითხარით და კიდევ გეუბნებით: ჩემთვის აჭარის უმაღლესი საბჭოს წევრობა თანამდებობა კი არა, ტრიბუნაა, რომ ხელისუფლებას ჩემი კუთხის, ჩემი აჭარის მოსახლეობის სატკივარი მეტად დავანახო!
რაც შეეხება ვადამდელ არჩევნებს, ჯერ ამაზე პარტიის ლიდერებთან არ მისაუბრია, თუმცა ჩემს პირად პოზიციას გეტყვით: აჭარაში „პატრიოტთა ალიანსს“ ძალიან დიდი რეიტინგი აქვს და თუ უნდათ, ვადამდელი არჩევნები ხვალვე დანიშნონ! ხალხი ხედავს, რომ მის გვერდით ვდგავართ და დიახ, სწორედ ჩვენ ვართ ის ძალა, რომელსაც შეუძლია, რაღაც გააკეთოს!

გიორგი აბაშიძე