გიგლა ბარამიძე: „დაიმახსოვრეთ ჩემი სიტყვა: ერთ წელიწადში „ოცნებამ“ შეიძლება, სალომე ზურაბიშვილის იმპიჩმენტის საკითხი დააყენოს!“

„დემოკრატიული მოძრაობის“ ერთ-ერთი ლიდერი, გიგლა ბარამიძე, რომელიც „ნაციონალური მოძრაობის“ ხელისუფლებაში ყოფნის დროს, 9 წლის განმავლობაში, დევნილობაში იმყოფებოდა, „ქრონიკა+“-თან „ქართულ ოცნებას“ უმწვავესად აკრიტიკებს და არც იმის თქმას ერიდება, რომ ამ პოლიტიკური გუნდისთვის პოლიტიკური წამმზომი ჩართულია. მეტიც, ბარამიძე ამბობს, რომ ქვეყნის განვითარებისთვის უკეთესი იქნებოდა, რომ საპრეზიდენტო არჩევნებში ოპოზიციის კანდიდატს გაემარჯვა.

ამასთან, გიგლა ბარამიძე პრეზიდენტის ინაუგურაციის თემასაც ეხმაურება და აცხადებს, რომ უმჯობესი იქნება, ინაუგურაცია ბიძინა ივანიშვილის სასახლეში ჩატარდეს.
„ამდენს ნუ წვალობთ და ინაუგურაცია ბიძინა ივანიშვილის სასახლეში ჩაატარეთ. ეს იქნება ყველაზე ლოგიკური გადაწყვეტილება. დიახ, ინაუგურაცია იმ ადამიანის სასახლესა და მის შემოგარენში უნდა ჩატარდეს, რომელმაც ზურაბიშვილი საქართველოს პრეზიდენტად დანიშნა. ბიძინა ივანიშვილზე თანამედროვე ტექნოლოგიებით აგებული სასახლე საქართველოში არ მოიძებნება. ივანიშვილის შემოგარენში თუ გაიმართება ინაუგურაცია, ამით საბიუჯეტო სახსრებსაც დავზოგავთ. არა მგონია, მილიარდერმა სასახლის იჯარის ფული გამოართვას თავის საპატრონოს“, _ აღნიშნავს გიგლა ბარამიძე „ქრონიკა+“-თან.
ამას გარდა, „დემოკრატიული მოძრაობის“ წევრი ამბობს, რომ ივანიშვილს წინაპრებთან თამაში უყვარს:
„სალომე თამარ მეფეს რომ შეადარა, ეს ხომ საერთოდ გაუგონარი სირცხვილი იყო. წავლენ-წამოვლენ და მიადგებიან წმინდან მეფეს. 21-ე საუკუნეში დანიშნული პრეზიდენტის თამარ მეფესთან შედარება ცოტა უხერხულია. მინდა, მივმართო „ოცნების“ უვიცებს, _ ნუ ეთამაშებით ჩვენს წინაპრებს. თამარი არა მარტო დიდი მეფე, არამედ წმინდანიც იყო. წმინდანებს მაინც დაანებეთ თავი და ეს თქვენი პრეზიდენტი გინდ თელავში ჩაიყვანეთ და გინდ _ ხონში. ყველაფერი უკვე ისედაც კომიკურია“.
სხვათა შორის, ინტერვიუს დროს გიგლა ბარამიძემ საერთაშორისო დამკვირვებლებთან შეხვედრაც გაიხსენა და მათი ნათქვამის ციტირება მოახდინა, ანუ როგორც ეუთოსა და სხვა მისიების წარმომადგნელებს ბარამიძესთან საუბრისას პირველი ტურის შემდეგ უთქვამთ, მათ ბოლო დრომდე ეგონათ, რომ მოსახლეობის აბსოლუტური უმრავლესობა ივანიშვილის მომხრე იყო, მაგრამ არჩევნებმა ცივილიზებული მსოფლიო, თურმე, სხვა რამეში დაარწმუნა.
„ქრონიკა+“ გიგლა ბარამიძის ინტერვიუს გთავაზობთ:

_ ბატონო გიგლა, საპრეზიდენტო არჩევნებს როგორ აფასებთ და, საერთოდ, სალომე ზურაბიშვილს პრეზიდენტად აღიარებთ?
_ ეს საპრეზიდენტო არჩევნები იმის კლასიკური ნიმუში და მსოფლიოში თითით საჩვენებელია, თუ როგორ არ უნდა ჩატარდეს ევროპეიზმისა და დასავლურობის პრეტენზიის მქონე პატარა და ღარიბ ქვეყანაში არჩევნები! ეს, პრაქტიკულად, არჩევნები არ ყოფილა.
_ რატომ?
_ უზამაზარ დარღვევებზე რომ აღარაფერი ვთქვათ, ეს იყო დანიშვნა _ ერთმა მდიდარმა ადამიანმა თავისი საპატრონო ფიგურა დანიშნა! ეს არის და ეს.
თუ გავითვალისწინებთ მთელი მსოფლიო მასშტაბით ჩვენი მეგობრებისა და იმ ხალხის რაოდენობას, ვინც ხმა მისცა ან მიაცემინეს, ასევე თუ იმასაც გავითვალისწინებთ, რომ ტერიტორიებდაკარგულ საქართველოში ზედმეტი ემოციურობა და დაპირისპირება საჭირო არ არის, შეიძლება ითქვას, რომ არჩევნები კოჭლი ქათამივით შედგა, მაგრამ ვაი, ასეთ არჩევნებს!
მოკლედ, შეგვიძლია ვთქვათ, რომ პრეზიდენტი ფორმალურად დაინიშნა!
_ რისთვის სჭირდებოდა იმ ერთ მდიდარ ადამიანს, რომ პრეზიდენტად მაინცდამაინც სალომე ზურაბიშვილი დაენიშნა?
_ ამის ორი მიზეზი არსებობს: ჯერ ერთი, ეს ადამიანი მის ოჯახთან დაახლოებულმა ერთმა წყვილმა გააცნო, დააახლოვა და შთააგონა, რომ ზურაბიშვილი ევროპის სახეა და მისი პრეზიდენტობა ამ ერთი მდიდარი ადამიანის იმიჯისთვის ძალიან კარგი იქნებოდა.
_ მდიდარ ადამიანთან დაახლოებულ წყვილში ვის გულისხმობთ?
_ გვარსა და სახელს არ ვიტყვი.
_ არც იმას მეტყვით, ეს ადამიანები ქართულ პოლიტიკაში არიან თუ არა?
_ არა, პოლიტიკაში არ არიან, მაგრამ ამ ერთი მდიდარი ადამიანის ოჯახთან და პირადად მასთანაც ძალიან ახლოს არიან. სწორედ მათგან წამოვიდა ამ ქალბატონის იდეა.
რაც შეეხება მეორე მიზეზს, დაარწმუნეს, რომ დასავლურ წრეებში ეს ქალბატონი ამ ერთი მდიდარი ადამიანის ინტერესებს დაიცავს და მისი სახე იქნება, მაგრამ ვიცი, რომ შინაგანად და ისეც, მოგვიანებით, ივანიშვილი ამ გადაწყვეტილებას ნანობდა და ვიწრო წრეში ამბობდა კიდეც, _ არ მეგონა, ამ ქალბატონს საქართველოში ასეთი ცუდი გამოხმაურება თუ ექნებოდაო. ამის მიუხედავად, ივანიშვილს თავისი არჩევანის უკან გადაწევა არ სჩვევია და ამიტომ, ვიტყოდი, რომ „ქართული ოცნება“ სალომე ზურაბიშვილმა პოლიტიკურ საფლავში ჩაითრია! „ოცნების“ უკან წასვლის რეალური ათვლის წერტილი სწორედ ეს არის!
_ ივანიშვილის მოტივი გასაგებია, მაგრამ, თქვენი აზრით, სალომე ზურაბიშვილს პრეზიდენტობა რისთვის უნდოდა?
_ სალომე ზურაბიშვილს პრეზიდენტობა რატომ არ უნდა? დიდი ხანია, ბალზაკის ასაკს გადაცილებული ქალბატონია, პრეზიდენტობა კი სერიოზული მდგომარეობაა _ ევროპაში ივლის, იფრენს და მას „სვეცკაობის“ თამაში უყვარს, თუმცა მისი ყოველი ნაბიჯი ცოტა სხვა რამეს მაგონებს, ვიდრე _ „სვეცკაობას“.
_ რა „სხვა რამეს“ გაგონებთ?
_ პროვინციალიზმს. რა, პარიზელი ან ნიუ-იორკელი პროვინციალები არ გინახავთ? ზურაბიშვილი აღტყინებული, აღტაცებულია, კანკალებს და ყველაფერი დაივიწყა _ ჟურნალისტებთან ურთიერთობა იქნება თუ ის, რომ ღარიბ ქვეყანაში, ვითომ დამოუკიდებელ კანდიდატს, 11 მილიონამდე შესწირეს და ამაზე უარი არ თქვა. რომელ ქვეყანაში გაგიგიათ, რომ არჩევნების მეორე ტური მიდიოდეს, მაგრამ კანდიდატს არ აჩენდნენ _ ერცხვინებოდეთ. მთელი ხელისუფლება ამ კამპანიაში იყოს ჩართული _ პოლიცია, სუს-ი, პრემიერი და ეს ქალბატონი კი მაინც ამბობდა, დამოუკიდებელი ვარო. აი, სწორედ ეს არის პროვინციალიზმის მაჩვენებელი.
მონტესკიე, ალბათ, საფლავში ტრიალებს, რადგან ეს არჩევნები ფრანგული დემოკრატია არ იყო! „სვეცკაობა“ მხოლოდ ყავის სმა არ არის, მოქმედებაში, საქციელში უნდა ჩანდეს, მაგრამ მე ვერ დავინახე!
თვითონ იმას იბრალებს, რაც არ გაუკეთებია და რაც მთავარია, ვერ ხვდება, რომ არასწორ ნაბიჯებს დგამს და ამით საზოგადოების დიდ ნაწილს აღიზიანებს. ყველაფერ ამას დიპლომატიასთან კავშირი საერთოდ არ აქვს და ვფიქრობ, ან უვიცობაა, ან _ რაღაცას დახარბებული პროვინციალიზმი.
სხვათა შორის, უცებ ამომიტივტივდა ერთი ასეთი პასაჟი: რამდენიმე წლის წინ, „ნაციონალების“ დროს, როცა შს მაშინდელმა მინისტრმა, ვანო მერაბიშვილმა, ოპოზიციას მინისტრის მოადგილის თანამდებობა შესთავაზა, მთელმა ოპოზიციამ უარი თქვა სალომე ზურაბიშვილის გარდა, რომელმაც განაცხადა, _ კი, მე მინდა, შს მინისტრის მოადგილე ვიყოო. ამ პასაჟის გახსენებით მივხვდი, რომ მისთვის ძალიან მნიშვნელოვანია არა პარტიულ-დიპლომატიური ცხოვრება, მეცენატობა ან ვთქვათ, მემუარების წერა, არამედ, თანამდებობა. დღეს პრეზიდენტის თანამდებობა აჩუქეს, დასვეს, დადეს პრეზიდენტის სავარძელში. ბოდიში და, ფეხებზე არ ჰკიდია, ვინ რას ფიქრობს?!
ერთი წუთით წარმოიდგინეთ: ვითომ დამოუკიდებელი პრეზიდენტობის კანდიდატი საფრანგეთში ან გერმანიაში, ან სხვა რომელიმე ქვეყანაში, რომელიც დემოკრატიის მაგალითად გვაქვს, ჟურნალისტებს ეუხეშებოდეს და ეჯიკავებოდეს.
_ მაგალითად, ტრამპი მედიას ხშირად ეუხეშება და ეჩხუბება.
_ ნუ გავქანდებით და ზურაბიშვილს, მაინცდამაინც, ტრამპს ნუ შევადარებთ, რომელიც სხვა მოვლენაა. ტრამპის უკან მისი შრომით მოპოვებული მილიარდებია, რომელიც არავის უჩუქებია. ტრამპი არავის აუღია და პრეზიდენტად არ დაუდევს!
ყველაფერ ზემოთქმულის მიუხედავად, მაინც ვისურვებდი და არ მეწყინება, რომ სალომე ზურაბიშვილი კარგი პრეზიდენტი იყოს, თუმცა „ქართულ ოცნებას“ _ დეგრადირების გზაზე დამდგარ ამ გაერთიანებას _ მოვუწოდე, ელოდე სპექტაკლებს და ტრაგიკომედიას-მეთქი.
_ რაზე აკეთებთ მინიშნებას, ბატონო გიგლა?
_ ვიცი რა ამ ქალბატონის ფსიქოტიპი, „ოცნებას“ ისეთ პენალტებს დაურტყამს, რომ პრობლემების წინაშე დააყენებს!
_ ელოდებით, რომ ზურაბიშვილი მმართველ ელიტას გაემიჯნება?
_ აუცილებლად! ზურაბიშვილი შინაგანად დასანახად ვერ იტანს „ოცნების“ უმეტესობას, უპირველესად, ქალბატონებს.
_ ამას რის საფუძველზე ამბობთ?
_ არ ვიცი, ყურადღება რატომ არავინ მიაქცია.
_ რას?
_ როცა მეორე ტურის წინ ისრაელიდან შავი პიარის სპეციალისტი ჩამოიყვანეს, რომელიც რაღაც გაუგებარ პიარს აწარმოებდა და ჩამოფხრიწეს ბილბორდებიდან ზურაბიშვილის სურათები და იმ ზორბა ბიჭის სურათები რომ მიაკრეს.
_ რომელი „ზორბა ბიჭის“?
_ მაგალითად, პრემიერის, რომელიც, თითქოს, დიდი ავტორიტეტი მყავდეს. მოკლედ, როცა ამის შესახებ ჰკითხეს, ზურაბიშვილი მაშინვე გაემიჯნა და განაცხადა, ეს „ოცნების“ პიარიაო.
_ თქვენი დაკვირვებით, ზურაბიშვილი „ოცნებაზე“ უკვე ნაწყენი და გაბრაზებულია?
_ ზურაბიშვილი შინაგანად ვერ იტანს „ოცნებას“, მათგან განსხვავებით, ორი წიგნი წაუკითხავს და მეტი ხედვა აქვს. „ოცნებაშიც“ არის ინტელექტთან წილნაყარი რამდენიმე ადამიანი, მაგრამ მთლიანობაზე ვლაპარაკობ და ნახეთ, ერთმანეთს როგორ დაჭამენ! დაიმახსოვრეთ ჩემი სიტყვა _ ერთ წელიწადში შეიძლება, სალომე ზურაბიშვილის იმპიჩმენტის საკითხიც დადგეს!
_ ანუ ერთი წლის შემდეგ „ოცნებამ“, შეიძლება, ზურაბიშვილის გადაყენება მოისურვოს და მისი იმპიჩმენტის საკითხი დააყენოს?
_ დიახ, ამან შეიძლება, ისეთები გააგორ-გამოაგოროს, რომ ადგება „ოცნების“ რომელიმე დეპუტატი და იმპიჩმენტს მოითხოვს! დაიმახსოვრეთ ეს სიტყვები და ასე რომ მოხდება, პირველ ინტერვიუს ისევ თქვენ მოგცემთ!
_ სხვათა შორის, ივანიშვილმაც ერთი წელი ითხოვა ყველაფრის დასალაგებლად… ზურაბიშვილის არჩევით ქვეყანამ საერთაშორისო არენაზე რა წააგო?
_ ასე ვთქვათ: ჯერ კიდევ მარგველაშვილის დროს და მით უმეტეს, ახლა პრეზიდენტის ინსტიტუტი ისეა გამოშიგნული, რომ, რეალურად, პრეზიდენტს ყავის სმის, ქორწილებსა და ქელეხებში სიარულის გარდა, სხვა ფუნქცია არ გააჩნია! ამიტომ სახელმწიფოსთვის გადაწმყვეტ მნიშვნელობაზე ვერ ვისაუბრებთ, თუმცა მაინც, ვფიქრობ, რომ პრეზიდენტს სახელმწიფოსთვის ადეკვატური ინსტინქტები და ქმედებები უნდა ჰქონდეს. შეძლებს კი ეს ქალბატონი რომელიმე უცხო ქვეყანაში ჩასვლისას, რაც ჩვენს ქვეყანას უნდა ან უნებურად იმის საწინააღმდეგოს ხომ არ იტყვის, რაც სახელმწიფო ინტერესებია? იმას კი არ ვამბობ, რომ ქვეყანას უღალატებს, მაგრამ…
_ ღალატი ახსენეთ და ოპოზიცია ზურაბიშვილს ღალატში, დიდი ხანია, ბრალს სდებს.
_ ოპოზიცია გასაგებია. საერთოდ, როგორ შეიძლება, „ნაცების“ მიმართ სიმპათია მქონდეს. აქვე, იმასაც შეგახსენებთ, მაშინ, როცა „ნაციონალურმა მოძრაობამ“ სალომე ზურაბიშვილი საგარეო საქმეთა მინისტრად დანიშნა, მე „ნაციონალური მოძრაობა“ დამდევდა და 9 წელი ძებნაში ვიყავი. ამიტომ წინა ხელისუფლებაზე ჩემგან ყველაფერი ითქმის _ დადებითიც და უარყოფითიც. ღალატს დამტკიცება უნდა და მე ამას არ ვამბობ, მაგრამ როცა ქვეყნის გარეთ გადის პრეზიდენტი, ქვეყნის საერთო საგარეო სტრატეგიასთან უნისონში უნდა საუბრობდეს, თუმცა დაიმახსოვრეთ, ეს ქალი ამის გამკეთებელი არ იქნება!
_ ბატონო გიგილა, ერთ-ერთ განცხადებაში, რომელიც ინაუგურაციის თელავში გამართვას ეხება, ამბობთ, ზურაბიშვილს გეორგიევსკის ტრაქტატის ნოსტალგია აქვსო.
_ უდავოდ, აბა, თელავში რა უნდა? ნონსენსი და სირცხვილია, როცა პრეზიდენტის ინაუგურაცია დედაქალაქში არ ტარდება. ამის შესახებ უკვე მოისმინეს და აი, დაიმახსოვრეთ, ინაუგურაციის რაღაც ფრაგმენტი შეიძლება, დედაქალაქის რომელიმე უბანში გააკეთონ. ინაუგურაციის თელავში გამართვის მიზეზი რა არის? ზურაბიშვილი გამოდის და ამბობს, თელავმა არ ამირჩია და რომ დავამტკიცო, ყველას პრეზიდენტი ვარ, სწორედ ამიტომ თელავიო, მაგრამ, სინამდვილეში, დედაქალაქს გაურბიან, თორემ არც რუსთავს აურჩევია და რუსთავში რატომ არ მიდის?
_ დედაქალაქს რატომ გაურბიან? ოპოზიციის წინააღმდეგობის ეშინიათ?
_ დიახ, არაკომფორტულად არიან. კარგად იციან, რომ საქართველოს მოსახლეობის ძალიან დიდ ნაწილს ზურაბიშვილი დასანახად არ უნდოდა და ეს მხოლოდ „ნაციონალური მოძრაობა“ არ არის. ეს ქალბატონი საპრეზიდენტო კანდიდატურა არ იყო!
ყველაფერს თავი დავანებოთ და ასე ვთქვათ: რომ ჩამოდის საფრანგეთისა თუ გერმანიის ან ბრიტანეთის ელჩი, ერთ წელიწადში ქართულს, ასე თუ ისე, სწავლობს და რა გაუხდა ზურაბიშვილს, რომ ქართული ვერ ისწავლა?
_ არადა, ივანიშვილს ზურაბიშვილის ქართული ძალიან მოსწონს და მას თამარ მეფესაც კი ადარებს.
_ ბატონმა ბიძინამ ისიც თქვა, ძველქართულად ლაპარაკობსო, მაგრამ ძველი ქართული სალომე ზურაბიშვილმა კი არა, ნიკო მარი რომ გააცოცხლოთ და ივანე ჯავახიშვილი, იმათ არ ეცოდინებათ, ძველ ქართულში როგორი ინტონაცია და კილოკავი იყო.
ამიტომაც შევთავაზე, ნუ წვალობთ, ნუ ხარჯავთ ბიუჯეტის თანხებს, თავს ნუ იკლავთ, ყველაზე ლოგიკური და ბუნებრივი იქნება, ინაუგურაცია იმ ადამიანის სასახლეში ჩატარდეს, რომელმაც საქართველოს პრეზიდენტი დაუნიშნა!
_ ანუ თქვენი იდეაა, რომ ზურაბიშვილის ინაუგურაცია სოლოლაკში, ივანიშვილის „შუშის სასახლეში“ გაიმართოს?
_ დიახ, „შუშის სასახლეში“ ჰაიკლასის ტექნოლოგიებიცაა, როგორც მეუბნებიან და იმედია, თუ ერთი დღით იჯარით გასცემს ბატონი ბიძინა, ამის ფულს მისსავე დანიშნულ მთავრობას ბიუჯეტიდან არ გამოართმევს!
_ ბატონო გიგლა, „ნაციონალურ მოძრაობასთან“ იყავით დაპირისპირებული. თქვენთვის მისაღები იყო, რომ გრიგოლ ვაშაძეს გაემარჯვა?
_ საერთოდ, ობიექტური ვარ და წინა წლების ჩემს ტანჯვა-წამებას სუბიექტივიზმში არ გადავყავარ ხოლმე, ანუ იმას ვამბობ, რაც რეალობაა. „ნაციონალებმა“ მამა არ მატირეს და კაცი, რომელსაც, სხვებისგან განსხვავებით, არაფერი მომიპარავს და დამიშავებია, 9 წელი გადაკარგული ვიყავი. ჰოდა, თუ ვინმეს სათქმელი აქვს აუგი „ნაციონალურ მოძრაობაზე“, მეც ვამბობ, მაგრამ, მიუხედავად ამისა, ძებნიდან დაბრუნების შემდეგ, ბათუმში პირველად რომ ჩავედი, ვთქვი, რომ იმ ხელისუფლების მიერ არნახული სამუშაოები იყო გაწეული, ბათუმს ისეთი სახე მიეღო, როგორიც დღეს აქვს. ვიცი, რასაც ვამბობ და სიბინძურეების გამო „ნაციონალურ მოძრაობას“ ისევ უმკაცრესად ვაკრიტიკებ, მაგრამ ისიც ბიძინა ივანიშვილის დიდი მინუსია, რომ „ოცნების“ ხელისუფლებაში მოსვლიდან ექვსი წლის შემდეგაც საპირწონედ ისევ „ნაციონალური მოძრაობა“ დაიყენა.
გრიგოლ ვაშაძის გამარჯვებით არ გავიხარებდი, მაგრამ პოლიტიკური და თუნდაც საზოგადოებრივი ცხოვრების განვითარებისთვის უკეთესი იქნებოდა, რომ პრეზიდენტი მკვეთრად ოპოზიციური ლიდერი გამხდარიყო! დაპირისპირების შიშით „ქართული ოცნება“, სანამ ხელისუფლებაშია, უფრო გაინძრეოდა _ რომ შეშინდა, ხომ უცებ დაიწყო ვალების დაფარვა? რომ შეშინდნენ, ხომ უცბად დაიწყეს ხალხოსნობა და იგივე პლანის კულტივაციის კანონპროექტი უკან გაიტანეს? ამ კონტექსტში შეიძლება, ოპოზიციის კანდიდატის გამარჯვება უკეთესი ყოფილიყო, თორემ არც ერთი და არც _ მეორე!
სხვათა შორის, ესეც პრინციპია, როცა ღიად საუბრობ, თორემ იმის თქმა, აი, ზურაბიშვილს ხმა იმიტომ მივეცი, „ნაციონალები“ არ დაბრუნებულიყვნენო, თბილისური, პროვინციული ვიწრო „სვეცკაობაა“.
_ ბატონო გიგლა, გაერთიანებული ოპოზიცია სალომე ზურაბიშვილის პრეზიდენტობას არ აღიარებს და ვადამდელი საპარლამენტო არჩევნების ჩატარებას რეგიონულ-პროპორციული პრინციპით ითხოვს. თქვენი აზრით, ეს მოთხოვნა რეალურია?
_ ინაუგურაციიდან ექვსი თვის განმავლობაში არანაირი არჩევნების ჩატარება არ შეიძლება, მაგრამ ეს არ არის მთავარი. თუ საარჩევნო სისტემა არ შეიცვლება, არაფერი გამოვა და ამ წუთას არჩევნები საარჩევნო სისტემის შეცვლის გარეშე რომ ჩატარდეს, ისევ ისეთივე კონფიგურაციას მივიღებთ _ „ნაცები“ და „ოცნება“. ამიტომ აზრი არ აქვს.
სხვათა შორის, ჩვენ არჩევნებამდე ორი თვით ადრე ვამბობდით, რომ ნომერი პირველი ამოცანა საარჩევნო სისტემის შეცვლაა და არჩევნები სწორედ ამ ცვლილების შემდეგ აუცილებლად უნდა ჩატარდეს!
დღევანდელი პარლამენტი უკვე სექტად ჩამოყალიბდა, რომელიც გვასწავლის, 35 ათას დოლარად ხუთსართულიანი სახლი როგორ უნდა ავაშენოთ, თან ბოდიშებიც უნდა ვუხადოთ, _ შეგვეშალა, რომ გკითხეთ, ამხელა სახლები საიდან და როგორ ააშენეთო.
ესენი მოსაცილებლები არიან, მაგრამ მხოლოდ საარჩევნო სისტემის შეცვლის შემდეგ!
_ გაერთიანებული ოპოზიცია საარჩევნო სისტემის შეცვლასაც ითხოვს… თქვენი დაკვირვებით, ოპოზიციის პროტესტს, ამ ეტაპზე, აზრი არ აქვს?
_ მე თუ მკითხავთ, უკეთესია, რაც უფრო მეტი აქცია იქნება, მაგრამ აქცია აქციისთვის არ უნდა იყოს. ჩვენ მრგვალ მაგიდასთან ყოველთვის ყველას ვიწვევდით და ახლაც მზად ვართ, მონაწილეობა საარჩევნო გარემოს კომპლექსური ცვლილებების განხილვაში მივიღოთ. უარს არც იმ შემთხვევაში ვიტყვით, თუ ამ მრგვალ მაგიდასთან „ნაციონალებიც“ იქნებიან, რადგან ეს ის საკითხია, რომელიც უნდა გაკეთდეს, მაგრამ თუ ამაზე არ წამოვლენ და, საერთოდ, არაფერზე წამოვლენ და ხელისუფლება სხვა გზას არ დაგვიტოებს, ქუჩის აქიცებს, რა თქმა უნდა, ჩვენც დავიწყებთ, რადგან ეს საზოგადოების მოთხოვნა იქნება!
_ ეს მასობრივი აქციები ხელისუფლების წინასაარჩევნო განცხადებას ხომ არ გაამართლებს, აი, გადატრიალება იგეგმებაო?
_ ამას თვითონ გეგმავენ! 2012 წელს ესენი ხელისუფლებაში იმიტომ მოვიყვანეთ, რომ უარი ვუთხარით ჯალათებს და სამართლიანობის აღდგენა გვინდოდა, მაგრამ მეშვიდე წელი იწყება, რაც „ოცნება“ ხელისუფლებაშია და საარჩევნოდ ბანერებზე გაგვიკრა ივანიშვილმა ისევ „ნაციონალური მოძრაობის“ სახეები და ისევ ეს თემა გაათამაშა!
ამიტომ თუ ვინმე ლაპარაკობს რევოლუციაზე, კონტრრევოლუციასა და არეულობაზე, ეს, მხოლოდ და მხოლოდ, დღევანდელ ხელისუფლებას აწყობს, რომ ინდულგენციასავით ჰქონდეს და ევროპასაც აჩვენოს, აი, მაგათ დემოკრატიული არჩევნები კი არა, არეულობა უნდათო.
ჩვენ ქუჩაში გასვლა, მუშტი-კრივი და რევოლუციები არ გვინდა! ეს გამორიცხულია და ამაში „ოცნებას“ არც ავყვებით!
_ აშშ-ის ერთ-ერთ ბოლო განცხადებაში, რომელიც საქართველოს ეხება, ნათქვამია, მომავალი წლის დასაწყისში გაირკვევა, ხელისუფლება არჩევნების ხარვეზებს როგორ გამოასწორებსო. ბატონო გიგლა, თეთრმა სახლმა, თქვენი აზრით, მომავალი წლის პირველ ნახევარზე რატომ დასვა მახვილი?
_ ზოგადად, ამერიკელებსა და ევროპელებს ვაი-ვიშის ძახილი არ ახასიათებთ. მათთვის მთავარია, უმრავლესობა რას ფიქრობს და გრძნობს.
სხვათა შორის, პირველ ტურში ეუთო-სა და სხვა საერთაშორისო მისიების დამკვირვებლებს შევხვდი და პირველი, რითიც ისინი გაოცებულები იყვნენ, დარღვევები კი არა, იცით, რა იყო?
_ რა?
_ პირდაპირ თქვეს, აქამდე რის გამოც თვალს ვხუჭავდით, ის იყო, რომ გვეგონა, საქართველოს მოსახლეობის 80-90%-იანი მხარდაჭერა ჰქონდა ბიძინა ივანიშვილს, მაგრამ ახლა დავინახეთ, რომ ასე არ არის და ეს ჩვენთვის ამოსავალი წერტილი ბევრ რამეში იქნებაო.
პროფესიონალი ვარ და ვიცი, ეს განცხადება რასაც ნიშნავს.
_ რას ნიშნავს?
_ ასე ცოტა ხანს კიდევ რომ გაგრძელდეს, ხელს დაუქნევენ და ეტყვიან, შენი დრო დამთავრდაო. როგორც მიშას უთხრეს, არ იხუნტრუცო, აღარავინ გეკითხება და დროა, წახვიდეო, ოღონდ მიშას ასე უთხრეს, ამას კი სხვანაირად ეტყვიან.
_ როგორ სხვანაირად?
_ შენი ანგარიშები დაიხურა და მორჩაო, ანუ ან ანგარიშები აირჩიე, ან ანგარიშების გარეშე თბილისში ყოფნაო. ძნელი მისახვედრი არ უნდა იყოს, ამ ორიდან რომელსაც აირჩევს.
ამ არჩევნებზე ეს ტენდენცია გამოჩნდა, რასაც „ოცნების“ ხალხი ვერ ხვდება.
_ ბატონო გიგლა, თუნდაც იმიტომ, რომ საკუთარი ანგარიშები დახურვას გადაარჩინოს, ივანიშვილი „ოცნებას“ ხომ არ გაწირავს და იტყვის, მე არაფერ შუაში ვარ, ყველაფერი გუნდის ბრალიაო?
_ რა თქმა უნდა, ასე იზამს. ჯერ ასე მწვავედ საკითხი არ დამდგარა, მაგრამ რა, ასე არ მოქცეულა? _ უცბად დაიბანა ხელები და ყველაფერი ღარიბაშვილს გადააბრალა, მერე ბიზნესგარიგებები _ კვირიკაშვილს.
„ქართული ოცნების“ წარმომადგენლებს გული სწყდებათ და მეხვეწებიან ხოლმე, ასე მწარედ რატომ გვაკრიტიკებო, მაგრამ „ქართული ოცნების“ სისუსტე და უუნარობა, პირველ რიგში, ვინ აღნიშნა?
_ ვინ?
_ ივანიშვილი ტელევიზიით გამოვიდა და ამაზე ილაპარაკა.
მოკლედ, გუნდს, რა თქმა უნდა, გაწირავს, მაგრამ გაწირვასაც თავისი დრო აქვს. არის გაწირვა, როცა გადარჩები, მაგრამ არის გაწირვა, როცა შენს შესაწირს აღარ ღებულობენ!
კიდევ ერთხელ ვამბობ: სალომე ზურაბიშვილს ვუსურვებ, რომ კარგი პრეზიდენტი იყოს და ეს მხოლოდ გამიხარდება, მაგრამ „ქართულმა ოცნებამ“ სახე დაკარგა და უმნიშვნელოვანეს საგარეო საკითხებს ვეღარც აკონტროლებს და ვეღარც აფიქსირებს. დაივიწყა სამაჩაბლოც, აფხაზეთიც და ახლა, როცა დე ფაქტო აფხაზეთის ე. წ. პრეზიდენტი გამოდის და ამბობს, 800 სირიელი ჩამოვასახლე და კიდევ ჩამოვასახლებო, ამათ ხმაც კი ვერ ამოიღეს!
კიდევ ერთი საკითხი: საკონსტიტუციო სასამართლო „ქართული ოცნებისგან“ თავიდან ბოლომდე კონტროლდება _ ჯერ იყო და, პლანი შემოგვტენა, მერე _ მიწების გაყიდვა და ახლა მიწების გაყიდვაზე მორატორიუმი მოხსნა. აი, ეს არის „ქართული ოცნების“ სახე.
_ ე. ი., „ოცნების“ საარჩევნო დაპირებები ისევ დაპირებებად დარჩება?
_ დიახ, ვერ შეასრულებს იმიტომ, რომ არ იცის, როგორ უნდა შეასრულოს! არ ვამბობ, რომ ხალხი მიეყიდა, მაგრამ „ოცნებას“ მოსყიდვის მცდელობა მუდმივად ექნება. საერთოდ, ასეა _ როცა ბევრი ფული გაქვს და ვერაფერს აკეთებ, ცუდ სიტუაციაში მზად ხარ, ჯანდაბას, გადაიხადო და მერე ათმაგად ამოიღო, მაგრამ „ოცნებაში“ საქმის გამკეთებელი არ ჰყავთ და არაადეკვატურები არიან!

გიორგი აბაშიძე