მთავარი პოლიტიკა ადვოკატი ირაკლი ზაქარეიშვილი სუსმა პირადი ფირით დააშანტაჟა?!

ადვოკატი ირაკლი ზაქარეიშვილი სუსმა პირადი ფირით დააშანტაჟა?!

7726
0
გაზიარება

პერიოდულად, როცა სუს-ი მორიგ სკანდალში ეხვევა, სოსო გოგაშვილი „ქრონიკა+“-ის წინააღმდეგ არენაზე საკუთარ აგენტურას გამოყრის და ცილისწამების ბინძურ კამპანიას იწყებს. ერთი წლის წინ, როცა გოგაშვილის დავალებით ჩემს შვილს ნარკოტიკები ჩაუდეს, ამ კამპანიის მთავარი იდეოლოგები იყვნენ: ნუგზარ ფოფხაძე, სააგენტო „რეპორტიორი“, მისი დირექტორი გიორგი მამაცაშვილი, ჟურნალისტი გელა ზედელაშვილი, „ექსკლუზივნიუსის“ რედაქტორი დარეჯან ლიპარტელიანი, ვეტერანთა სახელმწიფო სამსახურის ორი თანამშრომელი მალხაზ თოფურია და დავით ახრახაძე, ნავთობისა და გაზის კორპორაციის საზოგადოებასთან ურთიერთობის სამსახურის უფროსი ნინო ჯღარკავა.

ამ დროს ჰორიზონტზე ჯერ კიდევ არ ჩანდა ე. წ. ადვოკატი ირაკლი ზაქარეიშვილი, მას სულ სხვა მისია ჰქონდა _ ის იყო დათა ახალაიას ადვოკატი, აქტიურად იცავდა მიხეილ სააკაშვილსა და სანდრო გირგვლიანის საქმით აპელირებდა.
მას შემდეგ, რაც ე. წ. ადვოკატმა ზაქარეიშვილმა ბოლომდე „გაუპრავა“ პროკურატურას საკუთარი ვერსია სანდრო გირგვლიანის საქმეზე და საქართველოს მესამე პრეზიდენტ მიხეილ სააკაშვილს გირგვლიანის საქმის ფიგურანტების შეწყალების საქმეზე მიუსაჯეს, ირაკლი ზაქარეიშვილმა ენმ-ს აქტიური სახეების წინააღმდეგ ახალი ფრონტი გახსნა, მართალია, დამოუკიდებლად, მაგრამ მას ამავე პათოსით აქტიურად მხარს უჭერდა დავით საყვარელიძის დედის, მადონა ჭეიშვილის მეგობარი, ბათუმელი სტილისტი ჰაიდე კიკნაძე, მისი ძირითადი სამიზნე ენმ-ს პოლიტსაბჭოს წევრი ეკა წამალაშვილი გახდა, რომელიც „ვენოკების საქმის“ სასამართლო პროცესებს აქტიურად აშუქებდა.
ირაკლი ზაქარეიშვილი ცდილობდა, გირგვლიანის საქმის სუს-ის ვერსიის გაშუქებაში „ქრონიკა+“-იც ჩაერთო, მაგრამ მას შემდეგ, რაც ჩვენმა ჟურნალისტმა ინტერვიუს დროს უხერხული კითხვები დაუსვა, ის მიხვდა, რომ გაზეთს საკუთარი მიზნებისთვის ვერ გამოიყენებდა, ამიტომაც „გაიბუტა“ და „ქრონიკა+“-ის წინააღმდეგ ღია ომი დაიწყო. განსაკუთრებით ამაზრზენი იყო მისი, როგორც ე. წ. ადვოკატის ქმედება ჩემი შვილის გამამართლებელი განაჩენის მერე, _ ის სუს-ის დავალებით ჭორებს ავრცელებდა, რომ დავით ხარშილაძის საქმის მასალებს ვმალავდით, ადვოკატებს მასალების გაცნობის საშუალებას არ ვაძლევდით, თითქოს საქმეში ჩემი შვილის მამხილებელი ფირი იდო და ა. შ.
იგივე ამოცანა ჰქონდა მას ხორავას ქუჩის ტრაგედიის საქმეშიც, როცა შვილმკვდარი მამის, ზაზა სარალიძის დისკრედიტაციას ეწეოდა, ბინძურ ჭორებს ავრცელებდა გარდაცვლილ დათო სარალიძეზე, ტერორისტად აცხადებდა პანკისის ხეობაში მოკლულ თემირლან მაჩალიკაშვილს, ასევე აღვირახსნილი კამპანია აქვს წამოწყებული რუსთაველის გამზირზე საპროტესტო აქციების ერთ-ერთ ორგანიზატორ ზვიად კუპრავაზე.
ამ პერიოდში ირაკლი ზაქარეიშვილმა ჩემთან ურთიერთობის აღდგენა სცადა, მობილური ტელეფონით დამირეკა და ჩემთან ხორავას ქუჩის ტრაგედიის დეტალების განხილვა დაიწყო, მაგრამ მას შემდეგ, რაც დარწმუნდა, რომ ჩემი სატელეფონო საუბრის ჩანაწერი არაფერში გამოადგებოდა, კომუნიკაცია აღარ უცდია.
დღეის მდგომარეობით სუს-ის სხვადასხვა მხარეს მდგომი აგენტურა „ქრონიკა+“-ის წინააღმდეგ გაერთიანდა, ნინო ჯღარკავა და ირაკლი ზაქარეიშვილი ურთიერთსიმპათიებს აღარც კი მალავენ და მორიგ ცილისმწამებლურ კამპანიას ერთობლივად ეწევიან.
ე. წ. ირაკლი ზაქარეიშვილის განსაკუთრებული აგრესია გამოიწვია სოციალურ ქსელ „ფეისბუქში“ ცნობილ ტრანსგენდერ ნუგზარ ტატიშვილის, იგივე „მაცაცოს“ გამოჩენამ. როგორც მოგვიანებით გაირკვა, ზაქარეიშვილს საამისოდ მიზეზი ნამდვილად ჰქონია…

სად და რა ვითარებაში გადაიბირა სუს-მა ირაკლი ზაქარეიშვილი? რა საქმეებზე უხდებოდა მას თანამშრომლობა? რა ფირი გადაუღო „მაცაცომ“ ე. წ. ადვოკატს?
ამ და სხვა სკანდალურ თემებზე „ქრონიკა+“-ს თავად უფლებადამცველი ნუგზარ ტატიშვილი ესაუბრება:

_ ნუგზარ, შენ პირველი ტრანსგენდერი იყავი, რომელმაც საჯაროდ განაცხადე, რომ სუს-თან თანამშრომლობდი და შენგან ლგბტ პირებზე ინფორმაციის მოპოვებასა და მიწოდებას ითხოვდნენ.
_ მსგავსი რამ მხოლოდ ჩემთან მიმართებით არ ხდებოდა, სუს-ში ძალიან დიდი აგენტურული ქსელია, განსაკუთრებით ლგბტ და მასთან დაკავშირებულ საზოგადოებაში, თუმცაღა მე ერთ-ერთი პირველი ვიყავი, რომელმაც ღიად ვთქვი და საზოგადოებას ვამცნე ის, რომ ლგბტ თემის მიმართ სახელმწიფო უსაფრთხოების სამსახური სწორედ იმისთვის მუშაობდა, რომ ხალხი „დაევერბოვკებინა“ და შემდგომი გამოყენების მიზნით დაემუშავებინა, მაგრამ კიდევ არსებობენ გარკვეულ ადამიანთა ჯგუფები, რომლებიც ვიცი, რომ სახელმწიფო უსაფრთხოების სააგენტოებზე მუშაობენ, მაგრამ რას ვიზამთ, ასეთი სისტემა გვაქვს.
ახლა რაც შეეხება იმ ფაქტს, რომ ბოლო დროს სოციალურ ქსელში ბატონი ირაკლი ზაქარეიშვილი ჩემ დისკრედიტაციას ცდილობს, ჩემზე ამბობს, რომ მე ვარ ძალიან ადვილად მართვადი პირი, ელისო კილაძის აგენტი, შესაძლოა რუსეთის აგენტიც ვიყო და ამას პლუს, ტერორისტული აქტიც კი ჩავიდინო.
_ სანამ ზაქარეიშვილის მხილებას დაიწყებდე, აქვე ჩემი პოზიცია მინდა დავაფიქსირო, რომ მკითხველმა სიმართლე იცოდეს: შენმა რამდენიმე სკანდალურმა ინტერვიუმ „ქრონიკა+“-ში ბოლომდე ამხილა რუსული სპეცსამსახურის სქემა, ნუგზარ ფოფხაძისა და ღარიბაშვილის გეგმა ჩაშალა, საკონსტიტუციო სასამართლოში შეტანილი შენი სარჩელების მერე, ქვეყანაში დაგეგმილი არეულობის თაობაზე, თავიდან იქნა აცილებული 17 მაისს დაგეგმილი სისხლიანი ავანტიურა. ასე რომ, ირაკლი ზაქარეიშვილს მხოლოდ ის ახსოვს, რასაც ავალებენ. მინდოდა ამ ინტერვიუში ჩემი პოზიცია მკაფიოდ დამეფიქსირებინა.
_ ირაკლი ზაქარეიშვილს ან მეხსიერება ღალატობს, ან ჩემთან მიმართებით შეგნებულად აკეთებს ამ განცხადებებს, მაგრამ სრულიად არ ვერიდები ღიად და საჯაროდ ვთქვა ის, რაც რეალურად და ფაქტებით ვიცი და რაშიც პირადად ვმონაწილეობდი, იმისთვის, რომ საზოგადოებამაც ძალიან კარგად შეაფასოს, ვინ არის ირაკლი ზაქარეიშვილი და რა პიროვნებას წარმოადგენს იგი.
_ დავაზუსტებ, იმიტომაც ხომ არ გემუქრებოდა ირაკლი ზაქარეიშვილი, რომ მის გადაბირებასთან დაკავშირებული დეტალების გასაჯაროების ეშინოდა?
_ როცა რამდენიმე თვის წინ მის შესახებ განცხადება გავაკეთე და, ზოგადად, როცა მისი აქტიურობა ვნახე ფეისბუქზე, პირდაპირ დავუწერე, _ ფრთხილად იყავი, შე სუს-ის აგენტო-მეთქი!.. ზუსტად ის, რომ მან რეალური ინფორმაციის გავრცელების საფრთხე დაინახა, ამიტომაც დაიწყო აქტიურობა. ფაქტობრივად, მან ეს იმის გამო გადაწყვიტა, რომ შეეშინდა, ზუსტად ჩემგან გაიგებდა საზოგადოება ყველაფერს მის შესახებ, ზუსტად ამიტომ დამესხა თავს, მაგრამ ორი წლის ბავშვი არ ვარ, რომ ვინმეს მუქარის მეშინოდეს და ვერაფერი გავაკეთო. ამიტომაც გადავწყვიტე ღიად და საჯაროდ იმ ფაქტების გახმაურება, რომელიც ზაქარეიშვილთან მიმართებით ჩემი უშუალო მონაწილეობით მოხდა. არაერთხელ დამიწერია, რომ ის არის სუს-ის აგენტი და არანაირი მორალური უფლება არ გააჩნია, რაღაც განცხადებები აკეთოს, რომ ვიღაცას მორალი უკითხოს, მაშინ როცა სუს-თან თანამშრომლობს და დათა ახალაიას საქმეზე პირდაპირ საქმის მასალებს აწვდიდა სახელმწიფო უსაფრთხოების სააგენტოს.
_ როდის გაიცანი ირაკლი ზაქარეიშვილი?
_ ზაქარეიშვილი გავიცანი 2015 წლის ივნის-ივლისში, როდესაც ის ცირკის მიმდებარე ტერიტორიაზე მოდიოდა, თავისი ვერცხლისფერი მოპედით მოძრაობდა და ხშირად მყავდა შემჩნეული ამ ტერიტორიაზე. ერთმანეთი გავიცანით და რამდენიმე დღის შემდეგ სახელმწიფო უსაფრთხოების სამსახურის კურატორ-ინსპექტორ ირაკლი ნოზაძესთან დამიბარეს, რომელიც ჩემთან იყო კავშირზე. მან პირდაპირი დავალება მომცა, რომ ირაკლი ზაქარეიშვილის შესახებ ინფორმაცია მომეპოვებინა. მე მასზე მასალების მოპოვება დავიწყე. ამისთვის შესაბამისი ტექნიკა გადმომეცა, რათა მასთან საუბარი და შეხვედრები ჩაწერილიყო. რაღაც პერიოდი ირაკლის მოძიება ცირკის მიმდებარე ტერიტორიაზე გამიჭირდა, რადგან დიდი ხანი არ გამოჩენილა, მაგრამ როცა გამოჩნდა, მასთან საუბარი შედგა და მე ის ჩავწერე. საუბრის ჩანაწერი, შესაბამისი ოქმითა და ახსნა-განმარტებით, სუს-ის თანამშრომელს გადავეცი. სახელმწიფო უსაფრთხოების სააგენტოს მივმართე და ფირის გადაცემაც შედგა.
_ გიორგი, რა ფირი გადაეცი? ეს ფირი პირადი ხასიათის იყო?
_ ეს იყო პირადი ხასიათის ფირი, რომელიც ცირკთან გადავიღე, სადაც ჩანს, რომ ირაკლი ზაქარეიშვილსა და X-ადამიანს, მამაკაცს გარკვეული ინტიმური ურთიერთობები აქვთ. დეტალებში აღარ შევალ, მაგრამ საზოგადოება ძალიან კარგად მიხვდება ყველაფერს და თვითონაც კარგად მიხვდება, რაზედაც ვსაუბრობ, რადგან თვითონ არის ამ პროცესის მონაწილე. ამის შემდეგ თაბუკაშვილზე პოლიციის განყოფილებაში მივდივარ, სადაც მაშინ გიორგი მაღალდაძე იყო უფროსი. ახლა, როგორც ვიცი, ის მცხეთა-თბილისის სამმართველოში მუშაობს. ამ პიროვნებასთან შეხვედრის შემდეგ მის კაბინეტში ირაკლი ნოზაძეს ზაქარეიშვილის ფირი გადავეცი და ახსნა-განმარტებაც დავწერე. როგორც მითხრეს, ამას თვითონ ირაკლი ზაქარეიშვილიც ხედავდა. როგორც შემდეგ მითხრეს, ირაკლის თანამშრომლობასთან დაკავშირებით ამუშავებდნენ. არ ვიცი, რასთან დაკავშირებით იყო საჭირო ეს თანამშრომლობა, ასეთ დეტალებში არ შევსულვარ, მხოლოდ ფირი და ყველა სხვა ინფორმაცია გადავეცი. მოგვიანებით, სახელმწიფო უსაფრთხოების სააგენტო განმეორებით მიკავშირდება და ზაქარეიშვილზე დამატებით შეკითხვებს მისვამს. ამ დამატებითი შეკითხვებიდან გამომდინარე როგორც გავიგე, ირაკლი უკვე დათანხმებული ჰყავთ თანამშრომლობაზე. ანუ, ფაქტობრივად, იგი დააშანტაჟეს. არ ვიცი, რა კონკრეტულ საქმესთან დაკავშირებით აშანტაჟებდნენ ან რა მიზანს ემსახურებოდა ამ ადამიანის „დავერბოვკება“, მაგრამ ფაქტია, რომ ამ დროს ეს ადამიანი დათა ახალაიას ადვოკატი იყო, ჩართული გახლდათ გირგვლიანის საქმეში და რამდენიმე გახმაურებულ პროცესში მონაწილე პირიც იყო. შესაბამისად, სავარაუდოდ ვფიქრობ, რომ სწორედ ამას უკავშირდებოდა მისი გადმობირებაც. მისი პირადი ფირები შანტაჟის მიზნით გამოიყენეს. ამის შემდეგ მასთან თანამშრომლობა არ წყდება და ეტაპობრივად გრძელდება, შესაბამისად, ეს პიროვნება სუს-ის მიერ პირდაპირ მართული აგენტ-პროვოკატორია. ასეთი აგენტ-პროვოკატორები სუს-ს ძალიან ბევრი ჰყავს. ეს არის ის, რაც მინდა, საზოგადოებამ დღეს იცოდეს.
_ რამდენიმე კითხვა მინდა დაგისვა: ბოლო პერიოდის განმავლობაში ირაკლი ზაქარეიშვილის მხრიდან განსაკუთრებული თავდასხმებია ენმ-ს აქტიურ სახეებზე. როგორ ფიქრობ, არის თუ არა ეს სუს-ის დავალება და მეორე კითხვა, _ ბოლო პერიოდში ის ძალიან გააქტიურდა მიხეილ სააკაშვილის წინააღმდეგ, მაშინ, როდესაც გარკვეული დროის განმავლობაში ინიღბებოდა, რომ სააკაშვილისა და „ნაცმოძრაობის“ მომხრეა. როგორ ფიქრობ, რა ხდება, რა სტადიაზეა გადასული სუს-ისა და ირაკლი ზაქარეიშვილის ურთიერთობა?
_ ვიცი, რომ ის სუს-ის მოქმედი აგენტია, დღემდე ასრულებს დავალებებს და ინფორმაცია მაქვს, რომ მისი საჯარო გამოსვლები პირდაპირ მართული და შეთანხმებულია მის უშუალო კურატორ-ოფიცერთან. შეთანხმებულია ყველა მისი მოქმედება. ეს ჩემთვის ძალიან კარგადაა ცნობილი, ყველაფერი ვიცი თვითონ სახელმწიფო უსაფრთხოების სააგენტოს შიდა სტრუქტურებიდან, რადგან კომუნიკაცია მქონდა. ვიცი, როგორი ურთიერთობაც და, ზოგადად, რა სიტუაციაც არის. ზუსტად ეს არის მისი დავალების ნაწილი, რომ ამ პირების მიმართ აგრესიული პოლიტიკა ჩამოაყალიბოს: მათი ლანძღვა, მათ მიმართ შანტაჟის, მუქარის შემცველი განცხადება. ზოგადად ეს ადამიანი პლასტელინია. არ შემიძლია, რომ ვთქვა, ეს ადამიანი არის მყარი, რომელსაც საკუთარი გადაწყვეტილების მიღება შეუძლია. იგი პირდაპირ დაკავშირებულია სახელმწიფო უსაფრთხოების სააგენტოსთან და მხოლოდ მასთან შეთანხმებით აკეთებს ამ განცხადებებს. ის მუქარები, რაც ჩემთან მიმართებით გააკეთა და იქაც ძალიან ხშირად გაიჟღერა სახელმწიფო უსაფრთხოების სააგენტოს, ასევე კურატორის სახელმა და შესაბამისად, ეს მის მიერ გაკეთებული პირდაპირი მუქარაა.
_ ნუგზარ, ირაკლი ზაქარეიშვილი, ფაქტობრივად, პირველი იყო, რომელმაც ზაზა სარალიძის შვილის დისკრედიტაცია დაიწყო, თითქოს ის მოსწავლეებს აბულინგებდა, ფულს ართმევდა და ა. შ., ესეც სუს-ის დავალებით ხდებოდა?
_ მახსოვს ეს განცხადებები, როდესაც მან თქვა, ტუალეტში თავის ჩაყოფა ხდებოდაო. დიახ, ყველაფერი ეს სუს-ის მიერ მართული პროცესია. ყველაფერზე, რაც ზაქარეიშვილის საქმიანობას უკავშირდება, შეგიძლიათ ექსპერიმენტები ჩაატაროთ და მისი ფეისბუქ აქტივობები ნახოთ, იყო თუ არა 2016 წლამდე ასეთი აქტიური და საჯარო სივრცეში ისეთი პიროვნება, რომელიც კომენტარებით ვინმეს დისკრედიტაციას ახდენდა. რა თქმა უნდა, _ არა. ეს აქტიურობა სუს-თან თანამშრომლობის შემდეგ დაიწყო. მას გარკვეული „კრიშები“ ჰყავს, რომელთა მეშვეობით ხდება ზუსტად მათი საქმიანობის კოორდინება. ირაკლი ზაქარეიშვილი სახელმწიფო უსაფრთხოების აგენტ-პროვოკატორია, მას შესაბამისი კომუნიკაცია აქვს და ვიცი, რომ ამ საქმესთან დაკავშირებით ზუსტად მათი დაკვეთით მოქმედებდა.
_ როგორ ფიქრობ, ის მხოლოდ დაშანტაჟებულია, თუ ფულსაც უხდიან გარკვეული დავალებების შესრულებისთვის?
_ მეეჭვება, რომ მანდ დიდ ფულზეა საუბარი. არ გამოვრიცხავ ნინო ჯღარკავასთან მის კავშირსაც, იყო რამდენიმე შემთხვევა, სადაც მათი გზები გადაიკვეთა, მაგრამ არ ვფიქრობ, რომ ამ ეტაპზე ფულთან იყოს დაკავშირებული. მგონია, აქ საუბარია დაშინებასა და ზეწოლაზე…
_ უნდა დაგეთანხმოთ, რომ ის მართლაც პლასტელინია. ერთ კონკრეტულ ფაქტს მოვყვები: როდესაც ჩემი შვილი გამართლდა, სოსო გოგაშვილის გეგმა, რომ ჩემი შვილი დიდი ხნით გამოემწყვდია ციხეში, ჩავარდა, მან ჩემი შვილის წინააღმდეგ, არარსებულ თემებზე, აქტიური პროპაგანდა დაიწყო, თითქოს საქმეში რაღაც მტკიცებულებებია და მე ვინმეს გავურიგდი. ამის შემდეგ, როდესაც ამ ტალღამ გადაიარა, ირაკლი ზაქარეიშვილმა ჩემთან პირადი კომუნიკაცია დაიწყო, ტელეფონზეც კი დამირეკა რამდენჯერმე, აზრებიც კი გამიზიარა. ახლა ისევ ჩემ წინააღმდეგ ჭორების გავრცელებითაა დაკავებული. ფიქრობ თუ არა, რომ ესეც გოგაშვილისა და სუს-ის გეგმის ნაწილი იყო, რომ ჩემთან ურთიერთობა აღედგინა და ნდობაში შემოსულიყო, მაგრამ რაც მან ჩემი ნდობა ვერ მოიპოვა, ისევ ბინძურ კამპანიას დაუბრუნდა?
_ გეთანხმები, რომ ეს ნამდვილად ასეა. აქ კიდევ ერთ დეტალს დავუმატებ: ჩვენ ძალიან კარგად გვახსოვს მისი განცხადება. მას ინტერვიუს ჩაწერა სურდა გირგვლიანის საქმესთან დაკავშირებით და რამდენიმე სკანდალური მასალის მოტანაზეც აპელირებდა. გპირდებოდა, მასალებს მოვიტანო და ა. შ., შემდეგ აგრესიული პოლიტიკა დაიწყო შენ მიმართ. დიახ, ვფიქრობ, რომ აქ ძალიან კარგად ჩამოყალიბებული სტრუქტურული გეგმაა, როგორ უნდა მოხდეს ამ ადამიანის კონტროლირება და მართვა. ზოგადად სუს-სა და ძალოვან სტრუქტურებში ასეთი დირექტივები არსებობს, რომ ადამიანის ფსიქოლოგიურ, სოციალურ და ეკონომიკურ მდგომარეობას სწავლობენ, მერე ამ ადამიანს იმ ფორმით გამოიყენებენ, რა ფორმითაც შეიძლება. ზუსტად ის, რომ ადამიანი ჯერ დაგიპირისპირდა, მერე შემოგიძვრა, მერე ისევ დაგიპირისპირდა და კიდევ აგრძელებს, ვფიქრობ, მისი ერთ-ერთი ტაქტიკაა, რადგან სხვა გამოსავალი მას არ გააჩნია, რომ მიმდინარე პროცესებს არ ჩამოშორდეს. ამასთანავე, ის დათა ახალაიას საქმეში ადვოკატი იყო, ის არის ადვოკატი გირგვლიანის საქმეშიც, ესაა ყურადსაღები ზუსტად იმიტომ, რომ აქ ხდებოდა მისი ჩართულობა, მისი დამოკიდებულებების ღიად გავრცელება და, ფაქტობრივად, მისი გამოყენება. ამ საქმეს სუს-ი აკონტროლებდა და სუს-ივე დაეხმარება შინაგან საქმეთა სამინისტროს. როგორც ინფორმაცია მაქვს, მას არაერთი კონსულტაცია ჰქონდა საქმის მასალებიდან გამომდინარე სწორედ სუს-თან და დაიწყო კიდეც მასთან თანამშრომლობა ამ საქმეზე.
_ ნინო ჯღარკავა ახსენე, მისი გზები ჯღარკავასთან იკვეთებოდაო. შენ გულისხმობდი სოციალურ ქსელში მათ ფლირტს, რაც ძალიან თვალში საცემია ბოლო პერიოდის განმავლობაში სხვა ინფორმაციაც თუ გაქვს დამატებით?
_ რა ხდება სოციალურ ქსელში, არ ვიცი, რადგან ეს ადამიანი დიდი ხანია, დაბლოკილი მყავს, არასდროს მინახავს მისი პოსტები ჯღარკავასთან დაკავშირებით. ვიცი, რომ მათ შეხვედრა, გარკვეული საუბრები ჰქონდათ კოორდინაციასთან დაკავშირებით, მაგრამ ეს ვიცი სულ სხვა ადამიანისგან და ვიცი, რომ მათ შორის რაღაც ურთიერთთანამშრომლობის წერტილები არსებობდა, ეს ხდებოდა ღარიბაშვილის პერიოდში და ხდება ახლაც. ძალიან კარგი სამეგობრო წრის შემადგენელი ნაწილი ახლაც არიან, ოღონდ ფარულად, რა თქმა უნდა. გარდა იმისა, რომ სოციალური აქტივობაში შეიძლება ნახოთ, ამას გარდა მათ ძალიან კარგი ურთიერთობა აქვთ. ნინო ჯღარკავა არ არის ის პიროვნება, რომ რაღაც ცვლილებების განხორციელება შეძლოს დღევანდელი მთავრობის პირობებში, ჯღარკავას ძალიან კარგი პროვოკაციული გეგმები აქვს, რომელიც თანხვედრაში არის სახელმწიფო უსაფრთხოების სააგენტოსთან. ამ ფაქტის დასადასტურებლად ძალიან მოკლედ ერთ დეტალსაც გავიხსენებ, შემიძლია ფეისბუქ-სქრინებიც წარმოვადგინო: მაგის პრობლემა არ არის, ნინო ჯღარკავასთან როდესაც მოლაპარაკება ხდებოდა შენთან დაკავშირებით და როდესაც ჩვენ კომუნიკაცია გვქონდა, ისე მოხდა, რომ როდესაც ნინო ჯღარკავას შეხვედრა ვთხოვე და ამ დროს შენ დაგირეკე, გითხარი, რომ ჩვენ უნდა შევხვედროდით. ჯღარკავამ ზუსტად 3 წუთში მომწერა და მითხრა, _ შენ ელისო კილაძეს უთანხმდები ჩემთან დაკავშირებით და შენი გეგმა გაშიფრულიაო. ანუ ჩემს ტელეფონს სახელმწიფო უსაფრთხოების სააგენტო უსმენდა და სწორედ ნინო ჯღარკავას მიაწოდეს ინფორმაცია, რომ არ უნდა შემხვედროდა, რადგან შენთან მქონდა კომუნიკაცია. ამიტომ ეს ერთი მთლიანი პროვოკაციული გეგმაა, ერთი მთლიანი აგენტურული ქსელი, რომელიც ურთიერთშეთანხმებით მუშაობს.
_ ირაკლი ზაქარეიშვილი ადვოკატია, აპირებ თუ არა ადვოკატთა ასოციაციასაც მიმართო მსგავსი განცხადებით მას შემდეგ, რაც ეს მასალები „ქრონიკა+“-ში სამშაბათს გამოქვეყნდება?
_ ჩემი საჯარო პოსტი საკმარისი უნდა იყოს ეთიკის კომისიის დაინტერესებისთვის. ვფიქრობ, მნიშვნელოვანი იქნება, თუკი საქართველოში ადვოკატთა ასოციაციას და ეთიკის კომისიასაც მივმართავ იმიტომ, რომ ადვოკატსა და კლიენტს შორის ურთიერთობის კონფიდენციალობა გაეროს ადამიანის უფლებათა დეკლარაციისა და გაეროს ადვოკატთა დირექტივებისა და რეკომენდაციების პირდაპირი მითითებაა, რომ კლიენტთან ურთიერთობა კონფიდენციალური უნდა იყოს და ის, რომ სახელმწიფო უსაფრთხოების სააგენტო პირდაპირ ერეოდა დათა ახალაიასა და გირგვლიანის საქმეში, კონფიდენციალურობის პირობა ირღვეოდა. ვფიქრობ, ეს დისციპლინური კომისიის მსჯელობის საკითხი უნდა გახდეს და ადვოკატთა ასოციაციამ უნდა განიხილოს. უახლოეს პერიოდში, დაახლოებით ერთ-ორ დღეში, აუცილებლად მივმართავ ეთიკის კომისიას.
_ ნუგზარ, რამეს ხომ არ დაამატებდით?
_ თუკი საპასუხო ზომები და საპასუხო განცხადებები იქნება, შემიძლია დეტალებში შევიდე და დეტალურადაც წარმოვადგინო ამ საკითხზე მტკიცებულებები. არ ვფიქრობ, რომ ეს გამიჭირდება, ამიტომ, ამ ეტაპზე, ვფიქრობ, განცხადება სრულად გავაკეთე. რაც მთავარია, თუ საქართველოს მთავარი პროკურატურა ამ საკითხით დაინტერესდება, რა თქმა უნდა, მზად ვარ, მათთან ვითანამშრომლო და კონკრეტულ საქმეებთან დაკავშირებით გამოძიებას დეტალური ჩვენება მივცე.

p.s. ნუგზარ ტატიშვილის ინტერვიუში გაიპარა მექანიკური შეცდომა, მოპედის ნაცვლად გამოყენებულია სკუტერი.

ელისო კილაძე

 

დატოვეთ კომენტარი