ირაკლი ღლონტი: „ივანიშვილი გარემოცვის კი არა, კრემლის მძევალია!..“

„რეფორმატორების“ ლიდერმა ირაკლი ღლონტმა კარგა ხანია, სატელევიზიო დებატებში სათქმელის ხისტად და პირდაპირ თქმით და ამით გამოწვეული სკანდალებით დაგვამახსოვრა თავი. ამის გარდა, ეს ახალგაზრდა პოლიტიკოსი სხვადასხვა თემაზე აქტიურობით, მათ შორის, „რუსთავი 2“-თან დაკავშირებული ბატალიების დროს, კომპანიის უპირობო მხარდაჭერითაცაა ცნობილი.

მასთან საუბარი სწორედ სატელევიზიო დებატებში გამოხატული პოზიციით დავიწყეთ.

 

ირაკლი ღლონტი:

_ ირაკლი, თქვენი სიტყვებია: „ივანიშვილმა ინსტიტუციები შეჭამა“. რას გულისხმობდით? ამას მიზანმიმართულად აკეთებს, თუ გარემოცვის მძევალია?

_ დიახ, ეს ერთ-ერთ სატელევიზიო არხზე დებატების დროს მას შემდეგ ვთქვი, რაც ხელისუფლების სატელიტი მიმტკიცებდა, რომ ივანიშვილი არაფერ შუაშია პოლიტიკასთან და სახლში მშვიდად ჭამს მაწონს. სრული აბსურდი და თვალთმაქცობაა იმის მტკიცება, რომ ივანიშვილი გამიჯნულია პოლიტიკისგან.

მე არ ვიცი, მაწონს ჭამს თუ სტაფილოს წვენით ივსებს ეს კაცი კალორიებს, მაგრამ ის დანამდვილებით ვიცი, რომ მატყუარაა და რამდენადაც აცნობიერებს მისგან მოტყუებული ხალხისგან ადეკვატურ რეაგირებას, ცდილობს, ყველა კონსტიტუციური ორგანოს მიმართ განახორციელოს შტურმი და ყველა ინსტიტუცია ჰყავდეს მონურ მორჩილებაში.

ივანიშვილი არ არის გარემოცვის მძევალი, იგი კრემლის მძევალია და აქ არ შემიძლია არ გავიხსენო მისი სიტყვები, როგორ ამბობდა, რომ პუტინი არ არის მტერი. მისი სიტყვების ციტირებას მოვახდენ: ,,მე არ მგონია და ვერ ვიჯერებ, რომ რუსეთის სტრატეგია არის მეზობელი ქვეყნების ტერიტორიების დაპყრობა და ოკუპაცია, მე ამის არ მჯერა“.

დიახ, ეს არის ბიძინა ივანიშვილის სიტყვები და გული მწყდება, რომ უფრო მეტად არ დავაკვირდით და დროზე არ შევაფასეთ იგი, როგორც მორიგი რუსული საფრთხე. რაც შეეხება შეკითხვას, არის თუ არა იგი მისი გარემოცვის მძევალი, ასე არ ვფიქრობ.

მას რომ სურვილი ჰქონოდა, ის დაპირებები პრაქტიკულად შეესრულებინა, რაც ქართველ ხალხს 2012 წელს დაჰპირდა, თავზე არ დაგვასვამდა მაფიოზებს და დილეტანტებს მისი ფონდიდან, რომლებიც ძალ-ღონეს არ იშურებენ ქართული სახელმწიფოს ინსტიტუციური ნგრევისთვის. რამდენიმე დღის წინ ვთქვი და აქაც გავიმეორებ: ბიძინა ივანიშვილი არ არის პოლიტიკური ლიდერი, იგი კონფორმისტია და როგორც კი იგრძნობს, რომ გათითოკაცებული ხალხი კვლავ ვერთიანდებით, ვაჭრობას დაიწყებს და დარწმუნებული ვარ, თუ მას ხელშეუხებლობის გარანტიას მივცემთ, დაუყოვნებლივ დაგვიბრუნებს ხალხს ძალაუფლებას და თვითონვე დაშლის და მოსპობს მის მართვაში არსებულ ხელისუფლებას…

_ დიდი ხმაური ატყდა ოთარ ფარცხალაძის პიროვნების ირგვლივ, ვგულისხმობ როგორც თორდიასთან სკანდალს, ასევე მიწის ნაკვეთთან დაკავშირებულ პროცესებს, რამაც ის მილიონერი გახადა. რით ახსნით ფარცხალაძის პიროვნების ასეთ გავლენიანობას?

_ ასეა, ამ საქმის ირგვლივ რაც ვიხილეთ, კიდევ ერთი ნიშანია იმისა, რომ სახელმწიფოდ ვერ შევდექით: დაუსჯელობის სინდრომია, შერჩევითი სამართალია და მაფიოზური გადაწყვეტილებების ზეგავლენის ქვეშ ვართ.

საერთოდ არ მაინტერესებს ლაშა თორდიას პიროვნება, მისი პროფესიული ან პოლიტიკური საქმიანობა, იგი დღეს საქართველოს მთავარი აუდიტორია და როცა მას ყოფილი მთავარი პროკურორი საჯაროდ სცემს და იგი დღემდე დაუსჯელია, ეს ჩემთვის უდიდეს თავგასულობას ნიშნავს.

დღეს ფარცხალაძეს არც არავინ დასჯის, იგი კანონზე მაღლა დგას, იმდენად მნიშვნელოვან ფუნქციას ასრულებს ხელისუფლებისთვის, რომ არ მისცემენ პასუხისგებაში და ბოლომდე გამოიყენებენ შავი საქმეების გასაკეთებლად, მით უმეტეს, აწი. ამ საქმის შემდეგ უფრო და უფრო კომპრომეტირებულია და ვალდებულებები გაეზარდა მაფიოზურ-კლანური სისტემის მიმართ.

ამ ტიპის ადამიანები, სამწუხაროდ, ყველა იმ ქვეყანაში არიან, სადაც დემოკრატია ფასადურია და სამართალი და მართლმსაჯულება კრიზისშია, განსაკუთრებით კი მათ ხშირად ვხვდებით საქართველოში. ამ ტიპის ადამიანებში ვგულისხმობ ზომაზე მეტად თავგასულ პერსონებს, რომლებისთვისაც არ არსებობს კანონი, არიან შავი საქმის უბადლო შემსრულებლები და ნებისმიერ უკანონო დირექტივას უპირობოდ ასრულებენ.

სამაგიეროდ, ამ ტიპის ადამიანები გარკვეული დროის მანძილზე ყოველთვის სარგებლობენ პრივილეგიებით, მათ უკან დგას ხელისუფლება, ძალოვანი უწყებები და რამდენადაც ტრაგედია არ უნდა იყოს, კორუმპირებული მოსამართლეები.

აბა, დაფიქრდით, რომ არა საჯარო პირი, აუდიტორი თორდია, გავიგებდით კი ამ დანაშაულის ჩადენის ფაქტს? რა თქმა უნდა, ვერ გავიგებდით, ისე როგორც არ ვიცით, რამდენ დანაშაულს სჩადიან ყოველდღიურად.

_ გია ხუხაშვილმა, რომელიც ივანიშვილთან საკმაოდ დაახლოებული პირია (თუ იყო) თქვა, რომ ფარცხალაძეს ეს ხელისუფლება ივანიშვილის გარეშე ვერ მოერევა. რას იზამს, თქვენი აზრით, ივანიშვილი, ვის სასარგებლოდ გადაწყვეტს ამ დავას?

_ ფარცხალაძის საქმე უკვე არის ამ ხელისუფლების ერთ-ერთი დიდი „შავი ლაქა“ და ამ ლაქის ჩამორეცხვა გამორიცხულია. ამ საქმემ ჩვენს საზოგადოებას თვალი აუხილა, რადგან ამ თავხედური და ბრიყვული ქმედებებით გვაჩვენა, ვისთან გვაქვს საქმე ხალხს.

ფარცხალაძე, ეს არის სახე, ანარეკლი ამ ხელისუფლების მთელი პოლიტიკის, მისი საზოგადოებისადმი დამოკიდებულების. გია ხუხაშვილი გონიერი კაცია, ის ამას ტყუილად არ ამბობს, რადგან აცნობიერებს ამ პერსონის მიმართ არსებულ ინტერესს იგივე ივანიშვილის მხრიდან და ზუსტად იცის, რომ, სამწუხაროდ, ასეთი ტიპის ადამიანებზე დგას ჩვენი ხელისუფლება და მისი ბატონ-პატრონი.

ჩვენს ხელისუფლებას სჭირდება შავი საქმის შემსრულებელი, კომპრომეტირებული პერსონები, რომლებიც პირადი ინტერესების იქით ვერ ხედავენ ქვეყნის ინტერესებს, მათთვის სულ ერთია ზიანი და ზარალი, რომელსაც ჩვენს ხალხსა და ქვეყანას აყენებენ, მათთვის მთავარია ფული, ძალაუფლება და ხელშეუხებლობა.

ისე, მკითხველს მინდა ვთხოვო, ერთი წუთით მაინც დაფიქრდით, მთავარი აუდიტორი თქვენ რომ გეცემათ, ახლა სად იქნებოდით?..

_ საერთოდ, რამდენი ფარცხალაძეა მოსარევი და მოსაშორებელი, ვინმემ დაითვალა?

_ როცა „ქართული ოცნება“ხელისუფლებაში მოდიოდა, მაშინ  ვაცხადებდი, რომ ჩვენ მივიღებდით კორუმპირებულ-კლანურ სისტემებს, რომლის დემონტაჟი შემდეგ გართულდებოდა. ასეც მოხდა, ჩვენ მივიღეთ არაფორმალური და მაფიოზური მმართველობა და, შესაბამისად, ამ ტიპის „მენეჯმენტში“ ყოველთვის იარსებებს კანონგარეშე მოქმედი პერსონები, რომლებიც ფიქრობენ, რომ სახელმწიფო თავად არიან და კანონი რომ სხვა ადამიანებისთვის არის შექმნილი.

ვინც საკუთარ თავს კანონზე მაღლა აყენებს, უნდა მოშორდეს, მათი ადგილი ციხეშია. ამ ხალხის მოშორება ქართულმა საზოგადოებამ უნდა დავიწყოთ #1 მოქალაქედ წოდებული, მაფიოზური „კომპანიის“ დირექტორით.

თქვენ წარმოიდგინეთ, რამხელა საფრთხეა, როცა მაფიოზების ხელშია ყველა კონსტიტუციური ორგანო, სპეცსამსახურები, პარლამენტი, მთავრობა და არაფერს აღარ ვამბობ კორუმპირებულ მოსამართლეებზე, რომლებიც დასჯისა და სამოსამართლეო საქმიანობის ჩამოშორების ნაცვლად წაახალისეს და მთელ სასამართლო კორპუსზე მისცეს ზეგავლენის განხორციელების უფლება.

_ სტრატეგია, რომელიც ივანიშვილმა აირჩია _ არსად ჩანს, კომენტარს არ აკეთებს, თითქოს პროცესებს ჩამოშორდა _ რა არის ეს?

_ ვისთვის სტრატეგიაა და ვისთვის ჩვეულებრივი უპასუხისმგებლობა საკუთარი ხალხის მიმართ. მე არ ვფიქრობ, რომ ბიძინა ივანიშვილი სტრატეგია, უბრალოდ, იგი კარგად ფლობს კანონგარეშე მართვის სტილს და ამ გზით მოქმედებს.

არ ვიცი, ვინ მოატყუა, ან როგორ იტყუებს თავს, მაგრამ საქართველოს მოსახლეობის უმრავლესობა, ანუ ის ადამიანები, რომლებიც მან ვერ დაახარბა და ვერ იყიდა, ყველა ვაცნობიერებთ, რომ სახლიდან მართავს ხელისუფლებას, ანუ ყველა ინსტიტუციას და ყველა მაღალჩინოსანი მისი მარიონეტია.

თუ ის ფიქრობს, რომ გარკვეული დროის შემდეგ გამოჩნდება თავისი „სიბრძნისმფრქვეველი“ ლექსიკონით და ისევ შეძლებს ჩვენი ხალხის გაბითურებას, მინდა ვუთხრა, რომ ძალიან ცდება, _ მას მოუწევს პასუხის გაცემა ყველა შეუსრულებელ დაპირებაზე, ყველა იმ უკანონობაზე, თავგასულობასა და უძრაობაზე, რომელიც მისი ხელისუფლების პირობებში ჩვენი საზოგადოებისა და ოჯახების პრობლემად იქცა.

თქვენ ამბობთ, არსად ჩანსო, მე მინდა, იქით გკითხოთ: ახლა რაში სჭირდება მას სადმე გამოჩენა? ყველა მაღალჩინოსნის განცხადებისა და პოზიციის უკან დგას და ერთი სიტყვის თავისუფლად გამოხატვის უფლება და გამბედაობაც არ აქვს არც ერთ ჩინოვნიკს, ვსაუბრობ დეპუტატებზე და მინისტრებზე. ასე რომ, ჩანს, ვხედავთ, გვესმის და შევცვლით კიდეც.

_ მიხვდა, რომ მის ლაპარაკს დუმილი სჯობს, თუ რა მოხდა?..

_ მირჩევნია, ამ კითხვას იუმორისტულად ვუპასუხო: რამდენჯერაც არ მოვისმინე მისი გამოსვლა, იმდენჯერ საკუთარ თავზე მომერია ბრაზი, რომ ამ კაცის ოპოზიციაში ვართ ამდენი წელია და იგი მაინც კომფორტის ზონაშია.

მისი საუბარი, მისი ხედვები კიდევ უფრო მარწმუნებს ფართოდ გავრცელებულ სკანდალურ ამბავს, რომ მან ბიზნესის შენება და კაპიტალის დაგროვება არა საკუთარი უნარებით, არამედ სხვა ძალების მხარდაჭერით შეძლო.

დიდ პატივს ვცემ განათლებას, ცოდნას და ვაფასებ პროფესიონალიზმს, ამ კაცში ვერ დავინახე ცოდნა და უნარები, მე ამ კაცში ვხედავ დიდ საფრთხეს ჩვენი სახელმწიფოსთვის.

_ საკონსტიტუციო ცვლილებების განხილვაზე რას გვეტყვით?

_ უკაცრავად, სადმე ნახეთ განხილვა? მე ვერსად ვნახე საერთო-სახალხო განხილვა, სამაგიეროდ, ვნახე პარლამენტის თავმჯდომარის, ფრაქციის თავმჯდომარისა და რამდენიმე პოლიტიკური ორგანიზაციის ჩართულობით გამართული კომუნისტური ტიპის თავყრილობები, სადაც შეკრებილი ჰყავთ ადგილობრივი თვითმმართველობის წარმომადგენლები, გამგეობის, გუბერნიის თანამშრომლები და „ქართული ოცნების“ აქტივისტები.

ამ თემაზე ჩვენ, 15-მდე პოლიტიკურმა პარტიამ, საზოგადოებრივმა ორგანიზაციებმა და მოქალაქეებმა შევქმენით სამოქალაქო მოძრაობა „დაიცავი კონსტიტუცია“, ყოველდღიურ რეჟიმში გვაქვს აქტივობები და თუ ვინმეს აინტერესებს, როგორია განხილვა და მსჯელობა, ჩვენ მიერ ორგანიზებულ შეხვედრებს უნდა დაესწროს ჩვენს თანამოქალაქეებთან, დიპლომატიურ კორპუსთან და არასამთავრობო სექტორთან.

განხილვად შევაფასებდი ამ თავყრილობებს, თუ იქ მე ვნახავდი თავისუფალ მოქალაქეებს, რომლებიც პარტიულ ინტერესებსა და დირექტივებზე წინ აყენებენ ქვეყნის აწმყოსა და მომავალს.

რომელ განხილვაზეა საუბარი, მოსახლეობის უმრავლესობა ამბობს, რომ უნდა ჰქონდეთ პრეზიდენტის არჩევის უფლება და ამას არ ითვალისწინებს ხელისუფლება; რომელ მსჯელობაზეა საუბარი, როცა ბლოკისა და კოალიციის სახით ხელისუფლებაში მოსული პარტია ახლა აცხადებს, რომ ბლოკის გარეშე უფრო განვითარდება პარტიები და ამიტომ კრძალავს ამის შესაძლებლობას.

ეს არც განხილვაა და არც მსჯელობა, ეს არის ძალადობა კონსტიტუციაზე, ძალადობა საკუთარ ხალხზე და ამის უკან დგას ვიწროპარტიულ ინტერესებს ამოფარებული შეშინებული  ხელისუფლება, რომელიც აცნობიერებს, რომ ავტორიტეტდაკარგული პოლიტიკური წარმონაქმნია და თუ არა ამ ტიპის ანტიდემოკრატიული ნაბიჯები, ის მალე დაასრულებს მართვას.

მათი ნება, რომ აქამდე დაჩეხილი კონსტიტუციის რეფორმა ყოფილიყო, მხარს დავუჭერდი, მაგრამ მათ ამ მიმართულებით არაფერი გაუკეთებიათ და გვთავაზობენ რედაქციას, რომელიც პირდაპირ მეტყველებს, რომ მოახდინონ ხელისუფლების უზურპაცია, მიიტაცონ ძალაუფლება და ერთადერთი კონსტიტუციური ორგანო, რომელიც ვერ დაიმორჩილეს, საუბარი მაქვს პრეზიდენტის ინსტიტუტზე, რომ იგი კონსტიტუციური ცვლილების გზით ხელში ჩაიგდონ.

_ რადგან ამ თემას შევეხეთ, მაინტერესებს, რას ფიქრობთ ინიციატივაზე, რომ პრეზიდენტი 300-მა ხმოსანმა აირჩიოს?

_ რომელ 300 ხმოსანზე ვსაუბრობთ, 150 ხმოსანი არ გვიზის პარლამენტში? 150 შეუზღუდავი ძალაუფლების მქონე ხმოსანი, რომელიც ერთ ხმაში მეტყველებს და არც ერთ მათგანს არ აქვს იმხელა გამბედაობა, რომ კომპრომისზე არ წავიდეს და ხალხის მხარეს დარჩეს.

იმ 300 ხმოსანს გვთავაზობს ხელისუფლება, რომელმაც მშობლიური ქალაქის ინტერესები ვერ დაიცვა და უაპელაციოდ შეასრულა ცენტრალური ხელისუფლების დირექტივა, დიახ, ამ ადამიანებს მოიაზრებს „ქართული ოცნება“ ხვალ 300 ხმოსანში, ვინც უნდა დაგვინიშნოს პრეზიდენტი.

როგორ გგონიათ, ამ 300 ხმოსნის ხმა ვის ინტერესებს მოემსახურება? რა თქმა უნდა, ტრადიციულად მმართველი ძალის წისქვილზე დაასხამს წყალს. ეს დაუშვებელია! ჩვენ კარგად ვიცით, როგორ იმართებიან წარმომადგენლები, როგორ ახდენს მასზე პოლიტიზებული ძალოვანი უწყებები ზეგავლენას, ამიტომ პრეზიდენტი უნდა ავირჩიოთ ჩვენ, ქართველმა ხალხმა მგოსნებისა და ხმოსნების გარეშე და ეს ასეც მოხდება, რადგან მე ზედმიწევნით კარგად ვიცი, საზოგადოებაში რა განწყობაც არის.

_ ირაკლი, თქვენ და თქვენი პარტია არაერთხელ გიხილა საზოგადოებამ სასამართლო ხელისუფლების მწვავე კრიტიკის მხარედ, რას ფიქრობთ სასამართლო სისტემაზე? მიგაჩნიათ, რომ რეფორმები უშედეგოა და ესეც მიზანმიმართული ქმედებაა ჩვენი ხელისუფლების მხრიდან?

_ დიახ, ასეა, ჩემთვის, როგორც პროფესიით იურისტისთვის, მტკივნეულია სასამართლოს მწვავე კრიტიკა, მაგრამ მოცემულ სიტუაციაში ვალდებულებად მაქვს, მიჩნეული ვიყო ერთ-ერთ ატქიურ კრიტიკოსად და მხილებლად იმ თავგასულობისა, რომელიც ჩვენი მართლმსაჯულების სისტემის სავიზიტო ბარათია.

საუბრობენ, რომ რეფორმები გატარდა სასამართლოს მიმართულებით, რასაც არ ვიზიარებ: თუ რეფორმის შედეგად არ მივიღეთ დარგის, ინსტიტუტის საქმიანობის გაჯანსაღება, კორუფციული მექანიზმების მინიმიზება, მაშინ მას მე ვერ ვუწოდებ რეფორმაგავლილ ინსტიტუციას. მეტიც: სასამართლო არათუ რეფორმაგავლილი, არამედ ხელიდან ხელში გადასული ინსტიტუციაა, რომელიც ისე, როგორც სხვა დანარჩენი კონსტიტუციური ორგანოები, ხელისუფლების მონურ მორჩილებაში იმყოფებიან.

საერთოდ, გამაღიზიანებელია იუსტიციის უმაღლესი საბჭოს ბოლოდროინდელი რიტორიკა, რომ დავიცვათ მოსამართლეთა პატივი და ღირსება და ამ მიმართულებით გეგმავენ პარლამენტში საკანონმდებლო ცვლილების განხორციელებას.

მე მინდა, ამ მაფიოზურ სისტემად ქცეულ საბჭოს ვუთხრა, რომ მათზე ასჯერ მეტად ვაცნობიერებთ, რომ მოსამართლის ღირსების დაცვა და პატივისცემა მნიშვნელოვანია, მაგრამ ჩვენ მათგან განსხვავებით ადამიანებს, რომლებიც კანონგარეშე, კორუფციული სქემის მონაწილეები არიან, ვერ ვუწოდებთ მოსამართლეს და არც პატივს ვცემთ მის ე. წ. ღირსებას.

მოსამართლემ თავისი საქმიანობით უნდა მოიპოვოს საზოგადოების პატივისცემა, როცა ისინი ხელისუფლების მზაკვრულ ინტერესებს ემსახურებიან, მათ ჩვენ არ მივცემთ უფლებას, კომფორტის ზონაში დარჩნენ, თუმცა ბევრი უღირსი და „ქართული ოცნებისგან“ განზრახ წახალისებული კორუმპირებული მოსამართლის გვერდით ვხედავთ ბევრ ღირსეულ მოსამართლეს და იმედი მაქვს, ისინი სწორად ხედავენ ჩვენს ბრძოლას და იდეურად მაინც ვართ პარტნიორები.

ერთადერთი კადრი, ვინც ყველაზე სრულყოფილად და პროფესიონალურად წარადგინა საქმეთა გადანაწილების ელექტრონული პროგრამა, ეს იყო თბილისის საქალაქო სასამართლოს ყოფილი თავმჯდომარე, მამუკა ახვლედიანი, რომელიც ცდილობდა, ამოქმედებულიყო ელექტრონულად გადანაწილების პროგრამა და იგი საერთოდ ჩამოაშორეს ამ სფეროს.

ამ პროგრამის ამოქმედება ნიშნავდა ინსტრუმენტის ფუნქციონირებას, რომელიც ხელისუფლებას ყველანაირ ბერკეტს წაართმევდა, რომ წინასწარ კომპრომეტირებულ მოსამართლეებს დასწეროდა საქმეები განსახილველად, შესაბამისად, მინიმუმამდე დავიდოდა პოლიტიზებული გადაწყვეტილებების რისკი. ალბათ, ადვილად ხვდებით, რომ ეს განზრახ არ გააკეთეს.

რომ არა ცივილიზებული სამყაროს მხარდაჭერა და სტრასბურგის მოსამართლის გონიერება, დღეს ჩვენ არ გვექნებოდა ტელეკომპანია „რუსთავი 2“, როგორც ხელისუფლებისგან უკონტროლო ოპოზიციური ტელეკომპანია. მას ურთმელიძე, ნაზღაიძე და სხვა კორუმპირებული მოსამართლეები ერთი ჩაქუჩის დარტყმით გაანადგურებდნენ.

სასამართლო სისტემა მოითხოვს რეფორმებს და უპირველ ყოვლისა კორუფციისა და კანონგარეშე საქმიანობის რისკების მინიმიზებას. აი, ამის შემდეგ დავიცავთ მოსამართლეთა ღირსებას და პატივს, მანამდე კი მათ მოსვენებას არ მისცემს ჩვენი საზოგადოება. ბიძინა ივანიშვილს და მის ხელისუფლებას არ სჭირდება თავისუფალი და რეფორმირებული სასამართლო, მათ სჭორდებათ ყმადქცეული მოსამართლეები, რომლებსაც ნებისმიერ კანონგარეშე დავალებას შეასრულებინებენ, სხვა შემთხვევაში, არ მესმის, როგორ მოხდა ის, რომ „ნაციონალური მოძრაობის“ დროინდელი პროკურორები დღეს მოგვევლინენ მოსამართლის რანგში, იგივე რუსთავის, გორის, მცხეთისა და ბათუმის სასამართლოს თავმჯდომარეებად განწესებული არიან ყოფილი პროკურორები და ადამიანები, რომლებიც პროკურატურას საჩივრით მიმართავენ წინა ხელისუფლების დროს ამ ადამიანების მიერ ჩადენილი დანაშაულის შესასწავლად. ე. ი. ამ მოსამართლეებმა უნდა განიხილონ?

საკმარისია მანანა კობახიძის სასამართლო სისტემაში ყოფნის ფაქტი საიმისოდ, რომ ადვილად დავინახოთ ხელისუფლების დამოკიდებულება ამ ინსტიტუციის მიმართ.

შეგახსენებთ: ეს ადამიანი მოსამართლედ გამწესებამდე ერთი წლით ადრე ბიძინა ივანიშვილს ილია ჭავჭავაძეს ადარებდა.

_ კარგი, თვითმმართველობაზე გადავიდეთ… თვითმმართველობის რეფორმა დაერქვა იმ პროცესს, რაც ახლა მიმდინარეობს, ადგილობრივი საკრებულოების მიერ თვითმმართველი ქალაქის სტატუსის გაუქმებას. ამაზე რას იტყვით?

_ ეს არ არის რეფორმა, ეს არის ადგილობრივი თვითმმართველობის დაკნინება და ძალადობა დეცენტრალიზაციის უმნიშვნელოვანეს პრინციპზე. ქალაქის სტატუსის გაუქმება და ეს აბსურდული გადაწყვეტილება ცენტრალურ ხელისუფლებაში ისევ იმ მიზეზის გამო მიიღეს, რომ უავტორიტეტო და გაკოტრებული ხელისუფლება აცნობიერებს ძალაუფლების დაკარგვის რეალურ საფრთხეს და ცდილობს, ყველა ორგანო კონტროლქვეშ ჰყავდეს.

ხელისუფლებას ეშინია, რომ ოპოზიცია მოუგებს გამგებლის, ან მერის არჩევნებს და შემდეგ გაუჭირდებათ ბალანსის დაცვა. სწორედ ამიტომ გადაწყვიტეს ამ ე. წ. რეფორმის ამოქმედება. ისინი ცრუობენ, როცა აცხადებენ, რომ ბიუჯეტის ფულის დაზოგვის მიზნით გადაწყვიტეს ეს ცვლილებები, ამ დროს მკითხველს მინდა განსჯისთვის მივმართო: როდესმე გინახავთ ხელისუფლებისგან ბიუჯეტის დაზოგვის მცდელობა?

მეტიც, ჩვენ ყოველდღიურად ვხედავთ თავგასულობას და ბიუჯეტის ფულის არამიზნობრივ ხარჯვას ჯიპებში, პრემია-დანამატებში, უსაგნო მივლინებებში და როგორ ფიქრობს ხელისუფლება, ამ ცრუ არგუმენტს ქართველი ხალხი მიიღებს და კვერს დაუკრავს? მგონი, არა, ჩვენ თავის სახელს დავარქმევთ ყველაფერს.

_ თქვენი აზრით, რამდენად მომწიფებულია ხალხი ხელისუფლების ცვლილებისთვის?

_ ეს თავად ხალხის გადასაწყვეტია და მე ვერ მივცემ თავს უფლებას, ამაზე კომენტარი გავაკეთო, თუმცა მგონია, რომ თავად ხელისუფლებაა ძირგამომპალი და სასიცოცხლოდ მნიშვნელოვანია მისი ცვლილება.

ხელისუფლებამ ვერ შეასრულა მის მიერ გაცემული დაპირებების 20%-იც კი. სამაგიეროდ, საზოგადოებამ იხილა მაფიოზური კლანების თავხედობა, კრიმინალის მატება, ბიზნესის ლიკვიდაცია, ჯიპებსა და ხალხის ფულზე დახარბებული ფუქსავატი ჩინოვნიკების კეკლუცი, ინსტიტუციური ნგრევა და ა. შ.

საბოლოო ჯამში, მაინც მომიწია შეფასების გაკეთება: პირადად მე იშვიათად მხვდება სადმე თანამოქალაქე, რომელიც მხარს უჭერს „ქართულ ოცნებას“, მათ შორის, საჯარო სამსახურში დასაქმებული ადამიანები, რომლებიც ყველაზე  უკეთ აცნობიერებენ საფრთხეებს, რადგან თავად უწევთ დილეტანტი და ნეპოტიზმით დანიშნული ხელმძღვანელების ფუქსავატობის ყურება.

ვფიქრობ, რომ ხალხიც მზად არის ხელისუფლების ცვლილებისთვის, ხალხმა უნდა დავიბრუნოთ ძალაუფლება და იგი გადავცეთ ყველაზე კომპეტენტურებს, ქართული სახელმწიფოს წინაშე არსებული გამოწვევების საპასუხოდ.

_ რა მოხდება ადგილობრივ არჩევნებზე?

_ რაც მოხდა საპარლამენტო არჩევნების დროს, _ ვაჭრობა, აღებ-მიცემობა, არჩევნები ჩაატარა ცესკომ და სუს-მა ერთობლივად.

ხანდახან ვფიქრობ, რომ ადგილობრივ არჩევნებამდეც ვერ მივა ხელისუფლება, არ მინდა, მოვლენებს დავასწრო, მაგრამ ემიგრაციის იმედად დარჩენილი გაღარიბებული ხალხი ხვალ ან ზეგ რა გადაწყვეტილებას მიიღებს, ამაზე პასუხის გაცემა ახლა რთულია. არ გამოვრიცხავ, რომ ხალხი ქუჩაში გამოვა. ეს იქნება ყველაზე სწორი და ღირსეული საქციელი.

_ რას აპირებთ? მახსოვს, წერდით, თუ რესურსი მოვიძიე, კარდაკარ სიარულს ვაპირებ და ხალხთან შეხვედრებსო…

_ მედია პოლიტიზებულია და ჩვენ, „რეფორმატორებს“, ვერ მიგვაქვს ჩვენი სათქმელი ფართო საზოგადოებამდე, ახლა მთელი მონდომებით ვცდილობთ გამოვნახოთ ფინანსური სახსრები, რომ ახალი მოძრაობის ფორმირება დავიწყოთ, რომელიც ტელევიზიის ეთერებიდან კი არა, პირისპირ დაელაპარაკება ხალხს.

დღეს მედია და ფინანსები, ორივე მნიშვნელოვანი ბერკეტი გადანაწილებულია, რთულია ამ რესურსის მოძიება, მაგრამ ადვილია ხმამაღლა საუბარი, როცა მართალი ხარ და დარწმუნებული ვარ, ხვალ-ზეგ მე და ჩემი თანამებრძოლები უფრო ახლოს მივალთ ხალხთან და მათთან ერთად შევქმნით პროცესს, რომელიც მალე დაასრულებს ამ უძრაობას.

ვაპირებ ქალაქ-ქალაქ, ღობე-ყორე სიარულს და საკუთარ ხალხთან უშუალო კომუნიკაციას, ამ გზაზე ჩვენ გვჭირდება მხარდაჭერა. იმედი მაქვს, შევძლებთ ამ რესურსის გამონახვას.

_ ოპოზიციური პარტიების ერთობლივი განცხადებები გახშირდა. ადრე იყო არჩევნების გაყალბებაზე 2016 წელს, ახლა საკონსტიტუციო ცვლილებებსა და თვითმმართველობის რეფორმაზე. რა არის საჭირო იმისთვის, რომ ოპოზიციური პოლიტიკური სპექტრი გაერთიანდეს?

_ მინდა, სრული პასუხისმგებლობით გითხრათ, რომ ყველაზე მეტად, რისაც ივანიშვილსა და მის ხელისუფლებას ეშინია, ეს არის ოპოზიციური ძალების გაერთიანება, ზოგადად, გათითოკაცებული ხალხის ერთიანობა.

ყველაფერს აკეთებენ, მათ შორის, არ იშურებენ ფინანსური და სხვა ბერკეტების გამონახვას საიმისოდ, რომ ოპოზიციურმა პარტიებმა არ გააკეთონ ალიანსი მათ წინააღმდეგ. ჩვენდა სამწუხაროდ, ბევრი უღირსი და უთავმოყვარეო ოპოზიციონერია.

ამ ეტაპზე მეტს ვერ გეტყვით, მაგრამ მოვა დრო, როცა საზოგადოება ყველაფერს გაიგებს, ვინ, როდის და ვისთან ათანხმებდა დღის წესრიგს, როცა ქართველი ხალხი მათგან მოქმედებებს მოითხოვდა. მოვა ეს დრო და მე ერთ-ერთი ინიციატორი და ავტორი ვიქნები ლუსტრაციისა, რომელიც მთელ საქართველოს გააცნობს პოლიტიკაში მყოფ თვითმარქვია პერსონებს.

 

ლაშა ბერულავა